໑໑. ປາຏລິປຸຕ຺ຕເປຕວຕ຺ຖຸວຓ຺ຓນາ

ທິຏ຺ຐາ ຕຍາ ນິຣຍາ ຕິຣຈ຺ຉານໂຍນີຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ອຎ຺ຎຕຣໍ ວິມານເປຕໍ ອາຣພ຺ຠ ວຸຕ຺ຕໍ. ສາວຕ຺ຖິວາສິໂນ ກິຣ ປາຏລິປຸຕ຺ຕວາສິໂນ ຈ ພຫູ ວາຓິຊາ ນາວາຍ ສຸວຓ຺ຓຠູມິໍ ອຄມິໍສຸ. ຕຕ຺ເຖໂກ ອຸປາສໂກ ອາພາຘິໂກ ມາຕຸຄາເມ ປຏິພທ຺ຘຈິຕ຺ໂຕ ກາລມກາສິ. ໂສ ກຕກຸສໂລປິ ເທວໂລກໍ ອນຸປປຊ຺ຊິຕ຺ວາ ອິຕ຺ຖິຍາ ປຏິພທ຺ຘຈິຕ຺ຕຕາຍ ສມຸທ຺ທມຊ຺ເຌ ວິມານເປໂຕ ຫຸຕ຺ວາ ນິພ຺ພຕ຺ຕິ. ຍສ຺ສໍ ປນ ໂສ ປຏິພທ຺ຘຈິຕ຺ໂຕ, ສາ ອິຕ຺ຖີ ສຸວຓ຺ຓຠູມິຄາມິນິໍ ນາວໍ ອຠິຣຸຍ຺ຫ ຄຈ຺ຉຕິ. ອຖ ໂຂ ໂສ ເປໂຕ ຕໍ ອິຕ຺ຖິໍ ຄເຫຕຸກາໂມ ນາວາຍ ຄມນໍ ອຸປຣຸນ຺ຘິ. ອຖ ວາຓິຊາ ‘‘ເກນ ນຸ ໂຂ ກາຣເຓນ ອຍໍ ນາວາ ນ ຄຈ຺ຉຕີ’’ຕິ ວີມໍສນ຺ຕາ ກາຬກຓ຺ຓິສລາກໍ ວິຈາເຣສຸໍ. ອມນຸສ຺ສິທ຺ຘິຍາ ຍາວຕຕິຍໍ ຕສ຺ສາ ເອວ ອິຕ຺ຖິຍາ ປາປຸຓິ, ຍສ຺ສໍ ໂສ ປຏິພທ຺ຘຈິຕ຺ໂຕ. ຕໍ ທິສ຺ວາ ວາຓິຊາ ເວຬຸກລາປໍ ສມຸທ຺ເທ ໂອຕາເຣຕ຺ວາ ຕສ຺ສ ອຸປຣິ ຕໍ ອິຕ຺ຖິໍ ໂອຕາເຣສຸໍ. ອິຕ຺ຖິຍາ ໂອຕາຣິຕມຕ຺ຕາຍ ນາວາ ເວເຄນ ສຸວຓ຺ຓຠູມິໍ ອຠິມຸຂາ ປາຍາສິ. ອມນຸສ຺ໂສ ຕໍ ອິຕ຺ຖິໍ ອຕ຺ຕໂນ ວິມານໍ ອາໂຣເປຕ຺ວາ ຕາຍ ສທ຺ຘິໍ ອຠິຣມິ.

ສາ ເອກໍ ສໍວຈ຺ຉຣໍ ອຕິກ຺ກມິຕ຺ວາ ນິພ຺ພິນ຺ນຣູປາ ຕໍ ເປຕໍ ຍາຈນ຺ຕີ ອາຫ – ‘‘ອຫໍ ອິຘ ວສນ຺ຕີ ມຍ຺ຫໍ ສມ຺ປຣາຍິກໍ ອຕ຺ຖໍ ກາຕຸໍ ນ ລຠາມິ, ສາຘຸ, ມາຣິສ, ມໍ ປາຏລິປຸຕ຺ຕເມວ ເນຫີ’’ຕິ. ໂສ ຕາຍ ຍາຈິໂຕ –

໗໙໓. ‘‘ທິຏ຺ຐາ ຕຍາ ນິຣຍາ ຕິຣຈ຺ຉານໂຍນິ, ເປຕາ ອສຸຣາ ອຖວາປິ ມານຸສາ ເທວາ;

ສຍມທ຺ທສ ກມ຺ມວິປາກມຕ຺ຕໂນ, ເນສ຺ສາມິ ຕໍ ປາຏລິປຸຕ຺ຕມກ຺ຂຕໍ;

ຕຕ຺ຖ ຄນ຺ຕ຺ວາ ກຸສລໍ ກໂຣຫິ ກມ຺ມ’’ນ຺ຕິ. –

ຄາຖມາຫ. ຕຕ຺ຖ ທິຏ຺ຐາ ຕຍາ ນິຣຍາຕິ ເອກຈ຺ເຈ ປຈ຺ເຈກນິຣຍາປິ ຕຍາ ທິຏ຺ຐາ. ຕິຣຈ຺ຉານໂຍນີຕິ ມຫານຸຠາວາ ນາຄສຸປຓ຺ຓາທິຕິຣຈ຺ຉານາປິ ທິຏ຺ຐາ ຕຍາຕິ ໂຍຊນາ. ເປຕາຕິ ຂຸປ຺ປິປາສາທິເຠທາ ເປຕາ. ອສຸຣາຕິ ກາລກຎ຺ຈິກາທິເຠທາ ອສຸຣາ. ເທວາຕິ ເອກຈ຺ເຈ ຈາຕຸມຫາຣາຊິກາ ເທວາ. ໂສ ກິຣ ອຕ຺ຕໂນ ອານຸຠາເວນ ອນ຺ຕຣນ຺ຕຣາ ຕໍ ຄເຫຕ຺ວາ ປຈ຺ເຈກນິຣຍາທິເກ ທສ຺ເສນ຺ໂຕ ວິຈຣຕິ, ເຕນ ເອວມາຫ. ສຍມທ຺ທສ ກມ຺ມວິປາກມຕ຺ຕໂນຕິ ນິຣຍາທິເກ ວິເສສໂຕ ຄນ຺ຕ຺ວາ ປສ຺ສນ຺ຕີ ສຍເມວ ອຕ຺ຕນາ ກຕກມ຺ມານໍ ວິປາກໍ ປຈ຺ຈກ຺ຂໂຕ ອທ຺ທສ ອທກ຺ຂິ. ເນສ຺ສາມິ ຕໍ ປາຏລິປຸຕ຺ຕມກ຺ຂຕນ຺ຕິ ອິທານາຫໍ ຕໍ ອກ຺ຂຕໍ ເກນຈິ ອປຣິກ຺ຂຕໍ ມນຸສ຺ສຣູເປເນວ ປາຏລິປຸຕ຺ຕໍ ນຍິສ຺ສາມິ. ຕ຺ວໍ ປນ ຕຕ຺ຖ ຄນ຺ຕ຺ວາ ກຸສລໍ ກໂຣຫິ ກມ຺ມໍ, ກມ຺ມວິປາກສ຺ສ ປຈ຺ຈກ຺ຂໂຕ ທິຏ຺ຐຕ຺ຕາ ຍຸຕ຺ຕປຍຸຕ຺ຕາ ປຸຎ຺ຎນິຣຕາ ໂຫຫີຕິ ອຕ຺ໂຖ.

ອຖ ສາ ອິຕ຺ຖີ ຕສ຺ສ ວຈນໍ ສຸຕ຺ວາ ອຕ຺ຕມນາ –

໗໙໔. ‘‘ອຕ຺ຖກາໂມສິ ເມ ຍກ຺ຂ, ຫິຕກາໂມສິ ເທວເຕ;

ກໂຣມິ ຕຸຍ຺ຫໍ ວຈນໍ, ຕ຺ວໍສິ ອາຈຣິໂຍ ມມ.

໗໙໕. ‘‘ທິຏ຺ຐາ ມຍາ ນິຣຍາ ຕິຣຈ຺ຉານໂຍນິ, ເປຕາ ອສຸຣາ ອຖວາປິ ມານຸສາ ເທວາ;

ສຍມທ຺ທສໍ ກມ຺ມວິປາກມຕ຺ຕໂນ, ກາຫາມິ ປຸຎ຺ຎານິ ອນປ຺ປການີ’’ຕິ. –

ຄາຖມາຫ.

ອຖ ໂສ ເປໂຕ ຕໍ ອິຕ຺ຖິໍ ຄເຫຕ຺ວາ ອາກາເສນ ຄນ຺ຕ຺ວາ ປາຏລິປຸຕ຺ຕນຄຣສ຺ສ ມຊ຺ເຌ ຐເປຕ຺ວາ ປກ຺ກາມິ. ອຖສ຺ສາ ຎາຕິມິຕ຺ຕາທໂຍ ຕໍ ທິສ຺ວາ ‘‘ມຍໍ ປຸພ຺ເພ ສມຸທ຺ເທ ປກ຺ຂິຕ຺ຕາ ມຕາຕິ ອສ຺ສຸມ຺ຫ. ສາ ອຍໍ ທິຏ຺ຐາ ວຕ, ໂຠ, ໂສຕ຺ຖິນາ ອາຄຕາ’’ຕິ ອຠິນນ຺ທມານາ ສມາຄນ຺ຕ຺ວາ ຕສ຺ສາ ປວຕ຺ຕິໍ ປຸຈ຺ຉິໍສຸ. ສາ ເຕສໍ ອາທິໂຕ ປຏ຺ຐາຍ ອຕ຺ຕນາ ທິຏ຺ຐໍ ອນຸຠູຕຎ຺ຈ ສພ຺ພໍ ກເຖສິ. ສາວຕ຺ຖິວາສິໂນປິ ໂຂ ເຕ ວາຓິຊາ ອນຸກ຺ກເມນ ສາວຕ຺ຖິໍ ອຸປຄຕກາເລ ສຕ຺ຖຸ ສນ຺ຕິກໍ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສິນ຺ນາ ຕໍ ປວຕ຺ຕິໍ ຠຄວໂຕ ອາໂຣເຈສຸໍ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ຈຕຸນ຺ນໍ ປຣິສານໍ ຘມ຺ມໍ ເທເສສິ. ຕໍ ສຸຕ຺ວາ ມຫາຊໂນ ສໍເວຄຊາໂຕ ທານາທິກຸສລຘມ຺ມນິຣໂຕ ອໂຫສີຕິ.

ປາຏລິປຸຕ຺ຕເປຕວຕ຺ຖຸວຓ຺ຓນາ ນິຏ຺ຐິຕາ.