໙. ຉນ຺ນຕ຺ເຖຣຄາຖາວຓ຺ຓນາ

ສຸຕ຺ວານ ຘມ຺ມໍ ມຫໂຕ ມຫາຣສນ຺ຕິ ອາຍສ຺ມໂຕ ຉນ຺ນຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສິທ຺ຘຕ຺ຖໍ ຠຄວນ຺ຕໍ ອຎ຺ຎຕຣໍ ຣຸກ຺ຂມູລໍ ອຸປຄຈ຺ຉນ຺ຕໍ ທິສ຺ວາ ປສນ຺ນຈິຕ຺ໂຕ ມຸທຸສມ຺ຜສ຺ສໍ ປຓ຺ຓສນ຺ຖຣໍ ສນ຺ຖຣິຕ຺ວາ ອທາສິ. ປຸປ຺ເຜຫິ ຈ ສມນ຺ຕໂຕ ໂອກິຣິຕ຺ວາ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ປຸນປິ ອປຣາປຣໍ ປຸຎ຺ຎານິ ກຕ຺ວາ ສຸຄຕີສຸເຍວ ສໍສຣນ຺ໂຕ ອມ຺ຫາກໍ ຠຄວໂຕ ກາເລ ສຸທ຺ໂຘທນມຫາຣາຊສ຺ສ ເຄເຫ ທາສິຍາ ກຸຈ຺ຉິມ຺ຫິ ນິພ຺ພຕ຺ຕິ, ຉນ຺ໂນຕິສ຺ສ ນາມໍ ອໂຫສິ, ໂພຘິສຕ຺ເຕນ ສຫຊາໂຕ. ໂສ ສຕ຺ຖຸ ຎາຕິສມາຄເມ ປຏິລທ຺ຘສທ຺ໂຘ ປພ຺ພຊິຕ຺ວາ ຠຄວຕິ ເປເມນ, ‘‘ອມ຺ຫາກໍ ພຸທ຺ໂຘ, ອມ຺ຫາກໍ ຘມ຺ໂມ’’ຕິ ມມຕ຺ຕໍ ອຸປ຺ປາເທຕ຺ວາ ສິເນຫໍ ຉິນ຺ທິຕຸໍ ອສກ຺ໂກນ຺ໂຕ ສມຓຘມ຺ມໍ ອກຕ຺ວາ ສຕ຺ຖຣິ ປຣິນິພ຺ພຸເຕ ສຕ຺ຖາຣາ ອາຓຕ຺ຕວິຘິນາ ກເຕນ ພ຺ຣຫ຺ມທຓ຺ເຑນ ສນ຺ຕຊ຺ຊິໂຕ ສໍເວຄປ຺ປຕ຺ໂຕ ຫຸຕ຺ວາ ສິເນຫໍ ຉິນ຺ທິຕ຺ວາ ວິປສ຺ສນ຺ໂຕ ນຈິເຣເນວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໐.໔໕-໕໐) –

‘‘ສິທ຺ຘຕ຺ຖສ຺ສ ຠຄວໂຕ, ອທາສິໍ ປຓ຺ຓສນ຺ຖຣໍ;

ສມນ຺ຕາ ອຸປຫາຣຎ຺ຈ, ກຸສຸມໍ ໂອກິຣິໍ ອຫໍ.

‘‘ປາສາເທວໍ ຄຸຓໍ ຣມ຺ມໍ, ອນຸໂຠມິ ມຫາຣຫໍ;

ມຫຄ຺ຆານິ ຈ ປຸປ຺ຜານິ, ສຍເນຠິສວນ຺ຕິ ເມ.

‘‘ສຍເນຫໍ ຕຸວຏ຺ຏາມິ, ວິຈິຕ຺ເຕ ປຸປ຺ຜສນ຺ຖເຕ;

ປຸປ຺ຜວຸຏ຺ຐິ ຈ ສຍເນ, ອຠິວສ຺ສຕິ ຕາວເທ.

‘‘ຈຕຸນ຺ນວຸຕິໂຕ ກປ຺ເປ, ອທາສິໍ ປຓ຺ຓສນ຺ຖຣໍ;

ທຸຄ຺ຄຕິໍ ນາຠິຊານາມິ, ສນ຺ຖຣສ຺ສ ອິທໍ ຜລໍ.

‘‘ຕິຓສນ຺ຖຣກາ ນາມ, ສຕ຺ເຕເຕ ຈກ຺ກວຕ຺ຕິໂນ;

ອິໂຕ ເຕ ປຎ຺ຈເມ ກປ຺ເປ, ອຸປ຺ປຊ຺ຊິໍສຸ ຊນາຘິປາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ວິມຸຕ຺ຕິສຸຂສນ຺ຕປ຺ປິໂຕ ປີຕິເວຄວິສ຺ສຏ຺ຐໍ ອຸທານໍ ອຸທາເນນ຺ໂຕ –

໖໙. ‘‘ສຸຕ຺ວານ ຘມ຺ມໍ ມຫໂຕ ມຫາຣສໍ,

ສພ຺ພຎ຺ຎຸຕຎ຺ຎາຓວເຣນ ເທສິຕໍ;

ມຄ຺ຄໍ ປປຊ຺ຊິໍ ອມຕສ຺ສ ປຕ຺ຕິຍາ,

ໂສ ໂຍຄກ຺ເຂມສ຺ສ ປຖສ຺ສ ໂກວິໂທ’’ຕິ. – ຄາຖໍ ອຠາສິ;

ຕຕ຺ຖ ສຸຕ຺ວານາຕິ ສຸຓິຕ຺ວາ, ໂສເຕນ ຄເຫຕ຺ວາ ໂອຫິຕໂສໂຕ ໂສຕທ຺ວາຣານຸສາເຣນ ອຸປຘາເຣຕ຺ວາ. ຘມ຺ມນ຺ຕິ ຈຕຸສຈ຺ຈຘມ຺ມໍ. ມຫໂຕຕິ ຠຄວໂຕ. ຠຄວາ ຫິ ມຫນ຺ເຕຫິ ອຸຬາຣຕເມຫິ ສີລາທິຄຸເຓຫິ ສມນ຺ນາຄຕຕ຺ຕາ, ສເທວເກນ ໂລເກນ ວິເສສໂຕ ມຫນີຍຕາຍ ຈ ‘‘ມຫາ’’ຕິ ວຸຈ຺ຈຕິ, ຍາ ຕສ຺ສ ມຫາສມໂຓຕິ ສມຎ຺ຎາ ຊາຕາ. ນິສ຺ສກ຺ກວຈນຎ຺ເຈຕໍ ‘‘ມຫໂຕ ຘມ຺ມໍ ສຸຕ຺ວານາ’’ຕິ. ມຫາຣສນ຺ຕິ ວິມຸຕ຺ຕິຣສສ຺ສ ທາຍກຕ຺ຕາ ອຸຬາຣຣສໍ. ສພ຺ພຎ຺ຎຸຕຎ຺ຎາຓວເຣນ ເທສິຕນ຺ຕິ ສພ຺ພໍ ຊານາຕີຕິ ສພ຺ພຎ຺ຎູ, ຕສ຺ສ ຠາໂວ ສພ຺ພຎ຺ຎຸຕາ. ຎາຓເມວ ວຣໍ, ຎາເຓສຸ ວາ ວຣນ຺ຕິ ຎາຓວຣໍ, ສພ຺ພຎ຺ຎຸຕາ ຎາຓວຣໍ ເອຕສ຺ສາຕິ ສພ຺ພຎ຺ຎຸຕຎ຺ຎາຓວໂຣ, ຠຄວາ. ເຕນ ສພ຺ພຎ຺ຎຸຕຎ຺ຎາຓສງ຺ຂາຕອຄ຺ຄຎາເຓນ ວາ ກຣຓຠູເຕນ ເທສິຕໍ ກຖິຕໍ ຘມ຺ມໍ ສຸຕ຺ວານາຕິ ໂຍຊນາ. ຍໍ ປເນຕ຺ຖ ວຕ຺ຕພ຺ພໍ, ຕໍ ປຣມຕ຺ຖທີປນິຍໍ ອິຕິວຸຕ຺ຕກວຓ຺ຓນາຍໍ ວຸຕ຺ຕນເຍນ ເວທິຕພ຺ພໍ. ມຄ຺ຄນ຺ຕິ ອຏ຺ຐງ຺ຄິກໍ ອຣິຍມຄ຺ຄໍ. ປປຊ຺ຊິນ຺ຕິ ປຏິປຊ຺ຊິໍ. ອມຕສ຺ສ ປຕ຺ຕິຍາຕິ ນິພ຺ພານສ຺ສ ອຘິຄມາຍ ອຸປາຍຠູຕໍ ປຏິປຊ຺ຊິນ຺ຕິ ໂຍຊນາ. ໂສຕິ ໂສ ຠຄວາ. ໂຍຄກ຺ເຂມສ຺ສ ປຖສ຺ສ ໂກວິໂທຕິ ຈຕູຫິ ໂຍເຄຫິ ອນຸປທ຺ທຸຕສ຺ສ ນິພ຺ພານສ຺ສ ໂຍ ປໂຖ, ຕສ຺ສ ໂກວິໂທ ຕຕ຺ຖ ສຸກຸສໂລ. ອຍຎ຺ເຫຕ຺ຖ ອຕ຺ໂຖ – ຠຄວໂຕ ຈຕຸສຈ຺ຈເທສນໍ ສຸຕ຺ວາ ອມຕາຘິຄມູປາຍມຄ຺ຄໍ ອຫໍ ປຏິປຊ຺ຊິໍ ປຏິປຊ຺ຊນມຄ຺ຄໍ ມຍາ ກຕໍ, ໂສ ເອວ ປນ ຠຄວາ ສພ຺ພຖາ ໂຍຄກ຺ເຂມສ຺ສ ປຖສ຺ສ ໂກວິໂທ, ປຣສນ຺ຕາເນ ວາ ປຣມເນສຸ ກຸສໂລ, ຍສ຺ສ ສໍວິຘານມາຄມ຺ມ ອຫມ຺ປິ ມຄ຺ຄໍ ປຏິປຊ຺ຊິນ຺ຕິ. ອຍເມວ ຈ ເຖຣສ຺ສ ອຎ຺ຎາພ຺ຍາກຣຓຄາຖາ ອໂຫສີຕິ.

ຉນ຺ນຕ຺ເຖຣຄາຖາວຓ຺ຓນາ ນິຏ຺ຐິຕາ.