໑໖. ສຏ຺ຐິກູຏເປຕວຕ຺ຖຸວຓ຺ຓນາ

ກິໍ ນຸ ອຸມ຺ມຕ຺ຕຣູໂປວາຕິ ອິທໍ ສຕ຺ຖຣິ ເວຬຸວເນ ວິຫຣນ຺ເຕ ອຎ຺ຎຕຣໍ ເປຕໍ ອາຣພ຺ຠ ວຸຕ຺ຕໍ. ອຕີເຕ ກິຣ ພາຣາຓສິນຄເຣ ອຎ຺ຎຕໂຣ ປີຐສປ຺ປີ ສາລິຕ຺ຕກປໂຍເຄ ກຸສໂລ, ຕຫິໍ ສກ຺ຂຣຂິປນສິປ຺ເປ ນິປ຺ຜຕ຺ຕິໍ ຄໂຕ ນຄຣທ຺ວາເຣ ນິຄ຺ໂຣຘຣຸກ຺ຂມູເລ ນິສີທິຕ຺ວາ ສກ຺ຂຣປຫາເຣຫິ ຫຕ຺ຖິອສ຺ສມນຸສ຺ສຣຖກູຏາຄາຣຘຊປຸຓ຺ຓຆຏາທິຣູປານິ ນິຄ຺ໂຣຘປຕ຺ເຕສຸ ທສ຺ເສຕິ. ນຄຣທາຣກາ ອຕ຺ຕໂນ ກີຬນຕ຺ຖາຍ ມາຍກຑ຺ຒມາສກາທີນິ ທຕ຺ວາ ຍຖາຣຸຈິ ຕານິ ສິປ຺ປານິ ກາຣາເປນ຺ຕິ.

ອເຖກທິວສໍ ພາຣາຓສິຣາຊາ ນຄຣໂຕ ນິກ຺ຂມິຕ຺ວາ ຕໍ ນິຄ຺ໂຣຘມູລໍ ອຸປຄໂຕ ນິຄ຺ໂຣຘປຕ຺ເຕສຸ ຫຕ຺ຖິຣູປາທິວເສນ ນານາວິຘຣູປວິຠຕ຺ຕິໂຍ ອປ຺ປິຕາ ທິສ຺ວາ ມນຸສ຺ເສ ປຸຈ຺ຉິ – ‘‘ເກນ ນຸ ໂຂ ອິເມສຸ ນິຄ຺ໂຣຘປຕ຺ເຕສຸ ເອວໍ ນານາວິຘຣູປວິຠຕ຺ຕິໂຍ ກຕາ’’ຕິ? ມນຸສ຺ສາ ຕໍ ປີຐສປ຺ປິໍ ທສ຺ເສສຸໍ ‘‘ເທວ, ອິມິນາ ກຕາ’’ຕິ. ຣາຊາ ຕໍ ປກ຺ໂກສາເປຕ຺ວາ ເອວມາຫ – ‘‘ສກ຺ກາ ນຸ ໂຂ, ຠເຓ, ມຍາ ທສ຺ສິຕສ຺ສ ເອກສ຺ສ ປຸຣິສສ຺ສ ກເຖນ຺ຕສ຺ສ ອຊານນ຺ຕສ຺ເສວ ກຸຈ຺ຉິຍໍ ອຊລຓ຺ຑິກາຫິ ປູເຣຕຸ’’ນ຺ຕິ? ‘‘ສກ຺ກາ, ເທວາ’’ຕິ. ຣາຊາ ຕໍ ອຕ຺ຕໂນ ຣາຊຠວນໍ ເນຕ຺ວາ ພຫຸຠາຓິເກ ປຸໂຣຫິເຕ ນິພ຺ພິນ຺ນຣູໂປ ປຸໂຣຫິຕໍ ປກ຺ໂກສາເປຕ຺ວາ ເຕນ ສຫ ວິວິຕ຺ເຕ ໂອກາເສ ສາຓິປາກາຣປຣິກ຺ຂິຕ຺ເຕ ນິສີທິຕ຺ວາ ມນ຺ຕຍມາໂນ ປີຐສປ຺ປິໍ ປກ຺ໂກສາເປສິ. ປີຐສປ຺ປີ ນາຬິມຕ຺ຕາ ອຊລຓ຺ຑິກາ ອາທາຍາຄນ຺ຕ຺ວາ ຣຎ຺ໂຎ ອາກາຣໍ ຎຕ຺ວາ ປຸໂຣຫິຕາຠິມຸໂຂ ນິສິນ຺ໂນ ເຕນ ມຸເຂ ວິວເຏ ສາຓິປາກາຣວິວເຣນ ເອເກກໍ ອຊລຓ຺ຑິກໍ ຕສ຺ສ ຄລມູເລ ປຕິຏ຺ຐາເປສິ. ໂສ ລຊ຺ຊາຍ ອຸຄ຺ຄິລິຕຸໍ ອສກ຺ໂກນ຺ໂຕ ສພ຺ພາ ອຊ຺ໂຌຫຣິ. ອຖ ນໍ ຣາຊາ ອຊລຓ຺ຑິກາຫິ ປູຣິໂຕທຣໍ ວິສ຺ສຊ຺ຊິ – ‘‘ຄຈ຺ຉ, ພ຺ຣາຫ຺ມຓ, ລທ຺ຘໍ ຕຍາ ພຫຸຠາຓິຕາຍ ຜລໍ, ມທ຺ທນຜລປິຍງ຺ຄຸຕຈາທີຫິ ອຠິສງ຺ຂຕໍ ປານກໍ ປິວິຕ຺ວາ ອຸຈ຺ຉຑ຺ເຑຫິ, ເອວໍ ເຕ ໂສຕ຺ຖິ ຠວິສ຺ສຕີ’’ຕິ. ຕສ຺ສ ຈ ປີຐສປ຺ປິສ຺ສ ເຕນ ກມ຺ເມນ ອຕ຺ຕມໂນ ຫຸຕ຺ວາ ຈຸທ຺ທສ ຄາເມ ອທາສິ. ໂສ ຄາເມ ລຠິຕ຺ວາ ອຕ຺ຕານໍ ສຸເຂນ຺ໂຕ ປີເຓນ຺ໂຕ ປຣິຊນມ຺ປິ ສຸເຂນ຺ໂຕ ປີເຓນ຺ໂຕ ສມຓພ຺ຣາຫ຺ມຓາທີນໍ ຍຖາຣຫໍ ກິຎ຺ຈິ ເທນ຺ໂຕ ທິຏ຺ຐຘມ຺ມິກໍ ສມ຺ປຣາຍິກຎ຺ຈ ອຕ຺ຖໍ ອຫາເປນ຺ໂຕ ສຸເຂເນວ ຊີວຕິ, ອຕ຺ຕໂນ ສນ຺ຕິກໍ ອຸປຄຕານໍ ສິປ຺ປໍ ສິກ຺ຂນ຺ຕານໍ ຠຕ຺ຕເວຕນໍ ເທຕິ.

ອເຖໂກ ປຸຣິໂສ ຕສ຺ສ ສນ຺ຕິກໍ ອຸປຄນ຺ຕ຺ວາ ເອວມາຫ – ‘‘ສາຘຸ, ອາຈຣິຍ, ມມ຺ປິ ເອຕໍ ສິປ຺ປໍ ສິກ຺ຂາເປຫິ, ມຍ຺ຫໍ ປນ ອລໍ ຠຕ຺ຕເວຕເນນາ’’ຕິ. ໂສ ຕໍ ປຸຣິສໍ ຕໍ ສິປ຺ປໍ ສິກ຺ຂາເປສິ. ໂສ ສິກ຺ຂິຕສິປ຺ໂປ ສິປ຺ປໍ ວີມໍສິຕຸກາໂມ ຄນ຺ຕ຺ວາ ຄງ຺ຄາຕີເຣ ນິສິນ຺ນສ຺ສ ສຸເນຕ຺ຕສ຺ສ ນາມ ປຈ຺ເຈກພຸທ຺ຘສ຺ສ ສກ຺ຂຣາຠິຆາເຕນ ສີສໍ ຠິນ຺ທິ. ປຈ຺ເຈກພຸທ຺ໂຘ ຕຕ຺ເຖວ ຄງ຺ຄາຕີເຣ ປຣິນິພ຺ພາຍິ. ມນຸສ຺ສາ ຕໍ ປວຕ຺ຕິໍ ສຸຕ຺ວາ ຕໍ ປຸຣິສໍ ຕຕ຺ເຖວ ເລຑ຺ຑຸທຓ຺ຑາທີຫິ ປຫຣິຕ຺ວາ ຊີວິຕາ ໂວໂຣເປສຸໍ. ໂສ ກາລກໂຕ ອວີຈິມຫານິຣເຍ ນິພ຺ພຕ຺ຕິຕ຺ວາ ພຫູນິ ວສ຺ສສຫສ຺ສານິ ນິຣເຍ ປຈ຺ຈິຕ຺ວາ ຕສ຺ເສວ ກມ຺ມສ຺ສ ວິປາກາວເສເສນ ອິມສ຺ມິໍ ພຸທ຺ຘຸປ຺ປາເທ ຣາຊຄຫນຄຣສ຺ສ ອວິທູເຣ ເປໂຕ ຫຸຕ຺ວາ ນິພ຺ພຕ຺ຕິ. ຕສ຺ສ ກມ຺ມສ຺ສ ສຣິກ຺ຂເກນ ວິປາເກນ ຠວິຕພ຺ພນ຺ຕິ ກມ຺ມເວຄຸກ຺ຂິຕ຺ຕານິ ປຸພ຺ພຓ຺ຫສມຍໍ ມຊ຺ຌນ຺ຫິກສມຍໍ ສາຍນ຺ຫສມຍຎ຺ຈ ສຏ຺ຐິ ອໂຍກູຏສຫສ຺ສານິ ມຕ຺ຖເກ ນິປຕນ຺ຕິ. ໂສ ຉິນ຺ນຠິນ຺ນສີໂສ ອຘິມຕ຺ຕເວທນາປ຺ປຕ຺ໂຕ ຠູມິຍໍ ນິປຕຕິ, ອໂຍກູເຏສຸ ປນ ອປຄຕມຕ຺ເຕສຸ ປຏິປາກຕິກສິໂຣ ຕິຏ຺ຐຕິ.

ອເຖກທິວສໍ ອາຍສ຺ມາ ມຫາໂມຄ຺ຄລ຺ລາໂນ ຄິຊ຺ຌກູຏປພ຺ພຕາ ໂອຕຣນ຺ໂຕ ຕໍ ທິສ຺ວາ –

໘໐໖. ‘‘ກິໍ ນຸ ອຸມ຺ມຕ຺ຕຣູໂປວ, ມິໂຄ ຠນ຺ໂຕວ ຘາວສິ;

ນິສ຺ສໍສຍໍ ປາປກມ຺ມນ຺ໂຕ, ກິໍ ນຸ ສທ຺ທາຍເສ ຕຸວ’’ນ຺ຕິ. –

ອິມາຍ ຄາຖາຍ ປຏິປຸຈ຺ຉິ. ຕຕ຺ຖ ອຸມ຺ມຕ຺ຕຣູໂປວາຕິ ອຸມ຺ມຕ຺ຕກສຠາໂວ ວິຍ ອຸມ຺ມາທປ຺ປຕ຺ໂຕ ວິຍ. ມິໂຄ ຠນ຺ໂຕວ ຘາວສີຕິ ຠນ຺ຕມິໂຄ ວິຍ ອິໂຕ ຈິໂຕ ຈ ຘາວສິ. ໂສ ຫິ ເຕສຸ ອໂຍກູເຏສຸ ນິປຕນ຺ເຕສຸ ປຣິຕ຺ຕາຓໍ ອປສ຺ສນ຺ໂຕ ‘‘ນ ສິຍາ ນຸ ໂຂ ເອວໍ ປຫາໂຣ’’ຕິ ອິໂຕປິ ເອຕ຺ໂຕປິ ປລາຍຕິ. ເຕ ປນ ກມ຺ມເວຄຸກ຺ຂິຕ຺ຕາ ຍຕ຺ຖ ກຕ຺ຖຈິ ຐິຕສ຺ສ ມຕ຺ຖເກເຍວ ນິປຕນ຺ຕິ. ກິໍ ນຸ ສທ຺ທາຍເສ ຕຸວນ຺ຕິ ກິໍ ນຸ ໂຂ ຕຸວໍ ສທ຺ທໍ ກໂຣສິ, ອຕິວິຍ ວິສ຺ສຣໍ ກໂຣນ຺ໂຕ ວິຈຣສິ.

ຕໍ ສຸຕ຺ວາ ເປໂຕ –

໘໐໗. ‘‘ອຫໍ ຠທນ຺ເຕ ເປໂຕມ຺ຫິ, ທຸຄ຺ຄໂຕ ຍມໂລກິໂກ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄໂຕ.

໘໐໘. ‘‘ສຏ຺ຐິ ກູຏສຫສ຺ສານິ, ປຣິປຸຓ຺ຓານິ ສພ຺ພໂສ;

ສີເສ ມຍ຺ຫໍ ນິປຕນ຺ຕິ, ເຕ ຠິນ຺ທນ຺ຕິ ຈ ມຕ຺ຖກ’’ນ຺ຕິ. –

ທ຺ວີຫິ ຄາຖາຫິ ປຏິວຈນໍ ອທາສິ. ຕຕ຺ຖ ສຏ຺ຐິ ກູຏສຫສ຺ສານີຕິ ສຏ຺ຐິມຕ຺ຕານິ ອໂຍກູຏສຫສ຺ສານິ. ປຣິປຸຓ຺ຓານີຕິ ອນູນານິ. ສພ຺ພໂສຕິ ສພ຺ພຠາຄໂຕ. ຕສ຺ສ ກິຣ ສຏ຺ຐິຍາ ອໂຍກູຏສຫສ຺ສານໍ ປຕນປ຺ປໂຫນກໍ ມຫນ຺ຕໍ ປພ຺ພຕກູຏປ຺ປມາຓໍ ສີສໍ ນິພ຺ພຕ຺ຕິ. ຕໍ ຕສ຺ສ ວາລຄ຺ຄໂກຏິນິຕຸທນມຕ຺ຕມ຺ປິ ຐານໍ ອເສເສຕ຺ວາ ຕານິ ກູຏານິ ປຕນ຺ຕານິ ມຕ຺ຖກໍ ຠິນ຺ທນ຺ຕິ, ເຕນ ໂສ ອຏ຺ຏສ຺ສຣໍ ກໂຣຕິ. ເຕນ ວຸຕ຺ຕໍ ‘‘ສພ຺ພໂສ ສີເສ ມຍ຺ຫໍ ນິປຕນ຺ຕິ, ເຕ ຠິນ຺ທນ຺ຕິ ຈ ມຕ຺ຖກ’’ນ຺ຕິ.

ອຖ ນໍ ເຖໂຣ ກຕກມ຺ມໍ ປຸຈ຺ຉນ຺ໂຕ –

໘໐໙. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ອິທໍ ທຸກ຺ຂໍ ນິຄຈ຺ຉສິ.

໘໑໐. ‘‘ສຏ຺ຐິ ກູຏສຫສ຺ສານິ, ປຣິປຸຓ຺ຓານິ ສພ຺ພໂສ;

ສີເສ ຕຸຍ຺ຫໍ ນິປຕນ຺ຕິ, ເຕ ຠິນ຺ທນ຺ຕິ ຈ ມຕ຺ຖກ’’ນ຺ຕິ. –

ທ຺ເວ ຄາຖາ ອຠາສິ.

ຕສ຺ສ ເປໂຕ ອຕ຺ຕນາ ກຕກມ຺ມໍ ອາຈິກ຺ຂນ຺ໂຕ –

໘໑໑. ‘‘ອຖທ຺ທສາສິໍ ສມ຺ພຸທ຺ຘໍ, ສຸເນຕ຺ຕໍ ຠາວິຕິນ຺ທ຺ຣິຍໍ;

ນິສິນ຺ນໍ ຣຸກ຺ຂມູລສ຺ມິໍ, ຌາຍນ຺ຕໍ ອກຸໂຕຠຍໍ.

໘໑໒. ‘‘ສາລິຕ຺ຕກປ຺ປຫາເຣນ, ຠິນ຺ທິສ຺ສໍ ຕສ຺ສ ມຕ຺ຖກໍ;

ຕສ຺ສກມ຺ມວິປາເກນ, ອິທໍ ທຸກ຺ຂໍ ນິຄຈ຺ຉິສໍ.

໘໑໓. ‘‘ສຏ຺ຐິ ກູຏສຫສ຺ສານິ, ປຣິປຸຓ຺ຓານິ ສພ຺ພໂສ;

ສີເສ ມຍ຺ຫໍ ນິປຕນ຺ຕິ, ເຕ ຠິນ຺ທນ຺ຕິ ຈ ມຕ຺ຖກ’’ນ຺ຕິ. –

ຕິສ຺ໂສ ຄາຖາໂຍ ອຠາສິ.

໘໑໑. ຕຕ຺ຖ ສມ຺ພຸທ຺ຘນ຺ຕິ ປຈ຺ເຈກສມ຺ພຸທ຺ຘໍ. ສຸເນຕ຺ຕນ຺ຕິ ເອວໍນາມກໍ. ຠາວິຕິນ຺ທ຺ຣິຍນ຺ຕິ ອຣິຍມຄ຺ຄຠາວນາຍ ຠາວິຕສທ຺ຘາທິອິນ຺ທ຺ຣິຍໍ.

໘໑໒-໑໓. ສາລິຕ຺ຕກປ຺ປຫາເຣນາຕິ ສາລິຕ຺ຕກໍ ວຸຈ຺ຈຕິ ຘນຸເກນ, ອງ຺ຄຸລີຫິ ເອວ ວາ ສກ຺ຂຣຂິປນປໂຍໂຄ. ຕຖາ ຫິ ສກ຺ຂຣາຍ ປຫາເຣນາຕິ ວາ ປາໂຐ. ຠິນ຺ທິສ຺ສນ຺ຕິ ຠິນ຺ທິໍ.

ຕໍ ສຸຕ຺ວາ ເຖໂຣ ‘‘ອຕ຺ຕໂນ ກຕກມ຺ມານຸຣູປເມວ ອິທານິ ປຸຣາຓກມ຺ມສ຺ສ ອິທໍ ຜລໍ ປຏິລຠຕີ’’ຕິ ທສ຺ເສນ຺ໂຕ –

໘໑໔. ‘‘ຘມ຺ເມນ ເຕ ກາປຸຣິສ;

ສຏ຺ຐິ ກູຏສຫສ຺ສານິ, ປຣິປຸຓ຺ຓານິ ສພ຺ພໂສ;

ສີເສ ຕຸຍ຺ຫໍ ນິປຕນ຺ຕິ, ເຕ ຠິນ຺ທນ຺ຕິ ຈ ມຕ຺ຖກ’’ນ຺ຕິ. –

ໂອສານຄາຖມາຫ. ຕຕ຺ຖ ຘມ຺ເມນາຕິ ອນຸຣູປກາຣເຓນ. ເຕຕິ ຕວ, ຕສ຺ມິໍ ປຈ຺ເຈກພຸທ຺ເຘ ອປຣຊ຺ຌນ຺ເຕນ ຕຍາ ກຕສ຺ສ ປາປກມ຺ມສ຺ສ ອນຸຈ຺ຉວິກເມເວຕໍ ຜລໍ ຕຸຍ຺ຫໍ ອຸປນີຕໍ. ຕສ຺ມາ ເກນຈິ ເທເວນ ວາ ມາເຣນ ວາ ພ຺ຣຫ຺ມຸນາ ວາ ອປິ ສມ຺ມາສມ຺ພຸທ຺ເຘນປິ ອປ຺ປຏິພາຫນີຍເມຕນ຺ຕິ ທສ຺ເສຕິ.

ເອວຎ຺ຈ ປນ ວຕ຺ວາ ຕໂຕ ນຄເຣ ປິຓ຺ຑາຍ ຈຣິຕ຺ວາ ກຕຠຕ຺ຕກິຈ຺ໂຈ ສາຍນ຺ຫສມເຍ ສຕ຺ຖາຣໍ ອຸປສງ຺ກມິຕ຺ວາ ຕໍ ປວຕ຺ຕິໍ ຠຄວໂຕ ອາໂຣເຈສິ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສນ຺ໂຕ ປຈ຺ເຈກພຸທ຺ຘານໍ ຄຸຓານຸຠາວໍ ກມ຺ມານຎ຺ຈ ອວຎ຺ຌຕໍ ປກາເສສິ, ມຫາຊໂນ ສໍເວຄຊາໂຕ ຫຸຕ຺ວາ ປາປໍ ປຫາຍ ທານາທິປຸຎ຺ຎນິຣໂຕ ອໂຫສີຕິ.

ສຏ຺ຐິກູຏເປຕວຕ຺ຖຸວຓ຺ຓນາ ນິຏ຺ຐິຕາ.

ອິຕິ ຂຸທ຺ທກ-ອຏ຺ຐກຖາຍ ເປຕວຕ຺ຖຸສ຺ມິໍ

ໂສຬສວຕ຺ຖຸປຏິມຓ຺ຑິຕສ຺ສ

ຈຕຸຕ຺ຖສ຺ສ ມຫາວຄ຺ຄສ຺ສ ອຕ຺ຖສໍວຓ຺ຓນາ ນິຏ຺ຐິຕາ.

ນິຄມນກຖາ

ເອຕ຺ຕາວຕາ ຈ –

ເຍ ເຕ ເປເຕສຸ ນິພ຺ພຕ຺ຕາ, ສຕ຺ຕາ ທຸກ຺ກຏກາຣິໂນ;

ເຍຫິ ກມ຺ເມຫິ ເຕສໍ ຕໍ, ປາປກໍ ກຏຸກປ຺ຜລໍ.

ປຈ຺ຈກ຺ຂໂຕ ວິຠາເວນ຺ຕີ, ປຸຈ຺ຉາວິສ຺ສຊ຺ຊເນຫິ ຈ;

ຍາ ເທສນານິຍາເມນ, ສຕໍ ສໍເວຄວຑ຺ຒນີ.

ຍໍ ກຖາວຕ຺ຖຸກຸສລາ, ສຸປຣິຎ຺ຎາຕວຕ຺ຖຸກາ;

ເປຕວຕ຺ຖູຕິ ນາເມນ, ສງ຺ຄາຍິໍສຸ ມເຫສໂຍ.

ຕສ຺ສ ອຕ຺ຖໍ ປກາເສຕຸໍ, ໂປຣາຓຏ຺ຐກຖານຍໍ;

ນິສ຺ສາຍ ຍາ ສມາຣທ຺ຘາ, ອຕ຺ຖສໍວຓ຺ຓນາ ມຍາ.

ຍາ ຕຕ຺ຖ ປຣມຕ຺ຖານໍ, ຕຕ຺ຖ ຕຕ຺ຖ ຍຖາຣຫໍ;

ປກາສນາ ປຣມຕ຺ຖ-ທີປນີ ນາມ ນາມໂຕ.

ສມ຺ປຕ຺ຕາ ປຣິນິຏ຺ຐານໍ, ອນາກຸລວິນິຈ຺ຉຍາ;

ສາ ປນ຺ນຣສມຕ຺ຕາຍ, ປາຬິຍາ ຠາຓວາຣໂຕ.

ອິຕິ ຕໍ ສງ຺ຂໂຣນ຺ເຕນ, ຍໍ ຕໍ ອຘິຄຕໍ ມຍາ;

ປຸຎ຺ຎໍ ຕສ຺ສານຸຠາເວນ, ໂລກນາຖສ຺ສ ສາສນໍ.

ໂອຄາເຫຕ຺ວາ ວິສຸທ຺ຘາຍ, ສີລາທິປຏິປຕ຺ຕິຍາ;

ສພ຺ເພປິ ເທຫິໂນ ໂຫນ຺ຕຸ, ວິມຸຕ຺ຕິຣສຠາຄິໂນ.

ຈິຣໍ ຕິຏ຺ຐຕຸ ໂລກສ຺ມິໍ, ສມ຺ມາສມ຺ພຸທ຺ຘສາສນໍ;

ຕສ຺ມິໍ ສຄາຣວາ ນິຈ຺ຈໍ, ໂຫນ຺ຕຸ ສພ຺ເພປິ ປາຓິໂນ.

ສມ຺ມາ ວສ຺ສຕຸ ກາເລນ, ເທໂວປິ ຊຄຕີປຕິ;

ສທ຺ຘມ຺ມນິຣໂຕ ໂລກໍ, ຘມ຺ເມເນວ ປສາສຕູຕິ.

ອິຕິ ພທຣຕິຕ຺ຖວິຫາຣວາສິນາ ມຸນິວຣຍຕິນາ

ຠທນ຺ເຕນ ອາຈຣິຍຘມ຺ມປາເລນ ກຕາ ເປຕວຕ຺ຖຸອຕ຺ຖສໍວຓ຺ຓນາ ນິຏ຺ຐິຕາ.

ເປຕວຕ຺ຖຸ-ອຏ຺ຐກຖາ ສມຕ຺ຕາ.