໖. ປາຣາປຣິຍຕ຺ເຖຣຄາຖາວຓ຺ຓນາ

ຉຜສ຺ສາຍຕເນ ຫິຕ຺ວາຕິ ອາຍສ຺ມໂຕ ປາຣາປຣິຍຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ປິຍທສ຺ສິສ຺ສ ຠຄວໂຕ ກາເລ ເນສາທໂຍນິຍໍ ນິພ຺ພຕ຺ຕິຕ຺ວາ ຕສ຺ສ ວິຎ຺ຎຸຕໍ ປຕ຺ຕສ຺ສ ວິຈຣຓຏ຺ຐາເນ ອຎ຺ຎຕຣສ຺ມິໍ ວນສຓ຺ເຑ ປິຍທສ຺ສີ ຠຄວາ ຕໍ ອນຸຄ຺ຄຓ຺ຫິຕຸໍ ນິໂຣຘສມາປຕ຺ຕິໍ ສມາປຊ຺ຊິຕ຺ວາ ນິສີທິ. ໂສ ຈ ມິເຄ ປຣິເຍສນ຺ໂຕ ຕໍ ຐານໍ ຄໂຕ ສຕ຺ຖາຣໍ ທິສ຺ວາ ປສນ຺ນມານໂສ ຠຄວນ຺ຕໍ ອນ຺ໂຕ ກຕ຺ວາ ກຕໍ ສາຂາມຓ຺ຑປໍ ປທຸມປຸປ຺ເຜຫິ ກູຏາຄາຣາກາເຣນ ສຎ຺ຉາເທຕ຺ວາ ອຸຬາຣໍ ປີຕິໂສມນສ຺ສໍ ປຏິສໍເວເທນ຺ໂຕ ສຕ຺ຕາຫໍ ນມສ຺ສມາໂນ ອຏ຺ຐາສິ. ທິວເສ ທິວເສ ຈ ມິລາຕມິລາຕານິ ອປເນຕ຺ວາ ອຠິນເວຫິ ຉາເທສິ. ສຕ຺ຖາ ສຕ຺ຕາຫສ຺ສ ອຈ຺ຈເຍນ ນິໂຣຘໂຕ ວຸຏ຺ຐຫິຕ຺ວາ ຠິກ຺ຂຸສງ຺ຆໍ ອນຸສ຺ສຣິ. ຕາວເທວ ອສີຕິສຫສ຺ສມຕ຺ຕາ ຠິກ຺ຂູ ສຕ຺ຖາຣໍ ປຣິວາເຣສຸໍ. ‘‘ມຘຸຣຘມ຺ມກຖໍ ສຸຓິສ຺ສາມາ’’ຕິ ເທວຕາ ສນ຺ນິປຕິໍສຸ, ມຫາ ສມາຄໂມ ອໂຫສິ. ສຕ຺ຖາ ອນຸໂມທນໍ ກໂຣນ຺ໂຕ ຕສ຺ສ ເທວມນຸສ຺ເສສຸ ຠາວິນິໍ ສມ຺ປຕ຺ຕິໍ ອິມສ຺ມິໍ ພຸທ຺ຘຸປ຺ປາເທ ສາວກໂພຘິຎ຺ຈ ພ຺ຍາກຣິຕ຺ວາ ປກ຺ກາມິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຕິຓ຺ຓໍ ເວທານໍ ປາຣຄູ ຫຸຕ຺ວາ ປຣາປຣໂຄຕ຺ຕຕາຍ ປາຣາປຣິໂຍຕິ ລທ຺ຘສມຎ຺ໂຎ ພຫູ ພ຺ຣາຫ຺ມເຓ ມນ຺ເຕ ວາເຈນ຺ໂຕ ສຕ຺ຖຸ ຣາຊຄຫຄມເນ ພຸທ຺ຘານຸຠາວໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໔໐.໓໕໓-໓໘໕) –

‘‘ປິຍທສ຺ສີ ນາມ ຠຄວາ, ສຍມ຺ຠູ ໂລກນາຍໂກ;

ວິເວກກາໂມ ສມ຺ພຸທ຺ໂຘ, ສມາຘິກຸສໂລ ມຸນິ.

‘‘ວນສຓ຺ຑໍ ສໂມຄ຺ຄຍ຺ຫ, ປິຍທສ຺ສີ ມຫາມຸນິ;

ປໍສຸກູລໍ ປຕ຺ຖຣິຕ຺ວາ, ນິສີທິ ປຸຣິສຸຕ຺ຕໂມ.

‘‘ມິຄລຸທ຺ໂທ ປຸເຣ ອາສິໍ, ອຣຎ຺ເຎ ການເນ ອຫໍ;

ປສທໍ ມິຄເມສນ຺ໂຕ, ອາຫິຓ຺ຑາມິ ອຫໍ ຕທາ.

‘‘ຕຕ຺ຖທ຺ທສາສິໍ ສມ຺ພຸທ຺ຘໍ, ໂອຆຕິຓ຺ຓມນາສວໍ;

ປຸປ຺ຜິຕໍ ສາລຣາຊໍວ, ສຕຣໍສິໍວ ອຸຄ຺ຄຕໍ.

‘‘ທິສ຺ວານຫໍ ເທວເທວໍ, ປິຍທສ຺ສິໍ ມຫາຍສໍ;

ຊາຕສ຺ສຣໍ ສໂມຄ຺ຄຍ຺ຫ, ປທຸມໍ ອາຫຣິໍ ຕທາ.

‘‘ອາຫຣິຕ຺ວານ ປທຸມໍ, ສຕປຕ຺ຕໍ ມໂນຣມໍ;

ກູຏາຄາຣໍ ກຣິຕ຺ວານ, ຉາທຍິໍ ປທຸເມນຫໍ.

‘‘ອນຸກມ຺ປໂກ ກາຣຸຓິໂກ, ປິຍທສ຺ສີ ມຫາມຸນິ;

ສຕ຺ຕຣຕ຺ຕິນ຺ທິວໍ ພຸທ຺ໂຘ, ກູຏາຄາເຣ ວສີ ຊິໂນ.

‘‘ປຸຣາຓໍ ຉຑ຺ຑຍິຕ຺ວານ, ນເວນ ຉາທຍິໍ ອຫໍ;

ອຎ຺ຊລິໍ ປຄ຺ຄເຫຕ຺ວານ, ອຏ຺ຐາສິໍ ຕາວເທ ອຫໍ.

‘‘ວຸຏ຺ຐຫິຕ຺ວາ ສມາຘິມ຺ຫາ, ປິຍທສ຺ສີ ມຫາມຸນິ;

ທິສໍ ອນຸວິໂລເກນ຺ໂຕ, ນິສີທິ ໂລກນາຍໂກ.

‘‘ຕທາ ສຸທສ຺ສໂນ ນາມ, ອຸປຏ຺ຐາໂກ ມຫິທ຺ຘິໂກ;

ຈິຕ຺ຕມຎ຺ຎາຍ ພຸທ຺ຘສ຺ສ, ປິຍທສ຺ສິສ຺ສ ສຕ຺ຖຸໂນ.

‘‘ອສີຕິຍາ ສຫສ຺ເສຫິ, ຠິກ຺ຂູຫິ ປຣິວາຣິໂຕ;

ວນນ຺ເຕ ສຸຂມາສີນໍ, ອຸເປສິ ໂລກນາຍກໍ.

‘‘ຍາວຕາ ວນສຓ຺ຑມ຺ຫິ, ອຘິວຕ຺ຖາ ຈ ເທວຕາ;

ພຸທ຺ຘສ຺ສ ຈິຕ຺ຕມຎ຺ຎາຍ, ສພ຺ເພ ສນ຺ນິປຕຸໍ ຕທາ.

‘‘ສມາຄເຕສຸ ຍກ຺ເຂສຸ, ກຸມ຺ຠຓ຺ເຑ ສຫຣກ຺ຂເສ;

ຠິກ຺ຂຸສງ຺ເຆ ຈ ສມ຺ປຕ຺ເຕ, ຄາຖາ ປພ຺ຍາຫຣີ ຊິໂນ.

‘‘ໂຖມໍ ສຕ຺ຕາຫໍ ປູເຊສິ, ອາວາສຎ຺ຈ ອກາສິ ເມ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

‘‘ສຸທຸທ຺ທສໍ ສຸນິປຸຓໍ, ຄມ຺ຠີຣໍ ສຸປ຺ປກາສິຕໍ;

ຎາເຓນ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

‘‘ຈຕຸທ຺ທສານິ ກປ຺ປານິ, ເທວຣຊ຺ຊໍ ກຣິສ຺ສຕິ;

ກູຏາຄາຣໍ ມຫນ຺ຕສ຺ສ, ປທ຺ມປຸປ຺ເຜຫິ ຉາທິຕໍ.

‘‘ອາກາເສ ຘາຣຍິສ຺ສຕິ, ປຸປ຺ຜກມ຺ມສ຺ສິທໍ ຜລໍ;

ຈຕຸພ຺ພີເສ ກປ຺ປສເຕ, ໂວກິຓ຺ຓໍ ສໍສຣິສ຺ສຕິ.

‘‘ຕຕ຺ຖ ປຸປ຺ຜມຍໍ ພ຺ຍມ຺ຫໍ, ອາກາເສ ຘາຣຍິສ຺ສຕິ;

ຍຖາ ປທຸມປຕ຺ຕມ຺ຫິ, ໂຕຍໍ ນ ອຸປລິມ຺ປຕິ.

‘‘ຕເຖວີມສ຺ສ ຎາຓມ຺ຫິ, ກິເລສາ ໂນປລິມ຺ປເຣ;

ມນສາ ວິນິວຏ຺ເຏຕ຺ວາ, ປຎ຺ຈ ນີວຣເຓ ອຍໍ.

‘‘ຈິຕ຺ຕໍ ຊເນຕ຺ວາ ເນກ຺ຂມ຺ເມ, ອຄາຣາ ປພ຺ພຊິສ຺ສຕິ;

ຕໂຕ ປຸປ຺ຜມເຍ ພ຺ຍມ຺ເຫ, ຘາເຣນ຺ເຕ ນິກ຺ຂມິສ຺ສຕິ.

‘‘ຣຸກ຺ຂມູເລ ວສນ຺ຕສ຺ສ, ນິປກສ຺ສ ສຕີມໂຕ;

ຕຕ຺ຖ ປຸປ຺ຜມຍໍ ພ຺ຍມ຺ຫໍ, ມຕ຺ຖເກ ຘາຣຍິສ຺ສຕິ.

‘‘ຈີວຣໍ ປິຓ຺ຑປາຕຎ຺ຈ, ປຈ຺ຈຍໍ ສຍນາສນໍ;

ທຕ຺ວານ ຠິກ຺ຂຸສງ຺ຆສ຺ສ, ນິພ຺ພາຍິສ຺ສຕິນາສໂວ.

‘‘ກູຏາຄາເຣນ ຈຣຕາ, ປພ຺ພຊ຺ຊໍ ອຠິນິກ຺ຂມິໍ;

ຣຸກ຺ຂມູເລ ວສນ຺ຕມ຺ປິ, ກູຏາຄາຣໍ ຘຣີຍຕິ.

‘‘ຈີວເຣ ປິຓ຺ຑປາເຕ ຈ, ເຈຕນາ ເມ ນ ວິຊ຺ຊຕິ;

ປຸຎ຺ຎກມ຺ເມນ ສໍຍຸຕ຺ໂຕ, ລຠາມິ ປຣິນິຏ຺ຐິຕໍ.

‘‘ຄຓນາໂຕ ອສງ຺ເຂຍ຺ຍາ, ກປ຺ປໂກຏີ ພຫູ ມມ;

ຣິຕ຺ຕກາ ເຕ ອຕິກ຺ກນ຺ຕາ, ປມຸຕ຺ຕາ ໂລກນາຍກາ.

‘‘ອຏ຺ຐາຣເສ ກປ຺ປສເຕ, ປິຍທສ຺ສີ ວິນາຍໂກ;

ຕມຫໍ ປຍິຣຸປາສິຕ຺ວາ, ອິມໍ ໂຍນິໍ ອຸປາຄໂຕ.

‘‘ອິຘ ປສ຺ສາມິ ສມ຺ພຸທ຺ຘໍ, ອໂນມໍ ນາມ ຈກ຺ຂຸມໍ;

ຕມຫໍ ອຸປຄນ຺ຕ຺ວານ, ປພ຺ພຊິໍ ອນຄາຣິຍໍ.

‘‘ທຸກ຺ຂສ຺ສນ຺ຕກໂຣ ພຸທ຺ໂຘ, ມຄ຺ຄໍ ເມ ເທສຍີ ຊິໂນ;

ຕສ຺ສ ຘມ຺ມໍ ສຸຓິຕ຺ວານ, ປຕ຺ໂຕມ຺ຫິ ອຈລໍ ປທໍ.

‘‘ໂຕສຍິຕ຺ວານ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

‘‘ອຏ຺ຐາຣເສ ກປ຺ປສເຕ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ສຎ຺ຊາຕໂສມນສ຺ໂສ ອຸທານວເສນ –

໑໑໖. ‘‘ຉຜສ຺ສາຍຕເນ ຫິຕ຺ວາ, ຄຸຕ຺ຕທ຺ວາໂຣ ສຸສໍວຸໂຕ;

ອຆມູລໍ ວມິຕ຺ວານ, ປຕ຺ໂຕ ເມ ອາສວກ຺ຂໂຍ’’ຕິ. – ຄາຖໍ ອຠາສິ;

ຕຕ຺ຖ ຉຜສ຺ສາຍຕເນ ຫິຕ຺ວາຕິ ຈກ຺ຂຸສມ຺ຜສ຺ສາທີນໍ ຉນ຺ນໍ ສມ຺ຜສ຺ສານໍ ອຸປ຺ປຕ຺ຕິຏ຺ຐານຕາຍ ‘‘ຜສ຺ສາຍຕນານີ’’ຕິ ລທ຺ຘນາມານິ ຈກ຺ຂາທີນິ ຉ ອຊ຺ຌຕ຺ຕິກາຍຕນານິ ຕປ຺ປຏິພທ຺ຘສໍກິເລສປ຺ປຫານວເສນ ປຫາຍ. ຄຸຕ຺ຕທ຺ວາໂຣ ສຸສໍວຸໂຕຕິ ຕໂຕ ເອວ ຈກ຺ຂຸທ຺ວາຣາທີນໍ ຄຸຕ຺ຕຕ຺ຕາ, ຕຕ຺ຖ ປວຕ຺ຕນການໍ ອຠິຊ຺ຌາທີນໍ ປາປຘມ຺ມານໍ ປເວສນນິວາຣເຓນ ສຕິກວາເຏນ ສຸຏ຺ຏຸ ປິຫິຕຕ຺ຕາ ຄຸຕ຺ຕທ຺ວາໂຣ ສຸສໍວຸໂຕ. ອຖ ວາ ມນຈ຺ຉຏ຺ຐານໍ ຉນ຺ນໍ ທ຺ວາຣານໍ ວຸຕ຺ຕນເຍນ ຣກ຺ຂິຕຕ຺ຕາ ຄຸຕ຺ຕທ຺ວາໂຣ, ກາຍາທີຫິ ສຸຏ຺ຐຸ ສຎ຺ຎຕຕ຺ຕາ ສຸສໍວຸໂຕຕິ ເອວເມຕ຺ຖ ອຕ຺ໂຖ ເວທິຕພ຺ໂພ. ອຆມູລໍ ວມິຕ຺ວານາຕິ ອຆສ຺ສ ວຏ຺ຏທຸກ຺ຂສ຺ສ ມູລຠູຕໍ ອວິຊ຺ຊາຠວຕຓ຺ຫາສງ຺ຂາຕໍ ໂທສໍ, ສພ຺ພໍ ວາ ກິເລສໂທສໍ ອຣິຍມຄ຺ຄສງ຺ຂາຕວມນໂຍຄປາເນນ ອຸຄ຺ຄິຣິຕ຺ວາ ສນ຺ຕານໂຕ ພຫິ ກຕ຺ວາ, ພຫິກຣຓເຫຕຸ ວາ. ປຕ຺ໂຕ ເມ ອາສວກ຺ຂໂຍຕິ ກາມາສວາທໂຍ ອາສວາ ເອຕ຺ຖ ຂີຍນ຺ຕິ, ເຕສໍ ວາ ຂເຍນ ປຕ຺ຕພ຺ໂພຕິ ອາສວກ຺ຂໂຍ, ນິພ຺ພານໍ ອຣຫຕ຺ຕຎ຺ຈ. ໂສ ອາສວກ຺ຂໂຍ ປຕ຺ໂຕ ອຘິຄໂຕຕິ ອຸທານວເສນ ອຎ຺ຎໍ ພ຺ຍາກາສິ.

ປາຣາປຣິຍຕ຺ເຖຣຄາຖາວຓ຺ຓນາ ນິຏ຺ຐິຕາ.