໑໐. ຄຓເປຕວຕ຺ຖຸວຓ຺ຓນາ

ນຄ຺ຄາ ທຸພ຺ພຓ຺ຓຣູປາຕ຺ຖາຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ສມ຺ພຫຸເລ ເປເຕ ອາຣພ຺ຠ ວຸຕ຺ຕໍ. ສາວຕ຺ຖິຍໍ ກິຣ ສມ຺ພຫຸລາ ມນຸສ຺ສາ ຄຓຠູຕາ ອສ຺ສທ຺ຘາ ອປ຺ປສນ຺ນາ ມຈ຺ເຉຣມລປຣິຍຸຏ຺ຐິຕຈິຕ຺ຕາ ທານາທິສຸຈຣິຕວິມຸຂາ ຫຸຕ຺ວາ ຈິຣໍ ຊີວິຕ຺ວາ ກາຍສ຺ສ ເຠທາ ນຄຣສ຺ສ ສມີເປ ເປຕໂຍນິຍໍ ນິພ຺ພຕ຺ຕິໍສຸ. ອເຖກທິວສໍ ອາຍສ຺ມາ ມຫາໂມຄ຺ຄລ຺ລາໂນ ສາວຕ຺ຖິຍໍ ປິຓ຺ຑາຍ ຄຈ຺ຉນ຺ໂຕ ອນ຺ຕຣາມຄ຺ເຄ ເປເຕ ທິສ຺ວາ –

໗໘໒. ‘‘ນຄ຺ຄາ ທຸພ຺ພຓຣູປາຕ຺ຖ, ກິສາ ຘມນິສນ຺ຖຕາ;

ອຸປ຺ຜາສຸລິກາ ກິສິກາ, ເກ ນຸ ຕຸມ຺ເຫຕ຺ຖ ມາຣິສາ’’ຕິ. –

ຄາຖາຍ ປຸຈ຺ຉິ. ຕຕ຺ຖ ທຸພ຺ພຓ຺ຓຣູປາຕ຺ຖາຕິ ທຸພ຺ພຓ຺ຓສຣີຣາ ໂຫຖ. ເກ ນຸ ຕຸມ຺ເຫຕ຺ຖາຕິ ຕຸມ຺ເຫ ເກ ນຸ ນາມ ຠວຖ. ມາຣິສາຕິ ເຕ ອຕ຺ຕໂນ ສາຣຸປ຺ປວເສນ ອາລປຕິ.

ຕໍ ສຸຕ຺ວາ ເປຕາ –

໗໘໓. ‘‘ມຍໍ ຠທນ຺ເຕ ເປຕມ຺ຫາ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’’ຕິ. –

ຄາຖາຍ ອຕ຺ຕໂນ ເປຕຠາວໍ ປກາເສຕ຺ວາ ປຸນ ເຖເຣນ –

໗໘໔. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ເປຕໂລກໍ ອິໂຕ ຄຕາ’’ຕິ. –

ຄາຖາຍ ກຕກມ຺ມໍ ປຸຈ຺ຉິຕາ –

໗໘໕. ‘‘ອນາວເຏສຸ ຕິຕ຺ເຖສຸ, ວິຈິນິມ຺ຫທ຺ຘມາສກໍ;

ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກມ຺ຫ ອຕ຺ຕໂນ.

໗໘໖. ‘‘ນທິໍ ອຸເປມ ຕສິຕາ, ຣິຕ຺ຕກາ ປຣິວຕ຺ຕຕິ;

ຉາຍໍ ອຸເປມ ອຸຓ຺ເຫສຸ, ອາຕໂປ ປຣິວຕ຺ຕຕິ.

໗໘໗. ‘‘ອຄ຺ຄິວຓ຺ໂຓ ຈ ໂນ ວາໂຕ, ຑຫນ຺ໂຕ ອຸປວາຍຕິ;

ເອຕຎ຺ຈ ຠນ຺ເຕ ອຣຫາມ, ອຎ຺ຎຎ຺ຈ ປາປກໍ ຕໂຕ.

໗໘໘. ‘‘ອປິ ໂຍຊນານິ ຄຈ຺ຉາມ, ຉາຕາ ອາຫາຣເຄຘິໂນ;

ອລທ຺ຘາວ ນິວຕ຺ຕາມ, ອໂຫ ໂນ ອປ຺ປປຸຎ຺ຎຕາ.

໗໘໙. ‘‘ຉາຕາ ປມຸຈ຺ຉິຕາ ຠນ຺ຕາ, ຠູມິຍໍ ປຏິສຸມ຺ຠິຕາ;

ອຸຕ຺ຕານາ ປຏິກິຣາມ, ອວກຸຊ຺ຊາ ປຕາມເສ.

໗໙໐. ‘‘ເຕ ຈ ຕຕ຺ເຖວ ປຕິຕາ, ຠູມິຍໍ ປຏິສຸມ຺ຠິຕາ;

ອຸຣໍ ສີສຎ຺ຈ ຆຏ຺ເຏມ, ອໂຫ ໂນ ອປ຺ປປຸຎ຺ຎຕາ.

໗໙໑. ‘‘ເອຕຎ຺ຈ ຠນ຺ເຕ ອຣຫາມ, ອຎ຺ຎຎ຺ຈ ປາປກໍ ຕໂຕ;

ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກມ຺ຫ ອຕ຺ຕໂນ.

໗໙໒. ‘‘ເຕ ຫິ ນູນ ອິໂຕ ຄນ຺ຕ຺ວາ, ໂຍນິໍ ລທ຺ຘານ ມານຸສິໍ;

ວທຎ຺ຎູ ສີລສມ຺ປນ຺ນາ, ກາຫາມ ກຸສລໍ ພຫຸ’’ນ຺ຕິ. –

ອຕ຺ຕນາ ກຕກມ຺ມໍ ກເຖສຸໍ.

໗໘໘. ຕຕ຺ຖ ອປິ ໂຍຊນານິ ຄຈ຺ຉາມາຕິ ອເນການິປິ ໂຍຊນານິ ຄຈ຺ຉາມ. ກຖໍ? ຉາຕາ ອາຫາຣເຄຘິໂນຕິ, ຈິຣກາລໍ ຊິຆຈ຺ຉາຍ ຊິຆຈ຺ຉິຕາ ອາຫາເຣ ຄິທ຺ຘາ ອຠິຄິຊ຺ຌນ຺ຕາ ຫຸຕ຺ວາ, ເອວໍ ຄນ຺ຕ຺ວາປິ ກິຎ຺ຈິ ອາຫາຣໍ ອລທ຺ຘາເຍວ ນິວຕ຺ຕາມ. ອປ຺ປປຸຎ຺ຎຕາຕິ ອປຸຎ຺ຎຕາ ອກຕກລ຺ຍາຓຕາ.

໗໘໙. ອຸຕ຺ຕານາ ປຏິກິຣາມາຕິ ກທາຈິ ອຸຕ຺ຕານາ ຫຸຕ຺ວາ ວິກິຣິຍມານງ຺ຄປຈ຺ຈງ຺ຄາ ວິຍ ວຕ຺ຕາມ. ອວກຸຊ຺ຊາ ປຕາມເສຕິ ກທາຈິ ອວກຸຊ຺ຊາ ຫຸຕ຺ວາ ປຕາມ.

໗໙໐. ເຕ ຈາຕິ ເຕ ມຍໍ. ອຸຣໍ ສີສຎ຺ຈ ຆຏ຺ເຏມາຕິ ອວກຸຊ຺ຊາ ຫຸຕ຺ວາ ປຕິຕາ ອຸຏ຺ຐາຕຸໍ ອສກ຺ໂກນ຺ຕາ ເວຘນ຺ຕາ ເວທນາປ຺ປຕ຺ຕາ ອຕ຺ຕໂນ ອຕ຺ຕໂນ ອຸຣໍ ສີສຎ຺ຈ ປຏິຆໍສາມ. ເສສໍ ເຫຏ຺ຐາ ວຸຕ຺ຕນຍເມວ.

ເຖໂຣ ຕໍ ປວຕ຺ຕິໍ ຠຄວໂຕ ອາໂຣເຈສິ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ຕໍ ສຸຕ຺ວາ ມຫາຊໂນ ມຈ຺ເຉຣມລໍ ປຫາຍ ທານາທິສຸຈຣິຕນິຣໂຕ ອໂຫສີຕິ.

ຄຓເປຕວຕ຺ຖຸວຓ຺ຓນາ ນິຏ຺ຐິຕາ.