໑໐. ວິມລຕ຺ເຖຣຄາຖາວຓ຺ຓນາ

ຘຣຓີ ຈ ສິຎ຺ຈຕິ ວາຕິ ອາຍສ຺ມໂຕ ວິມລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ສງ຺ຂຘມນກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຕສ຺ມິໍ ສິປ຺ເປ ນິປ຺ຜຕ຺ຕິໍ ຄໂຕ ເອກທິວສໍ ວິປສ຺ສິໍ ຠຄວນ຺ຕໍ ປສ຺ສິຕ຺ວາ ປສນ຺ນມານໂສ ສງ຺ຂຘມເນນ ປູຊໍ ກຕ຺ວາ ຕໂຕ ປຏ຺ຐາຍ ກາເລນ ກາລໍ ສຕ຺ຖຸ ອຸປຏ຺ຐານໍ ອກາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ເທວມນຸສ຺ເສສຸ ສໍສຣນ຺ໂຕ ກສ຺ສປສ຺ສ ຠຄວໂຕ ກາເລ ‘‘ອນາຄເຕ ເມ ວິມໂລ ວິສຸທ຺ໂຘ ກາໂຍ ໂຫຕູ’’ຕິ ໂພຘິຣຸກ຺ຂໍ ຄນ຺ໂຘທເກຫິ ນ຺ຫາເປສິ, ເຈຕິຍງ຺ຄຓໂພຘິຍງ຺ຄເຓສຸ ອາສນານິ ໂຘວາເປສິ, ຠິກ຺ຂູນມ຺ປິ ກິລິຏ຺ເຐ ສມຓປຣິກ຺ຂາເຣ ໂຘວາເປສິ.

ໂສ ຕໂຕ ຈວິຕ຺ວາ ເທເວສຸ ຈ ມນຸສ຺ເສສຸ ຈ ປຣິວຕ຺ເຕນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ອິພ຺ຠກຸເລ ນິພ຺ພຕ຺ຕິ. ຕສ຺ສ ມາຕຸກຸຈ຺ຉິຍໍ ວສນ຺ຕສ຺ສ ນິກ຺ຂມນ຺ຕສ຺ສ ຈ ກາໂຍ ປິຕ຺ຕເສມ຺ຫາທີຫິ ອສໍກິລິຏ຺ໂຐ ປທຸມປລາເສ ອຸທກພິນ຺ທຸ ວິຍ ອລຄ຺ໂຄ ປຈ຺ຉິມຠວິກໂພຘິສຕ຺ຕສ຺ສ ວິຍ ສຸວິສຸທ຺ໂຘ ອໂຫສິ, ເຕນສ຺ສ ວິມໂລຕ຺ເວວ ນາມໍ ອກໍສຸ. ໂສ ວຍປ຺ປຕ຺ໂຕ ຣາຊຄຫປ຺ປເວສເນ ພຸທ຺ຘານຸຠາວໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ໂກສລຣຏ຺ເຐ ປພ຺ພຕຄຸຫາຍໍ ວິຫຣຕິ. ອເຖກທິວສໍ ຈາຕຸທ຺ທີປິກມຫາເມໂຆ ສກລໍ ຈກ຺ກວາຬຄພ຺ຠໍ ປຕ຺ຖຣິຕ຺ວາ ປາວສ຺ສິ. ວິວຏ຺ຏຏ຺ຐາຍິມ຺ຫິ ພຸທ຺ຘານໍ ຈກ຺ກວຕ຺ຕີນຎ຺ຈ ຘຣມານກາເລ ເອວ ກິຣ ເອວໍ ວສ຺ສຕິ. ຆມ຺ມປຣິຬາຫວູປສມໂຕ ອຸຕຸສປ຺ປາຍລາເຠນ ເຖຣສ຺ສ ຈິຕ຺ຕໍ ສມາຫິຕໍ ອໂຫສິ ເອກຄ຺ຄໍ. ໂສ ສມາຫິຕຈິຕ຺ໂຕ ຕາວເທວ ວິປສ຺ສນໍ ອຸສ຺ສຸກ຺ກາເປຕ຺ວາ ມຄ຺ຄປຏິປາຏິຍາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໑໐.໕໖-໖໐) –

‘‘ວິປສ຺ສິສ຺ສ ຠຄວໂຕ, ອໂຫສິໍ ສງ຺ຂຘມ຺ມໂກ;

ນິຈ຺ຈຸປຏ຺ຐານຍຸຕ຺ໂຕມ຺ຫິ, ສຸຄຕສ຺ສ ມເຫສິໂນ.

‘‘ອຸປຏ຺ຐານຜລໍ ປສ຺ສ, ໂລກນາຖສ຺ສ ຕາທິໂນ;

ສຏ຺ຐິ ຕູຣິຍສຫສ຺ສານິ, ປຣິວາເຣນ຺ຕິ ມໍ ສທາ.

‘‘ເອກນວຸຕິໂຕ ກປ຺ເປ, ອຸປຏ຺ຐຫິໍ ມຫາອິສິໍ;

ທຸຄ຺ຄຕິໍ ນາຠິຊານາມິ, ອຸປຏ຺ຐານສ຺ສິທໍ ຜລໍ.

‘‘ຈຕຸວີເສ ອິໂຕ ກປ຺ເປ, ມຫານິຄ຺ໂຆສນາມກາ;

ໂສຬສາສິໍສຸ ຣາຊາໂນ, ຈກ຺ກວຕ຺ຕີ ມຫພ຺ພລາ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ກຕກິຈ຺ຈຕາຍ ຕຸຏ຺ຐມານໂສ ອຸທານໍ ອຸທາເນນ຺ໂຕ ‘‘ຘຣຓີ ຈ ສິຎ຺ຈຕິ ວາຕິ ມາລຸໂຕ’’ຕິ ຄາຖໍ ອຠາສິ.

໕໐. ຕຕ຺ຖ ຘຣຓີຕິ ປຖວີ, ສາ ຫິ ສກລໍ ຘຣາຘຣໍ ຘາເຣຕີຕິ ‘‘ຘຣຓີ’’ຕິ ວຸຈ຺ຈຕິ. ສິຎ຺ຈຕີຕິ ສມນ຺ຕໂຕ ນຠໍ ປູເຣຕ຺ວາ ອຠິປ຺ປວສ຺ສໂຕ ມຫາເມຆສ຺ສ ວຸຏ຺ຐິຘາຣາຫິ ສິຎ຺ຈຕິ. ວາຕິ ມາລຸໂຕຕິ ອຸທກຜຸສິຕສມ຺ມິສ຺ສຕາຍ ສີຕໂລ ວາໂຕ ວາຍຕິ. ວິຊ຺ຊຸຕາ ຈຣຕິ ນເຠຕິ ຕຕ຺ຖ ຕຕ຺ຖ ຄຊ຺ຊຕາ ຄຬຄຬາຍຕາ ມຫາເມຆໂຕ ນິຈ຺ຉຣນ຺ຕິໂຍ ສເຕຣຕາ ອາກາເສ ອິໂຕ ຈິໂຕ ຈ ວິຈຣນ຺ຕິ. ອຸປສມນ຺ຕິ ວິຕກ຺ກາຕິ ອຸຕຸສປ຺ປາຍສິທ຺ເຘນ ສມຖວິປສ຺ສນາຘິຄເມນ ປຸພ຺ພຠາເຄ ຕທງ຺ຄາທິວເສນ ວູປສນ຺ຕາ ຫຸຕ຺ວາ ກາມວິຕກ຺ກາທໂຍ ສພ຺ເພປິ ນວ ມຫາວິຕກ຺ກາ ອຣິຍມຄ຺ຄາຘິຄເມນ ອຸປສມນ຺ຕິ. ອນວເສສໂຕ ສມຸຈ຺ຉິຊ຺ຊນ຺ຕີຕິ. ວຕ຺ຕມານສມີປຕາຍ ອຣິຍມຄ຺ຄກ຺ຂຓໍ ວຕ຺ຕມານໍ ກຕ຺ວາ ວທຕິ. ອຕີຕຕ຺ເຖ ວາ ເອຕໍ ປຈ຺ຈຸປ຺ປນ຺ນວຈນໍ. ຈິຕ຺ຕໍ ສຸສມາຫິຕໍ ມມາຕິ ຕໂຕ ເອວ ໂລກຸຕ຺ຕຣສມາຘິນາ ມມ ຈິຕ຺ຕໍ ສຸຏ຺ຐຸ ສມາຫິຕໍ, ນ ທານິ ຕສ຺ສ ສມາຘາເນ ກິຎ຺ຈິ ກາຕພ຺ພໍ ອຕ຺ຖີຕິ ເຖໂຣ ອຎ຺ຎໍ ພ຺ຍາກາສິ.

ວິມລຕ຺ເຖຣຄາຖາວຓ຺ຓນາ ນິຏ຺ຐິຕາ.

ປຎ຺ຈມວຄ຺ຄວຓ຺ຓນາ ນິຏ຺ຐິຕາ.