໕. ສູຈິໂລມສຸຕ຺ຕວຓ຺ຓນາ

ເອວໍ ເມ ສຸຕນ຺ຕິ ສູຈິໂລມສຸຕ຺ຕໍ. ກາ ອຸປ຺ປຕ຺ຕິ? ອຕ຺ຖວຓ຺ຓນານເຍເນວສ຺ສ ອຸປ຺ປຕ຺ຕິ ອາວິ ຠວິສ຺ສຕິ. ອຕ຺ຖວຓ຺ຓນາຍຎ຺ຈ ‘‘ເອວໍ ເມ ສຸຕ’’ນ຺ຕິອາທິ ວຸຕ຺ຕຕ຺ຖເມວ. ຄຍາຍໍ ວິຫຣຕິ ຏງ຺ກິຕມຎ຺ເຈ ສູຈິໂລມສ຺ສ ຍກ຺ຂສ຺ສ ຠວເນຕິ ເອຕ຺ຖ ປນ ກາ ຄຍາ, ໂກ ຏງ຺ກິຕມຎ຺ໂຈ, ກສ຺ມາ ຈ ຠຄວາ ຕສ຺ສ ຍກ຺ຂສ຺ສ ຠວເນ ວິຫຣຕີຕິ? ວຸຈ຺ຈເຕ – ຄຍາຕິ ຄາໂມປິ ຕິຕ຺ຖມ຺ປິ ວຸຈ຺ຈຕິ, ຕທຸຠຍມ຺ປິ ອິຘ ວຏ຺ຏຕິ. ຄຍາຄາມສ຺ສ ຫິ ອວິທູເຣ ເທເສ ວິຫຣນ຺ໂຕປິ ‘‘ຄຍາຍໍ ວິຫຣຕີ’’ຕິ ວຸຈ຺ຈຕິ, ຕສ຺ສ ຈ ຄາມສ຺ສ ສມີເປ ອວິທູເຣ ທ຺ວາຣສນ຺ຕິເກ ໂສ ຏງ຺ກິຕມຎ຺ໂຈ. ຄຍາຕິຕ຺ເຖ ວິຫຣນ຺ໂຕປິ ‘‘ຄຍາຍໍ ວິຫຣຕີ’’ຕິ ວຸຈ຺ຈຕິ, ຄຍາຕິຕ຺ເຖ ຈ ໂສ ຏງ຺ກິຕມຎ຺ໂຈ. ຏງ຺ກິຕມຎ຺ໂຈຕິ ຈຕຸນ຺ນໍ ປາສາຓານໍ ອຸປຣິ ວິຕ຺ຖຕໍ ປາສາຓໍ ອາໂຣເປຕ຺ວາ ກໂຕ ປາສາຓມຎ຺ໂຈ. ຕໍ ນິສ຺ສາຍ ຍກ຺ຂສ຺ສ ຠວນໍ ອາຬວກສ຺ສ ຠວນໍ ວິຍ. ຍສ຺ມາ ວາ ປນ ຠຄວາ ຕໍ ທິວສໍ ປຈ຺ຈູສສມເຍ ມຫາກຣຸຓາສມາປຕ຺ຕິໂຕ ວຸຏ຺ຐາຍ ພຸທ຺ຘຈກ຺ຂຸນາ ໂລກໍ ໂວໂລເກນ຺ໂຕ ສູຈິໂລມສ຺ສ ຈ ຂຣໂລມສ຺ສ ຈາຕິ ທ຺ວິນ຺ນມ຺ປິ ຍກ຺ຂານໍ ໂສຕາປຕ຺ຕິຜລູປນິສ຺ສຍໍ ອທ຺ທສ, ຕສ຺ມາ ປຕ຺ຕຈີວຣໍ ອາທາຍ ອນ຺ໂຕອຣຸເຓເຍວ ນານາທິສາຫິ ສນ຺ນິປຕິຕສ຺ສ ຊນສ຺ສ ເຂຬສິງ຺ຆາຓິກາທິນານປ຺ປກາຣາສຸຈິນິສ຺ສນ຺ທກິລິນ຺ນຠູມິຠາຄມ຺ປິ ຕໍ ຕິຕ຺ຖປ຺ປເທສໍ ອາຄນ຺ຕ຺ວາ ຕສ຺ມິໍ ຏງ຺ກິຕມຎ຺ເຈ ນິສີທິ ສູຈິໂລມສ຺ສ ຍກ຺ຂສ຺ສ ຠວເນ. ເຕນ ວຸຕ຺ຕໍ ‘‘ເອກໍ ສມຍໍ ຠຄວາ ຄຍາຍໍ ວິຫຣຕິ ຏງ຺ກິຕມຎ຺ເຈ ສູຈິໂລມສ຺ສ ຍກ຺ຂສ຺ສ ຠວເນ’’ຕິ.

ເຕນ ໂຂ ປນ ສມເຍນາຕິ ຍໍ ສມຍໍ ຠຄວາ ຕຕ຺ຖ ວິຫຣຕິ, ເຕນ ສມເຍນ. ຂໂຣ ຈ ຍກ຺ໂຂ ສູຈິໂລໂມ ຈ ຍກ຺ໂຂ ຠຄວໂຕ ອວິທູເຣ ອຕິກ຺ກມນ຺ຕີຕິ. ເກ ເຕ ຍກ຺ຂາ, ກສ຺ມາ ຈ ອຕິກ຺ກມນ຺ຕີຕິ? ວຸຈ຺ຈເຕ – ເຕສຸ ຕາວ ເອໂກ ອຕີເຕ ສງ຺ຆສ຺ສ ເຕລໍ ອນາປຸຈ຺ຉາ ຄເຫຕ຺ວາ ອຕ຺ຕໂນ ສຣີຣໍ ມກ຺ເຂສິ. ໂສ ເຕນ ກມ຺ເມນ ນິຣເຍ ປຈ຺ຈິຕ຺ວາ ຄຍາໂປກ຺ຂຣຓິຕີເຣ ຍກ຺ຂໂຍນິຍໍ ນິພ຺ພຕ຺ໂຕ. ຕສ຺ເສວ ຈສ຺ສ ກມ຺ມສ຺ສ ວິປາກາວເສເສນ ວິຣູປານິ ອງ຺ຄປຈ຺ຈງ຺ຄານິ ອເຫສຸໍ, ອິຏ຺ຐກຈ຺ຉທນສທິສຎ຺ຈ ຂຣສມ຺ຜສ຺ສໍ ຈມ຺ມໍ. ໂສ ກິຣ ຍທາ ປຣໍ ຠິໍສາເປຕຸກາໂມ ໂຫຕິ, ຕທາ ຉທນິຏ຺ຐກສທິສານິ ຈມ຺ມກປາລານິ ອຸກ຺ຂິປິຕ຺ວາ ຠິໍສາເປຕິ. ເອວໍ ໂສ ຂຣສມ຺ຜສ຺ສຕ຺ຕາ ຂໂຣ ຍກ຺ໂຂຕ຺ເວວ ນາມໍ ລຠິ.

ອິຕໂຣ ກສ຺ສປສ຺ສ ຠຄວໂຕ ກາເລ ອຸປາສໂກ ຫຸຕ຺ວາ ມາສສ຺ສ ອຏ຺ຐ ທິວເສ ວິຫາຣໍ ຄນ຺ຕ຺ວາ ຘມ຺ມໍ ສຸຓາຕິ. ໂສ ເອກທິວສໍ ຘມ຺ມສ຺ສວເນ ໂຆສິເຕ ສງ຺ຆາຣາມທ຺ວາເຣ ອຕ຺ຕໂນ ເຂຕ຺ຕໍ ເກລາຍນ຺ໂຕ ອຸຄ຺ໂຆສນໍ ສຸຕ຺ວາ ‘‘ສເຈ ນ຺ຫາຍາມິ, ຈິຣໍ ຠວິສ຺ສຕີ’’ຕິ ກິລິຏ຺ຐຄຕ຺ໂຕວ ອຸໂປສຖາຄາຣໍ ປວິສິຕ຺ວາ ມຫຄ຺ເຆ ຠຸມ຺ມຕ຺ຖຣເຓ ອນາທເຣນ ນິປຊ຺ຊິຕ຺ວາ ສຸປິ. ຠິກ຺ຂຸ ເອວາຍໍ, ນ ອຸປາສໂກຕິ ສໍຍຸຕ຺ຕຠາຓກາ. ໂສ ເຕນ ຈ ອຎ຺ເຎນ ກມ຺ເມນ ຈ ນິຣເຍ ປຈ຺ຈິຕ຺ວາ ຄຍາໂປກ຺ຂຣຓິຍາ ຕີເຣ ຍກ຺ຂໂຍນິຍໍ ນິພ຺ພຕ຺ໂຕ. ໂສ ຕສ຺ສ ກມ຺ມສ຺ສ ວິປາກາວເສເສນ ທຸທ຺ທສິໂກ ອໂຫສິ, ສຣີເຣ ຈສ຺ສ ສູຈິສທິສານິ ໂລມານິ ອເຫສຸໍ. ໂສ ຫິ ຠິໍສາເປຕພ຺ພເກ ສຕ຺ເຕ ສູຈີຫິ ວິຊ຺ຌນ຺ໂຕ ວິຍ ຠິໍສາເປຕິ. ເອວໍ ໂສ ສູຈິສທິສໂລມຕ຺ຕາ ສູຈິໂລໂມ ຍກ຺ໂຂຕ຺ເວວ ນາມໍ ລຠິ. ເຕ ອຕ຺ຕໂນ ໂຄຈຣຕ຺ຖາຍ ຠວນໂຕ ນິກ຺ຂມິຕ຺ວາ ມຸຫຸຕ຺ຕໍ ຄນ຺ຕ຺ວາ ຄຕມຄ຺ເຄເນວ ນິວຕ຺ຕິຕ຺ວາ ອິຕຣໍ ທິສາຠາຄໍ ຄຈ຺ຉນ຺ຕາ ຠຄວໂຕ ອວິທູເຣ ອຕິກ຺ກມນ຺ຕິ.

ອຖ ໂຂ ຂໂຣຕິ ກສ຺ມາ ເຕ ເອວມາຫໍສຸ? ຂໂຣ ສມຓກປ຺ປໍ ທິສ຺ວາ ອາຫ. ສູຈິໂລໂມ ປນ ‘‘ໂຍ ຠາຍຕິ ນ ໂສ ສມໂຓ, ສມຓປຏິຣູປກຕ຺ຕາ ປນ ສມຓໂກ ໂຫຕີ’’ຕິ ເອວໍລທ຺ຘິໂກ. ຕສ຺ມາ ຕາທິສໍ ຠຄວນ຺ຕໍ ມຎ຺ຎມາໂນ ‘‘ເນໂສ ສມໂຓ, ສມຓໂກ ເອໂສ’’ຕິ ສຫສາວ ວຕ຺ວາປິ ປຸນ ວີມໍສິຕຸກາໂມ ອາຫ – ‘‘ຍາວາຫໍ ຊານາມີ’’ຕິ. ‘‘ອຖ ໂຂ’’ຕິ ເອວໍ ວຕ຺ວາ ຕໂຕ. ສູຈິໂລໂມ ຍກ຺ໂຂຕິ ອິໂຕ ປຠຸຕິ ຍາວ ອປິຈ ໂຂ ເຕ ສມ຺ຜສ຺ໂສ ປາປໂກຕິ, ຕາວ ອຸຕ຺ຕານຕ຺ຖເມວ ເກວລຎ຺ເຈຕ຺ຖ ຠຄວໂຕ ກາຍນ຺ຕິ ອຕ຺ຕໂນ ກາຍໍ ຠຄວໂຕ ອຸປນາເມສີຕິ ເອວໍ ສມ຺ພນ຺ໂຘ ເວທິຕພ຺ໂພ.

ຕໂຕ ອຠາຍນ຺ຕໍ ຠຄວນ຺ຕໍ ທິສ຺ວາ ‘‘ປຎ຺ຫໍ ຕໍ ສມຓາ’’ຕິອາທິມາຫ. ກິໍ ກາຣຓາ? ໂສ ຫິ ຈິນ຺ເຕສິ – ‘‘ອິມິນາປິ ນາມ ເມ ເອວໍ ຂເຣນ ອມນຸສ຺ສສມ຺ຜສ຺ເສນ ມນຸສ຺ໂສ ສມາໂນ ອຍໍ ນ ຠາຍຕິ, ຫນ຺ທາຫໍ ເອຕໍ ພຸທ຺ຘວິສເຍ ປຎ຺ຫໍ ປຸຈ຺ຉາມິ, ອທ຺ຘາ ອຍໍ ຕຕ຺ຖ ນ ສມ຺ປາຍິສ຺ສຕິ, ຕໂຕ ນໍ ເອວໍ ວິເຫເຐສ຺ສາມີ’’ຕິ. ຠຄວາ ຕໍ ສຸຕ຺ວາ ‘‘ນ ຂ຺ວາຫໍ ຕໍ ອາວຸໂສ’’ຕິອາທິມາຫ. ຕໍ ສພ຺ພໍ ອາຬວກສຸຕ຺ເຕ ວຸຕ຺ຕນເຍເນວ ສພ຺ພາກາເຣຫິ ເວທິຕພ຺ພໍ.

໒໗໓. ອຖ ໂຂ ສູຈິໂລໂມ ຍກ຺ໂຂ ຠຄວນ຺ຕໍ ຄາຖາຍ ອຊ຺ຌຠາສິ ‘‘ຣາໂຄ ຈ ໂທໂສ ຈາ’’ຕິ. ຕຕ຺ຖ ຣາຄໂທສາ ວຸຕ຺ຕນຍາ ເອວ. ກຸໂຕນິທານາຕິ ກິໍນິທານາ ກິໍເຫຕຸກາ. ກຸໂຕຕິ ປຈ຺ຈຕ຺ຕວຈນສ຺ສ ໂຕ-ອາເທໂສ ເວທິຕພ຺ໂພ, ສມາເສ ຈສ຺ສ ໂລປາຠາໂວ. ອຖ ວາ ນິທານາຕິ ຊາຕາ ອຸປ຺ປນ຺ນາຕິ ອຕ຺ໂຖ, ຕສ຺ມາ ກຸໂຕນິທານາ, ກຸໂຕຊາຕາ, ກຸໂຕອຸປ຺ປນ຺ນາຕິ ວຸຕ຺ຕໍ ໂຫຕິ. ອຣຕີ ຣຕີ ໂລມຫໍໂສ ກຸໂຕຊາຕິ ຍາຍໍ ‘‘ປນ຺ເຕສຸ ວາ ເສນາສເນສຸ ອຎ຺ຎຕຣຎ຺ຎຕເຣສຸ ວາ ອຘິກຸສເລສຸ ຘມ຺ເມສຸ ອຣຕິ ອຣຕິຕາ ອນຠິຣຕິ ອນຠິຣມຓາ ອຸກ຺ກຓ຺ຐິຕາ ປຣິຕສ຺ສິຕາ’’ຕິ (ວິຠ. ໘໕໖) ເອວໍ ວິຠຕ຺ຕາ ອຣຕິ, ຍາ ຈ ປຎ຺ຈສຸ ກາມຄຸເຓສຸ ຣຕິ, ໂຍ ຈ ໂລມຫໍສສມຸຏ຺ຐາປນໂຕ ‘‘ໂລມຫໍໂສ’’ຕ຺ເວວ ສງ຺ຂ຺ຍໍ ຄໂຕ ຈິຕ຺ຕຸຕ຺ຣາໂສ. ອິເມ ຕໂຍ ຘມ຺ມາ ກຸໂຕຊາ ກຸໂຕຊາຕາຕິ ປຸຈ຺ຉຕິ. ກຸໂຕ ສມຸຏ຺ຐາຍາຕິ ກຸໂຕ ອຸປ຺ປຊ຺ຊິຕ຺ວາ. ມໂນຕິ ກຸສລຈິຕ຺ຕໍ, ວິຕກ຺ກາຕິ ອຸຣຄສຸຕ຺ເຕ ວຸຕ຺ຕາ ນວ ກາມວິຕກ຺ກາທໂຍ. ກຸມາຣກາ ຘງ຺ກມິໂວສ຺ສຊນ຺ຕີຕິ ຍຖາ ຄາມທາຣກາ ກີຬນ຺ຕາ ກາກໍ ສຸຕ຺ເຕນ ປາເທ ພນ຺ຘິຕ຺ວາ ໂອສ຺ສຊນ຺ຕິ ຂິປນ຺ຕິ, ເອວໍ ກຸສລມນໍ ອກຸສລວິຕກ຺ກາ ກຸໂຕ ສມຸຏ຺ຐາຍ ໂອສ຺ສຊນ຺ຕີຕິ ປຸຈ຺ຉຕິ.

໒໗໔. ອຖສ຺ສ ຠຄວາ ເຕ ປຎ຺ເຫ ວິສ຺ສຊ຺ເຊນ຺ໂຕ ‘‘ຣາໂຄ ຈາ’’ຕິ ທຸຕິຍຄາຖມຠາສິ. ຕຕ຺ຖ ອິໂຕຕິ ອຕ຺ຕຠາວໍ ສນ຺ຘາຍາຫ. ອຕ຺ຕຠາວນິທານາ ຫິ ຣາຄໂທສາ. ອຣຕິຣຕິໂລມຫໍສາ ຈ ອຕ຺ຕຠາວໂຕ ຊາຕາ, ກາມວິຕກ຺ກາທິອກຸສລວິຕກ຺ກາ ຈ ອຕ຺ຕຠາວໂຕເຍວ ສມຸຏ຺ຐາຍ ກຸສລມໂນ ໂອສ຺ສຊນ຺ຕິ, ເຕນ ຕທຎ຺ຎໍ ປກຕິອາທິກາຣຓໍ ປຏິກ຺ຂິປນ຺ໂຕ ອາຫ – ‘‘ອິໂຕນິທານາ ອິໂຕຊາ ອິໂຕ ສມຸຏ຺ຐາຍາ’’ຕິ. ສທ຺ທສິທ຺ຘິ ເຈຕ຺ຖ ປຸຣິມຄາຖາຍ ວຸຕ຺ຕນເຍເນວ ເວທິຕພ຺ພາ.

໒໗໕-໖. ເອວໍ ເຕ ປຎ຺ເຫ ວິສ຺ສຊ຺ເຊຕ຺ວາ ອິທານິ ຍ຺ວາຍໍ ‘‘ອິໂຕນິທານາ’’ຕິອາທີສຸ ‘‘ອຕ຺ຕຠາວນິທານາ ອຕ຺ຕຠາວໂຕ ຊາຕາ ອຕ຺ຕຠາວໂຕ ສມຸຏ຺ຐາຍາ’’ຕິ ອຕ຺ໂຖ ວຸຕ຺ໂຕ, ຕໍ ສາເຘນ຺ໂຕ ອາຫ – ‘‘ສ຺ເນຫຊາ ອຕ຺ຕສມ຺ຠູຕາ’’ຕິ. ເອເຕ ຫິ ສພ຺ເພປິ ຣາຄາທໂຍ ວິຕກ຺ກປຣິໂຍສານາ ຕຓ຺ຫາສ຺ເນເຫນ ຊາຕາ, ຕຖາ ຊາຍນ຺ຕາ ຈ ປຎ຺ຈຸປາທານກ຺ຂນ຺ຘເຠເທ ອຕ຺ຕຠາວປຣິຍາເຍ ອຕ຺ຕນິ ສມ຺ຠູຕາ. ເຕນາຫ – ‘‘ສ຺ເນຫຊາ ອຕ຺ຕສມ຺ຠູຕາ’’ຕິ. ອິທານິ ຕທຕ຺ຖໂຊຕິກໍ ອຸປມໍ ກໂຣຕິ ‘‘ນິຄ຺ໂຣຘສ຺ເສວ ຂນ຺ຘຊາ’’ຕິ. ຕຕ຺ຖ ຂນ຺ເຘສຸ ຊາຕາ ຂນ຺ຘຊາ, ປາໂຣຫານເມຕໍ ອຘິວຈນໍ. ກິໍ ວຸຕ຺ຕໍ ໂຫຕິ? ຍຖາ ນິຄ຺ໂຣຘສ຺ສ ຂນ຺ຘຊາ ນາມ ປາໂຣຫາ ອາໂປຣສສິເນເຫ ສຕິ ຊາຍນ຺ຕິ, ຊາຍນ຺ຕາ ຈ ຕສ຺ມິໍເຍວ ນິຄ຺ໂຣເຘ ເຕສຸ ເຕສຸ ສາຂປ຺ປເຠເທສຸ ສມ຺ຠວນ຺ຕິ, ເອວເມເຕປິ ຣາຄາທໂຍ ອຊ຺ຌຕ຺ຕຕຓ຺ຫາສ຺ເນເຫ ສຕິ ຊາຍນ຺ຕິ, ຊາຍນ຺ຕາ ຈ ຕສ຺ມິໍເຍວ ອຕ຺ຕຠາເວ ເຕສຸ ເຕສຸ ຈກ຺ຂາທິເຠເທສຸ ທ຺ວາຣາຣມ຺ມຓວຕ຺ຖູສຸ ສມ຺ຠວນ຺ຕິ. ຕສ຺ມາ ເວທິຕພ຺ພເມຕໍ ‘‘ອຕ຺ຕຠາວນິທານາ ອຕ຺ຕຠາວຊາ ອຕ຺ຕຠາວສມຸຏ຺ຐານາ ຈ ເອເຕ’’ຕິ.

ອວເສສທິຍຑ຺ຒຄາຖາຍ ປນ ອຍໍ ສພ຺ພສງ຺ຄາຫິກາ ອຕ຺ຖວຓ຺ຓນາ – ເອວໍ ອຕ຺ຕສມ຺ຠູຕາ ຈ ເອເຕ ປຸຖູ ວິສຕ຺ຕາ ກາເມສຸ. ຣາໂຄປິ ຫິ ປຎ຺ຈກາມຄຸຓິກາທິວເສນ, ໂທໂສປິ ອາຆາຕວຕ຺ຖາທິວເສນ, ອຣຕິອາທໂຍປິ ຕສ຺ສ ຕສ຺ເສວ ເຠທສ຺ສ ວເສນາຕິ ສພ຺ພຖາ ສພ຺ເພປິເມ ກິເລສາ ປຸຖູ ອເນກປ຺ປກາຣາ ຫຸຕ຺ວາ ວຕ຺ຖຸທ຺ວາຣາຣມ຺ມຓາທິວເສນ ເຕສຸ ເຕສຸ ວຕ຺ຖຸກາເມສຸ ຕຖາ ຕຖາ ວິສຕ຺ຕາ ລຄ຺ຄາ ລຄ຺ຄິຕາ ສໍສິພ຺ພິຕ຺ວາ ຐິຕາ. ກິມິວ? ມາລຸວາວ ວິຕຕາ ວເນ, ຍຖາ ວເນ ວິຕຕາ ມາລຸວາ ເຕສຸ ເຕສຸ ຣຸກ຺ຂສ຺ສ ສາຂປສາຂາທິເຠເທສຸ ວິສຕ຺ຕາ ໂຫຕິ ລຄ຺ຄາ ລຄ຺ຄິຕາ ສໍສິພ຺ພິຕ຺ວາ ຐິຕາ, ເອວໍ ປຸຖຸປ຺ປເຠເທສຸ ວຕ຺ຖຸກາເມສຸ ວິສຕ຺ຕໍ ກິເລສຄຓໍ ເຍ ນໍ ປຊານນ຺ຕິ ຍໂຕນິທານໍ, ເຕ ນໍ ວິໂນເທນ຺ຕິ ສຸໂຓຫິ ຍກ຺ຂ.

ຕຕ຺ຖ ຍໂຕນິທານນ຺ຕິ ຠາວນປຸໍສກນິທ຺ເທໂສ, ເຕນ ກິໍ ທີເປຕິ? ເຍ ສຕ຺ຕາ ນໍ ກິເລສຄຓໍ ‘‘ຍໂຕນິທານໍ ອຸປ຺ປຊ຺ຊຕີ’’ຕິ ເອວໍ ຊານນ຺ຕິ, ເຕ ນໍ ‘‘ຕຓ຺ຫາສ຺ເນຫສ຺ເນຫິເຕ ອຕ຺ຕຠາເວ ອຸປ຺ປຊ຺ຊຕີ’’ຕິ ຎຕ຺ວາ ຕໍ ຕຓ຺ຫາສ຺ເນຫໍ ອາທີນວານຸປສ຺ສນາທິຠາວນາຎາຓຄ຺ຄິນາ ວິໂສເສນ຺ຕາ ວິໂນເທນ຺ຕິ ປຊຫນ຺ຕິ ພ຺ຍນ຺ຕີກໂຣນ຺ຕິ ຈ, ເອຕໍ ອມ຺ຫາກໍ ສຸຠາສິຕໍ ສຸໂຓຫິ ຍກ຺ຂາຕິ. ເອວເມຕ຺ຖ ອຕ຺ຕຠາວຊານເນນ ທຸກ຺ຂປຣິຎ຺ຎໍ ຕຓ຺ຫາສ຺ເນຫຣາຄາທິກິເລສຄຓວິໂນທເນນ ສມຸທຍປ຺ປຫານຎ຺ຈ ທີເປຕິ.

ເຍ ຈ ນໍ ວິໂນເທນ຺ຕິ, ເຕ ທຸຕ຺ຕຣໍ ໂອຆມິມໍ ຕຣນ຺ຕິ ອຕິຓ຺ຓປຸພ຺ພໍ ອປຸນພ຺ຠວາຍ. ເອເຕນ ມຄ຺ຄຠາວນໍ ນິໂຣຘສຈ຺ຉິກິຣິຍຎ຺ຈ ທີເປຕິ. ເຍ ຫິ ນໍ ກິເລສຄຓໍ ວິໂນເທນ຺ຕິ, ເຕ ອວສ຺ສໍ ມຄ຺ຄໍ ຠາເວນ຺ຕິ. ນ ຫິ ມຄ຺ຄຠາວນໍ ວິນາ ກິເລສວິໂນທນໍ ອຕ຺ຖິ. ເຍ ຈ ມຄ຺ຄໍ ຠາເວນ຺ຕິ, ເຕ ທຸຕ຺ຕຣໍ ປກຕິຎາເຓນ ກາໂມຆາທິໍ ຈຕຸພ຺ພິຘມ຺ປິ ໂອຆມິມໍ ຕຣນ຺ຕິ. ມຄ຺ຄຠາວນາ ຫິ ໂອຆຕຣຓໍ. ອຕິຓ຺ຓປຸພ຺ພນ຺ຕິ ອິມິນາ ທີເຆນ ອທ຺ຘຸນາ ສຸປິນນ຺ເຕນປິ ອວີຕິກ຺ກນ຺ຕປຸພ຺ພໍ. ອປຸນພ຺ຠວາຍາຕິ ນິພ຺ພານາຍ. ເອວມິມໍ ຈຕຸສຈ຺ຈທີປິກໍ ຄາຖໍ ສຸຓນ຺ຕາ ‘‘ສຸຕ຺ວາ ຘມ຺ມໍ ຘາເຣນ຺ຕິ, ຘຕານໍ ຘມ຺ມານໍ ອຕ຺ຖມຸປປຣິກ຺ຂນ຺ຕີ’’ຕິອາທິກໍ ກຖໍ ສຸຠາວິນິຍາ ປຎ຺ຎາຍ ອນຸກ຺ກມມານາ ເຕ ທ຺ເວປິ ສຫາຍກາ ຍກ຺ຂາ ຄາຖາປຣິໂຍສາເນເຍວ ໂສຕາປຕ຺ຕິຜເລ ປຕິຏ຺ຐຫິໍສຸ, ປາສາທິກາ ຈ ອເຫສຸໍ ສຸວຓ຺ຓວຓ຺ຓາ ທິພ຺ພາລງ຺ກາຣວິຠູສິຕາຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ສູຈິໂລມສຸຕ຺ຕວຓ຺ຓນາ ນິຏ຺ຐິຕາ.