໒. ມຫາວຈ຺ຉຕ຺ເຖຣຄາຖາວຓ຺ຓນາ

ປຎ຺ຎາພລີຕິ ອາຍສ຺ມໂຕ ມຫາວຈ຺ຉຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍໍ ກິຣ ປທຸມຸຕ຺ຕຣສ຺ສ ຠຄວໂຕ ຠິກ຺ຂຸສງ຺ຆສ຺ສ ຈ ປານີຍທານມທາສິ. ປຸນ ສິຂິສ຺ສ ຠຄວໂຕ ກາເລ ອຸປາສໂກ ຫຸຕ຺ວາ ວິວຏ຺ຏູປນິສ຺ສຍໍ ພຫຸໍ ປຸຎ຺ຎກມ຺ມໍ ອກາສິ, ໂສ ເຕຫິ ປຸຎ຺ຎກມ຺ເມຫິ ຕຕ຺ຖ ຕຕ຺ຖ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ມຄຘຣຏ຺ເຐ ນາຬກຄາເມ ສມິທ຺ຘິສ຺ສ ນາມ ພ຺ຣາຫ຺ມຓສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ. ຕສ຺ສ ມຫາວຈ຺ໂຉຕິ ນາມໍ ອໂຫສິ. ໂສ ວຍປ຺ປຕ຺ໂຕ ອາຍສ຺ມໂຕ ສາຣິປຸຕ຺ຕສ຺ສ ຠຄວໂຕ ສາວກຠາວໍ ສຸຕ຺ວາ ‘‘ໂສປິ ນາມ ມຫາປຎ຺ໂຎ. ຍສ຺ສ ສາວກຕ຺ຕໍ ອຸປາຄໂຕ, ໂສ ເອວ ມຎ຺ເຎ ອິມສ຺ມິໍ ໂລເກ ອຄ຺ຄປຸຄ຺ຄໂລ’’ຕິ ຠຄວຕິ ສທ຺ຘໍ ອຸປ຺ປາເທຕ຺ວາ ສຕ຺ຖຸ ສນ຺ຕິເກ ປພ຺ພຊິຕ຺ວາ ກມ຺ມຏ຺ຐານໍ ອນຸຍຸຎ຺ຊນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໐.໕໑-໕໖) –

‘‘ປທຸມຸຕ຺ຕຣພຸທ຺ຘສ຺ສ, ຠິກ຺ຂຸສງ຺ເຆ ອນຸຕ຺ຕເຣ;

ປສນ຺ນຈິຕ຺ໂຕ ສຸມໂນ, ປານີຍຆຏມປູຣຍິໍ.

‘‘ປພ຺ພຕຄ຺ເຄ ທຸມຄ຺ເຄ ວາ, ອາກາເສ ວາຖ ຠູມິຍໍ;

ຍທາ ປານີຍມິຈ຺ຉາມິ, ຂິປ຺ປໍ ນິພ຺ພຕ຺ຕເຕ ມມ.

‘‘ສຕສຫສ຺ສິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ທກທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ຠວາ ສພ຺ເພ ສມູຫຕາ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນ’’ນ຺ຕິ.

ເອວໍ ປນ ອຣຫຕ຺ຕໍ ປຕ຺ວາ ວິມຸຕ຺ຕິສຸຂໍ ອນຸຠວນ຺ໂຕ ສາສນສ຺ສ ນິຍ຺ຍານິກຠາວວິຠາວເນນ ສພ຺ຣຫ຺ມຈາຣີນໍ ອຸສ຺ສາຫຊນນຕ຺ຖໍ ‘‘ປຎ຺ຎາພລີ’’ຕິ ຄາຖໍ ອຠາສິ.

໑໒. ຕຕ຺ຖ ປຎ຺ຎາພລີຕິ ປາຣິຫາຣິຍປຎ຺ຎາຍ ວິປສ຺ສນາປຎ຺ຎາຍ ຈ ວເສນ ອຠິຓ຺ຫໂສ ສາຕິສເຍນ ປຎ຺ຎາພເລນ ສມນ຺ນາຄໂຕ. ສີລວຕູປປນ຺ໂນຕິ ອຸກ຺ກໍສຄເຕນ ຈຕຸປາຣິສຸທ຺ຘິສີເລນ, ຘຸຕຘມ຺ມສງ຺ຂາເຕຫິ ວເຕຫິ ຈ ອຸປປນ຺ໂນ ສມນ຺ນາຄໂຕ. ສມາຫິໂຕຕິ ອຸປຈາຣປ຺ປນາເຠເທນ ສມາຘິນາ ສມາຫິໂຕ. ຌານຣໂຕຕິ ຕໂຕ ເອວ ອາຣມ຺ມຓູປນິຊ຺ຌາເນ ລກ຺ຂຓູປນິຊ຺ຌາເນ ຈ ຣໂຕ ສຕຕາຠິຍຸຕ຺ໂຕ. ສພ຺ພກາລໍ ສຕິຍາ ອວິປ຺ປວາສວເສນ ສຕິມາ. ຍທຕ຺ຖິຍນ຺ຕິ ອຕ຺ຖໂຕ ອນເປຕໍ ອຕ຺ຖິຍໍ, ເຍນ ອຕ຺ຖິຍໍ ຍທຕ຺ຖິຍໍ. ຍຖາ ປຈ຺ຈເຍ ປຣິຠຸຎ຺ຊນ຺ຕສ຺ສ ປຣິຠຸຎ຺ຊນໍ ອຕ຺ຖິຍໍ ໂຫຕິ, ຕຖາ ໂຠຊນໍ ຠຸຎ຺ຊມາໂນ. ສາມິປຣິໂຠເຄນ ຫິ ຕໍ ອຕ຺ຖິຍໍ ໂຫຕິ ທາຍຊ຺ຊປຣິໂຠເຄນ ວາ, ນ ອຎ຺ຎຖາ ໂຠຊນນ຺ຕິ ຈ ນິທສ຺ສນມຕ຺ຕໍ ທຏ຺ຐພ຺ພໍ. ຠຸຎ຺ຊິຍຕິ ປຣິຠຸຎ຺ຊິຍຕີຕິ ວາ ໂຠຊນໍ, ຈຕ຺ຕາໂຣ ປຈ຺ຈຍາ. ‘‘ຍທຕ຺ຖິກ’’ນ຺ຕິ ວາ ປາໂຐ. ຍທຕ຺ຖໍ ຍສ຺ສຕ຺ຖາຍ ສຕ຺ຖາຣາ ປຈ຺ຈຍາ ອນຸຎ຺ຎາຕາ, ຕທຕ຺ຖໍ ກາຍສ຺ສ ຐິຕິອາທິອຕ຺ຖໍ, ຕຎ຺ຈ ອນຸປາທິເສສນິພ຺ພານຕ຺ຖໍ. ຕສ຺ມາ ອນຸປາທາປຣິນິພ຺ພານຕ຺ຖໍ ໂຠຊນປຈ຺ຈເຍ ຠຸຎ຺ຊມາໂນ ຕໂຕ ເອວ ກງ຺ເຂຖ ກາລໍ ອຕ຺ຕໂນ ອນຸປາທາປຣິນິພ຺ພານກາລໍ ອາຄເມຍ຺ຍ. ອິຘ ອິມສ຺ມິໍ ສາສເນ ວີຕຣາໂຄ. ພາຫິຣກສ຺ສ ປນ ກາເມສຸ ວີຕຣາຄສ຺ສ ອິທໍ ນຕ຺ຖີຕິ ອຘິປ຺ປາໂຍ.

ມຫາວຈ຺ຉຕ຺ເຖຣຄາຖາວຓ຺ຓນາ ນິຏ຺ຐິຕາ.