໑. ວຈ຺ຉປາລຕ຺ເຖຣຄາຖາວຓ຺ຓນາ

ສຸສຸຂຸມນິປຸຓຕ຺ຖທສ຺ສິນາຕິ ອາຍສ຺ມໂຕ ວຈ຺ຉປາລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອາຈິນນ຺ໂຕ ເທວມນຸສ຺ເສສຸ ສໍສຣນ຺ໂຕ ອິໂຕ ເອກນວຸເຕ ກປ຺ເປ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ພ຺ຣາຫ຺ມຓສິປ຺ເປສຸ ນິປ຺ຜຕ຺ຕິໍ ຄນ຺ຕ຺ວາ ອຄ຺ຄິໍ ປຣິຈຣນ຺ໂຕ ເອກທິວສໍ ມຫຕິຍາ ກໍສປາຕິຍາ ປາຍາສໍ ອາທາຍ ທກ຺ຂິເຓຍ຺ຍໍ ປຣິເຍສນ຺ໂຕ ວິປສ຺ສິໍ ຠຄວນ຺ຕໍ ອາກາເສ ຈງ຺ກມນ຺ຕໍ ທິສ຺ວາ ອຈ຺ຉຣິຍພ຺ຠຸຕຈິຕ຺ຕຊາໂຕ ຠຄວນ຺ຕໍ ອຠິວາເທຕ຺ວາ ທາຕຸກາມຕໍ ທສ຺ເສສິ. ປຏິຄ຺ຄເຫສິ ຠຄວາ ອນຸກມ຺ປໍ ອຸປາທາຍ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ວິຠວສມ຺ປນ຺ນສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ວຈ຺ຉປາໂລຕິສ຺ສ ນາມໍ ອໂຫສິ. ໂສ ພິມ຺ພິສາຣສມາຄເມ ອຸຣຸເວລກສ຺ສປຕ຺ເຖເຣນ ອິທ຺ຘິປາຏິຫາຣິຍໍ ທສ຺ເສຕ຺ວາ ສຕ຺ຖຸ ປຣມນິປຈ຺ຈກາເຣ ກເຕ ຕໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສຕ຺ຕາຫປພ຺ພຊິໂຕ ເອວ ວິປສ຺ສນໍ ວຑ຺ເຒຕ຺ວາ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໓.໒໖-໓໔) –

‘‘ສຸວຓ຺ຓວຓ຺ໂຓ ສມ຺ພຸທ຺ໂຘ, ພາຕ຺ຕິໍສວຣລກ຺ຂໂຓ;

ປວນາ ອຠິນິກ຺ຂນ຺ໂຕ, ຠິກ຺ຂຸສງ຺ຆປຸຣກ຺ຂໂຕ.

‘‘ມຫຈ຺ຈາ ກໍສປາຕິຍາ, ວຑ຺ເຒຕ຺ວາ ປາຍສໍ ອຫໍ;

ອາຫຸຕິໍ ຍິຏ຺ຐຸກາໂມ ໂສ, ອຸປເນສິໍ ພລິໍ ອຫໍ.

‘‘ຠຄວາ ຕມ຺ຫິ ສມເຍ, ໂລກເຊຏ຺ໂຐ ນຣາສໂຠ;

ຈງ຺ກມໍ ສຸສມາຣູຬ຺ໂຫ, ອມ຺ພເຣ ອນິລາຍເນ.

‘‘ຕຎ຺ຈ ອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ຐປຍິຕ຺ວາ ກໍສປາຕິໍ, ວິປສ຺ສິໍ ອຠິວາທຍິໍ.

‘‘ຕຸວໍ ເທໂວສິ ສພ຺ພຎ຺ຎູ, ສເທເວ ສຫມານຸເສ;

ອນຸກມ຺ປໍ ອຸປາທາຍ, ປຏິຄ຺ຄຓ຺ຫ ມຫາມຸນິ.

‘‘ປຏິຄ຺ຄເຫສິ ຠຄວາ, ສພ຺ພຎ຺ຎູ ໂລກນາຍໂກ;

ມມ ສງ຺ກປ຺ປມຎ຺ຎາຍ, ສຕ຺ຖາ ໂລເກ ມຫາມຸນິ.

‘‘ເອກນວຸຕິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ປາຍາສສ຺ສ ອິທໍ ຜລໍ.

‘‘ເອກຕາລີສິໂຕ ກປ຺ເປ, ພຸທ຺ໂຘ ນາມາສິ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ສຸເຂເນວ ອຕ຺ຕນາ ນິພ຺ພານສ຺ສ ອຘິຄຕຠາວໍ ວິຠາເວນ຺ໂຕ –

໗໑. ‘‘ສຸສຸຂຸມນິປຸຓຕ຺ຖທສ຺ສິນາ, ມຕິກຸສເລນ ນິວາຕວຸຕ຺ຕິນາ;

ສໍເສວິຕວຸທ຺ຘສີລິນາ, ນິພ຺ພານໍ ນ ຫິ ເຕນ ທຸລ຺ລຠ’’ນ຺ຕິ. –

ອິມໍ ຄາຖໍ ອຠາສິ.

ຕຕ຺ຖ ສຸສຸຂຸມນິປຸຓຕ຺ຖທສ຺ສິນາຕິ ອຕິວິຍ ທຸທ຺ທສຏ຺ເຐນ ສຸຂຸເມ, ສຓ຺ຫຏ຺ເຐນ ນິປຸເຓ ສຈ຺ຈປຏິຈ຺ຈສມຸປ຺ປາທາທິອຕ຺ເຖ ອນິຈ຺ຈຕາທິໍ ໂອໂຣເປຕ຺ວາ ປສ຺ສຕີຕິ ສຸສຸຂຸມນິປຸຓຕ຺ຖທສ຺ສີ, ເຕນ. ມຕິກຸສເລນາຕິ ມຕິຍາ ປຎ຺ຎາຍ ກຸສເລນ ເຉເກນ, ‘‘ເອວໍ ປວຕ຺ຕມານສ຺ສ ປຎ຺ຎາ ວຑ຺ຒຕິ, ເອວໍ ນ ວຑ຺ຒຕີ’’ຕິ ຘມ຺ມວິຈຍສມ຺ໂພຊ຺ຌງ຺ຄປຎ຺ຎາຍ ອຸປ຺ປາທເນ ກຸສເລນ. ນິວາຕວຸຕ຺ຕິນາຕິ ສພ຺ຣຫ຺ມຈາຣີສຸ ນິວາຕນີຈວຕ຺ຕນສີເລນ, ວຸຑ຺ເຒສຸ ນເວສຸ ຈ ຍຖານຸຣູປປຏິປຕ຺ຕິນາ. ສໍເສວິຕວຸທ຺ຘສີລິນາຕິ ສໍເສວິຕໍ ອາຈິຓ຺ຓໍ ວຸທ຺ຘສີລໍ ສໍເສວິຕວຸທ຺ຘສີລໍ, ຕໍ ຍສ຺ສ ອຕ຺ຖິ, ເຕນ ສໍເສວິຕວຸທ຺ຘສີລິນາ. ອຖ ວາ ສໍເສວິຕາ ອຸປາສິຕາ ວຸທ຺ຘສີລິໂນ ເອເຕນາຕິ ສໍເສວິຕວຸທ຺ຘສີລີ, ເຕນ. ຫີຕິສທ຺ໂທ ເຫຕຸອຕ຺ໂຖ. ຍສ຺ມາ ໂຍ ນິວາຕວຸຕ຺ຕິ ສໍເສວິຕວຸທ຺ຘສີລີ ມຕິກຸສໂລ ສຸສຸຂຸມນິປຸຓຕ຺ຖທສ຺ສີ ຈ, ຕສ຺ມາ ນິພ຺ພານໍ ນ ຕສ຺ສ ທຸລ຺ລຠນ຺ຕິ ອຕ຺ໂຖ. ນິວາຕວຸຕ຺ຕິຕາຍ ຫິ ສໍເສວິຕວຸທ຺ຘສີລິຕາຍ ຈ ປຓ຺ຑິຕາ ຕໍ ໂອວທິຕພ຺ພໍ ອນຸສາສິຕພ຺ພໍ ມຎ຺ຎນ຺ຕິ, ເຕສຎ຺ຈ ໂອວາເທ ຐິໂຕ ສຍໍ ມຕິກຸສລຕາຍ ສຸສຸຂຸມນິປຸຓຕ຺ຖທສ຺ສິຕາຍ ຈ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ນິພ຺ພານໍ ອຘິຄຈ຺ຉຕີຕິ, ອຍເມວ ຈ ເຖຣສ຺ສ ອຎ຺ຎາພ຺ຍາກຣຓຄາຖາ ອໂຫສີຕິ.

ວຈ຺ຉປາລຕ຺ເຖຣຄາຖາວຓ຺ຓນາ ນິຏ຺ຐິຕາ.