໗. ຣາຊປຸຕ຺ຕເປຕວຕ຺ຖຸວຓ຺ຓນາ

ປຸພ຺ເພ ກຕານໍ ກມ຺ມານນ຺ຕິ ອິທໍ ສຕ຺ຖາ ເຊຕວເນ ວິຫຣນ຺ໂຕ ຣາຊປຸຕ຺ຕເປຕໍ ອາຣພ຺ຠ ກເຖສິ. ຕຕ຺ຖ ໂຍ ໂສ ອຕີເຕ ກິຕວສ຺ສ ນາມ ຣຎ຺ໂຎ ປຸຕ຺ໂຕ ອຕີເຕ ປຈ຺ເຈກພຸທ຺ເຘ ອປຣຊ຺ຌິຕ຺ວາ ພຫູນິ ວສ຺ສສຫສ຺ສານິ ນິຣເຍ ປຈ຺ຈິຕ຺ວາ ຕສ຺ເສວ ກມ຺ມສ຺ສ ວິປາກາວເສເສນ ເປເຕສຸ ອຸປ຺ປນ຺ໂນ. ໂສ ອິຘ ‘‘ຣາຊປຸຕ຺ຕເປໂຕ’’ຕິ ອຘິປ຺ເປໂຕ. ຕສ຺ສ ວຕ຺ຖຸ ເຫຏ຺ຐາ ສາຓວາສິເປຕວຕ຺ຖຸມ຺ຫິ ວິຕ຺ຖາຣໂຕ ອາຄຕເມວ, ຕສ຺ມາ ຕຕ຺ຖ ວຸຕ຺ຕນເຍເນວ ຄເຫຕພ຺ພໍ. ສຕ຺ຖາ ຫິ ຕທາ ເຖເຣນ ອຕ຺ຕໂນ ຎາຕິເປຕານໍ ປວຕ຺ຕິຍາ ກຖິຕາຍ ‘‘ນ ເກວລໍ ຕວ ຎາຕກາເຍວ, ອຖ ໂຂ ຕ຺ວມ຺ປິ ອິໂຕ ອນນ຺ຕຣາຕີເຕ ອຕ຺ຕຠາເວ ເປໂຕ ຫຸຕ຺ວາ ມຫາທຸກ຺ຂໍ ອນຸຠວີ’’ຕິ ວຕ຺ວາ ເຕນ ຍາຈິໂຕ –

໗໕໓. ‘‘ປຸພ຺ເພ ກຕານໍ ກມ຺ມານໍ, ວິປາໂກ ມຖເຍ ມນໍ;

ຣູເປ ສທ຺ເທ ຣເສ ຄນ຺ເຘ, ໂຜຏ຺ຐພ຺ເພ ຈ ມໂນຣເມ.

໗໕໔. ‘‘ອິຈ຺ຈໍ ຄີຕໍ ຣຕິໍ ຂິຑ຺ຑໍ, ອນຸຠຸຕ຺ວາ ອນປ຺ປກໍ;

ອຸຍ຺ຍາເນ ປຣິຈຣິຕ຺ວາ, ປວິສນ຺ໂຕ ຄິຣິພ຺ພຊໍ.

໗໕໕. ‘‘ອິສິໍ ສຸເນຕ຺ຕມທ຺ທກ຺ຂິ, ອຕ຺ຕທນ຺ຕໍ ສມາຫິຕໍ;

ອປ຺ປິຈ຺ຉໍ ຫິຣິສມ຺ປນ຺ນໍ, ອຸຎ຺ເຉ ປຕ຺ຕຄເຕ ຣຕໍ.

໗໕໖. ‘‘ຫຕ຺ຖິກ຺ຂນ຺ຘໂຕ ໂອຣຸຍ຺ຫ, ລທ຺ຘາ ຠນ຺ເຕຕິ ຈາພ຺ຣວິ;

ຕສ຺ສ ປຕ຺ຕໍ ຄເຫຕ຺ວານ, ອຸຈ຺ຈໍ ປຄ຺ຄຍ຺ຫ ຂຕ຺ຕິໂຍ.

໗໕໗. ‘‘ຖຓ຺ຑິເລ ປຕ຺ຕໍ ຠິນ຺ທິຕ຺ວາ, ຫສມາໂນ ອປກ຺ກມິ;

ຣຎ຺ໂຎ ກິຕວສ຺ສາຫໍ ປຸຕ຺ໂຕ, ກິໍ ມໍ ຠິກ຺ຂຸ ກຣິສ຺ສສິ.

໗໕໘. ‘‘ຕສ຺ສ ກມ຺ມສ຺ສ ຜຣຸສສ຺ສ, ວິປາໂກ ກຏຸໂກ ອຫຸ;

ຍໍ ຣາຊປຸຕ຺ໂຕ ເວເທສິ, ນິຣຍມ຺ຫິ ສມປ຺ປິໂຕ.

໗໕໙. ‘‘ຉເຬວ ຈຕຸຣາສີຕິ, ວສ຺ສານິ ນຫຸຕານິ ຈ;

ຠຸສໍ ທຸກ຺ຂໍ ນິຄຈ຺ຉິຕ຺ໂຖ, ນິຣເຍ ກຕກິພ຺ພິໂສ.

໗໖໐. ‘‘ອຸຕ຺ຕາໂນປິ ຈ ປຈ຺ຈິຕ຺ຖ, ນິກຸຊ຺ໂຊ ວາມທກ຺ຂິໂຓ;

ອຸທ຺ຘໍປາໂທ ຐິໂຕ ເຈວ, ຈິຣໍ ພາໂລ ອປຈ຺ຈຖ.

໗໖໑. ‘‘ພຫູນິ ວສ຺ສສຫສ຺ສານິ, ປູຄານິ ນຫຸຕານິ ຈ;

ຠຸສໍ ທຸກ຺ຂໍ ນິຄຈ຺ຉິຕ຺ໂຖ, ນິຣເຍ ກຕກິພ຺ພິໂສ.

໗໖໒. ‘‘ເອຕາທິສໍ ໂຂ ກຏຸກໍ, ອປ຺ປທຸຏ຺ຐປ຺ປໂທສິນໍ;

ປຈ຺ຈນ຺ຕິ ປາປກມ຺ມນ຺ຕາ, ອິສິມາສຊ຺ຊ ສຸພ຺ພຕໍ.

໗໖໓. ‘‘ໂສ ຕຕ຺ຖ ພຫຸວສ຺ສານິ, ເວທຍິຕ຺ວາ ພຫຸໍ ທຸຂໍ;

ຂຸປ຺ປິປາສຫໂຕ ນາມ, ເປໂຕ ອາສິ ຕໂຕ ຈຸໂຕ.

໗໖໔. ‘‘ເອຕມາທີນວໍ ຎຕ຺ວາ, ອິສ຺ສຣມທສມ຺ຠວໍ;

ປຫາຍ ອິສ຺ສຣມທໍ, ນິວາຕມນຸວຕ຺ຕເຍ.

໗໖໕. ‘‘ທິຏ຺ເຐວ ຘມ຺ເມ ປາສໍໂສ, ໂຍ ພຸທ຺ເຘສຸ ສຄາຣໂວ;

ກາຍສ຺ສ ເຠທາ ສປ຺ປຎ຺ໂຎ, ສຄ຺ຄໍ ໂສ ອຸປປຊ຺ຊຕີ’’ຕິ. –

ອິທໍ ເປຕວຕ຺ຖຸໍ ກເຖສິ.

໗໕໓. ຕຕ຺ຖ ປຸພ຺ເພ ກຕານໍ ກມ຺ມານໍ, ວິປາໂກ ມຖເຍ ມນນ຺ຕິ ປຸຣິມາສຸ ຊາຕີສຸ ກຕານໍ ອກຸສລກມ຺ມານໍ ຜລໍ ອຸຬາຣໍ ຫຸຕ຺ວາ ອຸປ຺ປຊ຺ຊມານໍ ອນ຺ຘພາລານໍ ຈິຕ຺ຕໍ ມຖເຍຍ຺ຍ ອຠິຠເວຍ຺ຍ, ປເຣສໍ ອນຕ຺ຖກຣຓມຸເຂນ ອຕ຺ຕໂນ ອຕ຺ຖໍ ອຸປ຺ປາເທຍ຺ຍາຕິ ອຘິປ຺ປາໂຍ.

ອິທານິ ຕໍ ຈິຕ຺ຕມຖນໍ ວິສເຍນ ສທ຺ຘິໍ ທສ຺ເສຕຸໍ ‘‘ຣູເປ ສທ຺ເທ’’ຕິອາທິ ວຸຕ຺ຕໍ. ຕຕ຺ຖ ຣູເປຕິ ຣູປເຫຕຸ, ຍຖິຈ຺ຉິຕສ຺ສ ມນາປິຍສ຺ສ ຣູປາຣມ຺ມຓສ຺ສ ປຏິລາຠນິມິຕ຺ຕນ຺ຕິ ອຕ຺ໂຖ. ສທ຺ເທຕິອາທີສຸປິ ເອເສວ ນໂຍ.

໗໕໔. ເອວໍ ສາຘາຣຓໂຕ ວຸຕ຺ຕມຕ຺ຖໍ ອສາຘາຣຓໂຕ ນິຍເມຕ຺ວາ ທສ຺ເສນ຺ໂຕ ‘‘ນຈ຺ຈໍ ຄີຕ’’ນ຺ຕິອາທິມາຫ. ຕຕ຺ຖ ຣຕິນ຺ຕິ ກາມຣຕິໍ. ຂິຑ຺ຑນ຺ຕິ ສຫາຍກາທີຫິ ເກຬິໍ. ຄິຣິພ຺ພຊນ຺ຕິ ຣາຊຄຫໍ.

໗໕໕. ອິສິນ຺ຕິ ອເສກ຺ຂານໍ ສີລກ຺ຂນ຺ຘາທີນໍ ເອສນຏ຺ເຐນ ອິສິໍ. ສຸເນຕ຺ຕນ຺ຕິ ເອວໍນາມກໍ ປຈ຺ເຈກພຸທ຺ຘໍ. ອຕ຺ຕທນ຺ຕນ຺ຕິ ອຸຕ຺ຕເມນ ທມເຖນ ທມິຕຈິຕ຺ຕໍ. ສມາຫິຕນ຺ຕິ ອຣຫຕ຺ຕຜລສມາຘິນາ ສມາຫິຕໍ. ອຸຎ຺ເຉ ປຕ຺ຕຄເຕ ຣຕນ຺ຕິ ອຸຎ຺ເຉນ ຠິກ຺ຂາຈາເຣນ ລທ຺ເຘ ປຕ຺ຕຄເຕ ປຕ຺ຕປຣິຍາປນ຺ເນ ອາຫາເຣ ຣຕໍ ສນ຺ຕຸຏ຺ຐໍ.

໗໕໖. ລທ຺ຘາ, ຠນ຺ເຕຕິ ຈາພ຺ຣວີຕິ ‘‘ອປິ, ຠນ຺ເຕ, ຠິກ຺ຂາ ລທ຺ຘາ’’ຕິ ວິສ຺ສາສຊນນຕ຺ຖໍ ກເຖສິ. ອຸຈ຺ຈໍ ປຄ຺ຄຍ຺ຫາຕິ ອຸຈ຺ຈຕຣໍ ກຕ຺ວາ ປຕ຺ຕໍ ອຸກ຺ຂິປິຕ຺ວາ.

໗໕໗. ຖຓ຺ຑິເລ ປຕ຺ຕໍ ຠິນ຺ທິຕ຺ວາຕິ ຂຣກຐິເນ ຠູມິປ຺ປເທເສ ຂິປນ຺ໂຕ ປຕ຺ຕໍ ຠິນ຺ທິຕ຺ວາ. ອປກ຺ກມີຕິ ໂຖກໍ ອປສກ຺ກິ. ອປສກ຺ກນ຺ໂຕ ຈ ‘‘ອກາຣເຓເນວ ອນ຺ຘພາໂລ ມຫນ຺ຕໍ ອນຕ຺ຖໍ ອຕ຺ຕໂນ ອກາສີ’’ຕິ ກຣຸຓາຍນວເສນ ໂອໂລເກນ຺ຕໍ ປຈ຺ເຈກພຸທ຺ຘໍ ຣາຊປຸຕ຺ໂຕ ອາຫ ‘‘ຣຎ຺ໂຎ ກິຕວສ຺ສາຫໍ ປຸຕ຺ໂຕ, ກິໍ ມໍ ຠິກ຺ຂຸ ກຣິສ຺ສສີ’’ຕິ.

໗໕໘. ຜຣຸສສ຺ສາຕິ ທາຣຸຓສ຺ສ. ກຏຸໂກຕິ ອນິຏ຺ໂຐ. ຍນ຺ຕິ ຍໍ ວິປາກໍ. ສມປ຺ປິໂຕຕິ ອລ຺ລີໂນ.

໗໕໙. ຉເຬວ ຈຕຸຣາສີຕິ, ວສ຺ສານິ ນຫຸຕານິ ຈາຕິ ອຸຕ຺ຕາໂນ ນິປນ຺ໂນ ຈຕຸຣາສີຕິວສ຺ສສຫສ຺ສານິ, ນິກຸຊ຺ໂຊ, ວາມປສ຺ເສນ, ທກ຺ຂິຓປສ຺ເສນ, ອຸທ຺ຘໍປາໂທ, ໂອລມ຺ພິໂກ, ຍຖາຐິໂຕ ຈາຕິ ເອວໍ ຉ ຈຕຸຣາສີຕິສຫສ຺ສານິ ວສ຺ສານິ ໂຫນ຺ຕິ. ເຕນາຫ –

໗໖໐. ‘‘ອຸຕ຺ຕາໂນປິ ຈ ປຈ຺ຈິຕ຺ຖ, ນິກຸຊ຺ໂຊ ວາມທກ຺ຂິໂຓ;

ອຸທ຺ຘໍປາໂທ ຐິໂຕ ເຈວ, ຈິຣໍ ພາໂລ ອປຈ຺ຈຖາ’’ຕິ.

ຕານິ ປນ ວສ຺ສານິ ຍສ຺ມາ ອເນການິ ນຫຸຕານິ ໂຫນ຺ຕິ, ຕສ຺ມາ ວຸຕ຺ຕໍ ‘‘ນຫຸຕານີ’’ຕິ. ຠຸສໍ ທຸກ຺ຂໍ ນິຄຈ຺ຉິຕ຺ໂຖຕິ ອຕິວິຍ ທຸກ຺ຂໍ ປາປຸຓິ.

໗໖໑. ປູຄານີຕິ ວສ຺ສສມູເຫ, ອິຘ ປຸຣິມຄາຖາຍ ຈ ອຈ຺ຈນ຺ຕສໍໂຍເຄ ອຸປໂຍຄວຈນໍ ທຏ຺ຐພ຺ພໍ.

໗໖໒. ເອຕາທິສນ຺ຕິ ເອວຣູປໍ. ກຏຸກນ຺ຕິ ອຕິທຸກ຺ຂໍ, ຠາວນປໍສກນິທ຺ເທໂສຍໍ ‘‘ເອກມນ຺ຕໍ ນິສີທີ’’ຕິອາທີສຸ ວິຍ. ອປ຺ປທຸຏ຺ຐປ຺ປໂທສິນໍ ອິສິໍ ສຸພ຺ພຕໍ ອາສຊ຺ຊ ອາສາເທຕ຺ວາ ປາປກມ຺ມນ຺ຕາ ປຸຄ຺ຄລາ ເອວຣູປໍ ກຏຸກໍ ອຕິວິຍ ທຸກ຺ຂໍ ປຈ຺ຈນ຺ຕີຕິ ໂຍຊນາ.

໗໖໓. ໂສຕິ ໂສ ຣາຊປຸຕ຺ຕເປໂຕ. ຕຕ຺ຖາຕິ ນິຣເຍ. ເວທຍິຕ຺ວາຕິ ອນຸຠວິຕ຺ວາ. ນາມາຕິ ພ຺ຍຕ຺ຕປາກຏຠາເວນ. ຕໂຕ ຈຸໂຕຕິ ນິຣຍໂຕ ຈຸໂຕ. ເສສໍ ວຸຕ຺ຕນຍເມວ.

ເອວໍ ຠຄວາ ຣາຊປຸຕ຺ຕເປຕກຖາຍ ຕຕ຺ຖ ສນ຺ນິປຕິຕໍ ມຫາຊນໍ ສໍເວເຊຕ຺ວາ ອຸປຣິ ສຈ຺ຈານິ ປກາເສສິ. ສຈ຺ຈປຣິໂຍສາເນ ພຫູ ໂສຕາປຕ຺ຕິຜລາທີນິ ສມ຺ປາປຸຓິໍສູຕິ.

ຣາຊປຸຕ຺ຕເປຕວຕ຺ຖຸວຓ຺ຓນາ ນິຏ຺ຐິຕາ.