໑໐. ອຊິຕຕ຺ເຖຣຄາຖາວຓ຺ຓນາ

ມຣເຓ ເມ ຠຍໍ ນຕ຺ຖີຕິ ອາຍສ຺ມໂຕ ອຊິຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ໂສ ກິຣ ເອກນວຸເຕ ກປ຺ເປ ວິປສ຺ສິໍ ຠຄວນ຺ຕໍ ປສ຺ສິຕ຺ວາ ປສນ຺ນຈິຕ຺ໂຕ ກປິຕ຺ຖຜລໍ ອທາສິ. ຕໂຕ ປຣມ຺ປິ ຕໍ ຕໍ ປຸຎ຺ຎໍ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ກປ຺ເປ ອນຸປ຺ປນ຺ເນ ເອວ ອມ຺ຫາກໍ ສຕ຺ຖຣິ ສາວຕ຺ຖິຍໍ ມຫາໂກສລຣຎ຺ໂຎ ອຄ຺ຄາສນິຍສ຺ສ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ. ຕສ຺ສ ອຊິໂຕຕິ ນາມໍ ອໂຫສິ. ຕສ຺ມິຎ຺ຈ ສມເຍ ສາວຕ຺ຖິວາສີ ພາວຣີ ນາມ ພ຺ຣາຫ຺ມໂຓ ຕີຫິ ມຫາປຸຣິສລກ຺ຂເຓຫິ ສມນ຺ນາຄໂຕ ຕິຓ຺ຓໍ ເວທານໍ ປາຣຄູ ສາວຕ຺ຖິໂຕ ນິກ຺ຂມິຕ຺ວາ ຕາປສປພ຺ພຊ຺ຊໍ ປພ຺ພຊິຕ຺ວາ ໂຄຘາວຣີຕີເຣ ກປິຕ຺ຖາຣາເມ ວສຕິ. ອຖ ອຊິໂຕ ຕສ຺ສ ສນ຺ຕິເກ ປພ຺ພຊິໂຕ ອຕ຺ຖກາມາຍ ເທວຕາຍ ໂຈທິເຕນ ພາວຣິນາ ສຕ຺ຖຸ ສນ຺ຕິກໍ ເປສິໂຕ ຕິສ຺ສເມຕ຺ເຕຍ຺ຍາທີຫິ ສທ຺ຘິໍ ຠຄວນ຺ຕໍ ອຸປສງ຺ກມິຕ຺ວາ ມນສາວ ປຎ຺ເຫ ປຸຈ຺ຉິຕ຺ວາ ເຕສຸ ວິສ຺ສຊ຺ຊິເຕສຸ ປສນ຺ນຈິຕ຺ໂຕ ສຕ຺ຖຸ ສນ຺ຕິເກ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໒.໗-໑໑) –

‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ອາຫຸຕີນໍ ປຏິຄ຺ຄຫໍ;

ຣຖິຍໍ ປຏິປຊ຺ຊນ຺ຕໍ, ກປິຕ຺ຖໍ ອທທິໍ ຜລໍ.

‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ທທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ໂຕ ສີຫນາທໍ ນທນ຺ໂຕ ‘‘ມຣເຓ ເມ ຠຍໍ ນຕ຺ຖີ’’ຕິ ຄາຖໍ ອຠາສິ.

໒໐. ຕຕ຺ຖ ມຣເຓຕິ ມຣຓນິມິຕ຺ຕໍ ມຣຓເຫຕຸ. ເມຕິ ມຍ຺ຫໍ, ຠຍໍ ນຕ຺ຖິ ອຸຈ຺ຉິນ຺ນຠວມູລຕາຍ ປຣິກ຺ຂີຓຊາຕິກຕ຺ຕາ. ອນຸຈ຺ຉິນ຺ນຠວມູລານຎ຺ຫິ ‘‘ກີທິສີ ນຸ ໂຂ ມຍ຺ຫໍ ອາຍຕິໍ ອຸປ຺ປຕ຺ຕີ’’ຕິ ມຣຓໂຕ ຠຍໍ ຠເວຍ຺ຍ. ນິກນ຺ຕີຕິ ອເປກ຺ຂາ ຕຓ຺ຫາ, ສາ ນຕ຺ຖິ ຊີວິເຕ ສຸປຣິມທ຺ທິຕສງ຺ຂາຣຕາຍ ອຸປາທານກ຺ຂນ຺ຘານໍ ທຸກ຺ຂາສາຣກາທິຠາເວນ ສຸຏ຺ຐຸ ອຸປຏ຺ຐຫນໂຕ. ເອວໍຠູໂຕ ຈາຫໍ ສນ຺ເທຫໍ ສຣີຣໍ, ສກໍ ວາ ເທຫໍ ເທຫສງ຺ຂາຕໍ ທຸກ຺ຂຠາຣໍ ນິກ຺ຂິປິສ຺ສາມິ ຉຑ຺ເຑສ຺ສາມິ, ນິກ຺ຂິປນ຺ໂຕ ຈ ‘‘‘ອິມິນາ ສຣີຣເກນ ສາເຘຕພ຺ພໍ ສາຘິຕໍ, ອິທານິ ຕໍ ເອກໍເສນ ຉຑ຺ຑນີຍເມວາ’ຕິ ປຎ຺ຎາເວປຸລ຺ລປ຺ປຕ຺ຕິຍາ ສມ຺ປຊາໂນ ສຕິເວປຸລ຺ລປ຺ປຕ຺ຕິຍາ ປຏິສ຺ສໂຕ ນິກ຺ຂິປິສ຺ສາມີ’’ຕິ. ອິມໍ ປນ ຄາຖໍ ວຕ຺ວາ ເຖໂຣ ຌານໍ ສມາປຊ຺ຊິຕ຺ວາ ຕທນນ຺ຕຣໍ ປຣິນິພ຺ພາຍີຕິ.

ອຊິຕຕ຺ເຖຣຄາຖາວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.