໖. ກຸມາຣເປຕວຕ຺ຖຸວຓ຺ຓນາ

ສາວຕ຺ຖິ ນາມ ນຄຣນ຺ຕິ ອິທໍ ສຕ຺ຖາ ເຊຕວເນ ວິຫຣນ຺ໂຕ ທ຺ເວ ເປເຕ ອາຣພ຺ຠ ກເຖສິ. ສາວຕ຺ຖິຍໍ ກິຣ ໂກສລຣຎ຺ໂຎ ທ຺ເວ ປຸຕ຺ຕາ ປາສາທິກາ ປຐມວເຍ ຐິຕາ ໂຍພ຺ພນມທມຕ຺ຕາ ປຣທາຣກມ຺ມໍ ກຕ຺ວາ ກາລໍ ກຕ຺ວາ ປຣິຂາປິຏ຺ເຐ ເປຕາ ຫຸຕ຺ວາ ນິພ຺ພຕ຺ຕິໍສຸ. ເຕ ຣຕ຺ຕິຍໍ ເຠຣເວນ ສທ຺ເທນ ປຣິເທວິໍສຸ. ມນຸສ຺ສາ ຕໍ ສຸຕ຺ວາ ຠີຕຕສິຕາ ‘‘ເອວໍ ກເຕ ອິທໍ ອວມງ຺ຄລໍ ວູປສມ຺ມຕີ’’ຕິ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ມຫາທານໍ ທຕ຺ວາ ຕໍ ປວຕ຺ຕິໍ ຠຄວໂຕ ອາໂຣເຈສຸໍ. ຠຄວາ ‘‘ອຸປາສກາ ຕສ຺ສ ສທ຺ທສ຺ສ ສວເນນ ຕຸມ຺ຫາກໍ ນ ໂກຈິ ອນ຺ຕຣາໂຍ’’ຕິ ວຕ຺ວາ ຕສ຺ສ ກາຣຓໍ ອາຈິກ຺ຂິຕ຺ວາ ເຕສໍ ຘມ຺ມໍ ເທເສຕຸໍ –

໗໔໖. ‘‘ສາວຕ຺ຖິ ນາມ ນຄຣໍ, ຫິມວນ຺ຕສ຺ສ ປສ຺ສໂຕ;

ຕຕ຺ຖ ອາສຸໍ ທ຺ເວ ກຸມາຣາ, ຣາຊປຸຕ຺ຕາຕິ ເມ ສຸຕໍ.

໗໔໗. ‘‘ສມ຺ມຕ຺ຕາ ຣຊນີເຍສຸ, ກາມສ຺ສາທາຠິນນ຺ທິໂນ;

ປຈ຺ຈຸປ຺ປນ຺ນສຸເຂ ຄິທ຺ຘາ, ນ ເຕ ປສ຺ສິໍສຸນາຄຕໍ.

໗໔໘. ‘‘ເຕ ຈຸຕາ ຈ ມນຸສ຺ສຕ຺ຕາ, ປຣໂລກໍ ອິໂຕ ຄຕາ;

ເຕຘ ໂຆເສນ຺ຕ຺ຍທິສ຺ສນ຺ຕາ, ປຸພ຺ເພ ທຸກ຺ກຏມຕ຺ຕໂນ.

໗໔໙. ‘‘ພຫູສຸ ວຕ ສນ຺ເຕສຸ, ເທຍ຺ຍຘມ຺ເມ ອຸປຏ຺ຐິເຕ;

ນາສກ຺ຂິມ຺ຫາ ຈ ອຕ຺ຕານໍ, ປຣິຕ຺ຕໍ ກາຕຸໍ ສຸຂາວຫໍ.

໗໕໐. ‘‘ກິໍ ຕໂຕ ປາປກໍ ອສ຺ສ, ຍໍ ໂນ ຣາຊກຸລາ ຈຸຕາ;

ອຸປປນ຺ນາ ເປຕ຺ຕິວິສຍໍ, ຂຸປ຺ປິປາສສມປ຺ປິຕາ.

໗໕໑. ‘‘ສາມິໂນ ອິຘ ຫຸຕ຺ວານ, ໂຫນ຺ຕິ ອສາມິໂນ ຕຫິໍ;

ຠມນ຺ຕິ ຂຸປ຺ປິປາສາຍ, ມນຸສ຺ສາ ອຸນ຺ນໂຕນຕາ.

໗໕໒. ‘‘ເອຕມາທີນວໍ ຎຕ຺ວາ, ອິສ຺ສຣມທສມ຺ຠວໍ;

ປຫາຍ ອິສ຺ສຣມທໍ, ຠເວ ສຄ຺ຄຄໂຕ ນໂຣ;

ກາຍສ຺ສ ເຠທາ ສປ຺ປຎ຺ໂຎ, ສຄ຺ຄໍ ໂສ ອຸປປຊ຺ຊຕີ’’ຕິ – ຄາຖາ ອຠາສິ;

໗໔໖. ຕຕ຺ຖ ອິຕິ ເມ ສຸຕນ຺ຕິ ນ ເກວລໍ ອຕ຺ຕໂນ ຎາເຓນ ທິຏ຺ຐເມວ, ອຖ ໂຂ ໂລເກ ປາກຏຠາເວນ ເອວໍ ມຍາ ສຸຕນ຺ຕິ ອຕ຺ໂຖ.

໗໔໗. ກາມສ຺ສາທາຠິນນ຺ທິໂນຕິ ກາມຄຸເຓສຸ ອສ຺ສາທວເສນ ອຠິນນ຺ທນສີລາ. ປຈ຺ຈຸປ຺ປນ຺ນສຸເຂ ຄິທ຺ຘາຕິ ວຕ຺ຕມານສຸຂມຕ຺ເຕ ຄິທ຺ຘາ ຄຖິຕາ ຫຸຕ຺ວາ. ນ ເຕ ປສ຺ສິໍສຸນາຄຕນ຺ຕິ ທຸຈ຺ຈຣິຕໍ ປຫາຍ ສຸຈຣິຕໍ ຈຣິຕ຺ວາ ອນາຄຕໍ ອາຍຕິໍ ເທວມນຸສ຺ເສສຸ ລທ຺ຘພ຺ພໍ ສຸຂໍ ເຕ ນ ຈິນ຺ເຕສຸໍ.

໗໔໘. ເຕຘ ໂຆເສນ຺ຕ຺ຍທິສ຺ສນ຺ຕາຕິ ເຕ ປຸພ຺ເພ ຣາຊປຸຕ຺ຕຠູຕາ ເປຕາ ອິຘ ສາວຕ຺ຖິຍາ ສມີເປ ອທິສ຺ສມານຣູປາ ໂຆເສນ຺ຕິ ກນ຺ທນ຺ຕິ. ກິໍ ກນ຺ທນ຺ຕີຕິ ອາຫ ‘‘ປຸພ຺ເພ ທຸກ຺ກຏມຕ຺ຕໂນ’’ຕິ.

໗໔໙. ອິທານິ ເຕສໍ ກນ຺ທນສ຺ສ ກາຣຓໍ ເຫຕຸໂຕ ຈ ຜລໂຕ ຈ ວິຠຊິຕ຺ວາ ທສ຺ເສຕຸໍ ‘‘ພຫູສຸ ວຕ ສນ຺ເຕສູ’’ຕິອາທິ ວຸຕ຺ຕໍ.

ຕຕ຺ຖ ພຫູສຸ ວຕ ສນ຺ເຕສູຕິ ອເນເກສຸ ທກ຺ຂິເຓຍ຺ເຍສຸ ວິຊ຺ຊມາເນສຸ. ເທຍ຺ຍຘມ຺ເມ ອຸປຏ຺ຐິເຕຕິ ອຕ຺ຕໂນ ສນ຺ຕເກ ທາຕພ຺ພເທຍ຺ຍຘມ຺ເມປິ ສມີເປ ຐິເຕ, ລພ຺ຠມາເນຕິ ອຕ຺ໂຖ. ປຣິຕ຺ຕໍ ສຸຂາວຫນ຺ຕິ ອປ຺ປມຕ຺ຕກມ຺ປິ ອາຍຕິໍ ສຸຂາວຫໍ ປຸຎ຺ຎໍ ກຕ຺ວາ ອຕ຺ຕານໍ ໂສຕ຺ຖິໍ ນິຣຸປທ຺ທວໍ ກາຕຸໍ ນາສກ຺ຂິມ຺ຫາ ວຕາຕິ ໂຍຊນາ.

໗໕໐. ກິໍ ຕໂຕ ປາປກໍ ອສ຺ສາຕິ ຕໂຕ ປາປກໍ ລາມກໍ ນາມ ກິໍ ອຎ຺ຎໍ ອສ຺ສ ສິຍາ. ຍໍ ໂນ ຣາຊກຸລາ ຈຸຕາຕິ ເຍນ ປາປກມ຺ເມນ ມຍໍ ຣາຊກຸລໂຕ ຈຸຕາ ອິຘ ເປຕ຺ຕິວິສຍໍ ອຸປປນ຺ນາ ເປເຕສຸ ນິພ຺ພຕ຺ຕາ ຂຸປ຺ປິປາສສມປ຺ປິຕາ ວິຈຣາມາຕິ ອຕ຺ໂຖ.

໗໕໑. ສາມິໂນ ອິຘ ຫຸຕ຺ວານາຕິ ອິຘ ອິມສ຺ມິໍ ໂລເກ ຍສ຺ມິໍເຍວ ຐາເນ ປຸພ຺ເພ ສາມິໂນ ຫຸຕ຺ວາ ວິຈຣນ຺ຕິ, ຕຫິໍ ຕສ຺ມິໍເຍວ ຐາເນ ໂຫນ຺ຕິ ອສ຺ສາມິໂນ. ມນຸສ຺ສາ ອຸນ຺ນໂຕນຕາຕິ ມນຸສ຺ສກາເລ ສາມິໂນ ຫຸຕ຺ວາ ກາລກຕາ ກມ຺ມວເສນ ໂອນຕາ ຠມນ຺ຕິ ຂຸປ຺ປິປາສາຍ, ປສ຺ສ ສໍສາຣປກຕິນ຺ຕິ ທສ຺ເສຕິ.

໗໕໒. ເອຕມາທີນວໍ ຎຕ຺ວາ, ອິສ຺ສຣມທສມ຺ຠວນ຺ຕິ ເອຕໍ ອິສ຺ສຣິຍມທວເສນ ສມ຺ຠູຕໍ ອປາຍູປປຕ຺ຕິສງ຺ຂາຕໍ ອາທີນວໍ ໂທສໍ ຎຕ຺ວາ ປຫາຍ ອິສ຺ສຣິຍມທໍ ປຸຎ຺ຎປ຺ປສຸໂຕ ຫຸຕ຺ວາ. ຠເວ ສຄ຺ຄຄໂຕ ນໂຣຕິ ສຄ຺ຄໍ ເທວໂລກໍ ຄໂຕເຍວ ຠເວຍ຺ຍ.

ອິຕິ ສຕ຺ຖາ ເຕສໍ ເປຕານໍ ປວຕ຺ຕິໍ ກເຖຕ຺ວາ ເຕຫິ ມນຸສ຺ເສຫິ ກຕໍ ທານໍ ເຕສໍ ເປຕານໍ ອຸທ຺ທິສາເປຕ຺ວາ ສມ຺ປຕ຺ຕປຣິສາຍ ອຊ຺ຌາສຍານຸຣູປໍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ກຸມາຣເປຕວຕ຺ຖຸວຓ຺ຓນາ ນິຏ຺ຐິຕາ.