໘. ຄູຖຂາທກເປຕວຕ຺ຖຸວຓ຺ຓນາ

ຄູຖກູປໂຕ ອຸຄ຺ຄນ຺ຕ຺ວາຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ເອກໍ ຄູຖຂາທກເປຕໍ ອາຣມ຺ຠ ວຸຕ຺ຕໍ. ສາວຕ຺ຖິຍາ ກິຣ ອວິທູເຣ ອຎ຺ຎຕຣສ຺ມິໍ ຄາມເກ ເອໂກ ກຸຏຸມ຺ພິໂກ ອຕ຺ຕໂນ ກຸລູປກໍ ຠິກ຺ຂຸໍ ອຸທ຺ທິສ຺ສ ວິຫາຣໍ ກາເຣສິ. ຕຕ຺ຖ ນານາຊນປທໂຕ ຠິກ຺ຂູ ອາຄນ຺ຕ຺ວາ ປຏິວສິໍສຸ. ເຕ ທິສ຺ວາ ມນຸສ຺ສາ ປສນ຺ນຈິຕ຺ຕາ ປຓີເຕນ ປຈ຺ຈເຍນ ອຸປຏ຺ຐຫິໍສຸ. ກຸລູປໂກ ຠິກ຺ຂຸ ຕໍ ອສຫມາໂນ ອິສ຺ສາປກໂຕ ຫຸຕ຺ວາ ເຕສໍ ຠິກ຺ຂູນໍ ໂທສໍ ວທນ຺ໂຕ ກຸຏຸມ຺ພິກໍ ອຸຊ຺ຌາເປສິ. ກຸຏຸມ຺ພິໂກ ເຕ ຠິກ຺ຂູ ກຸລູປກຎ຺ຈ ປຣິຠວນ຺ໂຕ ປຣິຠາສິ. ອຖ ກຸລູປໂກ ກາລໍ ກຕ຺ວາ ຕສ຺ມິໍເຍວ ວິຫາເຣ ວຈ຺ຈກຸຏິຍໍ ເປໂຕ ຫຸຕ຺ວາ ນິພ຺ພຕ຺ຕິ, ກຸຏຸມ຺ພິໂກ ປນ ກາລໍ ກຕ຺ວາ ຕສ຺ເສວ ອຸປຣິ ເປໂຕ ຫຸຕ຺ວາ ນິພ຺ພຕ຺ຕິ. ອຖາຍສ຺ມາ ມຫາໂມຄ຺ຄລ຺ລາໂນ ຕໍ ທິສ຺ວາ ປຸຈ຺ຉນ຺ໂຕ –

໗໖໖. ‘‘ຄູຖກູປໂຕ ອຸຄ຺ຄນ຺ຕ຺ວາ, ໂກ ນ ທີໂນ ປຕິຏ຺ຐສິ;

ນິສ຺ສໍສຍໍ ປາປກມ຺ມນ຺ໂຕ, ກິໍ ນຸ ສທ຺ທຫເສ ຕຸວ’’ນ຺ຕິ. –

ຄາຖມາຫ. ຕໍ ສຸຕ຺ວາ ເປໂຕ –

໗໖໗. ‘‘ອຫໍ ຠທນ຺ເຕ ເປໂຕມ຺ຫິ, ທຸຄ຺ຄໂຕ ຍມໂລກິໂກ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄໂຕ’’ຕິ. –

ຄາຖາຍ ອຕ຺ຕານໍ ອາຈິກ຺ຂິ. ອຖ ນໍ ເຖໂຣ –

໗໖໘. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ອິທໍ ທຸກ຺ຂໍ ນິຄຈ຺ຉສີ’’ຕິ. –

ຄາຖາຍ ເຕນ ກຕກມ຺ມໍ ປຸຈ຺ຉິ. ໂສ ເປໂຕ –

໗໖໙. ‘‘ອຫຸ ອາວາສິໂກ ມຍ຺ຫໍ, ອິສ຺ສຸກີ ກຸລມຈ຺ຉຣີ;

ອຊ຺ຌາສິໂຕ ມຍ຺ຫໍ ຆເຣ, ກທຣິໂຍ ປຣິຠາສໂກ.

໗໗໐. ‘‘ຕສ຺ສາຫໍ ວຈນໍ ສຸຕ຺ວາ, ຠິກ຺ຂໂວ ປຣິຠາສິສໍ;

ຕສ຺ສກມ຺ມວິປາເກນ, ເປຕໂລກໍ ອິໂຕ ຄໂຕ’’ຕິ. –

ທ຺ວີຫິ ຄາຖາຫິ ອຕ຺ຕນາ ກຕກມ຺ມໍ ກເຖສິ.

໗໖໙. ຕຕ຺ຖ ອຫຸ ອາວາສິໂກ ມຍ຺ຫນ຺ຕິ ມຍ຺ຫໍ ອາວາເສ ມຍາ ກຕວິຫາເຣ ເອໂກ ຠິກ຺ຂຸ ອາວາສິໂກ ນິພທ຺ຘວສນໂກ ອໂຫສິ. ອຊ຺ຌາສິໂຕ ມຍ຺ຫໍ ຆເຣຕິ ກຸລູປກຠາເວນ ມມ ເຄເຫ ຕຓ຺ຫາຠິນິເວສວເສນ ອຠິນິວິຏ຺ໂຐ.

໗໗໐. ຕສ຺ສາຕິ ຕສ຺ສ ກຸລູປກຠິກ຺ຂຸສ຺ສ. ຠິກ຺ຂໂວຕິ ຠິກ຺ຂູ. ປຣິຠາສິສນ຺ຕິ ອກ຺ໂກສິໍ. ເປຕໂລກໍ ອິໂຕ ຄໂຕຕິ ອິມິນາ ອາກາເຣນ ເປຕໂຍນິໍ ອຸປຄໂຕ ເປຕຠູໂຕ.

ຕໍ ສຸຕ຺ວາ ເຖໂຣ ອິຕຣສ຺ສ ຄຕິໍ ປຸຈ຺ຉນ຺ໂຕ –

໗໗໑. ‘‘ອມິຕ຺ໂຕ ມິຕ຺ຕວຓ຺ເຓນ, ໂຍ ເຕ ອາສິ ກຸລູປໂກ;

ກາຍສ຺ສ ເຠທາ ທຸປ຺ປຎ຺ໂຎ, ກິໍ ນຸ ເປຈ຺ຈ ຄຕິໍ ຄໂຕ’’ຕິ. –

ຄາຖມາຫ. ຕຕ຺ຖ ມິຕ຺ຕວຓ຺ເຓນາຕິ ມິຕ຺ຕປຏິຣູເປນ ມິຕ຺ຕປຏິຣູປຕາຍ.

ປຸນ ເປໂຕ ເຖຣສ຺ສ ຕມຕ຺ຖໍ ອາຈິກ຺ຂນ຺ໂຕ –

໗໗໒. ‘‘ຕສ຺ເສວາຫໍ ປາປກມ຺ມສ຺ສ, ສີເສ ຕິຏ຺ຐາມິ ມຕ຺ຖເກ;

ໂສ ຈ ປຣວິສຍໍ ປຕ຺ໂຕ, ມເມວ ປຣິຈາຣໂກ.

໗໗໓. ‘‘ຍໍ ຠທນ຺ເຕ ຫທນ຺ຕຎ຺ເຎ, ເອຕໍ ເມ ໂຫຕິ ໂຠຊນໍ;

ອຫຎ຺ຈ ໂຂ ຍໍ ຫທາມິ, ເອຕໍ ໂສ ອຸປຊີວຕີ’’ຕິ. – ຄາຖາທ຺ວຍມາຫ;

໗໗໒. ຕຕ຺ຖ ຕສ຺ເສວາຕິ ຕສ຺ເສວ ມຍ຺ຫໍ ປຸພ຺ເພ ກຸລູປກຠິກ຺ຂຸຠູຕສ຺ສ ເປຕສ຺ສ. ປາປກມ຺ມສ຺ສາຕິ ປາປສມາຈາຣສ຺ສ. ສີເສ ຕິຏ຺ຐາມິ ມຕ຺ຖເກຕິ ສີເສ ຕິຏ຺ຐາມິ, ຕິຏ຺ຐນ຺ໂຕ ຈ ມຕ຺ຖເກ ເອວ ຕິຏ຺ຐາມິ, ນ ສີສປ຺ປມາເຓ ອາກາເສຕິ ອຕ຺ໂຖ. ປຣວິສຍໍ ປຕ຺ໂຕຕິ ມນຸສ຺ສໂລກໍ ອຸປາທາຍ ປຣວິສຍຠູຕໍ ເປຕ຺ຕິວິສຍໍ ປຕ຺ໂຕ. ມເມວາຕິ ມຍ຺ຫໍ ເອວ ປຣິຈາຣໂກ ອໂຫສີຕິ ວຈນເສໂສ.

໗໗໓. ຍໍ ຠທນ຺ເຕ ຫທນ຺ຕຎ຺ເຎຕິ ຠທນ຺ເຕ, ອຍ຺ຍ ມຫາໂມຄ຺ຄລານ, ຕສ຺ສໍ ວຈ຺ຈກຸຏິຍໍ ຍໍ ອຎ຺ເຎ ອຸຫທນ຺ຕິ ວຈ຺ຈໍ ໂອສ຺ສຊນ຺ຕິ. ເອຕໍ ເມ ໂຫຕິ ໂຠຊນນ຺ຕິ ເອຕໍ ວຈ຺ຈໍ ມຍ຺ຫໍ ທິວເສ ທິວເສ ໂຠຊນໍ ໂຫຕິ. ຍໍ ຫທາມີຕິ ຕໍ ປນ ວຈ຺ຈໍ ຂາທິຕ຺ວາ ຍມ຺ປຫໍ ວຈ຺ຈໍ ກໂຣມິ. ເອຕໍ ໂສ ອຸປຊີວຕີຕິ ເອຕໍ ມມ ວຈ຺ຈໍ ໂສ ກຸລູປກເປໂຕ ທິວເສ ທິວເສ ຂາທນວເສນ ອຸປຊີວຕິ, ອຕ຺ຕຠາວໍ ຍາເປຕີຕິ ອຕ຺ໂຖ.

ເຕສຸ ກຸຏຸມ຺ພິໂກ ເປສເລ ຠິກ຺ຂູ ‘‘ເອວໍ ອາຫາຣປຣິໂຠຄໂຕ ວຣໍ ຕຸມ຺ຫາກໍ ຄູຖຂາທນ’’ນ຺ຕິ ອກ຺ໂກສິ. ກຸລູປໂກ ປນ ກຸຏຸມ຺ພິກມ຺ປິ ຕຖາວຈເນ ສມາທເປຕ຺ວາ ສຍໍ ຕຖາ ອກ຺ໂກສິ, ເຕນສ຺ສ ຕໂຕປິ ປຏິກຸຏ຺ຐຕຣາ ຊີວິກາ ອໂຫສິ. ອາຍສ຺ມາ ມຫາໂມຄ຺ຄລ຺ລາໂນ ຕໍ ປວຕ຺ຕິໍ ຠຄວໂຕ ອາໂຣເຈສິ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ອຸປວາເທ ອາທີນວໍ ທສ຺ເສຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ຄູຖຂາທກເປຕວຕ຺ຖຸວຓ຺ຓນາ ນິຏ຺ຐິຕາ.