໒. ສຸປ຺ປິຍຕ຺ເຖຣຄາຖາວຓ຺ຓນາ

ອຊຣໍ ຊີຣມາເນນາຕິ ອາຍສ຺ມໂຕ ສຸປ຺ປິຍຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສ ກິຣ ປທຸມຸຕ຺ຕຣສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ຕາປສປພ຺ພຊ຺ຊໍ ປພ຺ພຊິຕ຺ວາ ອຣຎ຺ຎາຍຕເນ ວສນ຺ໂຕ ຕຕ຺ຖ ຠຄວນ຺ຕໍ ທິສ຺ວາ ປສນ຺ນມານໂສ ຜລາຜລໍ ອທາສິ, ຕຖາ ຠິກ຺ຂຸສງ຺ຆສ຺ສ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ກສ຺ສປສ຺ສ ສມ຺ມາສມ຺ພຸທ຺ຘສ຺ສ ກາເລ ຂຕ຺ຕິຍກຸເລ ນິພ຺ພຕ຺ຕິຕ຺ວາ ອນຸກ຺ກເມນ ວິຎ຺ຎຸຕໍ ປຕ຺ໂຕ ກລ຺ຍາຓມິຕ຺ຕສນ຺ນິສ຺ສເຍນ ລທ຺ຘສໍເວໂຄ ສາສເນ ປພ຺ພຊິຕ຺ວາ ພຫຸສ຺ສຸໂຕ ອໂຫສິ. ຊາຕິມເທນ ສຸຕມເທນ ຈ ອຕ຺ຕານໍ ອຸກ຺ກໍເສນ຺ໂຕ ປເຣ ຈ ວມ຺ເຠນ຺ໂຕ ວິຫາສິ. ໂສ ອິມສ຺ມິໍ ພຸທ຺ຘຸປ຺ປາເທ ຕສ຺ສ ກມ຺ມສ຺ສ ນິສ຺ສນ຺ເທນ ສາວຕ຺ຖິຍໍ ປຣິຠູຕຣູເປ ສຸສານໂຄປກກຸເລ ນິພ຺ພຕ຺ຕິ. ສຸປ຺ປິໂຍຕິສ຺ສ ນາມໍ ອໂຫສິ. ອຖ ວິຎ຺ຎຸຕໍ ປຕ຺ໂຕ ອຕ຺ຕໂນ ສຫາຍຠູຕໍ ໂສປາກຕ຺ເຖຣໍ ອຸປສງ຺ກມິຕ຺ວາ ຕສ຺ສ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສໍເວໂຄ ປພ຺ພຊິຕ຺ວາ ສມ຺ມາປຏິປຕ຺ຕິໍ ປູເຣຕ຺ວາ ‘‘ອຊຣໍ ຊີຣມາເນນາ’’ຕິ ຄາຖໍ ອຠາສິ.

໓໒. ຕຕ຺ຖ ອຊຣນ຺ຕິ ຊຣາຣຫິຕໍ, ນິພ຺ພານໍ ສນ຺ຘາຍາຫ. ຕຎ຺ຫິ ອຊາຕຕ຺ຕາ ນຕ຺ຖິ ເອຕ຺ຖ ຊຣາ, ເອຕສ຺ມິໍ ວາ ອຘິຄເຕ ປຸຄ຺ຄລສ຺ສ ສາ ນຕ຺ຖີຕິ ຊຣາຠາວເຫຕຸໂຕປິ ອຊຣໍ ນາມ. ຊີຣມາເນນາຕິ ຊີຣນ຺ເຕນ, ຂເຓ ຂເຓ ຊຣໍ ປາປຸຓນ຺ເຕນ. ຕປ຺ປມາເນນາຕິ ສນ຺ຕປ຺ປມາເນນ, ຣາຄາທີຫິ ເອກາທສຫິ ອຄ຺ຄີຫິ ທຍ຺ຫມາເນນ. ນິພ຺ພຸຕິນ຺ຕິ ຍຖາວຸຕ຺ຕສນ຺ຕາປາຠາວໂຕ ນິພ຺ພຸຕສຠາວໍ ນິພ຺ພານໍ. ນິມິຍນ຺ຕິ ປຣິວຕ຺ເຕຍ຺ຍໍ ເຈຕາເປຍ຺ຍໍ. ປຣມໍ ສນ຺ຕິນ຺ຕິ ອນວເສສກິເລສາຠິສງ຺ຂາຣປຣິຬາຫວູປສມຘມ຺ມຕາຍ ອຸຕ຺ຕມໍ ສນ຺ຕິໍ. ຈຕູຫິ ໂຍເຄຫິ ອນນຸພນ຺ຘຕ຺ຕາ ໂຍຄກ຺ເຂມໍ. ອຕ຺ຕໂນ ອຸຕ຺ຕຣິຕຣສ຺ສ ກສ຺ສຈິ ອຠາວໂຕ ອນຸຕ຺ຕຣໍ. ອຍຎ຺ເຫຕ຺ຖ ສງ຺ເຂປຕ຺ໂຖ – ຂເຓ ຂເຓ ຊຣາຍ ອຠິຠຸຍ຺ຍມານຕ຺ຕາ ຊີຣມາເນນ, ຕຖາ ຣາຄຄ຺ຄິອາທີຫິ ສນ຺ຕປ຺ປມາເນນ ຄໂຕ ເອວໍ ອນິຈ຺ເຈນ ທຸກ຺ເຂນ ອສາເຣນ ສພ຺ພຖາປິ ອນຸປສນ຺ຕສຠາເວນ ສອຸປທ຺ທເວນ, ຕປ຺ປຏິປກ຺ຂຠາວໂຕ ອຊຣໍ ປຣມຸປສມຠູຕໍ ເກນຈິ ອນຸປທ຺ທຸຕໍ ອນຸຕ຺ຕຣໍ ນິພ຺ພານໍ ນິມິຍໍ ປຣິວຕ຺ເຕຍ຺ຍໍ ‘‘ມຫາ ວຕ ເມ ລາໂຠ ມຫາ ອຸທໂຍ ຫຕ຺ຖຄໂຕ’’ຕິ. ຍຖາ ຫິ ມນຸສ຺ສາ ຍໍ ກິຎ຺ຈິ ຠຓ຺ຑໍ ປຣິວຕ຺ເຕນ຺ຕາ ນິຣເປກ຺ຂາ ຄຍ຺ຫມາເນນ ສມ຺ພຫຸມານາ ໂຫນ຺ຕິ, ເອວມຍໍ ເຖໂຣ ປຫິຕຕ຺ໂຕ ວິຫຣນ຺ໂຕ ອຕ຺ຕໂນ ກາເຍ ຈ ຊີວິເຕ ຈ ນິຣເປກ຺ຂຕໍ, ນິພ຺ພານໍ ປຏິເປສິຕຕ຺ຕຎ຺ຈ ປກາເສນ຺ໂຕ ‘‘ນິມິຍໍ ປຣມໍ ສນ຺ຕິໍ, ໂຍຄກ຺ເຂມໍ ອນຸຕ຺ຕຣ’’ນ຺ຕິ ວຕ຺ວາ ຕເມວ ປຏິປຕ຺ຕິໍ ປຣິພ຺ຣູຫຍນ຺ໂຕ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໒.໕໑-໗໗) –

‘‘ວຣຸໂຓ ນາມ ນາເມນ, ພ຺ຣາຫ຺ມໂຓ ມນ຺ຕປາຣຄູ;

ຉຑ຺ເຑຕ຺ວາ ທສ ປຸຕ຺ຕານິ, ວນມຊ຺ໂຌຄຫິໍ ຕທາ.

‘‘ອສ຺ສມໍ ສຸກຕໍ ກຕ຺ວາ, ສຸວິຠຕ຺ຕໍ ມໂນຣມໍ;

ປຓ຺ຓສາລໍ ກຣິຕ຺ວານ, ວສາມິ ວິປິເນ ອຫໍ.

‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມຸທ຺ຘຣິຕຸກາໂມ ໂສ, ອາຄຈ຺ຉິ ມມ ອສ຺ສມໍ.

‘‘ຍາວຕາ ວນສຓ຺ຑມ຺ຫິ, ໂອຠາໂສ ວິປຸໂລ ອຫຸ;

ພຸທ຺ຘສ຺ສ ອານຸຠາເວນ, ປຊ຺ຊລີ ວິປິນໍ ຕທາ.

‘‘ທິສ຺ວານ ຕໍ ປາຏິຫີຣໍ, ພຸທ຺ຘເສຏ຺ຐສ຺ສ ຕາທິໂນ;

ປຕ຺ຕປຸຏໍ ຄເຫຕ຺ວານ, ຜເລນ ປູຊຍິໍ ອຫໍ.

‘‘ອຸປຄນ຺ຕ຺ວານ ສມ຺ພຸທ຺ຘໍ, ສຫຂາຣິມທາສຫໍ;

ອນຸກມ຺ປາຍ ເມ ພຸທ຺ໂຘ, ອິທໍ ວຈນມພ຺ຣວິ.

‘‘ຂາຣິຠາຣໍ ຄເຫຕ຺ວານ, ປຈ຺ຉໂຕ ເອຫິ ເມ ຕຸວໍ;

ປຣິຠຸຕ຺ເຕ ຈ ສງ຺ຆມ຺ຫິ, ປຸຎ຺ຎໍ ຕວ ຠວິສ຺ສຕິ.

‘‘ປຸຏກໍ ຕໍ ຄເຫຕ຺ວານ, ຠິກ຺ຂຸສງ຺ຆສ຺ສທາສຫໍ;

ຕຕ຺ຖ ຈິຕ຺ຕໍ ປສາເທຕ຺ວາ, ຕຸສິຕໍ ອຸປປຊ຺ຊຫໍ.

‘‘ຕຕ຺ຖ ທິພ຺ເພຫິ ນຈ຺ເຈຫິ, ຄີເຕຫິ ວາທິເຕຫິ ຈ;

ປຸຎ຺ຎກມ຺ເມນ ສໍຍຸຕ຺ຕໍ, ອນຸໂຠມິ ສທາ ສຸຂໍ.

‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ໂຠເຄ ເມ ອູນຕາ ນຕ຺ຖິ, ຜລທານສ຺ສິທໍ ຜລໍ.

‘‘ຍາວຕາ ຈຕຸໂຣ ທີປາ, ສສມຸທ຺ທາ ສປພ຺ພຕາ;

ຜລໍ ພຸທ຺ຘສ຺ສ ທຕ຺ວານ, ອິສ຺ສຣໍ ກາຣຍາມຫໍ.

‘‘ຍາວຕາ ເຍ ປກ຺ຂິຄຓາ, ອາກາເສ ອຸປ຺ປຕນ຺ຕິ ເຈ;

ເຕປິ ເມ ວສມນ຺ເວນ຺ຕິ, ຜລທານສ຺ສິທໍ ຜລໍ.

‘‘ຍາວຕາ ວນສຓ຺ຑມ຺ຫິ, ຍກ຺ຂາ ຠູຕາ ຈ ຣກ຺ຂສາ;

ກຸມ຺ຠຓ຺ຑາ ຄຣຸຬາ ຈາປິ, ປາຣິຈຣິຍໍ ອຸເປນ຺ຕິ ເມ.

‘‘ກຸມ຺ມາ ໂສຓາ ມຘຸກາຣາ, ຑໍສາ ຈ ມກສາ ອຸໂຠ;

ເຕປິ ມໍ ວສມນ຺ເວນ຺ຕິ, ຜລທານສ຺ສິທໍ ຜລໍ.

‘‘ສຸປຓ຺ຓາ ນາມ ສກຸຓາ, ປກ຺ຂິຊາຕາ ມຫພ຺ພລາ;

ເຕປິ ມໍ ສຣຓໍ ຍນ຺ຕິ, ຜລທານສ຺ສິທໍ ຜລໍ.

‘‘ເຍປິ ທີຆາຍຸກາ ນາຄາ, ອິທ຺ຘິມນ຺ໂຕ ມຫາຍສາ;

ເຕປິ ມໍ ວສມນ຺ເວນ຺ຕິ, ຜລທານສ຺ສິທໍ ຜລໍ.

‘‘ສີຫາ ພ຺ຍຄ຺ຆາ ຈ ທີປີ ຈ, ອຈ຺ຉໂກກຕຣຈ຺ຉກາ;

ເຕປິ ມໍ ວສມນ຺ເວນ຺ຕິ, ຜລທານສ຺ສິທໍ ຜລໍ.

‘‘ໂອສຘີ ຕິຓວາສີ ຈ, ເຍ ຈ ອາກາສວາສິໂນ;

ສພ຺ເພ ມໍ ສຣຓໍ ຍນ຺ຕິ, ຜລທານສ຺ສິທໍ ຜລໍ.

‘‘ສຸທຸທ຺ທສໍ ສຸນິປຸຓໍ, ຄມ຺ຠີຣໍ ສຸປ຺ປກາສິຕໍ;

ຜສ຺ສຍິຕ຺ວາ ວິຫຣາມິ, ຜລທານສ຺ສິທໍ ຜລໍ.

‘‘ວິໂມກ຺ເຂ ອຏ຺ຐ ຜຸສິຕ຺ວາ, ວິຫຣາມິ ອນາສໂວ;

ອາຕາປີ ນິປໂກ ຈາຫໍ, ຜລທານສ຺ສິທໍ ຜລໍ.

‘‘ເຍ ຜລຏ຺ຐາ ພຸທ຺ຘປຸຕ຺ຕາ, ຂີຓໂທສາ ມຫາຍສາ;

ອຫມຎ຺ຎຕໂຣ ເຕສໍ, ຜລທານສ຺ສິທໍ ຜລໍ.

‘‘ອຠິຎ຺ຎາປາຣມິໍ ຄນ຺ຕ຺ວາ, ສຸກ຺ກມູເລນ ໂຈທິໂຕ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

‘‘ເຕວິຊ຺ຊາ ອິທ຺ຘິປຕ຺ຕາ ຈ, ພຸທ຺ຘປຸຕ຺ຕາ ມຫາຍສາ;

ທິພ຺ພໂສຕໍ ສມາປນ຺ນາ, ເຕສໍ ອຎ຺ຎຕໂຣ ອຫໍ.

‘‘ສຕສຫສ຺ສິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາປິ ຕເມວ ຄາຖໍ ອຎ຺ຎາພ຺ຍາກຣຓວເສນ ອຠາສິ.

ສຸປ຺ປິຍຕ຺ເຖຣຄາຖາວຓ຺ຓນາ ນິຏ຺ຐິຕາ.