໕. ອຸຈ຺ຉຸເປຕວຕ຺ຖຸວຓ຺ຓນາ

ອິທໍ ມມ ອຸຈ຺ຉຸວນໍ ມຫນ຺ຕນ຺ຕິ ອິທໍ ອຸຈ຺ຉຸເປຕວຕ຺ຖຸ. ຕສ຺ສ ກາ ອຸປ຺ປຕ຺ຕິ? ຠຄວຕິ ເວຬຸວເນ ວິຫຣນ຺ເຕ ອຎ຺ຎຕໂຣ ປຸຣິໂສ ອຸຈ຺ຉຸກລາປໍ ຂນ຺ເຘ ກຕ຺ວາ ເອກໍ ອຸຈ຺ຉຸໍ ຂາທນ຺ໂຕ ຄຈ຺ຉຕິ. ອຖ ອຎ຺ຎຕໂຣ ອຸປາສໂກ ສີລວາ ກລ຺ຍາຓຘມ຺ໂມ ພາລທາຣເກນ ສທ຺ຘິໍ ຕສ຺ສ ປິຏ຺ຐິໂຕ ປິຏ຺ຐິໂຕ ຄຈ຺ຉຕິ. ທາຣໂກ ອຸຈ຺ຉຸໍ ປສ຺ສິຕ຺ວາ ‘‘ເທຫີ’’ຕິ ປໂຣທຕິ. ອຸປາສໂກ ທາຣກໍ ປໂຣທນ຺ຕໍ ທິສ຺ວາ ຕໍ ປຸຣິສໍ ສງ຺ຄຓ຺ຫນ຺ໂຕ ເຕນ ສທ຺ຘິໍ ສລ຺ລາປມກາສິ. ໂສ ປນ ປຸຣິໂສ ເຕນ ສທ຺ຘິໍ ນ ກິຎ຺ຈິ ອາລປິ, ທາຣກສ຺ສ ອຸຈ຺ຉຸຂຓ຺ຑມ຺ປິ ນາທາສິ. ອຸປາສໂກ ຕໍ ທາຣກໍ ທສ຺ເສຕ຺ວາ ‘‘ອຍໍ ທາຣໂກ ອຕິວິຍ ໂຣທຕິ, ອິມສ຺ສ ເອກໍ ອຸຈ຺ຉຸຂຓ຺ຑໍ ເທຫີ’’ຕິ ອາຫ. ຕໍ ສຸຕ຺ວາ ໂສ ປຸຣິໂສ ອສຫນ຺ໂຕ ປຏິຫຕຈິຕ຺ຕໍ ອຸປຏ຺ຐເປຕ຺ວາ ອນາທຣວເສນ ເອກໍ ອຸຈ຺ຉຸລຏ຺ຐິໍ ປິຏ຺ຐິໂຕ ຂິປິ.

ໂສ ອປເຣນ ສມເຍນ ກາລໍ ກຕ຺ວາ ຈິຣໍ ປຣິຠາວິຕສ຺ສ ໂລຠສ຺ສ ວເສນ ເປເຕສຸ ນິພ຺ພຕ຺ຕິ, ຕສ຺ສ ຜລໍ ນາມ ສກກມ຺ມສຣິກ຺ຂກໍ ໂຫຕີຕິ ອຏ຺ຐກຣີສມຕ຺ຕໍ ຐານໍ ອວຕ຺ຖຣນ຺ຕໍ ອຎ຺ຊນວຓ຺ຓໍ ມຸສລທຓ຺ຑປຣິມາເຓຫິ ອຸຈ຺ຉູຫິ ຆນສຎ຺ຉນ຺ນໍ ມຫນ຺ຕໍ ອຸຈ຺ຉຸວນໍ ນິພ຺ພຕ຺ຕິ. ຕສ຺ມິໍ ຂາທິຕຸກາມຕາຍ ‘‘ອຸຈ຺ຉຸໍ ຄເຫສ຺ສາມີ’’ຕິ ອຸປຄຕມຕ຺ເຕ ຕໍ ອຸຈ຺ຉູ ອຠິຫນນ຺ຕິ, ໂສ ເຕນ ປຸຈ຺ຉິໂຕ ປຕຕິ.

ອເຖກທິວສໍ ອາຍສ຺ມາ ມຫາໂມຄ຺ຄລ຺ລາໂນ ຣາຊຄຫໍ ປິຓ຺ຑາຍ ຄຈ຺ຉນ຺ໂຕ ອນ຺ຕຣາມຄ຺ເຄ ຕໍ ເປຕໍ ອທ຺ທສ. ໂສ ເຖຣໍ ທິສ຺ວາ ອຕ຺ຕນາ ກຕກມ຺ມໍ ປຸຈ຺ຉິ –

໗໓໗. ‘‘ອິທໍ ມມ ອຸຈ຺ຉຸວນໍ ມຫນ຺ຕໍ, ນິພ຺ພຕ຺ຕຕິ ປຸຎ຺ຎຜລໍ ອນປ຺ປກໍ;

ຕໍ ທານິ ເມ ນ ປຣິໂຠຄເມຕິ, ອາຈິກ຺ຂ ຠນ຺ເຕ ກິສ຺ສ ອຍໍ ວິປາໂກ.

໗໓໘. ‘‘ຫຎ຺ຎາມິ ຂຊ຺ຊາມິ ຈ ວາຍມາມິ, ປຣິສກ຺ກາມິ ປຣິຠຸຎ຺ຊິຕຸໍ ກິຎ຺ຈິ;

ສ຺ວາຫໍ ຉິນ຺ນຖາໂມ ກປໂຓ ລາລປາມິ, ກິສ຺ສ ກມ຺ມສ຺ສ ອຍໍ ວິປາໂກ.

໗໓໙. ‘‘ວິຆາໂຕ ຈາຫໍ ປຣິປຕາມິ ຉມາຍໍ,

ປຣິວຕ຺ຕາມິ ວາຣິຈໂຣວ ຆມ຺ເມ;

ຣຸທໂຕ ຈ ເມ ອສ຺ສຸກາ ນິຄ຺ຄລນ຺ຕິ,

ອາຈິກ຺ຂ ຠນ຺ເຕ ກິສ຺ສ ອຍໍ ວິປາໂກ.

໗໔໐. ‘‘ຉາໂຕ ກິລນ຺ໂຕ ຈ ປິປາສິໂຕ ຈ, ສນ຺ຕສ຺ສິໂຕ ສາຕສຸຂໍ ນ ວິນ຺ເທ;

ປຸຈ຺ຉາມິ ຕໍ ເອຕມຕ຺ຖໍ ຠທນ຺ເຕ, ກຖໍ ນຸ ອຸຈ຺ຉຸປຣິໂຠຄໍ ລເຠຍ຺ຍ’’ນ຺ຕິ.

໗໔໑. ‘‘ປຸເຣ ຕຸວໍ ກມ຺ມມກາສິ ອຕ຺ຕນາ, ມນຸສ຺ສຠູໂຕ ປຸຣິມາຍ ຊາຕິຍາ;

ອຫຎ຺ຈ ຕໍ ເອຕມຕ຺ຖໍ ວທາມິ, ສຸຕ຺ວານ ຕ຺ວໍ ເອຕມຕ຺ຖໍ ວິຊານ.

໗໔໒. ‘‘ອຸຈ຺ຉຸໍ ຕຸວໍ ຂາທມາໂນ ປຍາໂຕ, ປຸຣິໂສ ຈ ເຕ ປິຏ຺ຐິໂຕ ອນ຺ວຄຈ຺ຉິ;

ໂສ ຈ ຕໍ ປຈ຺ຈາສນ຺ໂຕ ກເຖສິ, ຕສ຺ສ ຕຸວໍ ນ ກິຎ຺ຈິ ອາລປິຕ຺ຖ.

໗໔໓. ‘‘ໂສ ຈ ຕໍ ອຠຓນ຺ຕໍ ອຍາຈິ, ເທຫຍ຺ຍ ອຸຈ຺ຉຸນ຺ຕິ ຈ ຕໍ ອໂວຈ;

ຕສ຺ສ ຕຸວໍ ປິຏ຺ຐິໂຕ ອຸຈ຺ຉຸໍ ອທາສິ, ຕສ຺ເສຕໍ ກມ຺ມສ຺ສ ອຍໍ ວິປາໂກ.

໗໔໔. ‘‘ອິງ຺ຆ ຕ຺ວໍ ຄນ຺ຕ຺ວານ ປິຏ຺ຐິໂຕ ຄຓ຺ເຫຍ຺ຍາສິ, ຄເຫຕ຺ວານ ຕໍ ຂາທສ຺ສຸ ຍາວທຕ຺ຖໍ;

ເຕເນວ ຕ຺ວໍ ອຕ຺ຕມໂນ ຠວິສ຺ສສິ, ຫຏ຺ໂຐ ຈຸທຄ຺ໂຄ ຈ ປໂມທິໂຕ ຈາຕິ.

໗໔໕. ‘‘ຄນ຺ຕ຺ວານ ໂສ ປິຏ຺ຐິໂຕ ອຄ຺ຄເຫສິ, ຄເຫຕ຺ວານ ຕໍ ຂາທິ ຍາວທຕ຺ຖໍ;

ເຕເນວ ໂສ ອຕ຺ຕມໂນ ອໂຫສິ, ຫຏ຺ໂຐ ຈຸທຄ຺ໂຄ ຈ ປໂມທິໂຕ ຈາ’’ຕິ. –

ວຈນປຏິວຈນຄາຖາ ເປເຕນ ເຖເຣນ ຈ ວຸຕ຺ຕາ.

໗໓໗-໘. ຕຕ຺ຖ ກິສ຺ສາຕິ ກີທິສສ຺ສ, ກມ຺ມສ຺ສາຕິ ອຘິປ຺ປາໂຍ. ຫຎ຺ຎາມີຕິ ວິຫຎ຺ຎາມິ ວິຆາຕໍ ອາປຊ຺ຊາມິ. ວິຫຎ຺ຎາມີຕິ ວາ ວິພາຘິຍາມິ, ວິເສສໂຕ ປີຬິຍາມີຕິ ອຕ຺ໂຖ. ຂຊ຺ຊາມີຕິ ຂາທິຍາມິ, ອສິປຕ຺ຕສທິເສຫິ ນິສິເຕຫິ ຂາທນ຺ເຕຫິ ວິຍ ອຸຈ຺ຉຸປຕ຺ເຕຫິ ກນ຺ຕິຍາມີຕິ ອຕ຺ໂຖ. ວາຍມາມີຕິ ອຸຈ຺ຉຸໍ ຂາທິຕຸໍ ວາຍາມໍ ກໂຣມິ. ປຣິສກ຺ກາມີຕິ ປໂຍຄໍ ກໂຣມິ. ປຣິຠຸຎ຺ຊິຕຸນ຺ຕິ ອຸຈ຺ຉຸຣສໍ ປຣິຠຸຎ຺ຊິຕຸໍ, ອຸຈ຺ຉຸໍ ຂາທິຕຸນ຺ຕິ ອຕ຺ໂຖ. ຉິນ຺ນຖາໂມຕິ ຉິນ຺ນສໂຫ ອຸປຈ຺ຉິນ຺ນຖາໂມ, ປຣິກ຺ຂີຓພໂລຕິ ອຕ຺ໂຖ. ກປໂຓຕິ ທີໂນ. ລາລປາມີຕິ ທຸກ຺ເຂນ ອຏ຺ຏິໂຕ ອຕິວິຍ ວິລປາມິ.

໗໓໙. ວິຆາໂຕຕິ ວິຆາຕວາ, ວິຫຕພໂລ ວາ. ປຣິປຕາມິ ຉມາຍນ຺ຕິ ຐາຕຸໍ ອສກ຺ໂກນ຺ໂຕ ຠູມິຍໍ ປປຕາມິ. ປຣິວຕ຺ຕາມີຕິ ປຣິພ຺ຠມາມິ. ວາຣິຈໂຣວາຕິ ມຈ຺ໂຉ ວິຍ. ຆມ຺ເມຕິ ຆມ຺ມສນ຺ຕຕ຺ເຕ ຖເລ.

໗໔໐-໔. ສນ຺ຕສ຺ສິໂຕຕິ ໂອຏ຺ຐກຓ຺ຐຕາລູນໍ ໂສສປ຺ປຕ຺ຕິຍາ ສຸຏ຺ຐຸ ຕສິໂຕ. ສາຕສຸຂນ຺ຕິ ສາຕຠູຕໍ ສຸຂໍ. ນ ວິນ຺ເທຕິ ນ ລຠາມິ. ຕນ຺ຕິ ຕຸວໍ. ວິຊານາຕິ ວິຊານາຫິ. ປຍາໂຕຕິ ຄນ຺ຕຸໍ ອາຣທ຺ໂຘ. ອນ຺ວຄຈ຺ຉີຕິ ອນຸພນ຺ຘິ. ປຈ຺ຈາສນ຺ໂຕຕິ ປຈ຺ຈາສີສມາໂນ. ຕສ຺ເສຕໍ ກມ຺ມສ຺ສາຕິ ເອຕ຺ຖ ເອຕນ຺ຕິ ນິປາຕມຕ຺ຕໍ, ຕສ຺ສ ກມ຺ມສ຺ສາຕິ ອຕ຺ໂຖ. ປິຏ຺ຐິໂຕ ຄຓ຺ເຫຍ຺ຍາສີຕິ ອຕ຺ຕໂນ ປິຏ຺ຐິປສ຺ເສເນວ ອຸຈ຺ຉຸໍ ຄຓ຺ເຫຍ຺ຍາສິ. ປໂມທິໂຕຕິ ປມຸທິໂຕ.

໗໔໕. ຄເຫຕ຺ວານ ຕໍ ຂາທິ ຍາວທຕ຺ຖນ຺ຕິ ເຖເຣນ ອາຓຕ຺ຕິນິຍາເມນ ອຸຈ຺ຉຸໍ ຄເຫຕ຺ວາ ຍຖາຣຸຈິ ຂາທິຕ຺ວາ ມຫນ຺ຕໍ ອຸຈ຺ຉຸກລາປໍ ຄເຫຕ຺ວາ ເຖຣສ຺ສ ອຸປເນສິ, ເຖໂຣ ຕໍ ອນຸຄ຺ຄຓ຺ຫນ຺ໂຕ ເຕເນວ ຕໍ ອຸຈ຺ຉຸກລາປໍ ຄາຫາເປຕ຺ວາ ເວຬຸວນໍ ຄນ຺ຕ຺ວາ ຠຄວໂຕ ອທາສິ, ຠຄວາ ຠິກ຺ຂຸສງ຺ເຆນ ສທ຺ຘິໍ ຕໍ ປຣິຠຸຎ຺ຊິຕ຺ວາ ອນຸໂມທນໍ ອກາສິ, ເປໂຕ ປສນ຺ນຈິຕ຺ໂຕ ວນ຺ທິຕ຺ວາ ຄໂຕ, ຕໂຕ ປຏ຺ຐາຍ ຍຖາສຸຂໍ ອຸຈ຺ຉຸໍ ປຣິຠຸຎ຺ຊິ.

ໂສ ອປເຣນ ສມເຍນ ກາລໍ ກຕ຺ວາ ຕາວຕິໍເສສຸ ອຸປ຺ປຊ຺ຊິ. ສາ ປເນສາ ເປຕສ຺ສ ປວຕ຺ຕິ ມນຸສ຺ສໂລເກ ປາກຏາ ອໂຫສິ. ອຖ ມນຸສ຺ສາ ສຕ຺ຖາຣໍ ອຸປສງ຺ກມິຕ຺ວາ ຕໍ ປວຕ຺ຕິໍ ປຸຈ຺ຉິໍສຸ. ສຕ຺ຖາ ເຕສໍ ຕມຕ຺ຖໍ ວິຕ຺ຖາຣໂຕ ກເຖຕ຺ວາ ຘມ຺ມໍ ເທເສສິ, ຕໍ ສຸຕ຺ວາ ມນຸສ຺ສາ ມຈ຺ເຉຣມລໂຕ ປຏິວິຣຕາ ອເຫສຸນ຺ຕິ.

ອຸຈ຺ຉຸເປຕວຕ຺ຖຸວຓ຺ຓນາ ນິຏ຺ຐິຕາ.