໙. ກຸລຕ຺ເຖຣຄາຖາວຓ຺ຓນາ

ອຸທກຎ຺ຫິ ນຍນ຺ຕີຕິ ອາຍສ຺ມໂຕ ກຸລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍໍ ກິຣ ເຖໂຣ ປຸພ຺ເພປິ ວິວຏ຺ຏູປນິສ຺ສຍໍ ພຫຸໍ ກຸສລໍ ອຸປຈິນິຕ຺ວາ ອຘິກາຣສມ຺ປນ຺ໂນ ວິປສ຺ສິໍ ຠຄວນ຺ຕໍ ອາກາເສ ຄຈ຺ຉນ຺ຕໍ ທິສ຺ວາ ປສນ຺ນມານໂສ ນາຬິເກຣຜລໍ ທາຕຸກາໂມ ອຏ຺ຐາສິ. ສຕ຺ຖາ ຕສ຺ສ ຈິຕ຺ຕໍ ຎຕ຺ວາ ໂອຕຣິຕ຺ວາ ປຏິຄ຺ຄຓ຺ຫິ. ໂສ ອຕິວິຍ ປສນ຺ນຈິຕ຺ໂຕ ຫຸຕ຺ວາ ເຕເນວ ສທ຺ຘາປຏິລາເຠນ ສຕ຺ຖາຣໍ ອຸປສງ຺ກມິຕ຺ວາ ປພ຺ພຊ຺ຊໍ ຍາຈິ, ສຕ຺ຖາ ອຎ຺ຎຕຣໍ ຠິກ຺ຂຸໍ ອາຓາເປສິ – ‘‘ອິມໍ ປຸຣິສໍ ປພ຺ພາເຊຫີ’’ຕິ. ໂສ ປພ຺ພຊິຕ຺ວາ ລທ຺ຘູປສມ຺ປໂທ ສມຓຘມ຺ມໍ ກຕ຺ວາ ຕໂຕ ຈຸໂຕ ຉປິ ພຸທ຺ຘນ຺ຕຣານິ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕິ. ກຸໂລຕິສ຺ສ ນາມໍ ອໂຫສິ. ໂສ ວຍປ຺ປຕ຺ໂຕ ສາສເນ ລທ຺ຘປ຺ປສາໂທ ຠຄວໂຕ ສນ຺ຕິເກ ປພ຺ພຊິຕ຺ວາ ວິກ຺ເຂປພຫຸລຕາຍ ວິເສສໍ ນິພ຺ພຕ຺ເຕຕຸໍ ນາສກ຺ຂິ. ອເຖກທິວສໍ ຄາມໍ ປິຓ຺ຑາຍ ປວິສນ຺ໂຕ ອນ຺ຕຣາມຄ຺ເຄ ຠູມິໍ ຂຓິຕ຺ວາ ອຸທກວາຫກໍ ກຕ຺ວາ ອິຈ຺ຉິຕິຈ຺ຉິຕຏ຺ຐາເນ ອຸທກໍ ເນນ຺ເຕ ປຸຣິເສ ທິສ຺ວາ ຕໍ ສລ຺ລກ຺ເຂຕ຺ວາ ຄາມໍ ປວິຏ຺ໂຐ ອຎ຺ຎຕຣໍ ອຸສຸກາຣໍ ອຸສຸທຓ຺ຑກໍ ອຸສຸຍນ຺ເຕ ປກ຺ຂິປິຕ຺ວາ ອກ຺ຂິໂກຏິຍາ ໂອໂລເກຕ຺ວາ ອຸຊຸໍ ກໂຣນ຺ຕໍ ທິສ຺ວາ ຕມ຺ປິ ສລ຺ລກ຺ເຂຕ຺ວາ ຄຈ຺ຉນ຺ໂຕ ປຸຣໂຕ ຄນ຺ຕ຺ວາ ອຣເນມິນາຠິອາທິເກ ຣຖຈກ຺ກາວຍເວ ຕຈ຺ຉນ຺ເຕ ຕຈ຺ຉເກ ທິສ຺ວາ ຕມ຺ປິ ສລ຺ລກ຺ເຂຕ຺ວາ ວິຫາຣໍ ປວິສິຕ຺ວາ ກຕຠຕ຺ຕກິຈ຺ໂຈ ປຕ຺ຕຈີວຣໍ ປຏິສາເມຕ຺ວາ ທິວາວິຫາເຣ ນິສິນ຺ໂນ ອຕ຺ຕນາ ທິຏ຺ຐນິມິຕ຺ຕານິ ອຸປມາຠາເວນ ຄເຫຕ຺ວາ ອຕ຺ຕໂນ ຈິຕ຺ຕທມເນ ອຸປເນນ຺ໂຕ ‘‘ອເຈຕນໍ ອຸທກມ຺ປິ ມນຸສ຺ສາ ອິຈ຺ຉິກິຈ຺ຉິຕຏ຺ຐານໍ ນຍນ຺ຕິ ຕຖາ ອເຈຕນໍ ວງ຺ກມ຺ປິ ສຣທຓ຺ຑໍ ອຸປາເຍນ ນເມນ຺ໂຕ ອຸຊຸໍ ກໂຣນ຺ຕິ, ຕຖາ ອເຈຕນໍ ກຏ຺ຐກຬິງ຺ຄຣາທິໍ ຕຈ຺ຉກາ ເນມິອາທິວເສນ ວງ຺ກໍ ອຸຊຸຎ຺ຈ ກໂຣນ຺ຕິ. ອຖ ກສ຺ມາ ອຫໍ ສກຈິຕ຺ຕໍ ອຸຊຸໍ ນ ກຣິສ຺ສາມີ’’ຕິ ຈິນ຺ເຕຕ຺ວາ ວິປສ຺ສນໍ ປຏ຺ຐເປຕ຺ວາ ຆເຏນ຺ໂຕ ວາຍມນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໙໑-໙໙) –

‘‘ນຄເຣ ພນ຺ຘຸມຕິຍາ, ອາຣາມິໂກ ອຫໍ ຕທາ;

ອທ຺ທສໍ ວິຣຊໍ ພຸທ຺ຘໍ, ຄຈ຺ຉນ຺ຕໍ ອນິລຎ຺ຊເສ.

‘‘ນາຬິເກຣຜລໍ ຄຍ຺ຫ, ພຸທ຺ຘເສຏ຺ຐສ຺ສທາສຫໍ;

ອາກາເສ ຐິຕໂກ ສນ຺ໂຕ, ປຏິຄ຺ຄຓ຺ຫິ ມຫາຍໂສ.

‘‘ວິຕ຺ຕິສຎ຺ຊນໂນ ມຍ຺ຫໍ, ທິຏ຺ຐຘມ຺ມສຸຂາວໂຫ;

ຜລໍ ພຸທ຺ຘສ຺ສ ທຕ຺ວານ, ວິປ຺ປສນ຺ເນນ ເຈຕສາ.

‘‘ອຘິຄຈ຺ຉິໍ ຕທາ ປີຕິໍ, ວິປຸລຎ຺ຈ ສຸຂຸຕ຺ຕມໍ;

ອຸປ຺ປຊ຺ຊເຕວ ຣຕນໍ, ນິພ຺ພຕ຺ຕສ຺ສ ຕຫິໍ ຕຫິໍ.

‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ທິພ຺ພຈກ຺ຂຸ ວິສຸທ຺ຘໍ ເມ, ສມາຘິກຸສໂລ ອຫໍ;

ອຠິຎ຺ຎາປາຣມິປ຺ປຕ຺ໂຕ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ເອວໍ ຍານິ ນິມິຕ຺ຕານິ ອງ຺ກຸເສ ກຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ, ເຕຫິ ສທ຺ຘິໍ ອຕ຺ຕໂນ ຈິຕ຺ຕທມນໍ ສໍສນ຺ທິຕ຺ວາ ອຎ຺ຎໍ ພ຺ຍາກໂຣນ຺ໂຕ ‘‘ອຸທກຎ຺ຫິ ນຍນ຺ຕິ ເນຕ຺ຕິກາ’’ຕິ ຄາຖໍ ອຠາສິ.

໑໙. ຕຕ຺ຖ ອຸທກໍ ຫີຕິ ຫິ-ສທ຺ໂທ ນິປາຕມຕ຺ຕໍ. ນຍນ຺ຕີຕິ ປຖວິຍາ ຕໍ ຕໍ ຖລຏ຺ຐານໍ ຂຓິຕ຺ວາ ນິນ຺ນຏ຺ຐານໍ ປູເຣຕ຺ວາ ມາຕິກໍ ວາ ກຕ຺ວາ ຣຸກ຺ຂໂທຓິໍ ວາ ຐເປຕ຺ວາ ອຕ຺ຕໂນ ອິຈ຺ຉິຕິຈ຺ຉິຕຏ຺ຐານໍ ເນນ຺ຕິ. ຕຖາ ເຕ ເນນ຺ຕີຕິ ເນຕ຺ຕິກາ. ເຕຊນນ຺ຕິ ກຓ຺ຑໍ. ອິທໍ ວຸຕ຺ຕໍ ໂຫຕິ – ເນຕ຺ຕິກາ ອຕ຺ຕໂນ ຣຸຈິຍາ ອິຈ຺ຉິຕິຈ຺ຉິຕຏ຺ຐານໍ ອຸທກໍ ນຍນ຺ຕິ, ອຸສຸກາຣາປິ ຕາເປຕ຺ວາ ເຕຊນໍ ນມຍນ຺ຕິ ອຸຊຸໍ ກໂຣນ຺ຕິ. ນມນວເສນ ຕຈ຺ຉກາ ເນມິອາທີນໍ ອຕ຺ຖາຍ ຕຈ຺ຉນ຺ຕາ ທາຣຸໍ ນມຍນ຺ຕິ ອຕ຺ຕໂນ ຣຸຈິຍາ ອຸຊຸໍ ວາ ວງ຺ກໍ ວາ ກໂຣນ຺ຕິ. ເອວໍ ເອຕ຺ຕກໍ ອາຣມ຺ມຓໍ ກຕ຺ວາ ສຸພ຺ພຕາ ຍຖາສມາທິນ຺ເນນ ສີລາທິນາ ສຸນ຺ທຣວຕາ ຘີຣາ ໂສຕາປຕ຺ຕິມຄ຺ຄາທີນໍ ອຸປ຺ປາເທນ຺ຕາ ອຕ຺ຕານໍ ທເມນ຺ຕິ, ອຣຫຕ຺ຕໍ ປນ ປຕ຺ເຕສຸ ເອກນ຺ຕທນ຺ຕາ ນາມ ໂຫນ຺ຕີຕິ.

ກຸລຕ຺ເຖຣຄາຖາວຓ຺ຓນາ ນິຏ຺ຐິຕາ.