໗. ມິຄລຸທ຺ທກເປຕວຕ຺ຖຸວຓ຺ຓນາ

ນຣນາຣິປຸຣກ຺ຂໂຕ ຍຸວາຕິ ອິທໍ ຠຄວຕິ ເວຬຸວເນ ວິຫຣນ຺ເຕ ມິຄລຸທ຺ທກເປຕໍ ອາຣພ຺ຠ ວຸຕ຺ຕໍ. ຣາຊຄເຫ ກິຣ ອຎ຺ຎຕໂຣ ລຸທ຺ທໂກ ຣຕ຺ຕິນ຺ທິວໍ ມິເຄ ວຘິຕ຺ວາ ຊີວິກໍ ກປ຺ເປສິ. ຕສ຺ເສໂກ ອຸປາສໂກ ມິຕ຺ໂຕ ອໂຫສິ, ໂສ ຕໍ ສພ຺ພກາລໍ ປາປໂຕ ນິວຕ຺ເຕຕຸໍ ອສກ຺ໂກນ຺ໂຕ ‘‘ເອຫິ, ສມ຺ມ, ຣຕ຺ຕິຍໍ ປາຓາຕິປາຕາ ວິຣມາຫີ’’ຕິ ຣຕ຺ຕິຍໍ ປຸຎ຺ເຎ ສມາທເປສິ. ໂສ ຣຕ຺ຕິຍໍ ວິຣມິຕ຺ວາ ທິວາ ເອວ ປາຓາຕິປາຕໍ ກໂຣຕິ.

ໂສ ອປເຣນ ສມເຍນ ກາລໍ ກຕ຺ວາ ຣາຊຄຫສມີເປ ເວມານິກເປໂຕ ຫຸຕ຺ວາ ນິພ຺ພຕ຺ໂຕ, ທິວສຠາຄໍ ມຫາທຸກ຺ຂໍ ອນຸຠວິຕ຺ວາ ຣຕ຺ຕິຍໍ ປຎ຺ຈຫິ ກາມຄຸເຓຫິ ສມປ຺ປິຕາ ສມງ຺ຄີຠູໂຕ ປຣິຈາເຣສິ. ຕໍ ທິສ຺ວາ ອາຍສ຺ມາ ນາຣໂທ –

໔໗໘. ‘‘ນຣນາຣິປຸຣກ຺ຂໂຕ ຍຸວາ, ຣຊນີເຍຫິ ກາມຄຸເຓຫິ ໂສຠສິ;

ທິວສໍ ອນຸໂຠສິ ກາຣຓໍ, ກິມກາສິ ປຸຣິມາຍ ຊາຕິຍາ’’ຕິ. –

ອິມາຍ ຄາຖາຍ ປຏິປຸຈ຺ຉິ. ຕຕ຺ຖ ນຣນາຣິປຸຣກ຺ຂໂຕຕິ ປຣິຈາຣກຠູເຕຫິ ເທວປຸຕ຺ເຕຫິ ເທວຘີຕາຫິ ຈ ປຸຣກ຺ຂໂຕ ປຍິຣຸປາສິໂຕ. ຍຸວາຕິ ຕຣຸໂຓ. ຣຊນີເຍຫີຕິ ກມນີເຍຫິ ຣາຄຸປ຺ປຕ຺ຕິເຫຕຸຠູເຕຫິ. ກາມຄຸເຓຫີຕິ ກາມໂກຏ຺ຐາເສຫິ. ໂສຠສີຕິ ສມງ຺ຄິຠາເວນ ວິໂຣຈສິ ຣຕ຺ຕິຍນ຺ຕິ ອຘິປ຺ປາໂຍ. ເຕນາຫ ‘‘ທິວສໍ ອນຸໂຠສິ ກາຣຓ’’ນ຺ຕິ, ທິວສຠາເຄ ປນ ນານປ຺ປກາຣໍ ກາຣຓໍ ຆາຕນໍ ປຈ຺ຈນຸຠວສິ. ຣຊນີຕິ ວາ ຣຕ຺ຕີສຸ. ເຍຫີຕິ ນິປາຕມຕ຺ຕໍ. ກິມກາສິ ປຸຣິມາຍ ຊາຕິຍາຕິ ເອວໍ ສຸຂທຸກ຺ຂສໍວຕ຺ຕນິຍໍ ກິໍ ນາມ ກມ຺ມໍ ອິໂຕ ປຸຣິມາຍ ຊາຕິຍາ ຕ຺ວໍ ອກຕ຺ຖ, ຕໍ ກເຖຫີຕິ ອຕ຺ໂຖ.

ຕໍ ສຸຕ຺ວາ ເປໂຕ ເຖຣສ຺ສ ອຕ຺ຕນາ ກຕກມ຺ມໍ ອາຈິກ຺ຂນ຺ໂຕ –

໔໗໙. ‘‘ອຫໍ ຣາຊຄເຫ ຣມ຺ເມ, ຣມຓີເຍ ຄິຣິພ຺ພເຊ;

ມິຄລຸທ຺ໂທ ປຸເຣ ອາສິໍ, ໂລຫິຕປາຓິ ທາຣຸໂຓ.

໔໘໐. ‘‘ອວິໂຣຘກເຣສຸ ປາຓິສຸ, ປຸຖຸສຕ຺ເຕສຸ ປທຸຏ຺ຐມານໂສ;

ວິຈຣິໍ ອຕິທາຣຸໂຓ ສທາ, ປຣຫິໍສາຍ ຣໂຕ ອສຎ຺ຎໂຕ.

໔໘໑. ‘‘ຕສ຺ສ ເມ ສຫາໂຍ ສຸຫທໂຍ, ສທ຺ໂຘ ອາສິ ອຸປາສໂກ;

ໂສປິ ມໍ ອນຸກມ຺ປນ຺ໂຕ, ນິວາເຣສິ ປຸນປ຺ປຸນໍ.

໔໘໒. ‘‘‘ມາກາສິ ປາປກໍ ກມ຺ມໍ, ມາ ຕາຕ ທຸຄ຺ຄຕິໍ ອຄາ;

ສເຈ ອິຈ຺ຉສິ ເປຈ຺ຈ ສຸຂໍ, ວິຣມ ປາຓວຘາ ອສໍຍມາ.

໔໘໓. ‘‘ຕສ຺ສາຫໍ ວຈນໍ ສຸຕ຺ວາ, ສຸຂກາມສ຺ສ ຫິຕານຸກມ຺ປິໂນ;

ນາກາສິໍ ສກລານຸສາສນິໍ, ຈິຣປາປາຠິຣໂຕ ອພຸທ຺ຘິມາ.

໔໘໔. ‘‘ໂສ ມໍ ປຸນ ຠູຣິສຸເມຘໂສ, ອນຸກມ຺ປາຍ ສໍຍເມ ນິເວສຍິ;

ສເຈ ທິວາ ຫນສິ ປາຓິໂນ, ອຖ ເຕ ຣຕ຺ຕິໍ ຠວຕຸ ສໍຍໂມ.

໔໘໕. ‘‘ສ຺ວາຫໍ ທິວາ ຫນິຕ຺ວາ ປາຓິໂນ, ວິຣໂຕ ຣຕ຺ຕິມໂຫສິ ສຎ຺ຎໂຕ;

ຣຕ຺ຕາຫໍ ປຣິຈາເຣມິ, ທິວາ ຂຊ຺ຊາມິ ທຸຄ຺ຄໂຕ.

໔໘໖. ‘‘ຕສ຺ສ ກມ຺ມສ຺ສ ກຸສລສ຺ສ, ອນຸໂຠມິ ຣຕ຺ຕິໍ ອມານຸສິໍ;

ທິວາ ປຏິຫຕາວ ກຸກ຺ກຸຣາ, ອຸປຘາວນ຺ຕິ ສມນ຺ຕາ ຂາທິຕຸໍ.

໔໘໗. ‘‘ເຍ ຈ ເຕ ສຕຕານຸໂຍຄິໂນ, ຘຸວໍ ປຍຸຕ຺ຕາ ສຸຄຕສ຺ສ ສາສເນ;

ມຎ຺ຎາມິ ເຕ ອມຕເມວ ເກວລໍ, ອຘິຄຈ຺ຉນ຺ຕິ ປທໍ ອສງ຺ຂຕ’’ນ຺ຕິ. –

ອິມາ ຄາຖາ ອຠາສິ.

໔໗໙-໘໐. ຕຕ຺ຖ ລຸທ຺ໂທຕິ ທາຣຸໂຓ. ໂລຫິຕປາຓີຕິ ອຠິຓ຺ຫໍ ປາຓຆາເຕນ ໂລຫິຕມກ຺ຂິຕປາຓີ. ທາຣຸໂຓຕິ ຂໂຣ, ສຕ຺ຕານໍ ຫິໍສນໂກຕິ ອຕ຺ໂຖ. ອວິໂຣຘກເຣສູຕິ ເກນຈິ ວິໂຣຘໍ ອກໂຣນ຺ເຕສຸ ມິຄສກຸຓາທີສຸ.

໔໘໒-໘໓. ອສໍຍມາຕິ ອສໍວຣາ ທຸສ຺ສີລ຺ຍາ. ສກລານຸສາສນິນ຺ຕິ ສພ຺ພໍ ອນຸສາສນິໍ, ສພ຺ພກາລໍ ປາຓາຕິປາຕໂຕ ປຏິວິຣຕິນ຺ຕິ ອຕ຺ໂຖ. ຈິຣປາປາຠິຣໂຕຕິ ຈິຣກາລໍ ປາເປ ອຠິຣໂຕ.

໔໘໔. ສໍຍເມຕິ ສຸຈຣິເຕ. ນິເວສຍີຫິ ນິເວເສສິ. ສເຈ ທິວາ ຫນສິ ປາຓິໂນ, ອຖ ເຕ ຣຕ຺ຕິໍ ຠວຕຸ ສໍຍໂມຕິ ນິເວສິຕາກາຣທສ຺ສນໍ. ໂສ ກິຣ ສລ຺ລປາສສຊ຺ຊນາທິນາ ຣຕ຺ຕິຍມ຺ປິ ປາຓວຘໍ ອນຸຍຸຕ຺ໂຕ ອໂຫສິ.

໔໘໕. ທິວາ ຂຊ຺ຊາມິ ທຸຄ຺ຄໂຕຕິ ອິທານິ ທຸຄ຺ຄຕິໍ ຄໂຕ ມຫາທຸກ຺ຂປ຺ປຕ຺ໂຕ ທິວສຠາເຄ ຂາທິຍາມິ. ຕສ຺ສ ກິຣ ທິວາ ສຸນເຂຫິ ມິຄານໍ ຂາທາປິຕຕ຺ຕາ ກມ຺ມສຣິກ຺ຂກໍ ຜລໍ ໂຫຕິ, ທິວສຠາເຄ ມຫນ຺ຕາ ສຸນຂາ ອຸປຘາວິຕ຺ວາ ອຏ຺ຐິສງ຺ຆາຕມຕ຺ຕາວເສສໍ ສຣີຣໍ ກໂຣນ຺ຕິ. ຣຕ຺ຕິຍາ ປນ ອຸປຄຕາຍ ຕໍ ປາກຕິກເມວ ໂຫຕິ, ທິພ຺ພສມ຺ປຕ຺ຕິໍ ອນຸຠວຕິ. ເຕນ ວຸຕ຺ຕໍ –

໔໘໖. ‘‘ຕສ຺ສ ກມ຺ມສ຺ສ ກຸສລສ຺ສ, ອນຸໂຠມິ ຣຕ຺ຕິໍ ອມານຸສິໍ;

ທິວາ ປຏິຫຕາວ ກຸກ຺ກຸຣາ, ອຸປຘາວນ຺ຕິ ສມນ຺ຕາ ຂາທິຕຸ’’ນ຺ຕິ.

ຕຕ຺ຖ ປຏິຫຕາຕິ ປຏິຫຕຈິຕ຺ຕາ ພທ຺ຘາຆາຕາ ວິຍ ຫຸຕ຺ວາ. ສມນ຺ຕາ ຂາທິຕຸນ຺ຕິ ມມ ສຣີຣໍ ສມນ຺ຕໂຕ ຂາທິຕຸໍ ອຸປຘາວນ຺ຕິ. ອິທຎ຺ຈ ເນສໍ ອຕິວິຍ ອຕ຺ຕໂນ ຠຍາວຫໍ ອຸປຄມນກາລໍ ຄເຫຕ຺ວາ ວຸຕ຺ຕໍ. ເຕ ປນ ອຸປຘາວິຕ຺ວາ ອຏ຺ຐິມຕ຺ຕາວເສສໍ ສຣີຣໍ ກຕ຺ວາ ຄຈ຺ຉນ຺ຕິ.

໔໘໗. ເຍ ຈ ເຕ ສຕຕານຸໂຍຄິໂນຕິ ໂອສານຄາຖາຍ ອຍໍ ສງ຺ເຂປຕ຺ໂຖ – ອຫມ຺ປິ ນາມ ຣຕ຺ຕິຍໍ ປາຓວຘມຕ຺ຕໂຕ ວິຣໂຕ ເອວຣູປໍ ສມ຺ປຕ຺ຕິໍ ອນຸຠວາມິ. ເຍ ປນ ເຕ ປຸຣິສາ ສຸຄຕສ຺ສ ພຸທ຺ຘສ຺ສ ຠຄວໂຕ ສາສເນ ອຘິສີລາທິເກ ຘຸວໍ ປຍຸຕ຺ຕາ ທຬ຺ຫໍ ປຍຸຕ຺ຕາ ສຕຕໍ ສພ຺ພກາລໍ ອນຸໂຍຄວນ຺ຕາ, ເຕ ປຸຎ຺ຎວນ຺ໂຕ ເກວລໍ ໂລກິຍສຸເຂນ ອສມ຺ມິສ຺ສໍ ‘‘ອສງ຺ຂຕໍ ປທ’’ນ຺ຕິ ລທ຺ຘນາມໍ ອມຕເມວ ອຘິຄຈ຺ຉນ຺ຕິ ມຎ຺ເຎ, ນຕ຺ຖິ ເຕສໍ ຕທຘິຄເມ ໂກຈິ ວິພນ຺ໂຘຕິ.

ເອວໍ ເຕນ ເປເຕນ ວຸຕ຺ເຕ ເຖໂຣ ຕໍ ປວຕ຺ຕິໍ ສຕ຺ຖຸ ອາໂຣເຈສິ. ສຕ຺ຖາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສພ຺ພມ຺ປິ ວຸຕ຺ຕນຍເມວ.

ມິຄລຸທ຺ທກເປຕວຕ຺ຖຸວຓ຺ຓນາ ນິຏ຺ຐິຕາ.