໕. ຣມຓີຍວິຫາຣິຕ຺ເຖຣຄາຖາວຓ຺ຓນາ

ຍຖາປິ ຠທ຺ໂທ ອາຊຎ຺ໂຎຕິ ອາຍສ຺ມໂຕ ຣມຓີຍວິຫາຣິຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ປຸຎ຺ຎານິ ອຸປຈິນນ຺ໂຕ ອິໂຕ ເອກນວຸເຕ ກປ຺ເປ ວິປສ຺ສິໍ ຠຄວນ຺ຕໍ ທິສ຺ວາ ປສນ຺ນມານໂສ ປຎ຺ຈປຕິຏ຺ຐິເຕນ ວນ຺ທິຕ຺ວາ ໂກຣຓ຺ຑປຸປ຺ເຜຫິ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທເວສຸ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ອຎ຺ຎຕຣສ຺ສ ເສຏ຺ຐິສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ໂຕ ໂຍພ຺ພນມເທນ ກາເມສຸ ມຸຈ຺ຉໍ ອາປນ຺ໂນ ວິຫຣຕິ. ໂສ ເອກທິວສໍ ອຎ຺ຎຕຣໍ ປາຣທາຣິກໍ ຣາຊປຸຣິເສຫິ ວິວິຘາ ກມ຺ມກາຣຓາ ກຣີຍມານໍ ທິສ຺ວາ ສໍເວຄຊາໂຕ ສຕ຺ຖຸ ສນ຺ຕິເກ ຘມ຺ມໍ ສຸຕ຺ວາ ປພ຺ພຊິ. ປພ຺ພຊິໂຕ ຈ ຣາຄຈຣິຕຕາຍ ນິຈ຺ຈກາລໍ ສຸສມ຺ມຏ຺ຐໍ ປຣິເວຓໍ ສູປຏ຺ຐິຕໍ ປານີຍປຣິໂຠຊນີຍໍ ສຸປຎ຺ຎຕໍ ມຎ຺ຈປີຐໍ ກຕ຺ວາ ວິຫຣຕິ. ເຕນ ໂສ ຣມຓີຍວິຫາຣີຕ຺ເວວ ປຎ຺ຎາຍິຕ຺ຖ.

ໂສ ຣາຄຸສ຺ສນ຺ນຕາຍ ອໂຍນິໂສ ມນສິ ກຣິຕ຺ວາ ສຎ຺ເຈຕນິກໍ ສຸກ຺ກວິສ຺ສຏ຺ຐິອາປຕ຺ຕິໍ ອາປຊ຺ຊິຕ຺ວາ, ‘‘ຘິຣຕ຺ຖຸ, ມໍ ເອວໍຠູໂຕ ສທ຺ຘາເທຍ຺ຍໍ ຠຸຎ຺ເຊຍ຺ຍ’’ນ຺ຕິ ວິປ຺ປຏິສາຣີ ຫຸຕ຺ວາ ‘‘ວິພ຺ຠມິສ຺ສາມີ’’ຕິ ຄຈ຺ຉນ຺ໂຕ ອນ຺ຕຣາມຄ຺ເຄ ຣຸກ຺ຂມູເລ ນິສີທິ, ເຕນ ຈ ມຄ຺ເຄນ ສກເຏສຸ ຄຈ຺ຉນ຺ເຕສຸ ເອໂກ ສກຏຍຸຕ຺ໂຕ ໂຄໂຓ ປຣິສ຺ສມນ຺ໂຕ ວິສມຏ຺ຐາເນ ຂລິຕ຺ວາ ປຕິ, ຕໍ ສາກຏິກາ ຍຸຄໂຕ ມຸຎ຺ຈິຕ຺ວາ ຕິໂຓທກໍ ທຕ຺ວາ ປຣິສ຺ສມໍ ວິໂນເທຕ຺ວາ ປຸນປິ ຘຸເຣ ໂຍເຊຕ຺ວາ ອຄມໍສຸ. ເຖໂຣ ຕໍ ທິສ຺ວາ – ‘‘ຍຖາຍໍ ໂຄໂຓ ສກິໍ ຂລິຕ຺ວາປິ ອຸຏ຺ຐາຍ ສກິໍ ຘຸຣໍ ວຫຕິ, ເອວໍ ມຍາປິ ກິເລສວເສນ ສກິໍ ຂລິເຕນາປິ ວຸຏ຺ຐາຍ ສມຓຘມ຺ມໍ ກາຕຸໍ ວຏ຺ຏຕີ’’ຕິ ໂຍນິໂສ ອຸມ຺ມຸຊ຺ຊນ຺ໂຕ ນິວຕ຺ຕິຕ຺ວາ ອຸປາລິຕ຺ເຖຣສ຺ສ ອຕ຺ຕໂນ ປວຕ຺ຕິໍ ອາຈິກ຺ຂິຕ຺ວາ ເຕນ ວຸຕ຺ຕວິຘິນາ ອາປຕ຺ຕິໂຕ ວຸຏ຺ຐຫິຕ຺ວາ ສີລໍ ປາກຕິກໍ ກຕ຺ວາ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໒໑.໓໕-໓໙) –

‘‘ອກ຺ກນ຺ຕຎ຺ຈ ປທໍ ທິສ຺ວາ, ຈກ຺ກາລງ຺ກາຣຠູສິຕໍ;

ປເທນານຸປທໍ ຍນ຺ໂຕ, ວິປສ຺ສິສ຺ສ ມເຫສິໂນ.

‘‘ໂກຣຓ຺ຑໍ ປຸປ຺ຜິຕໍ ທິສ຺ວາ, ສມູລໍ ປູຊິຕໍ ມຍາ;

ຫຏ຺ໂຐ ຫຏ຺ເຐນ ຈິຕ຺ເຕນ, ອວນ຺ທິໍ ປທມຸຕ຺ຕມໍ.

‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ສຕ຺ຕປຎ຺ຎາສກປ຺ປມ຺ຫິ, ເອໂກ ວີຕມໂລ ອຫຸໍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ວິມຸຕ຺ຕິສຸຂໍ ອນຸຠວນ຺ໂຕ ອຕ຺ຕໂນ ປຸພ຺ພຠາຄປຏິປຕ຺ຕິຍາ ສທ຺ຘິໍ ອຣິຍຘມ຺ມາຘິຄມນທີປນິໍ ‘‘ຍຖາປິ ຠທ຺ໂທ ອາຊຎ຺ໂຎ, ຂລິຕ຺ວາ ປຕິຕິຏ຺ຐຕີ’’ຕິ ຄາຖໍ ອຠາສິ.

໔໕. ຕຕ຺ຖ ຂລິຕ຺ວາຕິ ປກ຺ຂລິຕ຺ວາ. ປຕິຕິຏ຺ຐຕີຕິ ປຕິຏ຺ຐຫຕິ, ປຸນເທວ ຍຖາຐາເນ ຕິຏ຺ຐຕິ. ເອວນ຺ຕິ ຍຖາ ຠທ຺ໂທ ອຸສຠາຊານີໂຍ ຠາຣໍ ວຫນ຺ໂຕ ປຣິສ຺ສມປ຺ປຕ຺ໂຕ ວິສມຏ຺ຐານໍ ອາຄມ຺ມ ເອກວາຣໍ ປກ຺ຂລິຕ຺ວາ ປຕິໂຕ ນ ຕຕ຺ຕເກນ ຘຸຣໍ ຉຑ຺ເຑຕິ, ຖາມຊວປຣກ຺ກມສມ຺ປນ຺ນຕາຍ ປນ ຂລິຕ຺ວາປິ ປຕິຕິຏ຺ຐຕິ, ອຕ຺ຕໂນ ສຠາເວເນວ ຐຕ຺ວາ ຠາຣໍ ວຫຕິ, ເອວໍ ກິເລສປຣິສ຺ສມປ຺ປຕ຺ໂຕ ກິຣິຍາປຣາເຘນ ຂລິຕ຺ວາ ຕໍ ຂລິຕໍ ຖາມວີຣິຍສມ຺ປຕ຺ຕິຕາຍ ປຏິປາກຕິກໍ ກຕ຺ວາ ມຄ຺ຄສມ຺ມາທິຏ຺ຐິຍາ ທສ຺ສນສມ຺ປນ຺ນໍ, ຕໂຕ ເອວ ສມ຺ມາສມ຺ພຸທ຺ຘສ຺ສ ສວນນ຺ເຕ ອຣິຍາຍ ຊາຕິຍາ ຊາຕຕາຍ ສາວກໍ, ຕສ຺ສ ອຸເຣ ວາຍາມຊນິຕາຠິຊາຕິຕາຍ ໂອຣສໍ ປຸຕ຺ຕໍ ຠທ຺ທາຊານີຍສທິສກິຈ຺ຈຕາຍ ອາຊານີຍນ຺ຕິ ຈ ມໍ ຘາເຣຖ ອຸປຘາເຣຖາຕິ ອຕ຺ໂຖ.

ຣມຓີຍວິຫາຣິຕ຺ເຖຣຄາຖາວຓ຺ຓນາ ນິຏ຺ຐິຕາ.