໘. ຊມ຺ພຸຄາມິຍປຸຕ຺ຕຕ຺ເຖຣຄາຖາວຓ຺ຓນາ

ກຈ຺ຈິ ໂນ ວຕ຺ຖປສຸໂຕຕິ ອາຍສ຺ມໂຕ ຊມ຺ພຸຄາມິຍປຸຕ຺ຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສ ກິຣ ປຸຣິມພຸທ຺ເຘສຸ ກຕາຘິກາໂຣ ຫຸຕ຺ວາ ຕຕ຺ຖ ຕຕ຺ຖ ວິວຏ຺ຏູປນິສ຺ສຍໍ ກຸສລໍ ອາຈິນນ຺ໂຕ ອິໂຕ ເອກຕິໍເສ ກປ຺ເປ ເວສ຺ສຠຸສ຺ສ ຠຄວໂຕ ກາເລ ເອກທິວສໍ ກິໍສຸການິ ປຸປ຺ຜານິ ທິສ຺ວາ ຕານິ ປຸປ຺ຜານິ ຄເຫຕ຺ວາ ພຸທ຺ຘຄຸເຓ ອນຸສ຺ສຣນ຺ໂຕ ຠຄວນ຺ຕໍ ອຸທ຺ທິສ຺ສ ອາກາເສ ຂິປນ຺ໂຕ ປູເຊສິ. ໂສ ເຕນ ປຸຎ຺ຎກມ຺ເມນ ຕາວຕິໍເສສຸ ນິພ຺ພຕ຺ໂຕ. ຕໂຕ ປຣໍ ປຸຎ຺ຎານິ ກຕ຺ວາ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຈມ຺ປາຍໍ ຊມ຺ພຸຄາມິຍສ຺ສ ນາມ ອຸປາສກສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ. ເຕນ ປຸຎ຺ຎກມ຺ເມນ ຕາວຕິໍເສສຸ ນິພ຺ພຕ຺ໂຕ. ຕໂຕ ປຣໍ ປຸຎ຺ຎານິ ກຕ຺ວາ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຈມ຺ປາຍໍ ຊມ຺ພຸຄາມິຍສ຺ສ ນາມ ອຸປາສກສ຺ສ ປຸຕ຺ວາ ນິພ຺ພຕ຺ຕິ. ເຕນສ຺ສ ຊມ຺ພຸຄາມິຍປຸຕ຺ໂຕຕ຺ເວວ ສມຎ຺ຎາ ອໂຫສິ. ໂສ ວຍປ຺ປຕ຺ໂຕ ຠຄວໂຕ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສໍເວໂຄ ປພ຺ພຊິຕ຺ວາ ກຕປຸພ຺ພກິຈ຺ໂຈ ກມ຺ມຏ຺ຐານໍ ຄເຫຕ຺ວາ ສາເກເຕ ອຎ຺ຊນວເນ ວສຕິ. ອຖສ຺ສ ປິຕາ ‘‘ກິໍ ນຸ ໂຂ ມມ ປຸຕ຺ໂຕ ສາສເນ ອຠິຣໂຕ ວິຫຣຕິ, ອຸທາຫຸ ໂນ’’ຕິ ວີມໍສນຕ຺ຖໍ ‘‘ກຈ຺ຈິ ໂນ ວຕ຺ຖປສຸໂຕ’’ຕິ ຄາຖໍ ລິຂິຕ຺ວາ ເປເສສິ. ໂສ ຕໍ ວາເຈຕ຺ວາ, ‘‘ປິຕາ ເມ ປມາທວິຫາຣໍ ອາສງ຺ກຕິ, ອຫຎ຺ຈ ອຊ຺ຊາປິ ປຸຖຸຊ຺ຊນຠູມິໍ ນາຕິວຕ຺ໂຕ’’ຕິ ສໍເວຄຊາໂຕ ຆເຏນ຺ໂຕ ວາຍມນ຺ໂຕ ນຈິຣສ຺ເສວ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໐.໒໕-໓໐) –

‘‘ກິໍສຸກໍ ປຸປ຺ຜິຕໍ ທິສ຺ວາ, ປຄ຺ຄເຫຕ຺ວານ ອຎ຺ຊລິໍ;

ພຸທ຺ຘເສຏ຺ຐໍ ສຣິຕ຺ວານ, ອາກາເສ ອຠິປູຊຍິໍ.

‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

‘‘ເອກຕິໍເສ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ຎາຕີນໍ ວສນນຄຣໍ ຄນ຺ຕ຺ວາ ສາສນສ຺ສ ນິຍ຺ຍານິກຠາວໍ ປກາເສນ຺ໂຕ ອິທ຺ຘິປາຏິຫາຣິຍໍ ທສ຺ເສສິ. ຕໍ ທິສ຺ວາ ຎາຕກາ ປສນ຺ນມານສາ ພຫູ ສງ຺ຆາຣາເມ ກາເຣສຸໍ. ເຖໂຣປິ ສກປິຕຣາ ເປສິຕໍ ຄາຖໍ ອງ຺ກຸສໍ ກຕ຺ວາ ຆເຏນ຺ໂຕ ວາຍມນ຺ໂຕ ອຣຫຕ຺ຕໍ ສຈ຺ຉາກາສິ. ອຎ຺ຎໍ ພ຺ຍາກໂຣນ຺ໂຕປິ ປິຕຸປູຊນຕ຺ຖໍ ‘‘ກຈ຺ຈິ ໂນ ວຕ຺ຖປສຸໂຕ’’ຕິ ຕເມວ ຄາຖໍ ອຠາສິ.

໒໘. ຕຕ຺ຖ ກຈ຺ຈີຕິ ປຸຈ຺ຉາຍໍ ນິປາໂຕ. ໂນຕິ ປຏິເສເຘ. ວຕ຺ຖປສຸໂຕຕິ ວຕ຺ເຖ ປສຸໂຕ ວຕ຺ຖປສຸໂຕ, ຈີວຣມຓ຺ຑນາຠິຣໂຕ. ນິທສ຺ສນມຕ຺ຕຎ຺ເຈຕໍ ປຕ຺ຕມຓ຺ຑນາທິຈາປລ຺ລປຏິກ຺ເຂປສ຺ສາປິ ອຘິປ຺ເປຕຕ຺ຕາ. ‘‘ກຈ຺ຈິ ນ ວຕ຺ຖປສຸໂຕ’’ຕິປິ ປາໂຐ, ໂສ ເອວຕ຺ໂຖ. ຠູສນາຣໂຕຕິ ອຕ຺ຕຠາວວິຠູສນາຍ ຣໂຕ ອຠິຣໂຕ, ຍເຖກຈ຺ເຈ ປພ຺ພຊິຕ຺ວາປິ ຈປລາ ກາຍທຬ຺ຫິພຫຸລາ ຈີວຣາທິປຣິກ຺ຂາຣສ຺ສ ອຕ຺ຕໂນ ສຣີຣສ຺ສ ຈ ມຓ຺ຑນວິຠູສນຏ຺ຐານາຍ ຍຸຕ຺ຕາ ໂຫນ຺ຕິ. ກິເມວ ປຣິກ຺ຂາຣປສຸໂຕ ຠູສນາຣໂຕ ຈ ນາໂຫສີຕິ ອຍເມຕ຺ຖ ປທທ຺ວຍສ຺ສາປິ ອຕ຺ໂຖ. ສີລມຍໍ ຄນ຺ຘນ຺ຕິ ອຂຓ຺ຑາທິຠາວາປາທເນນ ສຸປຣິສຸທ຺ຘສ຺ສ ຈຕຸພ຺ພິຘສ຺ສປິ ສີລສ຺ສ ວເສນ ຍ຺ວາຍໍ ‘‘ໂຍ ຈ ສີລວຕໍ ປຊາຕິ ນ ອິຕຣາ ທຸສ຺ສີລປຊາ, ທຸສ຺ສີລຕ຺ຕາເຍວ ທຸສ຺ສິລ຺ຍມຍໍ ທຸຄ຺ຄນ຺ຘໍ ວາຍຕິ, ເອວໍ ຕ຺ວໍ ທຸຄ຺ຄນ຺ຘໍ ອວາຍິຕ຺ວາ ກຈ຺ຈິ ສີລມຍໍ ຄນ຺ຘໍ ວາຍສີຕິ ອຕ຺ໂຖ. ອຖ ວາ ເນຕຣາ ປຊາຕິ ນ ອິຕຣາ ທຸສ຺ສີລປຊາ, ຕໍ ກຈ຺ຈິ ນ ໂຫຕິ, ຍໂຕ ສີລມຍໍ ຄນ຺ຘໍ ວາຍສີຕິ ພ຺ຍຕິເຣເກນ ສີລຄນ຺ຘວາຍນເມວ ວິຠາເວຕິ.

ຊມ຺ພຸຄາມິຍປຸຕ຺ຕຕ຺ເຖຣຄາຖາວຓ຺ຓນາ ນິຏ຺ຐິຕາ.