໘. ທຸຕິຍມິຄລຸທ຺ທກເປຕວຕ຺ຖຸວຓ຺ຓນາ

ກູຏາຄາເຣ ຈ ປາສາເທຕິ ອິທໍ ຠຄວຕິ ເວຬຸວເນ ວິຫຣນ຺ເຕ ອປຣໍ ມິຄລຸທ຺ທກເປຕໍ ອາຣພ຺ຠ ວຸຕ຺ຕໍ. ຣາຊຄເຫ ກິຣ ອຎ຺ຎຕໂຣ ມາຄວິໂກ ມາຓໂວ ວິຠວສມ຺ປນ຺ໂນປິ ສມາໂນ ໂຠຄສຸຂໍ ປຫາຍ ຣຕ຺ຕິນ຺ທິວໍ ມິເຄ ຫນນ຺ໂຕ ວິຈຣຕິ. ຕສ຺ສ ສຫາຍຠູໂຕ ເອໂກ ອຸປາສໂກ ອນຸທ຺ທຍໍ ປຏິຈ຺ຈ – ‘‘ສາຘຸ, ສມ຺ມ, ປາຓາຕິປາຕໂຕ ວິຣມາຫິ, ມາ ເຕ ອໂຫສິ ທີຆຣຕ຺ຕໍ ອຫິຕາຍ ທຸກ຺ຂາຍາ’’ຕິ ໂອວາທໍ ອທາສິ. ໂສ ຕໍ ອນາທິຍິ. ອຖ ໂສ ອຸປາສໂກ ອຎ຺ຎຕຣໍ ອຕ຺ຕໂນ ມໂນຠາວນີຍໍ ຂີຓາສວຕ຺ເຖຣໍ ຍາຈິ – ‘‘ສາຘຸ, ຠນ຺ເຕ, ອສຸກປຸຣິສສ຺ສ ຕຖາ ຘມ຺ມໍ ເທເສຖ, ຍຖາ ໂສ ປາຓາຕິປາຕໂຕ ວິຣເມຍ຺ຍາ’’ຕິ.

ອເຖກທິວສໍ ໂສ ເຖໂຣ ຣາຊຄເຫ ປິຓ຺ຑາຍ ຈຣນ຺ໂຕ ຕສ຺ສ ເຄຫທ຺ວາເຣ ອຏ຺ຐາສິ. ຕໍ ທິສ຺ວາ ໂສ ມາຄວິໂກ ສຎ຺ຊາຕພຫຸມາໂນ ປຈ຺ຈຸຄ຺ຄນ຺ຕ຺ວາ ເຄຫໍ ປເວເສຕ຺ວາ ອາສນໍ ປຎ຺ຎາເປຕ຺ວາ ອທາສິ. ນິສີທິ ເຖໂຣ ປຎ຺ຎຕ຺ເຕ ອາສເນ, ໂສປິ ເຖຣໍ ອຸປສງ຺ກມິຕ຺ວາ ນິສີທິ. ຕສ຺ສ ເຖໂຣ ປາຓາຕິປາເຕ ອາທີນວໍ, ຕໂຕ ວິຣຕິຍາ ອານິສໍສຎ຺ຈ ປກາເສສິ. ໂສ ຕໍ ສຸຕ຺ວາປິ ຕໂຕ ວິຣມິຕຸໍ ນ ອິຈ຺ຉິ. ອຖ ນໍ ເຖໂຣ ອາຫ – ‘‘ສເຈ, ຕ຺ວໍ ອາວຸໂສ, ສພ຺ເພນ ສພ຺ພໍ ວິຣມິຕຸໍ ນ ສກ຺ໂກສິ, ຣຕ຺ຕິມ຺ປິ ຕາວ ວິຣມສ຺ສູ’’ຕິ, ໂສ ‘‘ສາຘຸ, ຠນ຺ເຕ, ວິຣມາມິ ຣຕ຺ຕິ’’ນ຺ຕິ ຕໂຕ ວິຣມິ. ເສສໍ ອນນ຺ຕຣວຕ຺ຖຸສທິສໍ. ຄາຖາສຸ ປນ –

໔໘໘. ‘‘ກູຏາຄາເຣ ຈ ປາສາເທ, ປລ຺ລງ຺ເກ ໂຄນກຕ຺ຖເຕ;

ປຎ຺ຈງ຺ຄິເກນ ຕຸຣິເຍນ, ຣມສິ ສຸປ຺ປວາທິເຕ.

໔໘໙. ‘‘ຕໂຕ ຣຕ຺ຍາ ວິວສາເນ, ສູຣິຍຸຄ຺ຄມນໍ ປຕິ;

ອປວິທ຺ໂຘ ສຸສານສ຺ມິໍ, ພຫຸທຸກ຺ຂໍ ນິຄຈ຺ຉສິ.

໔໙໐. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ອິທໍ ທຸກ຺ຂໍ ນິຄຈ຺ຉສີ’’ຕິ. –

ຕີຫິ ຄາຖາຫິ ນາຣທຕ຺ເຖໂຣ ນໍ ປຏິປຸຈ຺ຉິ. ອຖສ຺ສ ເປໂຕ –

໔໙໑. ‘‘ອຫໍ ຣາຊຄເຫ ຣມ຺ເມ, ຣມຓີເຍ ຄິຣິພ຺ພເຊ;

ມິຄລຸທ຺ໂທ ປຸເຣ ອາສິໍ, ລຸທ຺ໂທ ຈາສິມສຎ຺ຎໂຕ.

໔໙໒. ‘‘ຕສ຺ສ ເມ ສຫາໂຍ ສຸຫທໂຍ, ສທ຺ໂຘ ອາສິ ອຸປາສໂກ;

ຕສ຺ສ ກຸລູປໂກ ຠິກ຺ຂຸ, ອາສິ ໂຄຕມສາວໂກ;

ໂສປິ ມໍ ອນຸກມ຺ປນ຺ໂຕ, ນິວາເຣສິ ປຸນປ຺ປຸນໍ.

໔໙໓. ‘‘‘ມາກາສິ ປາປກໍ ກມ຺ມໍ, ມາ ຕາຕ ທຸຄ຺ຄຕິໍ ອຄາ;

ສເຈ ອິຈ຺ຉສິ ເປຈ຺ຈ ສຸຂໍ, ວິຣມ ປາຓວຘາ ອສໍຍມາ’.

໔໙໔. ‘‘ຕສ຺ສາຫໍ ວຈນໍ ສຸຕ຺ວາ, ສຸຂກາມສ຺ສ ຫິຕານຸກມ຺ປິໂນ;

ນາກາສິໍ ສກລານຸສາສນິໍ, ຈິຣປາປາຠິຣໂຕ ອພຸທ຺ຘິມາ.

໔໙໕. ‘‘ໂສ ມໍ ປຸນ ຠູຣິສຸເມຘໂສ, ອນຸກມ຺ປາຍ ສໍຍເມ ນິເວສຍິ;

‘ສເຈ ທິວາ ຫນສິ ປາຓິໂນ, ອຖ ເຕ ຣຕ຺ຕິໍ ຠວຕຸ ສໍຍໂມ’.

໔໙໖. ‘‘ສ຺ວາຫໍ ທິວາ ຫນິຕ຺ວາ ປາຓິໂນ, ວິຣໂຕ ຣຕ຺ຕິມໂຫສິ ສຎ຺ຎໂຕ;

ຣຕ຺ຕາຫໍ ປຣິຈາເຣມິ, ທິວາ ຂຊ຺ຊາມິ ທຸຄ຺ຄໂຕ.

໔໙໗. ‘‘ຕສ຺ສ ກມ຺ມສ຺ສ ກຸສລສ຺ສ, ອນຸໂຠມິ ຣຕ຺ຕິໍ ອມານຸສິໍ;

ທິວາ ປຏິຫຕາວ ກຸກ຺ກຸຣາ, ອຸປຘາວນ຺ຕິ ສມນ຺ຕາ ຂາທິຕຸໍ.

໔໙໘. ‘‘ເຍ ຈ ເຕ ສຕຕານຸໂຍຄິໂນ, ຘຸວໍ ປຍຸຕ຺ຕາ ສຸຄຕສ຺ສ ສາສເນ;

ມຎ຺ຎາມິ ເຕ ອມຕເມວ ເກວລໍ, ອຘິຄຈ຺ຉນ຺ຕິ ປທໍ ອສງ຺ຂຕ’’ນ຺ຕິ. –

ຕມຕ຺ຖໍ ອາຈິກ຺ຂິ. ຕາສໍ ອຕ຺ໂຖ ເຫຏ຺ຐາ ວຸຕ຺ຕນໂຍວ.

ທຸຕິຍມິຄລຸທ຺ທກເປຕວຕ຺ຖຸວຓ຺ຓນາ ນິຏ຺ຐິຕາ.