໙. ກູຏວິນິຈ຺ຉຍິກເປຕວຕ຺ຖຸວຓ຺ຓນາ

ມາລີ ກິຣິຏີ ກາຍູຣີຕິ ອິທໍ ສຕ຺ຖຣິ ເວຬຸວເນ ວິຫຣນ຺ເຕ ກູຏວິນິຈ຺ຉຍິກເປຕໍ ອາຣພ຺ຠ ວຸຕ຺ຕໍ. ຕທາ ພິມ຺ພິສາໂຣ ຣາຊາ ມາສສ຺ສ ຉສຸ ທິວເສສຸ ອຸໂປສຖໍ ອຸປວສຕິ, ຕໍ ອນຸວຕ຺ຕນ຺ຕາ ພຫູ ມນຸສ຺ສາ ອຸໂປສຖໍ ອຸປວສນ຺ຕິ. ຣາຊາ ອຕ຺ຕໂນ ສນ຺ຕິກໍ ອາຄຕາຄເຕ ມນຸສ຺ເສ ປຸຈ຺ຉຕິ – ‘‘ກິໍ ຕຸມ຺ເຫຫິ ອຸໂປສໂຖ ອຸປວຸຕ຺ໂຖ, ອຸທາຫຸ ນ ອຸປວຸຕ຺ໂຖ’’ຕິ? ຕຕ຺ເຣໂກ ອຘິກຣເຓ ນິຍຸຕ຺ຕກປຸຣິໂສ ປິສຸຓວາໂຈ ເນກຕິໂກ ລຎ຺ຊຄາຫໂກ ‘‘ນ ອຸປວຸຕ຺ໂຖມ຺ຫີ’’ຕິ ວຕ຺ຕຸໍ ອສຫນ຺ໂຕ ‘‘ອຸປວຸຕ຺ໂຖມ຺ຫິ, ເທວາ’’ຕິ ອາຫ. ອຖ ນໍ ຣາຊສມີປໂຕ ນິກ຺ຂນ຺ຕໍ ສຫາໂຍ ອາຫ – ‘‘ກິໍ, ສມ຺ມ, ອຊ຺ຊ ຕຍາ ອຸປວຸຕ຺ໂຖ’’ຕິ? ‘‘ຠເຍນາຫໍ, ສມ຺ມ, ຣຎ຺ໂຎ ສມ຺ມຸຂາ ເອວໍ ອໂວຈໍ, ນາຫໍ ອຸໂປສຖິໂກ’’ຕິ.

ອຖ ນໍ ສຫາໂຍ ອາຫ – ‘‘ຍທິ ເອວໍ ອຸປຑ຺ຒຸໂປສໂຖປິ ຕາວ ເຕ ອຊ຺ຊ ໂຫຕຸ, ອຸໂປສຖງ຺ຄານິ ສມາທິຍາຫີ’’ຕິ. ໂສ ຕສ຺ສ ວຈນໍ ‘‘ສາຘູ’’ຕິ ສມ຺ປຏິຈ຺ຉິຕ຺ວາ ເຄຫໍ ຄນ຺ຕ຺ວາ ອຠຸຕ຺ວາວ ມຸຂໍ ວິກ຺ຂາເລຕ຺ວາ ອຸໂປສຖໍ ອຘິຏ຺ຐາຍ ຣຕ຺ຕິຍໍ ວາສູປຄໂຕ ຣິຕ຺ຕາສຍສມ຺ຠູເຕນ ພລວວາຕເຫຕຸເກນ ສູເລນ ອຸປຈ຺ຉິນ຺ນາຍຸສງ຺ຂາໂຣ ຈຸຕິອນນ຺ຕຣໍ ປພ຺ພຕກຸຈ຺ຉິຍໍ ເວມານິກເປໂຕ ຫຸຕ຺ວາ ນິພ຺ພຕ຺ຕິ. ໂສ ຫິ ເອກຣຕ຺ຕິໍ ອຸໂປສຖຣກ຺ຂຓມຕ຺ເຕນ ວິມານໍ ປຏິລຠິ ທສກຎ຺ຎາສຫສ຺ສປຣິວາຣໍ ມຫຕິຎ຺ຈ ທິພ຺ພສມ຺ປຕ຺ຕິໍ. ກູຏວິນິຈ຺ຉຍິກຕາຍ ປນ ເປສຸຓິກຕາຍ ຈ ອຕ຺ຕໂນ ປິຏ຺ຐິມໍສານິ ສຍເມວ ໂອກ຺ກນ຺ຕິຕ຺ວາ ຂາທຕິ. ຕໍ ອາຍສ຺ມາ ນາຣໂທ ຄິຊ຺ຊກູຏໂຕ ໂອຕຣນ຺ໂຕ ທິສ຺ວາ –

໔໙໙. ‘‘ມາລີ ກິຣິຏີ ກາຍູຣີ, ຄຕ຺ຕາ ເຕ ຈນ຺ທນຸສ຺ສທາ;

ປສນ຺ນມຸຂວຓ຺ໂຓສິ, ສູຣິຍວຓ຺ໂຓວ ໂສຠສິ.

໕໐໐. ‘‘ອມານຸສາ ປາຣິສຊ຺ຊາ, ເຍ ເຕເມ ປຣິຈາຣກາ;

ທສ ກຎ຺ຎາສຫສ຺ສານິ, ຍາ ເຕມາ ປຣິຈາຣິກາ;

ຕາ ກມ຺ພຸກາຍູຣຘຣາ, ກຎ຺ຈນາເວຬຠູສິຕາ.

໕໐໑. ‘‘ມຫານຸຠາໂວສິ ຕຸວໍ, ໂລມຫໍສນຣູປວາ;

ປິຏ຺ຐິມໍສານິ ອຕ຺ຕໂນ, ສາມໍ ອຸກ຺ກຈ຺ຈ ຂາທສິ.

໕໐໒. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ປິຏ຺ຐິມໍສານິ ອຕ຺ຕໂນ;

ສາມໍ ອຸກ຺ກຈ຺ຈ ຂາທສີຕິ.

໕໐໓. ‘‘ອຕ຺ຕໂນຫໍ ອນຕ຺ຖາຍ, ຊີວໂລເກ ອຈາຣິສໍ;

ເປສຸຎ຺ຎມຸສາວາເທນ, ນິກຕິວຎ຺ຈນາຍ ຈ.

໕໐໔. ‘‘ຕຕ຺ຖາຫໍ ປຣິສໍ ຄນ຺ຕ຺ວາ, ສຈ຺ຈກາເລ ອຸປຏ຺ຐິເຕ;

ອຕ຺ຖໍ ຘມ຺ມໍ ນິຣາກຕ຺ວາ, ອຘມ຺ມມນຸວຕ຺ຕິສໍ.

໕໐໕. ‘‘ເອວໍ ໂສ ຂາທຕຕ຺ຕານໍ, ໂຍ ໂຫຕິ ປິຏ຺ຐິມໍສິໂກ;

ຍຖາຫໍ ອຊ຺ຊ ຂາທາມິ, ປິຏ຺ຐິມໍສານິ ອຕ຺ຕໂນ.

໕໐໖. ‘‘ຕຍິທໍ ຕຍາ ນາຣທ ສາມໍ ທິຏ຺ຐໍ, ອນຸກມ຺ປກາ ເຍ ກຸສລາ ວເທຍ຺ຍຸໍ;

ມາ ເປສຸຓໍ ມາ ຈ ມຸສາ ອຠາຓິ, ມາ ໂຂສິ ປິຏ຺ຐິມໍສິໂກ ຕຸວ’’ນ຺ຕິ. –

ເຖໂຣ ຈຕູຫິ ຄາຖາຫິ ປຸຈ຺ຉິ, ໂສປິ ຕສ຺ສ ຈຕູຫິ ຄາຖາຫິ ເອຕມຕ຺ຖໍ ວິສ຺ສຊ຺ເຊສິ.

໔໙໙. ຕຕ຺ຖ ມາລີຕິ ມາລຘາຣີ, ທິພ຺ພປຸປ຺ເຜຫິ ປຏິມຓ຺ຑິໂຕຕິ ອຘິປ຺ປາໂຍ. ກິຣິຏີຕິ ເວຐິຕສີໂສ. ກາຍູຣີຕິ ເກຍູຣວາ, ພາຫາລງ຺ກາຣປຏິມຓ຺ຑິໂຕຕິ ອຕ຺ໂຖ. ຄຕ຺ຕາຕິ ສຣີຣາວຍວາ. ຈນ຺ທນຸສ຺ສທາຕິ ຈນ຺ທນສາຣານຸລິຕ຺ຕາ. ສູຣິຍວຓ຺ໂຓວ ໂສຠສີຕິ ພາລສູຣິຍສທິສວຓ຺ໂຓ ເອວ ຫຸຕ຺ວາ ວິໂຣຈສິ. ‘‘ອຣຓວຓ຺ຓີ ປຠາສສີ’’ຕິປິ ປາຬິ, ອຣຓນ຺ຕິ ອຣຓິເຍຫິ ເທເວຫິ ສທິສວຓ຺ໂຓ ອຣິຍາວກາໂສຕິ ອຕ຺ໂຖ.

໕໐໐. ປາຣິສຊ຺ຊາຕິ ປຣິສປຣິຍາປນ຺ນາ, ອຸປຏ຺ຐາກາຕິ ອຕ຺ໂຖ. ຕຸວນ຺ຕິ ຕ຺ວໍ. ໂລມຫໍສນຣູປວາຕິ ປສ຺ສນ຺ຕານໍ ໂລມຫໍສຊນນຣູປຍຸຕ຺ໂຕ. ມຫານຸຠາວຕາສມງ຺ຄິຕາຍ ເຫຕໍ ວຸຕ຺ຕໍ. ອຸກ຺ກຈ຺ຈາຕິ ອຸກ຺ກນ຺ຕິຕ຺ວາ, ຉິນ຺ທິຕ຺ວາຕິ ອຕ຺ໂຖ.

໕໐໓. ອຈາຣິສນ຺ຕິ ອຈຣິໍ ປຏິປຊ຺ຊິໍ. ເປສຸຎ຺ຎມຸສາວາເທນາຕິ ເປສຸຎ຺ເຎນ ເຈວ ມຸສາວາເທນ ຈ. ນິກຕິວຎ຺ຈນາຍ ຈາຕິ ນິກຕິຍາ ວຎ຺ຈນາຍ ຈ ປຕິຣູປທສ຺ສເນນ ປເຣສໍ ວິກາເຣນ ວຎ຺ຈນາຍ ຈ.

໕໐໔. ສຈ຺ຈກາເລຕິ ສຈ຺ຈໍ ວຕ຺ຕຸໍ ຍຸຕ຺ຕກາເລ. ອຕ຺ຖນ຺ຕິ ທິຏ຺ຐຘມ຺ມິກາທິເຠທໍ ຫິຕໍ. ຘມ຺ມນ຺ຕິ ກາຣຓໍ ຎາຍໍ. ນິຣາກຕ຺ວາຕິ ຉຑ຺ເຑຕ຺ວາ ປຫາຍ. ໂສຕິ ໂຍ ເປສຸຎ຺ຎາທິໍ ອາຈຣຕິ, ໂສ ສຕ຺ໂຕ. ເສສໍ ສພ຺ພໍ ເຫຏ຺ຐາ ວຸຕ຺ຕນຍເມວ.

ກູຏວິນິຈ຺ຉຍິກເປຕວຕ຺ຖຸວຓ຺ຓນາ ນິຏ຺ຐິຕາ.