໑໕. ເສຏ຺ຐິປຸຕ຺ຕເປຕວຕ຺ຖຸວຓ຺ຓນາ

ສຏ຺ຐິວສ຺ສສຫສ຺ສານີຕິ ອິທໍ ເສຏ຺ຐິປຸຕ຺ຕເປຕວຕ຺ຖຸ. ຕສ຺ສ ກາ ອຸປ຺ປຕ຺ຕິ? ຠຄວາ ສາວຕ຺ຖິຍໍ ວິຫຣຕິ ເຊຕວເນ. ເຕນ ໂຂ ປນ ສມເຍນ ຣາຊາ ປເສນທິ ໂກສໂລ ອລງ຺ກຕປ຺ປຏິຍຕ຺ໂຕ ຫຕ຺ຖິກ຺ຂນ຺ຘວຣຄໂຕ ມຫຕິຍາ ຣາຊິທ຺ຘິຍາ ມຫນ຺ເຕນ ຣາຊານຸຠາເວນ ນຄຣໍ ອນຸສຎ຺ຈຣນ຺ໂຕ ອຎ຺ຎຕຣສ຺ມິໍ ເຄເຫ ອຸປຣິປາສາເທ ວາຕປານໍ ວິວຣິຕ຺ວາ ຕໍ ຣາຊວິຠູຕິໍ ໂອໂລເກນ຺ຕິໍ ຣູປສມ຺ປຕ຺ຕິຍາ ເທວຈ຺ຉຣາປຏິຠາຄໍ ເອກໍ ອິຕ຺ຖິໍ ທິສ຺ວາ ອທິຏ຺ຐປຸພ຺ເພ ອາຣມ຺ມເຓ ສຫສາ ສມຸປ຺ປນ຺ເນນ ກິເລສສມຸທາຈາເຣນ ປຣິຍຸຏ຺ຐິຕຈິຕ຺ໂຕ ສຕິປິ ກຸລຣູປາຈາຣາທິຄຸຓວິເສສສມ຺ປນ຺ເນ ອນ຺ເຕປຸຣຊເນ ສຠາວລຫຸກສ຺ສ ປນ ທຸທ຺ທມສ຺ສ ຈິຕ຺ຕສ຺ສ ວເສນ ຕສ຺ສໍ ອິຕ຺ຖິຍໍ ປຏິພທ຺ຘມານໂສ ຫຸຕ຺ວາ ປຈ຺ຉາສເນ ນິສິນ຺ນສ຺ສ ປຸຣິສສ຺ສ ‘‘ອິມໍ ປາສາທໍ ອິມຎ຺ຈ ອິຕ຺ຖິໍ ອຸປຘາເຣຫີ’’ຕິ ສຎ຺ຎໍ ທຕ຺ວາ ຣາຊເຄຫໍ ປວິຏ຺ໂຐ. ອຎ຺ຎໍ ສພ຺ພໍ ອມ຺ພສກ຺ກຣເປຕວຕ຺ຖຸມ຺ຫິ ອາຄຕນເຍເນວ ເວທິຕພ຺ພໍ.

ອຍໍ ປນ ວິເສໂສ – ອິຘ ປຸຣິໂສ ສູຣິເຍ ອນຕ຺ຖງ຺ຄເຕເຍວ ອາຄນ຺ຕ຺ວາ ນຄຣທ຺ວາເຣ ຖກິເຕ ອຕ຺ຕນາ ອານີຕໍ ອຣຸຓວຓ຺ຓມຕ຺ຕິກໍ ອຸປ຺ປລານິ ຈ ນຄຣທ຺ວາຣກວາເຏ ລຄ຺ເຄຕ຺ວາ ນິປຊ຺ຊິຕຸໍ ເຊຕວນໍ ອຄມາສິ. ຣາຊາ ປນ ສິຣິສຍເນ ວາສູປຄໂຕ ມຊ຺ຌິມຍາເມ ສ-ອິຕິ ນ-ອິຕິ ທຸ-ອິຕິ ໂສ-ອິຕິ ຈ ອິມານິ ຈຕ຺ຕາຣິ ອກ຺ຂຣານິ ມຫຕາ ກຓ຺ເຐນ ອຸຈ຺ຈາຣິຕານິ ວິຍ ວິສ຺ສຣວເສນ ອສ຺ໂສສິ. ຕານິ ກິຣ ອຕີເຕ ກາເລ ສາວຕ຺ຖິວາສີຫິ ຈຕູຫິ ເສຏ຺ຐິປຸຕ຺ເຕຫິ ໂຠຄມທມຕ຺ເຕຫິ ໂຍພ຺ພນກາເລ ປາຣທາຣິກກມ຺ມວເສນ ພຫຸໍ ອປຸຎ຺ຎໍ ປສເວຕ຺ວາ ອປຣຠາເຄ ກາລໍ ກຕ຺ວາ ຕສ຺ເສວ ນຄຣສ຺ສ ສມີເປ ໂລຫກຸມ຺ຠິຍໍ ນິພ຺ພຕ຺ຕິຕ຺ວາ ປຈ຺ຈມາເນຫິ ໂລຫກຸມ຺ຠິຍາ ມຸຂວຏ຺ຏິໍ ປຕ຺ວາ ເອເກກໍ ຄາຖໍ ວຕ຺ຖຸກາເມຫິ ອຸຈ຺ຈາຣິຕານໍ ຕາສໍ ຄາຖານໍ ອາທິອກ຺ຂຣານິ, ເຕ ປຐມກ຺ຂຣເມວ ວຕ຺ວາ ເວທນາປ຺ປຕ຺ຕາ ຫຸຕ຺ວາ ໂລຫກຸມ຺ຠິໍ ໂອຕຣິໍສຸ.

ຣາຊາ ປນ ຕໍ ສທ຺ທໍ ສຸຕ຺ວາ ຠີຕຕສິໂຕ ສໍວິຄ຺ໂຄ ໂລມຫຏ຺ຐຊາໂຕ ຕໍ ຣຕ຺ຕາວເສສໍ ທຸກ຺ເຂນ ວີຕິນາເມຕ຺ວາ ວິຠາຕາຍ ຣຕ຺ຕິຍາ ປຸໂຣຫິຕໍ ປກ຺ໂກສາເປຕ຺ວາ ຕໍ ປວຕ຺ຕິໍ ກເຖສິ. ປຸໂຣຫິໂຕ ຣາຊານໍ ຠີຕຕສິຕໍ ຎຕ຺ວາ ລາຠຄິທ຺ໂຘ ‘‘ອຸປ຺ປນ຺ໂນ ໂຂ ອຍໍ ມຍ຺ຫໍ ພ຺ຣາຫ຺ມຓານຎ຺ຈ ລາຠຸປ຺ປາທນຸປາໂຍ’’ຕິ ຈິນ຺ເຕຕ຺ວາ ‘‘ມຫາຣາຊ, ມຫາ ວຕາຍໍ ອຸປທ຺ທໂວ ອຸປ຺ປນ຺ໂນ, ສພ຺ພຈຕຸກ຺ກໍ ຍຎ຺ຎໍ ຍຊາຫີ’’ຕິ ອາຫ. ຣາຊາ ຕສ຺ສ ວຈນໍ ສຸຕ຺ວາ ອມຈ຺ເຈ ອາຓາເປສິ ‘‘ສພ຺ພຈຕຸກ຺ກຍຎ຺ຎສ຺ສ ອຸປກຣຓານິ ສຊ຺ເຊຖາ’’ຕິ. ຕໍ ສຸຕ຺ວາ ມລ຺ລິກາ ເທວີ ຣາຊານໍ ເອວມາຫ – ‘‘ກສ຺ມາ, ມຫາຣາຊ, ພ຺ຣາຫ຺ມຓສ຺ສ ວຈນໍ ສຸຕ຺ວາ ອເນກປາຓວຘຫິໍສນກກິຈ຺ຈໍ ກາຕຸກາໂມສິ, ນນຸ ສພ຺ພຕ຺ຖ ອປ຺ປຏິຫຕຎາຓຈາໂຣ ຠຄວາ ປຸຈ຺ຉິຕພ຺ໂພ? ຍຖາ ຈ ເຕ ຠຄວາ ພ຺ຍາກຣິສ຺ສຕິ, ຕຖາ ປຏິປຊ຺ຊິຕພ຺ພ’’ນ຺ຕິ. ຣາຊາ ຕສ຺ສາ ວຈນໍ ສຸຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ຕໍ ປວຕ຺ຕິໍ ຠຄວໂຕ ອາໂຣເຈສິ. ຠຄວາ ‘‘ນ, ມຫາຣາຊ, ຕໂຕນິທານໍ ຕຸຍ຺ຫໍ ໂກຈິ ອນ຺ຕຣາໂຍ’’ຕິ ວຕ຺ວາ ອາທິໂຕ ປຏ຺ຐາຍ ເຕສໍ ໂລຫກຸມ຺ຠິນິຣເຍ ນິພ຺ພຕ຺ຕສຕ຺ຕານໍ ປວຕ຺ຕິໍ ກເຖຕ຺ວາ ເຕຫິ ປຈ຺ເຈກໍ ອຸຈ຺ຈາເຣຕຸໍ ອາຣທ຺ຘຄາຖາໂຍ –

໘໐໒. ‘‘ສຏ຺ຐິວສ຺ສສຫສ຺ສານິ, ປຣິປຸຓ຺ຓານິ ສພ຺ພໂສ;

ນິຣເຍ ປຈ຺ຈມານານໍ, ກທາ ອນ຺ໂຕ ຠວິສ຺ສຕິ.

໘໐໓. ‘‘ນຕ຺ຖິ ອນ຺ໂຕ ກຸໂຕ ອນ຺ໂຕ, ນ ອນ຺ໂຕ ປຏິທິສ຺ສຕິ;

ຕຖາ ຫິ ປກຕໍ ປາປໍ, ຕຸຍ຺ຫໍ ມຍ຺ຫຎ຺ຈ ມາຣິສາ.

໘໐໔. ‘‘ທຸຊ຺ຊີວິຕມຊີວິມ຺ຫ, ເຍ ສນ຺ເຕ ນ ທທມ຺ຫເສ;

ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກມ຺ຫ ອຕ຺ຕໂນ.

໘໐໕. ‘‘ໂສຫໍ ນູນ ອິໂຕ ຄນ຺ຕ຺ວາ, ໂຍນິໍ ລທ຺ຘານ ມານຸສິໍ;

ວທຎ຺ຎູ ສີລສມ຺ປນ຺ໂນ, ກາຫາມິ ກຸສລໍ ພຫຸ’’ນ຺ຕິ. –

ປຣິປຸຓ຺ຓໍ ກຕ຺ວາ ກເຖສິ.

໘໐໒. ຕຕ຺ຖ ສຏ຺ຐິວສ຺ສສຫສ຺ສານີຕິ ວສ຺ສານໍ ສຏ຺ຐິສຫສ຺ສານິ. ຕສ຺ມິໍ ກິຣ ໂລຫກຸມ຺ຠິນິຣເຍ ນິພ຺ພຕ຺ຕສຕ຺ໂຕ ອໂຘ ໂອຄຈ຺ຉນ຺ໂຕ ຕິໍສາຍ ວສ຺ສສຫສ຺ເສຫິ ເຫຏ຺ຐິມຕລໍ ປາປຸຓາຕິ, ຕໂຕ ອຸທ຺ຘໍ ອຸຄ຺ຄຈ຺ຉນ຺ໂຕປິ ຕິໍສາຍ ເອວ ວສ຺ສສຫສ຺ເສຫິ ມຸຂວຏ຺ຏິປເທສໍ ປາປຸຓາຕິ, ຕາຍ ສຎ຺ຎາຍ ໂສ ‘‘ສຏ຺ຐິວສ຺ສສຫສ຺ສານິ, ປຣິປຸຓ຺ຓານິ ສພ຺ພໂສ’’ຕິ ຄາຖໍ ວຕ຺ຕຸກາໂມ ສ-ອິຕິ ວຕ຺ວາ ອຘິມຕ຺ຕເວທນາປ຺ປຕ຺ໂຕ ຫຸຕ຺ວາ ອໂຘມຸໂຂ ປຕິ. ຠຄວາ ປນ ຕໍ ຣຎ຺ໂຎ ປຣິປຸຓ຺ຓໍ ກຕ຺ວາ ກເຖສິ. ເອສ ນໂຍ ເສສຄາຖາສຸປິ. ຕຕ຺ຖ ກທາ ອນ຺ໂຕ ຠວິສ຺ສຕີຕິ ໂລຫກຸມ຺ຠິນິຣເຍ ປຈ຺ຈມານານໍ ອມ຺ຫາກໍ ກທາ ນຸ ໂຂ ອິມສ຺ສ ທຸກ຺ຂສ຺ສ ອນ຺ໂຕ ປຣິໂຍສານໍ ຠວິສ຺ສຕິ.

໘໐໓. ຕຖາ ຫີຕິ ຍຖາ ຕຸຍ຺ຫໍ ມຍ຺ຫຎ຺ຈ ອິມສ຺ສ ທຸກ຺ຂສ຺ສ ນຕ຺ຖິ ອນ຺ໂຕ, ນ ອນ຺ໂຕ ປຏິທິສ຺ສຕິ, ຕຖາ ເຕນ ປກາເຣນ ປາປກໍ ກມ຺ມໍ ປກຕໍ ຕຍາ ມຍາ ຈາຕິ ວິຠຕ຺ຕິໍ ວິປຣິຓາເມຕ຺ວາ ວຕ຺ຕພ຺ພໍ.

໘໐໔. ທຸຊ຺ຊີວິຕນ຺ຕິ ວິຎ຺ຎູຫິ ຄຣຫິຕພ຺ພໍ ຊີວິຕໍ. ເຍ ສນ຺ເຕຕິ ເຍ ມຍໍ ສນ຺ເຕ ວິຊ຺ຊມາເນ ເທຍ຺ຍຘມ຺ເມ. ນ ທທມ຺ຫເສຕິ ນ ອທມ຺ຫ. ວຸຕ຺ຕເມວຕ຺ຖໍ ປາກຏຕຣໍ ກາຕຸໍ ‘‘ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກມ຺ຫ ອຕ຺ຕໂນ’’ຕິ ວຸຕ຺ຕໍ.

໘໐໕. ໂສຫນ຺ຕິ ໂສ ອຫໍ. ນູນາຕິ ປຣິວິຕກ຺ເກ ນິປາໂຕ. ອິໂຕຕິ ອິມສ຺ມາ ໂລຫກຸມ຺ຠິນິຣຍາ. ຄນ຺ຕ຺ວາຕິ ອປຄນ຺ຕ຺ວາ. ໂຍນິໍ ລທ຺ຘານ ມານຸສິນ຺ຕິ ມນຸສ຺ສໂຍນິໍ ມນຸສ຺ສຕ຺ຕຠາວໍ ລຠິຕ຺ວາ. ວທຎ຺ຎູຕິ ປຣິຈ຺ຈາຄສີໂລ, ຍາຈການໍ ວາ ວຈນຎ຺ຎູ. ສີລສມ຺ປນ຺ໂນຕິ ສີລາຈາຣສມ຺ປນ຺ໂນ. ກາຫາມິ ກຸສລໍ ພຫຸນ຺ຕິ ປຸພ຺ເພ ວິຍ ປມາທໍ ອນາປຊ຺ຊິຕ຺ວາ ພຫຸໍ ປຫູຕໍ ກຸສລໍ ປຸຎ຺ຎກມ຺ມໍ ກຣິສ຺ສາມິ, ອຸປຈິນິສ຺ສາມີຕິ ອຕ຺ໂຖ.

ສຕ຺ຖາ ອິມາ ຄາຖາໂຍ ວຕ຺ວາ ວິຕ຺ຖາເຣນ ຘມ຺ມໍ ເທເສສິ, ເທສນາປຣິໂຍສາເນ ມຕ຺ຕິກາຣຕ຺ຕຸປ຺ປລຫາຣໂກ ປຸຣິໂສ ໂສຕາປຕ຺ຕິຜເລ ປຕິຏ຺ຐຫິ. ຣາຊາ ສຎ຺ຊາຕສໍເວໂຄ ປຣປຣິຄ຺ຄເຫ ອຠິຊ຺ຌໍ ປຫາຍ ສທາຣສນ຺ຕຸຏ຺ໂຐ ອໂຫສີຕິ.

ເສຏ຺ຐິປຸຕ຺ຕເປຕວຕ຺ຖຸວຓ຺ຓນາ ນິຏ຺ຐິຕາ.