໙. ກິໍສີລສຸຕ຺ຕວຓ຺ຓນາ

໓໒໗. ກິໍສີໂລຕິ ກິໍສີລສຸຕ຺ຕໍ. ກາ ອຸປ຺ປຕ຺ຕິ? ອາຍສ຺ມໂຕ ສາຣິປຸຕ຺ຕສ຺ສ ຄິຫິສຫາຍໂກ ເອໂກ ເຖຣສ຺ເສວ ປິຕຸໂນ ວງ຺ຄນ຺ຕພ຺ຣາຫ຺ມຓສ຺ສ ສຫາຍສ຺ສ ພ຺ຣາຫ຺ມຓສ຺ສ ປຸຕ຺ໂຕ ສຏ຺ຐິໂກຏິອຘິກໍ ປຎ຺ຈສຕໂກຏິຘນໍ ປຣິຈ຺ຈຊິຕ຺ວາ ອາຍສ຺ມໂຕ ສາຣິປຸຕ຺ຕຕ຺ເຖຣສ຺ສ ສນ຺ຕິເກ ປພ຺ພຊິຕ຺ວາ ສພ຺ພໍ ພຸທ຺ຘວຈນໍ ປຣິຍາປຸຓິ. ຕສ຺ສ ເຖໂຣ ພຫຸໂສ ໂອວທິຕ຺ວາ ກມ຺ມຏ຺ຐານມທາສິ, ໂສ ເຕນ ວິເສສໍ ນາຘິຄຈ຺ຉຕິ. ຕໂຕ ເຖໂຣ ‘‘ພຸທ຺ຘເວເນຍ຺ໂຍ ເອໂສ’’ຕິ ຎຕ຺ວາ ຕໍ ອາທາຍ ຠຄວໂຕ ສນ຺ຕິກໍ ຄນ຺ຕ຺ວາ ຕໍ ຠິກ຺ຂຸໍ ອາຣພ຺ຠ ປຸຄ຺ຄລໍ ອນິຍເມຕ຺ວາ ‘‘ກິໍສີໂລ’’ຕິ ປຸຈ຺ຉິ. ອຖສ຺ສ ຠຄວາ ຕໂຕ ປຣໍ ອຠາສິ. ຕຕ຺ຖ ກິໍສີໂລຕິ ກີທິເສນ ວາຣິຕ຺ຕສີເລນ ສມນ຺ນາຄໂຕ, ກີທິສປກຕິໂກ ວາ. ກິໍສມາຈາໂຣຕິ ກີທິເສນ ຈາຣິຕ຺ເຕນ ຍຸຕ຺ໂຕ. ການິ ກມ຺ມານິ ພ຺ຣູຫຍນ຺ຕິ ການິ ກາຍກມ຺ມາທີນິ ວຑ຺ເຒນ຺ໂຕ. ນໂຣ ສມ຺ມາ ນິວິຏ຺ຐສ຺ສາຕິ ອຠິຣໂຕ ນໂຣ ສາສເນ ສມ຺ມາ ປຕິຏ຺ຐິໂຕ ຠເວຍ຺ຍ. ອຸຕ຺ຕມຕ຺ຖຎ຺ຈ ປາປຸເຓຕິ ສພ຺ພຕ຺ຖານໍ ອຸຕ຺ຕມໍ ອຣຫຕ຺ຕຎ຺ຈ ປາປຸເຓຍ຺ຍາຕິ ວຸຕ຺ຕໍ ໂຫຕິ.

໓໒໘. ຕໂຕ ຠຄວາ ‘‘ສາຣິປຸຕ຺ໂຕ ອຑ຺ຒມາສູປສມ຺ປນ຺ໂນ ສາວກປາຣມິປ຺ປຕ຺ໂຕ, ກສ຺ມາ ອາທິກມ຺ມິກປຸຖຸຊ຺ຊນປຎ຺ຫໍ ປຸຈ຺ຉຕີ’’ຕິ ອາວຊ຺ເຊນ຺ໂຕ ‘‘ສທ຺ຘິວິຫາຣິກໍ ອາຣພ຺ຠາ’’ຕິ ຎຕ຺ວາ ປຸຈ຺ຉາຍ ວຸຕ຺ຕໍ ຈາຣິຕ຺ຕສີລໍ ອວິຠຊິຕ຺ວາວ ຕສ຺ສ ສປ຺ປາຍວເສນ ຘມ຺ມໍ ເທເສນ຺ໂຕ ‘‘ວຸຑ຺ຒາປຈາຍີ’’ຕິອາທິມາຫ.

ຕຕ຺ຖ ປຎ຺ຎາວຸຑ຺ໂຒ, ຄຸຓວຸຑ຺ໂຒ, ຊາຕິວຸຑ຺ໂຒ, ວໂຍວຸຑ຺ໂຒຕິ ຈຕ຺ຕາໂຣ ວຸຑ຺ຒາ. ຊາຕິຍາ ຫິ ທຫໂຣປິ ພຫຸສ຺ສຸໂຕ ຠິກ຺ຂຸ ອປ຺ປສ຺ສຸຕມຫລ຺ລກຠິກ຺ຂູນມນ຺ຕເຣ ພາຫຸສຈ຺ຈປຎ຺ຎາຍ ວຸຑ຺ຒຕ຺ຕາ ປຎ຺ຎາວຸຑ຺ໂຒ. ຕສ຺ສ ຫິ ສນ຺ຕິເກ ມຫລ຺ລກຠິກ຺ຂູປິ ພຸທ຺ຘວຈນໍ ປຣິຍາປຸຓນ຺ຕິ, ໂອວາທວິນິຈ຺ຉຍປຎ຺ຫວິສ຺ສຊ຺ຊນານິ ຈ ປຈ຺ຈາສີສນ຺ຕິ. ຕຖາ ທຫໂຣປິ ຠິກ຺ຂຸ ອຘິຄມສມ຺ປນ຺ໂນ ຄຸຓວຸຑ຺ໂຒ ນາມ. ຕສ຺ສ ຫິ ໂອວາເທ ປຕິຏ຺ຐາຍ ມຫລ຺ລກາປິ ວິປສ຺ສນາຄພ຺ຠໍ ຄເຫຕ຺ວາ ອຣຫຕ຺ຕຜລໍ ປາປຸຓນ຺ຕິ. ຕຖາ ທຫໂຣປິ ຣາຊາ ຂຕ຺ຕິໂຍ ມຸທ຺ຘາວສິຕ຺ໂຕ ພ຺ຣາຫ຺ມໂຓ ວາ ເສສຊນສ຺ສ ວນ຺ທນາຣຫໂຕ ຊາຕິວຸຑ຺ໂຒ ນາມ. ສພ຺ໂພ ປນ ປຐມຊາໂຕ ວໂຍວຸຑ຺ໂຒ ນາມ. ຕຕ຺ຖ ຍສ຺ມາ ປຎ຺ຎາຍ ສາຣິປຸຕ຺ຕຕ຺ເຖຣສ຺ສ ສທິໂສ ນຕ຺ຖິ ຐເປຕ຺ວາ ຠຄວນ຺ຕໍ, ຕຖາ ຄຸເຓນປິ ອຑ຺ຒມາເສນ ສພ຺ພສາວກປາຣມີຎາຓສ຺ສ ປຏິວິທ຺ຘຕ຺ຕາ. ຊາຕິຍາປິ ໂສ ພ຺ຣາຫ຺ມຓມຫາສາລກຸເລ ອຸປ຺ປນ຺ໂນ, ຕສ຺ມາ ຕສ຺ສ ຠິກ຺ຂຸໂນ ວເຍນ ສມາໂນປິ ໂສ ອິເມຫິ ຕີຫິ ກາຣເຓຫິ ວຸຑ຺ໂຒ. ອິມສ຺ມິໍ ປນຕ຺ເຖ ປຎ຺ຎາຄຸເຓຫິ ເອວ ວຸຑ຺ຒຠາວໍ ສນ຺ຘາຍ ຠຄວາ ອາຫ – ‘‘ວຸຑ຺ຒາປຈາຍີ’’ຕິ. ຕສ຺ມາ ຕາທິສານໍ ວຸຑ຺ຒານໍ ອປຈິຕິກຣເຓນ ວຸຑ຺ຒາປຈາຍີ, ເຕສເມວ ວຸຑ຺ຒານໍ ລາຠາທີສຸ ອຸສູຍວິຄເມນ ອນຸສູຍໂກ ຈ ສິຍາຕິ ອຍມາທິປາທສ຺ສ ອຕ຺ໂຖ.

ກາລຎ຺ຎູ ຈສ຺ສາຕິ ເອຕ຺ຖ ປນ ຣາເຄ ອຸປ຺ປນ຺ເນ ຕສ຺ສ ວິໂນທນຕ຺ຖາຍ ຄຣູນໍ ທສ຺ສນໍ ຄຈ຺ຉນ຺ໂຕປິ ກາລຎ຺ຎູ, ໂທເສ… ໂມເຫ… ໂກສຊ຺ເຊ ອຸປ຺ປນ຺ເນ ຕສ຺ສ ວິໂນທນຕ຺ຖາຍ ຄຣູນໍ ທສ຺ສນໍ ຄຈ຺ຉນ຺ໂຕປິ ກາລຎ຺ຎູ, ຍໂຕ ເອວໍ ກາລຎ຺ຎູ ຈ ອສ຺ສ ຄຣູນໍ ທສ຺ສນາຍ. ຘມ຺ມິໍ ກຖນ຺ຕິ ສມຖວິປສ຺ສນາຍຸຕ຺ຕໍ. ເອຣຍິຕນ຺ຕິ ວຸຕ຺ຕໍ. ຂຓຎ຺ຎູຕິ ຕສ຺ສາ ກຖາຍ ຂຓເວທີ, ທຸລ຺ລໂຠ ວາ ອຍໍ ອີທິສາຍ ກຖາຍ ສວນກ຺ຂໂຓຕິ ຊານນ຺ໂຕ. ສຸເຓຍ຺ຍ ສກ຺ກຈ຺ຈາຕິ ຕໍ ກຖໍ ສກ຺ກຈ຺ຈໍ ສຸເຓຍ຺ຍ. ນ ເກວລຎ຺ຈ ຕເມວ, ອຎ຺ຎານິປິ ພຸທ຺ຘຄຸຓາທິປຏິສໍຍຸຕ຺ຕານິ ສຸຠາສິຕານິ ສກ຺ກຈ຺ຈເມວ ສຸເຓຍ຺ຍາຕິ ອຕ຺ໂຖ.

໓໒໙. ‘‘ກາລຎ຺ຎູ ຈສ຺ສ ຄຣູນໍ ທສ຺ສນາຍາ’’ຕິ ເອຕ຺ຖ ວຸຕ຺ຕນຍຎ຺ຈ ອຕ຺ຕໂນ ອຸປ຺ປນ຺ນຣາຄາທິວິໂນທນກາລໍ ຎຕ຺ວາປິ ຄຣູນໍ ສນ຺ຕິກໍ ຄຈ຺ຉນ຺ໂຕ ກາເລນ ຄຈ຺ເຉ ຄຣູນໍ ສກາສໍ, ‘‘ອຫໍ ກມ຺ມຏ຺ຐານິໂກ ຘຸຕງ຺ຄຘໂຣ ຈາ’’ຕິ ກຕ຺ວາ ນ ເຈຕິຍວນ຺ທນໂພຘິຍງ຺ຄຓຠິກ຺ຂາຈາຣມຄ຺ຄອຕິມຊ຺ຌນ຺ຫິກເວລາທີສຸ ຍຕ຺ຖ ກຕ຺ຖຈິ ຐິຕມາຈຣິຍໍ ທິສ຺ວາ ປຣິປຸຈ຺ຉນຕ຺ຖາຍ ອຸປສງ຺ກເມຍ຺ຍ, ສກເສນາສເນ ປນ ອຕ຺ຕໂນ ອາສເນ ນິສິນ຺ນໍ ວູປສນ຺ຕທຣຖໍ ສລ຺ລກ຺ເຂຕ຺ວາ ກມ຺ມຏ຺ຐານາທິວິຘິປຸຈ຺ຉນຕ຺ຖໍ ອຸປສງ຺ກເມຍ຺ຍາຕິ ອຕ຺ໂຖ. ເອວໍ ອຸປສງ຺ກມນ຺ໂຕປິ ຈ ຖມ຺ຠໍ ນິຣໍກຕ຺ວາ ນິວາຕວຸຕ຺ຕິ ຖທ຺ຘຠາວກຣໍ ມານໍ ວິນາເສຕ຺ວາ ນີຈວຸຕ຺ຕິ ປາທປຸຎ຺ຉນໂຈຬກຉິນ຺ນວິສາຓຸສຠອຸທ຺ຘຕທາຐສປ຺ປສທິໂສ ຫຸຕ຺ວາ ອຸປສງ຺ກເມຍ຺ຍ. ອຖ ເຕນ ຄຣຸນາ ວຸຕ຺ຕໍ ອຕ຺ຖໍ ຘມ຺ມໍ…ເປ… ສມາຈເຣ ຈ. ອຕ຺ຖນ຺ຕິ ຠາສິຕຕ຺ຖໍ. ຘມ຺ມນ຺ຕິ ປາຬິຘມ຺ມໍ. ສໍຍມນ຺ຕິ ສີລໍ. ພ຺ຣຫ຺ມຈຣິຍນ຺ຕິ ອວເສສສາສນພ຺ຣຫ຺ມຈຣິຍໍ. ອນຸສ຺ສເຣ ເຈວ ສມາຈເຣ ຈາຕິ ອຕ຺ຖໍ ກຖິໂຕກາເສ ອນຸສ຺ສເຣຍ຺ຍ, ຘມ຺ມໍ ສໍຍມໍ ພ຺ຣຫ຺ມຈຣິຍໍ ກຖິໂຕກາເສ ອນຸສ຺ສເຣຍ຺ຍ, ອນຸສ຺ສຣຓມຕ຺ເຕເນວ ຈ ອຕຸສ຺ສນ຺ໂຕ ຕໍ ສພ຺ພມ຺ປິ ສມາຈເຣ ສມາຈເຣຍ຺ຍ ສມາທາຍ ວຕ຺ເຕຍ຺ຍ. ຕາສໍ ກຖານໍ ອຕ຺ຕນິ ປວຕ຺ຕເນ ອຸສ຺ສຸກ຺ກໍ ກເຣຍ຺ຍາຕິ ອຕ຺ໂຖ. ເອວໍ ກໂຣນ຺ໂຕ ຫິ ກິຈ຺ຈກໂຣ ໂຫຕິ.

໓໓໐. ຕໂຕ ປຣຎ຺ຈ ຘມ຺ມາຣາໂມ ຘມ຺ມຣໂຕ ຘມ຺ເມ ຐິໂຕ ຘມ຺ມວິນິຈ຺ຉຍຎ຺ຎູ ຠເວຍ຺ຍ. ສພ຺ພປເທສຸ ເຈຕ຺ຖ ຘມ຺ໂມຕິ ສມຖວິປສ຺ສນາ, ອາຣາໂມ ຣຕີຕິ ເອໂກວ ອຕ຺ໂຖ, ຘມ຺ເມ ອາຣາໂມ ອສ຺ສາຕິ ຘມ຺ມາຣາໂມ. ຘມ຺ເມ ຣໂຕ, ນ ອຎ຺ຎໍ ປິເຫຕີຕິ ຘມ຺ມຣໂຕ. ຘມ຺ເມ ຐິໂຕ ຘມ຺ມໍ ວຕ຺ຕນໂຕ. ຘມ຺ມວິນິຈ຺ຉຍໍ ຊານາຕິ ‘‘ອິທໍ ອຸທຍຎາຓໍ ອິທໍ ວຍຎາຓ’’ນ຺ຕິ ຘມ຺ມວິນິຈ຺ຉຍຎ຺ຎູ, ເອວຣູໂປ ອສ຺ສ. ອຖ ຍາຍໍ ຣາຊກຖາທິຕິຣຈ຺ຉານກຖາ ຕຣຸຓວິປສ຺ສກສ຺ສ ພຫິທ຺ຘາຣູປາທີສຸ ອຠິນນ຺ທນຸປ຺ປາທເນນ ຕໍ ສມຖວິປສ຺ສນາຘມ຺ມໍ ສນ຺ທູເສຕິ, ຕສ຺ມາ ‘‘ຘມ຺ມສນ຺ໂທສວາໂທ’’ຕິ ວຸຈ຺ຈຕິ, ຕໍ ເນວາຈເຣ ຘມ຺ມສນ຺ໂທສວາທໍ, ອຎ຺ຎທຕ຺ຖຸ ອາວາສໂຄຈຣາທິສປ຺ປາຍານິ ເສວນ຺ໂຕ ຕຈ຺ເຉຫິ ນີເຍຖ ສຸຠາສິເຕຫິ. ສມຖວິປສ຺ສນາປຏິສໍຍຸຕ຺ຕາເນເວຕ຺ຖ ຕຈ຺ຉານິ, ຕຖາຣູເປຫິ ສຸຠາສິເຕຫິ ນີເຍຖ ນີເຍຍ຺ຍ, ກາລໍ ເຂເປຍ຺ຍາຕິ ອຕ຺ໂຖ.

໓໓໑. ອິທານິ ‘‘ຘມ຺ມສນ຺ໂທສວາທ’’ນ຺ຕິ ເອຕ຺ຖ ອຕິສງ຺ເຂເປນ ວຸຕ຺ຕໍ ສມຖວິປສ຺ສນາຍຸຕ຺ຕສ຺ສ ຠິກ຺ຂຸໂນ ອຸປກ຺ກິເລສໍ ປາກຏໍ ກໂຣນ຺ໂຕ ຕທຎ຺ເຎນປິ ອຸປກ຺ກິເລເສນ ສທ຺ຘິໍ ‘‘ຫສ຺ສໍ ຊປ຺ປ’’ນ຺ຕິ ອິມໍ ຄາຖມາຫ. ຫາສນ຺ຕິປິ ປາໂຐ. ວິປສ຺ສເກນ ຫິ ຠິກ຺ຂຸນາ ຫສນີຍສ຺ມິໍ ວຕ຺ຖຸສ຺ມິໍ ສິຕມຕ຺ຕເມວ ກາຕພ຺ພໍ, ນິຣຕ຺ຖກກຖາຊປ຺ໂປ ນ ຠາສິຕພ຺ໂພ, ຎາຕິພ຺ຍສນາທີສຸ ປຣິເທໂວ ນ ກາຕພ຺ໂພ, ຂາຓຸກຓ຺ຏກາທິມ຺ຫິ ມໂນປໂທໂສ ນ ອຸປ຺ປາເທຕພ຺ໂພ. ມາຍາກຕນ຺ຕິ ວຸຕ຺ຕາ ມາຍາ, ຕິວິຘໍ ກຸຫນໍ, ປຈ຺ຈເຍສຸ ຄິທ຺ຘິ, ຊາຕິອາທີຫິ ມາໂນ, ປຈ຺ຈນີກສາຕຕາສງ຺ຂາໂຕ ສາຣມ຺ໂຠ, ຜຣຸສວຈນລກ຺ຂຓໍ ກກ຺ກສໍ, ຣາຄາທໂຍ ກສາວາ, ອຘິມຕ຺ຕຕຓ຺ຫາລກ຺ຂຓາ ມຸຈ຺ຉາຕິ ອິເມ ຈ ໂທສາ ສຸຂກາເມນ ອງ຺ຄາຣກາສຸ ວິຍ, ສຸຈິກາເມນ ຄູຖຐານໍ ວິຍ, ຊີວິຕຸກາເມນ ອາສິວິສາທໂຍ ວິຍ ຈ ປຫາຕພ຺ພາ. ຫິຕ຺ວາ ຈ ອາໂຣຄ຺ຍມທາທິວິຄມາ ວີຕມເທນ ຈິຕ຺ຕວິກ຺ເຂປາຠາວາ ຐິຕຕ຺ເຕນ ຈຣິຕພ຺ພໍ. ເອວໍ ປຏິປນ຺ໂນ ຫິ ສພ຺ພຸປກ຺ກິເລສປຣິສຸທ຺ຘາຍ ຠາວນາຍ ນ ຈິຣສ຺ເສວ ອຣຫຕ຺ຕໍ ປາປຸຓາຕິ. ເຕນາຫ ຠຄວາ – ‘‘ຫສ຺ສໍ ຊປ຺ປໍ…ເປ… ຐິຕຕ຺ໂຕ’’ຕິ.

໓໓໒. ອິທານິ ຍ຺ວາຍໍ ‘‘ຫສ຺ສໍ ຊປ຺ປ’’ນ຺ຕິອາທິນາ ນເຍນ ອຸປກ຺ກິເລໂສ ວຸຕ຺ໂຕ, ເຕນ ສມນ຺ນາຄໂຕ ຠິກ຺ຂຸ ຍສ຺ມາ ສາຫໂສ ໂຫຕິ ອວີມໍສກາຣີ, ຣຕ຺ໂຕ ຣາຄວເສນ ທຸຏ຺ໂຐ ໂທສວເສນ ຄຈ຺ຉຕິ, ປມຕ຺ໂຕ ຈ ໂຫຕິ ກຸສລານໍ ຘມ຺ມານໍ ຠາວນາຍ ອສາຕຈ຺ຈກາຣີ, ຕຖາຣູປສ຺ສ ຈ ‘‘ສຸເຓຍ຺ຍ ສກ຺ກຈ຺ຈ ສຸຠາສິຕານີ’’ຕິອາທິນາ ນເຍນ ວຸຕ຺ໂຕ ໂອວາໂທ ນິຣຕ຺ຖໂກ, ຕສ຺ມາ ອິມສ຺ສ ສໍກິເລສສ຺ສ ປຸຄ຺ຄລາຘິຏ຺ຐານາຍ ເທສນາຍ ສຸຕາທິວຸທ຺ຘິປຏິປກ຺ຂຠາວໍ ທສ຺ເສນ຺ໂຕ ‘‘ວິຎ຺ຎາຕສາຣານີ’’ຕິ ອິມໍ ຄາຖມາຫ.

ຕສ຺ສຕ຺ໂຖ – ຍານິ ເຫຕານິ ສມຖວິປສ຺ສນາປຏິສໍຍຸຕ຺ຕານິ ສຸຠາສິຕານິ, ເຕສໍ ວິຊານນໍ ສາໂຣ. ຍທິ ວິຎ຺ຎາຕານິ ສາຘຸ, ອຖ ສທ຺ທມຕ຺ຕເມວ ຄຫິຕໍ, ນ ກິຎ຺ຈິ ກຕໍ ໂຫຕິ, ເຍນ ເອຕານິ ສຸຕມເຍນ ຎາເຓນ ວິຎ຺ຎາຍນ຺ຕິ, ຕໍ ສຸຕໍ, ເອຕຎ຺ຈ ສຸຕມຍຎາຓໍ ວິຎ຺ຎາຕສມາຘິສາຣໍ, ເຕສຸ ວິຎ຺ຎາເຕສຸ ຘມ຺ເມສຸ ໂຍ ສມາຘິ ຈິຕ຺ຕສ຺ສາວິກ຺ເຂໂປ ຕຖຕ຺ຕາຍ ປຏິປຕ຺ຕິ, ອຍມສ຺ສ ສາໂຣ. ນ ຫິ ວິຊານນມຕ຺ເຕເນວ ໂກຈິ ອຕ຺ໂຖ ສິຊ຺ຌຕິ. ໂຍ ປນາຍໍ ນໂຣ ຣາຄາທິວເສນ ວຕ຺ຕນໂຕ ສາຫໂສ, ກຸສລານໍ ຘມ຺ມານໍ ຠາວນາຍ ອສາຕຈ຺ຈກາຣິຕາຍ ປມຕ຺ໂຕ, ໂສ ສທ຺ທມຕ຺ຕຄ຺ຄາຫີເຍວ ໂຫຕິ. ເຕນ ຕສ຺ສ ອຕ຺ຖວິຊານນາຠາວໂຕ ສາ ສຸຠາສິຕວິຊານນປຎ຺ຎາ ຈ, ຕຖຕ຺ຕາຍ ປຏິປຕ຺ຕິຍາ ອຠາວໂຕ ສຸຕຎ຺ຈ ນ ວຑ຺ຒຕີຕິ.

໓໓໓. ເອວໍ ປມຕ຺ຕານໍ ສຕ຺ຕານໍ ປຎ຺ຎາປຣິຫານິໍ ສຸຕປຣິຫານິຎ຺ຈ ທສ຺ເສຕ຺ວາ ອິທານິ ອປ຺ປມຕ຺ຕານໍ ຕທຸຠຍສາຣາຘິຄມໍ ທສ຺ເສນ຺ໂຕ ອາຫ – ‘‘ຘມ຺ເມ ຈ ເຍ…ເປ… ສາຣມຊ຺ຌຄູ’’ຕິ. ຕຕ຺ຖ ອຣິຍປ຺ປເວທິໂຕ ຘມ຺ໂມ ນາມ ສມຖວິປສ຺ສນາຘມ຺ໂມ. ເອໂກປິ ຫິ ພຸທ຺ໂຘ ສມຖວິປສ຺ສນາຘມ຺ມໍ ອເທເສຕ຺ວາ ປຣິນິພ຺ພຸໂຕ ນາມ ນຕ຺ຖິ. ຕສ຺ມາ ເອຕສ຺ມິໍ ຘມ຺ເມ ຈ ເຍ ອຣິຍປ຺ປເວທິເຕຣຕາ ນິຣຕາ ອປ຺ປມຕ຺ຕາ ສາຕຈ຺ຈານຸໂຍຄິໂນ, ອນຸຕ຺ຕຣາ ເຕ ວຈສາ ມນສາ ກມ຺ມຸນາ ຈ, ເຕ ຈຕຸພ຺ພິເຘນ ວຈີສຸຈຣິເຕນ ຕິວິເຘນ ມໂນສຸຈຣິເຕນ ຕິວິເຘນ ກາຍສຸຈຣິເຕນ ຈ ສມນ຺ນາຄຕຕ຺ຕາ ວຈສາ ມນສາ ກມ຺ມຸນາ ຈ ອນຸຕ຺ຕຣາ, ອວເສສສຕ຺ເຕຫິ ອສມາ ອຄ຺ຄາວິສິຏ຺ຐາ. ເອຕ຺ຕາວຕາ ສທ຺ຘິໍ ປຸພ຺ພຠາຄສີເລນ ອຣິຍມຄ຺ຄສມ຺ປຍຸຕ຺ຕໍ ສີລໍ ທສ຺ເສຕິ. ເອວໍ ປຣິສຸທ຺ຘສີລາ ເຕ ສນ຺ຕິໂສຣຈ຺ຈສມາຘິສຓ຺ຐິຕາ, ສຸຕສ຺ສ ປຎ຺ຎາຍ ຈ ສາຣມຊ຺ຌຄູ, ເຍ ອຣິຍປ຺ປເວທິເຕ ຘມ຺ເມ ຣຕາ, ເຕ ນ ເກວລໍ ວາຈາທີຫິ ອນຸຕ຺ຕຣາ ໂຫນ຺ຕິ, ອປິຈ ໂຂ ປນ ສນ຺ຕິໂສຣຈ຺ເຈ ສມາຘິມ຺ຫິ ຈ ສຓ຺ຐິຕາ ຫຸຕ຺ວາ ສຸຕສ຺ສ ປຎ຺ຎາຍ ຈ ສາຣມຊ຺ຌຄູ ອຘິຄຕາ ອິຈ຺ເຈວ ເວທິຕພ຺ພາ. ອາສໍສາຍໍ ຠູຕວຈນໍ. ຕຕ຺ຖ ສນ຺ຕີຕິ ນິພ຺ພານໍ, ໂສຣຈ຺ຈນ຺ຕິ ສຸນ຺ທເຣ ຣຕຠາເວນ ຍຖາຠູຕປຏິເວຘິກາ ປຎ຺ຎາ, ສນ຺ຕິຍາ ໂສຣຈ຺ຈນ຺ຕິ ສນ຺ຕິໂສຣຈ຺ຈໍ, ນິພ຺ພານາຣມ຺ມຓາຍ ມຄ຺ຄປຎ຺ຎາເຍຕໍ ອຘິວຈນໍ. ສມາຘີຕິ ຕໍສມ຺ປຍຸຕ຺ໂຕວ ມຄ຺ຄສມາຘິ. ສຓ຺ຐິຕາຕິ ຕທຸຠເຍ ປຕິຏ຺ຐິຕາ. ສຸຕປຎ຺ຎານໍ ສາຣໍ ນາມ ອຣຫຕ຺ຕຜລວິມຸຕ຺ຕິ. ວິມຸຕ຺ຕິສາຣຎ຺ຫິ ອິທໍ ພ຺ຣຫ຺ມຈຣິຍໍ.

ເອວເມຕ຺ຖ ຠຄວາ ຘມ຺ເມນ ປຸພ຺ພຠາຄປຏິປທໍ, ‘‘ອນຸຕ຺ຕຣາ ວຈສາ’’ຕິອາທີຫິ ສີລກ຺ຂນ຺ຘໍ, ສນ຺ຕິໂສຣຈ຺ຈສມາຘີຫິ ປຎ຺ຎາກ຺ຂນ຺ຘສມາຘິກ຺ຂນ຺ເຘຕິ ຕີຫິປິ ອິເມຫິ ຂນ຺ເຘຫິ ອປຣຠາຄປຏິປທຎ຺ຈ ທສ຺ເສຕ຺ວາ ສຸຕປຎ຺ຎາສາເຣນ ອກຸປ຺ປວິມຸຕ຺ຕິໍ ທສ຺ເສນ຺ໂຕ ອຣຫຕ຺ຕນິກູເຏນ ເທສນໍ ສມາເປສິ. ເທສນາປຣິໂຍສາເນ ຈ ໂສ ຠິກ຺ຂຸ ໂສຕາປຕ຺ຕິຜລໍ ປຕ຺ວາ ປຸນ ນ ຈິຣສ຺ເສວ ອຄ຺ຄຜເລ ອຣຫຕ຺ເຕ ປຕິຏ຺ຐາສີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ກິໍສີລສຸຕ຺ຕວຓ຺ຓນາ ນິຏ຺ຐິຕາ.