໔. ສິວກສາມເຓຣຄາຖາວຓ຺ຓນາ

ອຸປຊ຺ຌາໂຍຕິ ສິວກສ຺ສ ສາມເຓຣສ຺ສ ຄາຖາ. ກາ ອຸປ຺ປຕ຺ຕິ? ໂສ ກິຣ ອິໂຕ ເອກຕິໍເສ ກປ຺ເປ ເວສ຺ສຠຸສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ເອກທິວສໍ ເກນຈິເທວ ກຣຓີເຍນ ອຣຎ຺ຎໍ ປວິຏ຺ໂຐ ຕຕ຺ຖ ປພ຺ພຕນ຺ຕເຣ ນິສິນ຺ນໍ ເວສ຺ສຠຸໍ ຠຄວນ຺ຕໍ ທິສ຺ວາ ປສນ຺ນຈິຕ຺ໂຕ ອຸປສງ຺ກມິຕ຺ວາ ວນ຺ທິຕ຺ວາ ອຎ຺ຊລິໍ ປຄ຺ຄຍ຺ຫ ອຏ຺ຐາສິ. ປຸນ ຕຕ຺ຖ ມໂນຫຣານິ ກາສຸມາຣິກຜລານິ ທິສ຺ວາ ຕານິ ຄເຫຕ຺ວາ ຠຄວໂຕ ອຸປເນສິ, ປຏິຄ຺ຄເຫສິ ຠຄວາ ອນຸກມ຺ປໍ ອຸປາທາຍ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ກສ຺ສປສ຺ສ ຠຄວໂຕ ສາສເນ ມາຕຸເລ ປພ຺ພຊນ຺ເຕ ເຕນ ສທ຺ຘິໍ ປພ຺ພຊິຕ຺ວາ ພຫຸໍ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ອິມສ຺ມິໍ ພຸທ຺ຘຸປ຺ປາເທ ວນວຈ຺ຉຕ຺ເຖຣສ຺ສ ຠາຄິເນຍ຺ໂຍ ຫຸຕ຺ວາ ນິພ຺ພຕ຺ໂຕ, ສິວໂກຕິສ຺ສ ນາມໍ ອໂຫສິ. ຕສ຺ສ ມາຕາ ອຕ຺ຕໂນ ເຊຏ຺ຐຠາຕິເກ ວນວຈ຺ເຉ ສາສເນ ປພ຺ພຊິຕ຺ວາ ປພ຺ພຊິຕກິຈ຺ຈໍ ມຕ຺ຖກໍ ປາເປຕ຺ວາ ອຣຎ຺ເຎ ວິຫຣນ຺ເຕ ຕໍ ປວຕ຺ຕິໍ ສຸຕ຺ວາ ປຸຕ຺ຕໍ ອາຫ – ‘‘ຕາຕ ສິວກ, ເຖຣສ຺ສ ສນ຺ຕິເກ ປພ຺ພຊິຕ຺ວາ ເຖຣໍ ອຸປຏ຺ຐຫ, ມຫລ຺ລໂກ ທານິ ເຖໂຣ’’ຕິ. ໂສ ມາຕຸ ເອກວຈເນເນວ ຈ ປຸພ຺ເພ ກຕາຘິກາຣຕາຍ ຈ ມາຕຸລຕ຺ເຖຣສ຺ສ ສນ຺ຕິກໍ ຄນ຺ຕ຺ວາ ປພ຺ພຊິຕ຺ວາ ຕໍ ອຸປຏ຺ຐຫນ຺ໂຕ ອຣຎ຺ເຎ ວສຕິ.

ຕສ຺ສ ເອກທິວສໍ ເກນຈິເທວ ກຣຓີເຍນ ຄາມນ຺ຕໍ ຄຕສ຺ສ ຂໂຣ ອາພາໂຘ ອຸປ຺ປຊ຺ຊິ. ມນຸສ຺ເສສຸ ເຠສຊ຺ຊໍ ກໂຣນ຺ເຕສຸປິ ນ ປຏິປ຺ປສ຺ສມ຺ຠິ. ຕສ຺ມິໍ ຈິຣາຍນ຺ເຕ ເຖໂຣ ‘‘ສາມເຓໂຣ ຈິຣາຍຕິ, ກິໍ ນຸ ໂຂ ກາຣຓ’’ນ຺ຕິ ຕຕ຺ຖ ຄນ຺ຕ຺ວາ ຕໍ ຄິລານໍ ທິສ຺ວາ ຕສ຺ສ ຕໍ ຕໍ ກຕ຺ຕພ຺ພຍຸຕ຺ຕກໍ ກໂຣນ຺ໂຕ ທິວສຠາຄໍ ວີຕິນາເມຕ຺ວາ ຣຕ຺ຕິຠາເຄ ພລວປຈ຺ຈູສເວລາຍໍ ອາຫ – ‘‘ສິວກ, ນ ມຍາ ປພ຺ພຊິຕກາລໂຕ ປຏ຺ຐາຍ ຄາເມ ວສິຕປຸພ຺ພໍ, ອິໂຕ ອຣຎ຺ຎເມວ ຄຈ຺ຉາມາ’’ຕິ. ຕໍ ສຸຕ຺ວາ ສິວໂກ ‘‘ຍທິປິ ເມ, ຠນ຺ເຕ, ອິທານິ ກາໂຍ ຄາມນ຺ເຕ ຐິໂຕ, ຈິຕ຺ຕໍ ປນ ອຣຎ຺ເຎ, ຕສ຺ມາ ສຍາໂນປິ ອຣຎ຺ຎເມວ ຄມິສ຺ສາມີ’’ຕິ, ຕໍ ສຸຕ຺ວາ ເຖໂຣ ຕໍ ພາຫາຍໍ ຄເຫຕ຺ວາ ອຣຎ຺ຎເມວ ເນຕ຺ວາ ໂອວາທໍ ອທາສິ. ໂສ ເຖຣສ຺ສ ໂອວາເທ ຐຕ຺ວາ ວິປສ຺ສິຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໓໘.໕໓-໕໘) –

‘‘ກຓິກາຣໍວ ໂຊຕນ຺ຕໍ, ນິສິນ຺ນໍ ປພ຺ພຕນ຺ຕເຣ;

ອທ຺ທສໍ ວິຣຊໍ ພຸທ຺ຘໍ, ໂລກເຊຏ຺ຐໍ ນຣາສຠໍ.

‘‘ປສນ຺ນຈິຕ຺ໂຕ ສຸມໂນ, ກິເຣ ກຕ຺ວານ ອຎ຺ຊລິໍ;

ກາສຸມາຣິກມາທາຍ, ພຸທ຺ຘເສຏ຺ຐສ຺ສທາສຫໍ.

‘‘ເອກຕິໍເສ ອິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ໂສ ອຣຫຕ຺ຕໍ ປຕ຺ວາ ອຸປຊ຺ຌາເຍນ ອຕ຺ຕນາ ຈ ວຸຕ຺ຕມຕ຺ຖໍ ສໍສນ຺ທິຕ຺ວາ ອຕ຺ຕໂນ ວິເວກາຠິຣຕິກຕໍ ກຕກິຈ຺ຈຕຎ຺ຈ ປເວເທນ຺ໂຕ ‘‘ອຸປຊ຺ຌາໂຍ ມໍ ອວຈາ’’ຕິ ຄາຖໍ ອຠາສິ.

໑໔. ຕຕ຺ຖ ອຸປຊ຺ຌາໂຍຕິ ວຊ຺ຊາວຊ຺ຊໍ ອຸປນິຊ຺ຌາຍຕິ ຫິເຕສິຕໍ ປຈ຺ຈຸປຏ຺ຐເປຕ຺ວາ ຎາຓຈກ຺ຂຸນາ ເປກ຺ຂຕີຕິ ອຸປຊ຺ຌາໂຍ. ມນ຺ຕິ ອຕ຺ຕານໍ ວທຕິ. ອວຈາຕິ ອຠາສິ. ອິໂຕ ຄຈ຺ຉາມ ສີວກາຕິ ວຸຕ຺ຕາກາຣທສ຺ສນໍ, ສິວກ, ອິໂຕ ຄາມນ຺ຕໂຕ ອຣຎ຺ຎຏ຺ຐານເມວ ເອຫິ ຄຈ຺ຉາມ, ຕເທວ ອມ຺ຫາກໍ ວສນໂຍຄ຺ຄນ຺ຕິ ອຘິປ຺ປາໂຍ. ເອວໍ ປນ ອຸປຊ຺ຌາເຍນ ວຸຕ຺ໂຕ ສິວໂກ ຠທ຺ໂຣ ອສ຺ສາຊານີໂຍ ວິຍ ກສາຠິຫໂຕ ສຎ຺ຊາຕສໍເວໂຄ ຫຸຕ຺ວາ ອຣຎ຺ຎເມວ ຄນ຺ຕຸກາມຕໍ ປເວເທນ຺ໂຕ –

‘‘ຄາເມ ເມ ວສຕິ ກາໂຍ, ອຣຎ຺ຎໍ ເມ ຄຕໍ ມໂນ;

ເສມານໂກປິ ຄຈ຺ຉາມິ, ນຕ຺ຖິ ສງ຺ໂຄ ວິຊານຕ’’ນ຺ຕິ. –ອາຫ;

ຕສ຺ສຕ຺ໂຖ – ຍສ຺ມາ ອິທານິ ຍທິປິ ເມ ອິທໍ ສຣີຣໍ ຄາມນ຺ເຕ ຐິຕໍ, ອຊ຺ຌາສໂຍ ປນ ອຣຎ຺ຎເມວ ຄໂຕ, ຕສ຺ມາ ເສມານໂກປິ ຄຈ຺ຉາມິ ເຄລຎ຺ເຎນ ຐານນິສຊ຺ຊາຄມເນສຸ ອສມຕ຺ຖຕາຍ ສຍາໂນປິ ອິມິນາ ສຍິຕາກາເຣນ ສຣີສໂປ ວິຍ ສຣີສປນ຺ໂຕ, ເອຖ, ຠນ຺ເຕ, ອຣຎ຺ຎເມວ ຄຈ຺ຉາມ, ກສ຺ມາ? ນຕ຺ຖິ ສງ຺ໂຄ ວິຊານຕນ຺ຕິ, ຍສ຺ມາ ຘມ຺ມສຠາວາ ກາເມສຸ ສໍສາເຣ ຈ ອາທີນວໍ, ເນກ຺ຂມ຺ເມ ນິພ຺ພາເນ ຈ ອານິສໍສໍ ຍາຖາວໂຕ ຊານນ຺ຕສ຺ສ ນ ກຕ຺ຖຈິ ສງ຺ໂຄ, ຕສ຺ມາ ເອກປເທເນວ ອຸປຊ຺ຌາຍສ຺ສ ອາຓາ ອນຸຐິຕາຕິ, ຕທປເທເສນ ອຎ຺ຎໍ ພ຺ຍາກາສິ.

ສິວກສາມເຓຣຄາຖາວຓ຺ຓນາ ນິຏ຺ຐິຕາ.