໑໒. ອມ຺ພວນເປຕວຕ຺ຖຸວຓ຺ຓນາ

ອຍຎ຺ຈ ເຕ ໂປກ຺ຂຣຓີ ສຸຣມ຺ມາຕິ ອິທໍ ສຕ຺ຖຣິ ສາວຕ຺ຖິຍໍ ວິຫຣນ຺ເຕ ອມ຺ພເປຕໍ ອາຣພ຺ຠ ວຸຕ຺ຕໍ. ສາວຕ຺ຖິຍໍ ກິຣ ອຎ຺ຎຕໂຣ ຄຫປຕິ ປຣິກ຺ຂີຓໂຠໂຄ ອໂຫສິ. ຕສ຺ສ ຠຣິຍາ ກາລມກາສິ, ເອກາ ຘີຕາເຍວ ໂຫຕິ. ໂສ ຕໍ ອຕ຺ຕໂນ ມິຕ຺ຕສ຺ສ ເຄເຫ ຐເປຕ຺ວາ ອິຓວເສນ ຄຫິເຕນ ກຫາປຓສເຕນ ຠຓ຺ຑໍ ຄເຫຕ຺ວາ ສຕ຺ເຖນ ສທ຺ຘິໍ ວຓິຊ຺ຊາຍ ຄໂຕ, ນ ຈິເຣເນວ ມູເລນ ສຫ ອຸທຍຠູຕານິ ປຎ຺ຈ ກຫາປຓສຕານິ ລຠິຕ຺ວາ ສຕ຺ເຖນ ສຫ ປຏິນິວຕ຺ຕິ. ອນ຺ຕຣາມຄ຺ເຄ ໂຈຣາ ປຣິຍຸຏ຺ຐາຍ ສຕ຺ຖໍ ປາປຸຓິໍສຸ, ສຕ຺ຖິກາ ອິໂຕ ຈິໂຕ ຈ ປລາຍິໍສຸ. ໂສ ປນ ຄຫປຕິ ອຎ຺ຎຕຣສ຺ມິໍ ຄຈ຺ເຉ ກຫາປເຓ ນິກ຺ຂິປິຕ຺ວາ ອວິທູເຣ ນິລີຍິ. ໂຈຣາ ຕໍ ຄເຫຕ຺ວາ ຊີວິຕາ ໂວໂຣເປສຸໍ. ໂສ ຘນໂລເຠນ ຕຕ຺ເຖວ ເປໂຕ ຫຸຕ຺ວາ ນິພ຺ພຕ຺ຕິ.

ວາຓິຊາ ສາວຕ຺ຖິໍ ຄນ຺ຕ຺ວາ ຕສ຺ສ ຘີຕຸຍາ ຕໍ ປວຕ຺ຕິໍ ອາໂຣເຈສຸໍ. ສາ ປິຕຸ ມຣເຓນ ອາຊີວິກາຠເຍນ ຈ ອຕິວິຍ ສຎ຺ຊາຕໂທມນສ຺ສາ ພາຬ຺ຫໍ ປຣິເທວິ. ອຖ ນໍ ໂສ ປິຕຸ ສຫາໂຍ ກຸຏຸມ຺ພິໂກ ‘‘ຍຖາ ນາມ ກຸລາລຠາຊນໍ ສພ຺ພໍ ເຠທນປຣິຍນ຺ຕໍ, ເອວເມວ ສຕ຺ຕານໍ ຊີວິຕໍ ເຠທນປຣິຍນ຺ຕໍ. ມຣຓໍ ນາມ ສພ຺ພສາຘາຣຓໍ ອປ຺ປຏິກາຣຎ຺ຈ, ຕສ຺ມາ ມາ ຕ຺ວໍ ປິຕຣິ ອຕິພາຬ຺ຫໍ ໂສຈິ, ມາ ປຣິເທວິ, ອຫໍ ເຕ ປິຕາ, ຕ຺ວໍ ມຍ຺ຫໍ ຘີຕາ, ອຫໍ ຕວ ປິຕຸ ກິຈ຺ຈໍ ກໂຣມິ, ຕ຺ວໍ ປິຕຸໂນ ເຄເຫ ວິຍ ອິມສ຺ມິໍ ເຄເຫ ອວິມນາ ອຠິຣມສ຺ສູ’’ຕິ ວຕ຺ວາ ສມສ຺ສາເສສິ. ສາ ຕສ຺ສ ວຈເນນ ປຏິປ຺ປສ຺ສທ຺ຘໂສກາ ປິຕຣິ ວິຍ ຕສ຺ມິໍ ສຎ຺ຊາຕຄາຣວພຫຸມານາ ອຕ຺ຕໂນ ກປຓຠາເວນ ຕສ຺ສ ເວຍ຺ຍາວຈ຺ຈກາຣິນີ ຫຸຕ຺ວາ ວຕ຺ຕມານາ ປິຕຣໍ ອຸທ຺ທິສ຺ສ ມຕກິຈ຺ຈໍ ກາຕຸກາມາ ຍາຄຸໍ ປຈິຕ຺ວາ ມໂນສິລາວຓ຺ຓານິ ສຸປຣິປກ຺ການິ ມຘຸຣານິ ອມ຺ພຜລານິ ກໍສປາຕິຍໍ ຐເປຕ຺ວາ ຍາຄຸໍ ອມ຺ພຜລານິ ຈ ທາສິຍາ ຄາຫາເປຕ຺ວາ ວິຫາຣໍ ຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ເອວມາຫ – ‘‘ຠຄວາ ມຍ຺ຫໍ ທກ຺ຂິຓາຍ ປຏິຄ຺ຄຫເຓນ ອນຸຄ຺ຄຫໍ ກໂຣຖາ’’ຕິ. ສຕ຺ຖາ ມຫາກຣຸຓາຍ ສຎ຺ໂຈທິຕມານໂສ ຕສ຺ສາ ມໂນຣຖໍ ປູເຣນ຺ໂຕ ນິສຊ຺ຊາກາຣໍ ທສ຺ເສສິ. ສາ ຫຏ຺ຐຕຸຏ຺ຐາ ປຎ຺ຎຕ຺ຕວຣພຸທ຺ຘາສເນ ອຕ຺ຕນາ ອຸປນີຕໍ ສຸວິສຸທ຺ຘວຕ຺ຖໍ ອຕ຺ຖຣິຕ຺ວາ ອທາສິ, ນິສີທິ ຠຄວາ ປຎ຺ຎຕ຺ເຕ ອາສເນ.

ອຖ ສາ ຠຄວໂຕ ຍາຄຸໍ ອຸປນາເມສິ, ປຏິຄ຺ຄເຫສິ ຠຄວາ ຍາຄຸໍ. ອຖ ສງ຺ຆໍ ອຸທ຺ທິສ຺ສ ຠິກ຺ຂູນມ຺ປິ ຍາຄຸໍ ທຕ຺ວາ ປຸນ ໂຘຕຫຕ຺ຖາ ອມ຺ພຜລານິ ຠຄວໂຕ ອຸປນາເມສິ, ຠຄວາ ຕານິ ປຣິຠຸຎ຺ຊິ. ສາ ຠຄວນ຺ຕໍ ວນ຺ທິຕ຺ວາ ເອວມາຫ – ‘‘ຍາ ເມ, ຠນ຺ເຕ, ປຈ຺ຈຕ຺ຖຣຓຍາຄຸອມ຺ພຜລທານວເສນ ປວຕ຺ຕາ ທກ຺ຂິຓາ, ສາ ເມ ປິຕຣໍ ປາປຸຓາຕູ’’ຕິ. ຠຄວາ ‘‘ເອວໍ ໂຫຕູ’’ຕິ ວຕ຺ວາ ອນຸໂມທນໍ ອກາສິ. ສາ ຠຄວນ຺ຕໍ ວນ຺ທິຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ຕາຍ ທກ຺ຂິຓາຍ ສມຸທ຺ທິຏ຺ຐມຕ຺ຕາຍ ໂສ ເປໂຕ ອມ຺ພວນອຸຍ຺ຍານວິມານກປ຺ປຣຸກ຺ຂໂປກ຺ຂຣຓິໂຍ ມຫຕິຎ຺ຈ ທິພ຺ພສມ຺ປຕ຺ຕິໍ ປຏິລຠິ.

ອຖ ເຕ ວາຓິຊາ ອປເຣນ ສມເຍນ ວຓິຊ຺ຊາຍ ຄຈ຺ຉນ຺ຕາ ຕເມວ ມຄ຺ຄໍ ປຏິປນ຺ນາ ປຸພ຺ເພ ວສິຕຏ຺ຐາເນ ເອກຣຕ຺ຕິໍ ວາສໍ ກປ຺ເປສຸໍ. ເຕ ທິສ຺ວາ ໂສ ວິມານເປໂຕ ອຸຍ຺ຍານວິມານາທີຫິ ສທ຺ຘິໍ ເຕສໍ ອຕ຺ຕານໍ ທສ຺ເສສິ. ເຕ ວາຓິຊາ ຕໍ ທິສ຺ວາ ເຕນ ລທ຺ຘສມ຺ປຕ຺ຕິໍ ປຸຈ຺ຉນ຺ຕາ –

໗໙໖. ‘‘ອຍຎ຺ຈ ເຕ ໂປກ຺ຂຣຓີ ສຸຣມ຺ມາ, ສມາ ສຸຕິຕ຺ຖາ ຈ ມໂຫທກາ ຈ;

ສຸປຸປ຺ຜິຕາ ຠມຣຄຓານຸກິຓ຺ຓາ, ກຖໍ ຕຍາ ລທ຺ຘາ ອຍໍ ມນຸຎ຺ຎາ.

໗໙໗. ‘‘ອິທຎ຺ຈ ເຕ ອມ຺ພວນໍ ສຸຣມ຺ມໍ, ສພ຺ໂພຕຸກໍ ຘາຣຍເຕ ຜລານິ;

ສຸປຸປ຺ຜິຕໍ ຠມຣຄຓານຸກິຓ຺ຓໍ, ກຖໍ ຕຍາ ລທ຺ຘມິທໍ ວິມານ’’ນ຺ຕິ. –

ອິມາ ທ຺ເວ ຄາຖາ ອໂວຈຸໍ.

໗໙໖. ຕຕ຺ຖ ສຸຣມ຺ມາຕິ ສຸຏ຺ຐຸ ຣມຓີຍາ. ສມາຕິ ສມຕລາ. ສຸຕິຕ຺ຖາຕິ ຣຕນມຍໂສປານຕາຍ ສຸນ຺ທຣຕິຕ຺ຖາ. ມໂຫທກາຕິ ພຫຸຊລາ.

໗໙໗. ສພ຺ໂພຕຸກນ຺ຕິ ປຸປ຺ຜູປຄຜລູປຄຣຸກ຺ຂາທີຫິ ສພ຺ເພສຸ ອຸຕູສຸ ສຸຂາວຫໍ. ເຕນາຫ ‘‘ຘາຣຍເຕ ຜລານີ’’ຕິ. ສຸປຸປ຺ຜິຕນ຺ຕິ ນິຈ຺ຈໍ ສຸປຸປ຺ຜິຕໍ.

ຕໍ ສຸຕ຺ວາ ເປໂຕ ໂປກ຺ຂຣຓິອາທີນໍ ປຏິລາຠກາຣຓໍ ອາຈິກ຺ຂນ຺ໂຕ –

໗໙໘. ‘‘ອມ຺ພປກ຺ກໍ ທກໍ ຍາຄຸ, ສີຕຈ຺ຉາຍາ ມໂນຣມາ;

ຘີຕາຍ ທິນ຺ນທາເນນ, ເຕນ ເມ ອິຘ ລພ຺ຠຕີ’’ຕິ. –

ຄາຖມາຫ. ຕຕ຺ຖ ເຕນ ເມ ອິຘ ລພ຺ຠຕີຕິ ຍໍ ຕໍ ຠຄວໂຕ ຠິກ຺ຂູນຎ຺ຈ ອມ຺ພປກ຺ກໍ ອຸທກໍ ຍາຄຸຎ຺ຈ ມມໍ ອຸທ຺ທິສ຺ສ ເທນ຺ຕິຍາ ມຍ຺ຫໍ ຘີຕາຍ ທິນ຺ນໍ ທານໍ, ເຕນ ເມ ຘີຕາຍ ທິນ຺ນທາເນນ ອິຘ ອິມສ຺ມິໍ ທິພ຺ເພ ອມ຺ພວເນ ສພ຺ໂພຕຸກໍ ອມ຺ພປກ຺ກໍ, ອິມິສ຺ສາ ທິພ຺ພາຍ ມນຸຎ຺ຎາຍ ໂປກ຺ຂຣຓິຍາ ທິພ຺ພໍ ອຸທກໍ, ຍາຄຸຍາ ອຕ຺ຖຣຓສ຺ສ ຈ ທາເນນ ອຸຍ຺ຍານວິມານກປ຺ປຣຸກ຺ຂາທີສຸ ສີຕຈ຺ຉາຍາ ມໂນຣມາ ອິຘ ລພ຺ຠຕິ, ສມິຊ຺ຌຕີຕິ ອຕ຺ໂຖ.

ເອວຎ຺ຈ ປນ ວຕ຺ວາ ໂສ ເປໂຕ ເຕ ວາຓິເຊ ເນຕ຺ວາ ຕານິ ປຎ຺ຈ ກຫາປຓສຕານິ ທສ຺ເສຕ຺ວາ ‘‘ອິໂຕ ອຸປຑ຺ຒໍ ຕຸມ຺ເຫ ຄຓ຺ຫຖ, ອຸປຑ຺ຒໍ ມຍາ ຄຫິຕໍ ອິຓໍ ໂສເຘຕ຺ວາ ສຸເຂນ ຊີວຕູຕິ ມຍ຺ຫໍ ຘີຕາຍ ເທຖາ’’ຕິ ອາຫ. ວາຓິຊາ ອນຸກ຺ກເມນ ສາວຕ຺ຖິໍ ປຕ຺ວາ ຕສ຺ສ ຘີຕາຍ ກເຖຕ຺ວາ ເຕນ ອຕ຺ຕໂນ ທິນ຺ນຠາຄມ຺ປິ ຕສ຺ສາ ເອວ ອທໍສຸ. ສາ ກຫາປຓສຕໍ ຘນິການໍ ທຕ຺ວາ ອິຕຣໍ ອຕ຺ຕໂນ ປິຕຸ ສຫາຍສ຺ສ ຕສ຺ສ ກຸຏຸມ຺ພິກສ຺ສ ທຕ຺ວາ ສຍໍ ເວຍ຺ຍາວຈ຺ຈໍ ກໂຣນ຺ຕິ ນິວສຕິ. ໂສ ‘‘ອິທໍ ສພ຺ພໍ ຕຸຍ຺ຫໍເຍວ ໂຫຕູ’’ຕິ ຕສ຺ສາເຍວ ປຏິທຕ຺ວາ ຕໍ ອຕ຺ຕໂນ ເຊຏ຺ຐປຸຕ຺ຕສ຺ສ ຆຣສາມິນິໍ ອກາສິ.

ສາ ຄຈ຺ຉນ຺ເຕ ກາເລ ເອກໍ ປຸຕ຺ຕໍ ລຠິຕ຺ວາ ຕໍ ອຸປລາເລນ຺ຕີ –

໗໙໙. ‘‘ສນ຺ທິຏ຺ຐິກໍ ກມ຺ມໍ ເອວໍ ປສ຺ສຖ, ທານສ຺ສ ທມສ຺ສ ສໍຍມສ຺ສ ວິປາກໍ;

ທາສີ ອຫໍ ອຍ຺ຍກຸເລສຸ ຫຸຕ຺ວາ, ສຸຓິສາ ໂຫມິ ອຄາຣສ຺ສ ອິສ຺ສຣາ’’ຕິ. –

ອິມໍ ຄາຖໍ ວທຕິ.

ອເຖກທິວສໍ ສຕ຺ຖາ ຕສ຺ສາ ຎາຓປຣິປາກໍ ໂອໂລເກຕ຺ວາ ໂອຠາສໍ ຜຣິຕ຺ວາ ສມ຺ມຸເຂ ຐິໂຕ ວິຍ ອຕ຺ຕານໍ ທສ຺ເສຕ຺ວາ –

‘‘ອສາຕໍ ສາຕຣູເປນ, ປິຍຣູເປນ ອປ຺ປິຍໍ;

ທຸກ຺ຂໍ ສຸຂສ຺ສ ຣູເປນ, ປມຕ຺ຕໍ ອຕິວຕ຺ຕຕີ’’ຕິ. (ອຸທາ. ໑໘; ຊາ. ໑.໑.໑໐໐) –

ອິມໍ ຄາຖມາຫ. ສາ ຄາຖາປຣິໂຍສາເນ ໂສຕາປຕ຺ຕິຜເລ ປຕິຏ຺ຐິຕາ. ສາ ທຸຕິຍທິວເສ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ທານໍ ທຕ຺ວາ ຕໍ ປວຕ຺ຕິໍ ຠຄວໂຕ ອາໂຣເຈສິ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ອມ຺ພວນເປຕວຕ຺ຖຸວຓ຺ຓນາ ນິຏ຺ຐິຕາ.