໑໐. ອິສິທຕ຺ຕຕ຺ເຖຣຄາຖາວຓ຺ຓນາ

ປຎ຺ຈກ຺ຂນ຺ຘາ ປຣິຎ຺ຎາຕາຕິ ອາຍສ຺ມໂຕ ອິສິທຕ຺ຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ຠຄວນ຺ຕໍ ຣຖິຍໍ ຄຈ຺ຉນ຺ຕໍ ທິສ຺ວາ ປສນ຺ນມານໂສ ມຘຸຣໍ ອາໂມທຜລໍ ອທາສິ. ໂສ ເຕນ ປຸຎ຺ຎກມ຺ເມນ ເທວໂລເກ ນິພ຺ພຕ຺ຕິຕ຺ວາ ອປຣາປຣໍ ປຸຎ຺ຎານິ ກຕ຺ວາ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ອວນ຺ຕິຣຏ຺ເຐ ວຑ຺ຒຄາເມ ອຎ຺ຎຕຣສ຺ສ ສຕ຺ຖວາຫສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ, ອິສິທຕ຺ໂຕຕິສ຺ສ ນາມໍ ອໂຫສິ. ໂສ ວຍປ຺ປຕ຺ໂຕ ມຈ຺ຉິກາສຓ຺ເຑ ຈິຕ຺ຕສ຺ສ ຄຫປຕິໂນ ອທິຏ຺ຐສຫາໂຍ ຫຸຕ຺ວາ ເຕນ ພຸທ຺ຘຄຸເຓ ລິຂິຕ຺ວາ ເປສິຕສາສນໍ ປຏິລຠິຕ຺ວາ ສາສເນ ສຎ຺ຊາຕປ຺ປສາໂທ ເຖຣສ຺ສ ມຫາກຈ຺ຈານສ຺ສ ສນ຺ຕິເກ ປພ຺ພຊິຕ຺ວາ ວິປສ຺ສນໍ ອາຣຠິຕ຺ວາ ນຈິຣສ຺ເສວ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໘໐-໘໔) –

‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ອາຫຸຕີນໍ ປຏິຄ຺ຄຫໍ;

ຣຖິຍໍ ປຏິປຊ຺ຊນ຺ຕໍ, ອາໂມທມທທິໍ ຜລໍ.

‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ‘‘ພຸທ຺ຘຸປຏ຺ຐານໍ ຄມິສ຺ສາມີ’’ຕິ ເຖຣໍ ອາປຸຈ຺ຉິຕ຺ວາ ອນຸກ຺ກເມນ ມຊ຺ຌິມເທສໍ ຄນ຺ຕ຺ວາ ສຕ຺ຖາຣໍ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສິນ຺ໂນ, ‘‘ກຈ຺ຈິ, ຠິກ຺ຂຸ, ຂມນີຍໍ, ກຈ຺ຈິ ຍາປນີຍ’’ນ຺ຕິອາທິນາ ສຕ຺ຖາຣາ ກຕປຏິສນ຺ຖາໂຣ ປຏິວຈນມຸເຂນ, ‘‘ຠຄວາ ຕຸມ຺ຫາກໍ ສາສນໍ ອຸປຄຕກາລໂຕ ປຏ຺ຐາຍ ມຍ຺ຫໍ ສພ຺ພທຸກ຺ຂໍ ອປຄຕໍ, ສພ຺ໂພ ປຣິສ຺ສໂຍ ວູປສນ຺ໂຕ’’ຕິ ປເວທນວເສນ ອຎ຺ຎໍ ພ຺ຍາກໂຣນ຺ໂຕ –

໑໒໐. ‘‘ປຎ຺ຈກ຺ຂນ຺ຘາ ປຣິຎ຺ຎາຕາ, ຕິຏ຺ຐນ຺ຕິ ຉິນ຺ນມູລກາ;

ທຸກ຺ຂກ຺ຂໂຍ ອນຸປ຺ປຕ຺ໂຕ, ປຕ຺ໂຕ ເມ ອາສວກ຺ຂໂຍ’’ຕິ. – ຄາຖໍ ອຠາສິ;

ຕຕ຺ຖ ປຎ຺ຈກ຺ຂນ຺ຘາ ປຣິຎ຺ຎາຕາຕິ ປຎ຺ຈປິ ເມ ອຸປາທານກ຺ຂນ຺ຘາ ວິປສ຺ສນາປຎ຺ຎາສຫິຕາຍ ມຄ຺ຄປຎ຺ຎາຍ ‘‘ອິທໍ ທຸກ຺ຂໍ, ເອຕ຺ຕກໍ ທຸກ຺ຂໍ, ນ ອິໂຕ ຠິຍ຺ໂຍ’’ຕິ ສພ຺ພໂສ ປຣິຈ຺ຉິຊ຺ຊ ຎາຕາ, ນ ເຕສຸ ກິຎ຺ຈິປິ ປຣິຎ຺ຎາຕພ຺ພໍ ອຕ຺ຖີຕິ ອຘິປ຺ປາໂຍ. ຕິຏ຺ຐນ຺ຕິ ຉິນ຺ນມູລກາຕິ ສພ຺ພໂສ ປຣິຎ຺ຎາຕຕ຺ຕາ ເອວ ເຕສໍ ອວິຊ຺ຊາຕຓ຺ຫາທິກສ຺ສ ມູລສ຺ສ ສມຸຈ຺ຉິນ຺ນຕ຺ຕາ ອຣິຍມຄ຺ເຄນ ປຫີນຕ຺ຕາ ຍາວຈຣິມຈິຕ຺ຕນິໂຣຘາ ເຕ ຕິຏ຺ຐນ຺ຕິ. ທຸກ຺ຂກ຺ຂໂຍ ອນຸປ຺ປຕ຺ໂຕຕິ ຉິນ຺ນມູລກຕ຺ຕາເຍວ ຈ ເນສໍ ວຏ຺ຏທຸກ຺ຂສ຺ສ ຂໂຍ ປຣິກ຺ຂໂຍ ອນຸປ຺ປຕ຺ໂຕ, ນິພ຺ພານໍ ອຘິຄຕໍ. ປຕ຺ໂຕ ເມ ອາສວກ຺ຂໂຍຕິ ກາມາສວາທີນໍ ສພ຺ເພສໍ ອາສວານໍ ຂຍນ຺ເຕ ອຠິຄນ຺ຕພ຺ພຕາຍ ‘‘ອາສວກ຺ຂໂຍ’’ຕິ ລທ຺ຘນາມໍ ອຣຫຕ຺ຕໍ ປຕ຺ຕໍ ປຏິລທ຺ຘນ຺ຕິ ອຕ຺ໂຖ. ເກຈິ ປນ ອນ຺ຕິມາຍໍ ສມຸສ຺ສໂຍ’’ຕິ ປຐນ຺ຕິ. ນິພ຺ພານສ຺ສ ອຘິຄຕຕ຺ຕາເຍວ ອຍໍ ມມ ສມຸສ຺ສໂຍ ອຕ຺ຕຠາໂວ ອນ຺ຕິໂມ ສພ຺ພປຈ຺ຉິມໂກ, ນຕ຺ຖິ ທານິ ປຸນພ຺ຠໂວຕິ ອຕ຺ໂຖ. ຍໍ ປນ ຕຕ຺ຖ ຕຕ຺ຖ ອວຸຕ຺ຕໍ, ຕໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານໍເຍວາຕິ.

ອິສິທຕ຺ຕຕ຺ເຖຣຄາຖາວຓ຺ຓນາ ນິຏ຺ຐິຕາ.

ທ຺ວາທສມວຄ຺ຄວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ປຣມຕ຺ຖທີປນິຍໍ ເຖຣຄາຖາວຓ຺ຓນາຍໍ

ວີສາຘິກສຕຕ຺ເຖຣຄາຖາປຏິມຓ຺ຑິຕສ຺ສ ເອກກນິປາຕສ຺ສ

ອຕ຺ຖວຓ຺ຓນາ.