໙. ວຊ຺ຊິປຸຕ຺ຕຕ຺ເຖຣຄາຖາວຓ຺ຓນາ

ຣຸກ຺ຂມູລຄຫນໍ ປສກ຺ກິຍາຕິ ອາຍສ຺ມໂຕ ວຊ຺ຊິປຸຕ຺ຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ອິໂຕ ຈຕຸນວຸເຕ ກປ຺ເປ ເອກໍ ປຈ຺ເຈກສມ຺ພຸທ຺ຘໍ ຠິກ຺ຂາຍ ຄຈ຺ຉນ຺ຕໍ ທິສ຺ວາ ປສນ຺ນມານໂສ ກທລິຜລານິ ອທາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ເວສາລິຍໍ ລິຈ຺ຉວິຣາຊປຸຕ຺ໂຕ ຫຸຕ຺ວາ ນິພ຺ພຕ຺ຕິ, ວຊ຺ຊິຣາຊປຸຕ຺ຕຕ຺ຕາ ວຊ຺ຊິປຸຕ຺ໂຕຕ຺ເວວ ຈສ຺ສ ສມຎ຺ຎາ ອໂຫສິ. ໂສ ທຫໂຣ ຫຸຕ຺ວາ ຫຕ຺ຖິສິກ຺ຂາທິສິກ຺ຂນກາເລປິ ເຫຕຸສມ຺ປນ຺ນຕາຍ ນິສ຺ສຣຓຊ຺ຌາສໂຍວ ຫຸຕ຺ວາ ວິຈຣນ຺ໂຕ ສຕ຺ຖຸ ຘມ຺ມເທສນາກາເລ ວິຫາຣໍ ຄນ຺ຕ຺ວາ ປຣິສປຣິຍນ຺ເຕ ນິສິນ຺ໂນ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ສຕ຺ຖຸ ສນ຺ຕິເກ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໕໗-໖໒) –

‘‘ສຫສ຺ສຣໍສີ ຠຄວາ, ສຍມ຺ຠູ ອປຣາຊິໂຕ;

ວິເວກາ ວຸຏ຺ຐຫິຕ຺ວານ, ໂຄຈຣາຍາຠິນິກ຺ຂມິ.

‘‘ຜລຫຕ຺ໂຖ ອຫໍ ທິສ຺ວາ, ອຸປຄຈ຺ຉິໍ ນຣາສຠໍ;

ປສນ຺ນຈິຕ຺ໂຕ ສຸມໂນ, ອວຏໍ ອທທິໍ ຜລໍ.

‘‘ຈຕຸນ຺ນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ອປຣຠາເຄ ອຈິຣປຣິນິພ຺ພຸເຕ ສຕ຺ຖຣິ ຘມ຺ມໍ ສງ຺ຄາຍິຕຸໍ ສງ຺ເກຕໍ ກຕ຺ວາ ມຫາເຖເຣສຸ ຕຕ຺ຖ ຕຕ຺ຖ ວິຫຣນ຺ເຕສຸ ເອກທິວສໍ ອາຍສ຺ມນ຺ຕໍ ອານນ຺ທໍ ເສຂໍເຍວ ສມານໍ ມຫຕິຍາ ປຣິສາຍ ປຣິວຸຕໍ ຘມ຺ມໍ ເທເສນ຺ຕໍ ທິສ຺ວາ ຕສ຺ສ ອຸປຣິມຄ຺ຄາຘິຄມາຍ ອຸສ຺ສາຫໍ ຊເນນ຺ໂຕ –

໑໑໙. ‘‘ຣຸກ຺ຂມູລຄຫນໍ ປສກ຺ກິຍ, ນິພ຺ພານໍ ຫທຍສ຺ມິໍ ໂອປິຍ;

ຌາຍ ໂຄຕມ ມາ ຈ ປມາໂທ, ກິໍ ເຕ ພິຬິພິຬິກາ ກຣິສ຺ສຕີ’’ຕິ. –

ຄາຖໍ ອຠາສິ.

ຕຕ຺ຖ ຣຸກ຺ຂມູລຄຫນນ຺ຕິ ຣຸກ຺ຂມູລຠູຕໍ ຄຫນໍ, ຄຫນຎ຺ຫິ ອຕ຺ຖິ, ນ ຣຸກ຺ຂມູລໍ, ຣຸກ຺ຂມູລຎ຺ຈ ອຕ຺ຖິ, ນ ຄຫນໍ, ເຕສຸ ຣຸກ຺ຂມູລຄ຺ຄຫເຓນ ຐານສ຺ສ ຉາຍາສມ຺ປນ຺ນຕາຍ ວາຕາຕປປຣິສ຺ສຍາຠາວໍ ທສ຺ເສຕິ. ຄຫນຄ຺ຄຫເຓນ ນິວາຕຠາເວນ ວາຕປຣິສ຺ສຍາຠາວໍ ຊນສມ຺ພາຘາຠາວຎ຺ຈ ທສ຺ເສຕິ, ຕທຸຠເຍນ ຈ ຠາວນາໂຍຄ຺ຍຕໍ. ປສກ຺ກິຍາຕິ ອຸປຄນ຺ຕ຺ວາ. ນິພ຺ພານໍ ຫທຍສ຺ມິໍ ໂອປິຍາຕິ ‘‘ເອວໍ ມຍາ ປຏິປຊ຺ຊິຕ຺ວາ ນິພ຺ພານໍ ອຘິຄນ຺ຕພ຺ພ’’ນ຺ຕິ ນິພ຺ພຸຕິໍ ຫທເຍ ຐເປຕ຺ວາ ຈິຕ຺ເຕ ກຣິຕ຺ວາ. ຌາຍາຕິ ລກ຺ຂຓູປນິຊ຺ຌາເນນ ຌາຍ, ວິປສ຺ສນາຠາວນາສຫິຕໍ ມຄ຺ຄຠາວນໍ ຠາເວຫິ. ໂຄຕມາຕິ ຘມ຺ມຠຓ຺ຑາຄາຣິກໍ ໂຄຕ຺ເຕນ ອາລປຕິ. ມາ ຈ ປມາໂທຕິ ອຘິກຸສເລສຸ ຘມ຺ເມສຸ ມາ ປມາທໍ ອາປຊ຺ຊິ. ອິທານິ ຍາທິໂສ ເຖຣສ຺ສ ປມາໂທ, ຕໍ ປຏິກ຺ເຂປວເສນ ທສ຺ເສນ຺ໂຕ ‘‘ກິໍ ເຕ ພິຬິພິຬິກາ ກຣິສ຺ສຕີ’’ຕິ ອາຫ. ຕຕ຺ຖ ພິຬິພິຬິກາຕິ ວິຬິວິຬິກິຣິຍາ, ພິຬິພິຬີຕິ ສທ຺ທປວຕ຺ຕິ ຍຖາ ນິຣຕ຺ຖກາ, ເອວໍ ພິຬິພິຬິກາສທິສາ ຊນປຎ຺ຎຕ຺ຕິ ກິໍ ເຕ ກຣິສ຺ສຕິ ກີທິສໍ ອຕ຺ຖໍ ຕຸຍ຺ຫໍ ສາເຘຕິ, ຕສ຺ມາ ຊນປຎ຺ຎຕ຺ຕິໍ ປຫາຍ ສທຕ຺ຖປສຸໂຕ ໂຫຫີຕິ ໂອວາທໍ ອທາສິ.

ຕໍ ສຸຕ຺ວາ ອຎ຺ເຎຫິ ວຸຕ຺ຕວິສຄນ຺ຘວາຍນວຈເນນ ສໍເວຄຊາໂຕ ພຫຸເທວ ຣຕ຺ຕິໍ ຈງ຺ກເມນ ວີຕິນາເມນ຺ໂຕ ວິປສ຺ສນໍ ອຸສ຺ສຸກ຺ກາເປຕ຺ວາ ເສນາສນໍ ປວິສິຕ຺ວາ ມຎ຺ຈເກ ນິປນ຺ນມຕ຺ໂຕວ ອຣຫຕ຺ຕໍ ປາປຸຓິ.

ວຊ຺ຊິປຸຕ຺ຕຕ຺ເຖຣຄາຖາວຓ຺ຓນາ ນິຏ຺ຐິຕາ.