໑໓. ອກ຺ຂຣຸກ຺ຂເປຕວຕ຺ຖຸວຓ຺ຓນາ

ຍໍ ທທາຕິ ນ ຕໍ ໂຫຕີຕິ ອິທໍ ອກ຺ຂທາຍກເປຕວຕ຺ຖຸ. ຕສ຺ສ ກາ ອຸປ຺ປຕ຺ຕິ? ຠຄວຕິ ສາວຕ຺ຖິຍໍ ວິຫຣນ຺ເຕ ອຎ຺ຎຕໂຣ ສາວຕ຺ຖິວາສີ ອຸປາສໂກ ສກເຏຫິ ຠຓ຺ຑສ຺ສ ປູເຣຕ຺ວາ ວຓິຊ຺ຊາຍ ວິເທສໍ ຄນ຺ຕ຺ວາ ຕຕ຺ຖ ອຕ຺ຕໂນ ຠຓ຺ຑໍ ວິກ຺ກິຓິຕ຺ວາ ປຏິຠຓ຺ຑໍ ສກເຏສຸ ອາໂຣເປຕ຺ວາ ສາວຕ຺ຖິໍ ອຸທ຺ທິສ຺ສ ມຄ຺ຄໍ ປຏິປຊ຺ຊິ. ຕສ຺ສ ມຄ຺ຄໍ ຄຈ຺ຉນ຺ຕສ຺ສ ອຏວິຍໍ ເອກສ຺ສ ສກຏສ຺ສ ອກ຺ໂຂ ຠິຊ຺ຊິ. ອຖ ອຎ຺ຎຕໂຣ ປຸຣິໂສ ຣຸກ຺ຂຄຫຓຕ຺ຖໍ ກຸຐາຣິຜຣສຸໍ ຄາຫາເປຕ຺ວາ ອຕ຺ຕໂນ ຄາມໂຕ ນິກ຺ຂມິຕ຺ວາ ອຣຎ຺ເຎ ວິຈຣນ຺ໂຕ ຕໍ ຐານໍ ປຕ຺ວາ ຕໍ ອຸປາສກໍ ອກ຺ຂຠຎ຺ຊເນນ ໂທມນສ຺ສປ຺ປຕ຺ຕໍ ທິສ຺ວາ ‘‘ອຍໍ ວາຓິໂຊ ອກ຺ຂຠຎ຺ຊເນນ ອຏວິຍໍ ກິລມຕີ’’ຕິ ອນຸກມ຺ປໍ ອຸປາທາຍ ຣຸກ຺ຂທຓ຺ຑໍ ຉິນ຺ທິຕ຺ວາ ທຬ຺ຫໍ ອກ຺ຂໍ ກຕ຺ວາ ສກເຏ ໂຍເຊຕ຺ວາ ອທາສິ.

ໂສ ອປເຣນ ສມເຍນ ກາລໍ ກຕ຺ວາ ຕສ຺ມິໍເຍວ ອຏວິປເທເສ ຠຸມ຺ມເທວຕາ ຫຸຕ຺ວາ ນິພ຺ພຕ຺ໂຕ. ອຕ຺ຕໂນ ກມ຺ມໍ ປຈ຺ຈເວກ຺ຂິຕ຺ວາ ຣຕ຺ຕິຍໍ ຕສ຺ສ ອຸປາສກສ຺ສ ເຄຫໍ ຄນ຺ຕ຺ວາ ເຄຫທ຺ວາເຣ ຐຕ຺ວາ –

໘໐໐. ‘‘ຍໍ ທທາຕິ ນ ຕໍ ໂຫຕິ, ເທເຖວ ທານໍ ທຕ຺ວາ ອຸຠຍໍ ຕຣຕິ;

ອຸຠຍໍ ເຕນ ທາເນນ ຄຈ຺ຉຕິ, ຊາຄຣຖ ມາ ປມຊ຺ຊຖາ’’ຕິ. –

ຄາຖມາຫ. ຕຕ຺ຖ ຍໍ ທທາຕິ ນ ຕໍ ໂຫຕີຕິ ຍໍ ເທຍ຺ຍຘມ຺ມໍ ທາຍໂກ ເທຕິ, ນ ຕເທວ ປຣໂລເກ ຕສ຺ສ ທານສ຺ສ ຜລຠາເວນ ໂຫຕິ, ອຖ ໂຂ ອຎ຺ຎໍ ພຫຸໍ ອິຏ຺ຐໍ ກນ຺ຕໍ ຜລໍ ໂຫຕິເຍວ. ຕສ຺ມາ ເທເຖວ ທານນ຺ຕິ ຍຖາ ຕຖາ ທານໍ ເທຖ ເອວ. ຕຕ຺ຖ ກາຣຓມາຫ ‘‘ທຕ຺ວາ ອຸຠຍໍ ຕຣຕີ’’ຕິ, ທານໍ ທຕ຺ວາ ທິຏ຺ຐຘມ຺ມິກມ຺ປິ ສມ຺ປຣາຍິກມ຺ປິ ທຸກ຺ຂໍ ອນຕ຺ຖຎ຺ຈ ອຕິກ຺ກມຕິ. ອຸຠຍໍ ເຕນ ທາເນນ ຄຈ຺ຉຕີຕິ ທິຏ຺ຐຘມ຺ມິກໍ ສມ຺ປຣາຍິກຎ຺ຈາຕິ ອຸຠຍມ຺ປິ ສຸຂໍ ເຕນ ທາເນນ ອຸປຄຈ຺ຉຕິ ປາປຸຓາຕິ, ອຕ຺ຕໂນ ປເຣສຎ຺ຈ ຫິຕສຸຂວເສນາປິ ອຍມຕ຺ໂຖ ໂຍເຊຕພ຺ໂພ. ຊາຄຣຖ ມາ ປມຊ຺ຊຖາຕິ ເອວໍ ອຸຠຍານຕ຺ຖນິວາຣຓໍ ອຸຠຍຫິຕສາຘນໍ ທານໍ ສມ຺ປາເທຕຸໍ ຊາຄຣຖ, ທານູປກຣຓານິ ສຊ຺ເຊຕ຺ວາ ຕຕ຺ຖ ຈ ອປ຺ປມຕ຺ຕາ ໂຫຖາຕິ ອຕ຺ໂຖ. ອາທຣທສ຺ສນຕ຺ຖໍ ເຈຕ຺ຖ ອາເມຑິຕວເສນ ວຸຕ຺ຕໍ.

ວາຓິໂຊ ອຕ຺ຕໂນ ກິຈ຺ຈໍ ຕີເຣຕ຺ວາ ປຏິນິວຕ຺ຕິຕ຺ວາ ອນຸກ຺ກເມນ ສາວຕ຺ຖິໍ ປຕ຺ວາ ທຸຕິຍທິວເສ ສຕ຺ຖາຣໍ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສິນ຺ໂນ ຕໍ ປວຕ຺ຕິໍ ຠຄວໂຕ ອາໂຣເຈສິ. ສຕ຺ຖາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ອກ຺ຂຣຸກ຺ຂເປຕວຕ຺ຖຸວຓ຺ຓນາ ນິຏ຺ຐິຕາ.