໑໐. ຘາຕຸວິວຓ຺ຓເປຕວຕ຺ຖຸວຓ຺ຓນາ

ອນ຺ຕລິກ຺ຂສ຺ມິໍ ຕິຏ຺ຐນ຺ໂຕຕິ ອິທໍ ຘາຕຸວິວຓ຺ຓເປຕວຕ຺ຖຸ. ຠຄວຕິ ກຸສິນາຣາຍໍ ອຸປວຕ຺ຕເນ ມລ຺ລານໍ ສາລວເນ ຍມກສາລານມນ຺ຕເຣ ປຣິນິພ຺ພຸເຕ ຘາຕຸວິຠາເຄ ຈ ກເຕ ຣາຊາ ອຊາຕສຕ຺ຕຸ ອຕ຺ຕນາ ລທ຺ຘຘາຕຸຠາຄໍ ຄເຫຕ຺ວາ ສຕ຺ຕ ວສ຺ສານິ ສຕ຺ຕ ຈ ມາເສ ສຕ຺ຕ ຈ ທິວເສ ພຸທ຺ຘຄຸເຓ ອນຸສ຺ສຣນ຺ໂຕ ອຸຬາຣປູຊໍ ປວຕ຺ເຕສິ. ຕຕ຺ຖ ອສງ຺ເຂຍ຺ຍາ ອປ຺ປເມຍ຺ຍາ ມນຸສ຺ສາ ຈິຕ຺ຕານິ ປສາເທຕ຺ວາ ສຄ຺ຄູປຄາ ອເຫສຸໍ, ຉຬາສີຕິມຕ຺ຕານິ ປນ ປຸຣິສສຫສ຺ສານິ ຈິຣກາລຠາວິເຕນ ອສ຺ສທ຺ຘິເຍນ ມິຈ຺ຉາທສ຺ສເນນ ຈ ວິປລ຺ລຕ຺ຖຈິຕ຺ຕາ ປສາທນີເຍປິ ຐາເນ ອຕ຺ຕໂນ ຈິຕ຺ຕານິ ປໂທເສຕ຺ວາ ເປເຕສຸ ອຸປ຺ປຊ຺ຊິໍສຸ. ຕສ຺ມິໍເຍວ ຣາຊຄເຫ ອຎ຺ຎຕຣສ຺ສ ວິຠວສມ຺ປນ຺ນສ຺ສ ກຸຏຸມ຺ພິກສ຺ສ ຠຣິຍາ ຘີຕາ ສຸຓິສາ ຈ ປສນ຺ນຈິຕ຺ຕາ ‘‘ຘາຕຸປູຊໍ ກຣິສ຺ສາມາ’’ຕິ ຄນ຺ຘປຸປ຺ຜາທີນິ ຄເຫຕ຺ວາ ຘາຕຸຏ຺ຐານໍ ຄນ຺ຕຸໍ ອາຣທ຺ຘາ. ໂສ ກຸຏຸມ຺ພິໂກ ‘‘ກິໍ ອຏ຺ຐິການໍ ປູຊເນນາ’’ຕິ ຕາ ປຣິຠາເສຕ຺ວາ ຘາຕຸປູຊໍ ວິວຓ຺ເຓສິ. ຕາປິ ຕສ຺ສ ວຈນໍ ອນາທິຍິຕ຺ວາ ຕຕ຺ຖ ຄນ຺ຕ຺ວາ ຘາຕຸປູຊໍ ກຕ຺ວາ ເຄຫໍ ອາຄຕາ ຕາທິເສນ ໂຣເຄນ ອຠິຠູຕາ ນຈິຣສ຺ເສວ ກາລໍ ກຕ຺ວາ ເທວໂລເກ ນິພ຺ພຕ຺ຕິໍສຸ. ໂສ ປນ ໂກເຘນ ອຠິຠູໂຕ ນຈິຣສ຺ເສວ ກາລໍ ກຕ຺ວາ ເຕນ ປາປກມ຺ເມນ ເປເຕສຸ ນິພ຺ພຕ຺ຕິ.

ອເຖກທິວສໍ ອາຍສ຺ມາ ມຫາກສ຺ສໂປ ສຕ຺ເຕສຸ ອນຸກມ຺ປາຍ ຕຖາຣູປໍ ອິທ຺ຘາຠິສງ຺ຂາຣໍ ອຠິສງ຺ຂາສິ, ຍຖາ ມນຸສ຺ສາ ເຕ ເປເຕ ຕາ ຈ ເທວຕາໂຍ ປສ຺ສນ຺ຕິ. ຕຖາ ປນ ກຕ຺ວາ ເຈຕິຍງ຺ຄເຓ ຐິໂຕ ຕໍ ຘາຕຸວິວຓ຺ຓກໍ ເປຕໍ ຕີຫິ ຄາຖາຫິ ປຸຈ຺ຉິ. ຕສ຺ສ ໂສ ເປໂຕ ພ຺ຍາກາສິ –

໕໐໗. ‘‘ອນ຺ຕລິກ຺ຂສ຺ມິໍ ຕິຏ຺ຐນ຺ໂຕ, ທຸຄ຺ຄນ຺ໂຘ ປູຕິ ວາຍສິ;

ມຸຂຎ຺ຈ ເຕ ກິມໂຍ ປູຕິຄນ຺ຘໍ, ຂາທນ຺ຕິ ກິໍ ກມ຺ມມກາສິ ປຸພ຺ເພ.

໕໐໘. ‘‘ຕໂຕ ສຕ຺ຖໍ ຄເຫຕ຺ວານ, ໂອກ຺ກນ຺ຕນ຺ຕິ ປຸນປ຺ປຸນໍ;

ຂາເຣນ ປຣິປ຺ໂຜສິຕ຺ວາ, ໂອກ຺ກນ຺ຕນ຺ຕິ ປຸນປ຺ປຸນໍ.

໕໐໙. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ອິທໍ ທຸກ຺ຂໍ ນິຄຈ຺ຉສີ’’ຕິ.

໕໑໐. ‘‘ອຫໍ ຣາຊຄເຫ ຣມ຺ເມ, ຣມຓີເຍ ຄິຣິພ຺ພເຊ;

ອິສ຺ສໂຣ ຘນຘຎ຺ຎສ຺ສ, ສຸປຫູຕສ຺ສ ມາຣິສ.

໕໑໑. ‘‘ຕສ຺ສາຍໍ ເມ ຠຣິຍາ ຈ, ຘີຕາ ຈ ສຸຓິສາ ຈ ເມ;

ຕາ ມາລໍ ອຸປ຺ປລຎ຺ຈາປິ, ປຈ຺ຈຄ຺ຆຎ຺ຈ ວິເລປນໍ;

ຖູປໍ ຫຣນ຺ຕິໂຍ ວາເຣສິໍ, ຕໍ ປາປໍ ປກຕໍ ມຍາ.

໕໑໒. ‘‘ຉຬາສີຕິສຫສ຺ສານິ, ມຍໍ ປຈ຺ຈຕ຺ຕເວທນາ;

ຖູປປູຊໍ ວິວຓ຺ເຓຕ຺ວາ, ປຈ຺ຈາມ ນິຣເຍ ຠຸສໍ.

໕໑໓. ‘‘ເຍ ຈ ໂຂ ຖູປປູຊາຍ, ວຕ຺ຕນ຺ເຕ ອຣຫໂຕ ມເຫ;

ອາທີນວໍ ປກາເສນ຺ຕິ, ວິເວຈເຍຖ ເນ ຕໂຕ.

໕໑໔. ‘‘ອິມາ ຈ ປສ຺ສ ອຍນ຺ຕິໂຍ, ມາລຘາຣີ ອລງ຺ກຕາ;

ມາລາວິປາກໍນຸໂຠນ຺ຕິໂຍ, ສມິທ຺ຘາ ຈ ຕາ ຍສສ຺ສິນິໂຍ.

໕໑໕. ‘‘ຕຎ຺ຈ ທິສ຺ວານ ອຈ຺ເຉຣໍ, ອພ຺ຠຸຕໍ ໂລມຫໍສນໍ;

ນໂມ ກໂຣນ຺ຕິ ສປ຺ປຎ຺ຎາ, ວນ຺ທນ຺ຕິ ຕໍ ມຫາມຸນິໍ.

໕໑໖. ‘‘ໂສຫໍ ນູນ ອິໂຕ ຄນ຺ຕ຺ວາ, ໂຍນິໍ ລທ຺ຘານ ມານຸສິໍ;

ຖູປປູຊໍ ກຣິສ຺ສາມິ, ອປ຺ປມຕ຺ໂຕ ປຸນປ຺ປຸນ’’ນ຺ຕິ.

໕໐໗-໘. ຕຕ຺ຖ ທຸຄ຺ຄນ຺ໂຘຕິ ອນິຏ຺ຐຄນ຺ໂຘ, ກຸຓປຄນ຺ຘຄນ຺ຘີຕິ ອຕ຺ໂຖ. ເຕນາຫ ‘‘ປູຕິ ວາຍສີ’’ຕິ. ຕໂຕຕິ ທຸຄ຺ຄນ຺ຘວາຍນໂຕ ກິມີຫິ ຂາຍິຕພ຺ພໂຕ ຈ ອຸປຣິ. ສຕ຺ຕໍ ຄເຫຕ຺ວານ, ໂອກ຺ກນ຺ຕນ຺ຕິ ປຸນປ຺ປຸນນ຺ຕິ ກມ຺ມສຎ຺ໂຈທິຕາ ສຕ຺ຕາ ນິສິຕຘາຣໍ ສຕ຺ຖໍ ຄເຫຕ຺ວາ ປຸນປ຺ປຸນໍ ຕໍ ວຓມຸຂໍ ອວກນ຺ຕນ຺ຕິ. ຂາເຣນ ປຣິປ຺ໂຜສິຕ຺ວາ, ໂອກ຺ກນ຺ຕນ຺ຕິ ປຸນປ຺ປຸນນ຺ຕິ ອວກນ຺ຕິຕຏ຺ຐາເນ ຂາໂຣທເກນ ອາສິຎ຺ຈິຕ຺ວາ ປຸນປ຺ປຸນມ຺ປິ ອວກນ຺ຕນ຺ຕິ.

໕໑໐. ອິສ຺ສໂຣ ຘນຘຎ຺ຎສ຺ສ, ສຸປຫູຕສ຺ສາຕິ ອຕິວິຍ ປຫູຕສ຺ສ ຘນສ຺ສ ຘຎ຺ຎສ຺ສ ຈ ອິສ຺ສໂຣ ສາມີ, ອຑ຺ໂຒ ມຫທ຺ຘໂນຕິ ອຕ຺ໂຖ.

໕໑໑. ຕສ຺ສາຍໍ ເມ ຠຣິຍາ ຈ, ຘີຕາ ຈ ສຸຓິສາ ຈາຕິ ຕສ຺ສ ມຍ຺ຫໍ ອຍໍ ປຸຣິມຕ຺ຕຠາເວ ຠຣິຍາ, ອຍໍ ຘີຕາ, ອຍໍ ສຸຓິສາ. ຕາ ເທວຠູຕາ ອາກາເສ ຐິຕາຕິ ທສ຺ເສນ຺ໂຕ ວທຕິ. ປຈ຺ຈຄ຺ຆນ຺ຕິ ອຠິນວໍ. ຖູປໍ ຫຣນ຺ຕິໂຍ ວາເຣສິນ຺ຕິ ຖູປໍ ປູເຊຕຸໍ ອຸປເນນ຺ຕິໂຍ ຘາຕຸໍ ວິວຓ຺ເຓນ຺ໂຕ ປຏິກ຺ຂິປິໍ. ຕໍ ປາປໍ ປກຕໍ ມຍາຕິ ຕໍ ຘາຕຸວິວຓ຺ຓນປາປໍ ກຕໍ ສມາຈຣິຕໍ ມຍາຕິ ວິປ຺ປຏິສາຣປ຺ປຕ຺ໂຕ ວທຕິ.

໕໑໒. ຉຬາສີຕິສຫສ຺ສານີຕິ ຉສຫສ຺ສາຘິກາ ອສີຕິສຫສ຺ສມຕ຺ຕາ. ມຍນ຺ຕິ ເຕ ເປເຕ ອຕ຺ຕນາ ສທ຺ຘິໍ ສງ຺ຄເຫຕ຺ວາ ວທຕິ. ປຈ຺ຈຕ຺ຕເວທນາຕິ ວິສຸໍ ວິສຸໍ ອນຸຠຸຍ຺ຍມານທຸກ຺ຂເວທນາ. ນິຣເຍຕິ ພລທຸກ຺ຂຕາຍ ເປຕ຺ຕິວິສຍໍ ນິຣຍສທິສໍ ກຕ຺ວາ ອາຫ.

໕໑໓. ເຍ ຈ ໂຂ ຖູປປູຊາຍ, ວຕ຺ຕນ຺ເຕ ອຣຫໂຕ ມເຫຕິ ອຣຫໂຕ ສມ຺ມາສມ຺ພຸທ຺ຘສ຺ສ ຖູປໍ ອຸທ຺ທິສ຺ສ ປູຊາມເຫ ປວຕ຺ຕມາເນ ອຫໍ ວິຍ ເຍ ຖູປປູຊາຍ ອາທີນວໍ ໂທສໍ ປກາເສນ຺ຕິ. ເຕ ປຸຄ຺ຄເລ ຕໂຕ ປຸຎ຺ຎໂຕ ວິເວຈເຍຖ ວິເວຈາປເຍຖ, ປຣິພາຫິເຣ ຊນເຍຖາຕິ ອຎ຺ຎາປເທເສນ ອຕ຺ຕໂນ ມຫາຊານິຍຕໍ ວິຠາເວຕິ.

໕໑໔. ອາຍນ຺ຕິໂຍຕິ ອາກາເສນ ອາຄຈ຺ຉນ຺ຕິໂຍ. ມາລາວິປາກນ຺ຕິ ຖູເປ ກຕມາລາປູຊາຍ ວິປາກໍ ຜລໍ. ສມິທ຺ຘາຕິ ທິພ຺ພສມ຺ປຕ຺ຕິຍາ ສມິທ຺ຘາ. ຕາ ຍສສ຺ສິນິໂຍຕິ ຕາ ປຣິວາຣວນ຺ຕິໂຍ.

໕໑໕. ຕຎ຺ຈ ທິສ຺ວານາຕິ ຕສ຺ສ ອຕິປຣິຕ຺ຕສ຺ສ ປູຊາປຸຎ຺ຎສ຺ສ ອຈ຺ຉຣິຍໍ ອພ຺ຠຸຕໍ ໂລມຫໍສນໍ ອຕິອຸຬາຣໍ ວິປາກວິເສສໍ ທິສ຺ວາ. ນໂມ ກໂຣນ຺ຕິ ສປ຺ປຎ຺ຎາ, ວນ຺ທນ຺ຕິ ຕໍ ມຫາມຸນິນ຺ຕິ, ຠນ຺ເຕ ກສ຺ສປ, ອິມາ ອິຕ຺ຖິໂຍ ຕໍ ອຸຕ຺ຕມປຸຎ຺ຎກ຺ເຂຕ຺ຕຠູຕໍ ວນ຺ທນ຺ຕິ ອຠິວາເທນ຺ຕິ, ນໂມ ກໂຣນ຺ຕິ ນມກ຺ກາຣຎ຺ຈ ກໂຣນ຺ຕີຕິ ອຕ຺ໂຖ.

໕໑໖. ອຖ ໂສ ເປໂຕ ສໍວິຄ຺ຄມານໂສ ສໍເວຄານຸຣູປໍ ອາຍຕິໍ ອຕ຺ຕນາ ກາຕພ຺ພໍ ທສ຺ເສນ຺ໂຕ ‘‘ໂສຫໍ ນູນາ’’ຕິ ຄາຖມາຫ. ຕໍ ອຸຕ຺ຕານຕ຺ຖເມວ.

ເອວໍ ເປເຕນ ວຸຕ຺ໂຕ ມຫາກສ຺ສໂປ ຕໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ.

ຘາຕຸວິວຓ຺ຓເປຕວຕ຺ຖຸວຓ຺ຓນາ ນິຏ຺ຐິຕາ.

ອິຕິ ຂຸທ຺ທກ-ອຏ຺ຐກຖາຍ ເປຕວຕ຺ຖຸສ຺ມິໍ

ທສວຕ຺ຖຸປຏິມຓ຺ຑິຕສ຺ສ

ຕຕິຍສ຺ສ ຈູຬວຄ຺ຄສ຺ສ ອຕ຺ຖສໍວຓ຺ຓນາ ນິຏ຺ຐິຕາ.