໖. ເສຣິຓີເປຕິວຕ຺ຖຸວຓ຺ຓນາ

ນຄ຺ຄາ ທຸພ຺ພຓ຺ຓຣູປາສີຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ເສຣິຓີເປຕິໍ ອາຣພ຺ຠ ວຸຕ຺ຕໍ. ກຸຣຸຣຏ຺ເຐ ກິຣ ຫຕ຺ຖິນິປຸເຣ ເສຣິຓີ ນາມ ເອກາ ຣູປູປຊີວິນີ ອໂຫສິ. ຕຕ຺ຖ ຈ ອຸໂປສຖກຣຓຕ຺ຖາຍ ຕໂຕ ຕໂຕ ຠິກ຺ຂູ ສນ຺ນິປຕິໍສຸ. ປຸນ ມຫາຠິກ຺ຂຸສນ຺ນິປາໂຕ ອໂຫສິ. ຕໍ ທິສ຺ວາ ມນຸສ຺ສາ ຕິລຕຓ຺ຑຸລາທິໍ ສປ຺ປິນວນີຕມຘຸອາທິຎ຺ຈ ພຫຸໍ ທານູປກຣຓໍ ສຊ຺ເຊຕ຺ວາ ມຫາທານໍ ປວຕ຺ເຕສຸໍ. ເຕນ ຈ ສມເຍນ ສາ ຄຓິກາ ອສ຺ສທ຺ຘາ ອປ຺ປສນ຺ນາ ມຈ຺ເຉຣມລປຣິຍຸຏ຺ຐິຕຈິຕ຺ຕາ ເຕຫິ ມນຸສ຺ເສຫິ ‘‘ເອຫິ ຕາວ ອິທໍ ທານໍ ອນຸໂມທາຫີ’’ຕິ ອຸສ຺ສາຫິຕາປິ ‘‘ກິໍ ເຕນ ມຸຓ຺ຑການໍ ສມຓານໍ ທິນ຺ເນນາ’’ຕິ ອປ຺ປສາທເມວ ເນສໍ ສມ຺ປເວເທສິ, ກຸໂຕ ອປ຺ປມຕ຺ຕກສ຺ສ ປຣິຈ຺ຈາໂຄ.

ສາ ອປເຣນ ສມເຍນ ກາລໍ ກຕ຺ວາ ອຎ຺ຎຕຣສ຺ສ ປຈ຺ຈນ຺ຕນຄຣສ຺ສ ປຣິຂາປິຏ຺ເຐ ເປຕີ ຫຸຕ຺ວາ ນິພ຺ພຕ຺ຕິ. ອຖ ຫຕ຺ຖິນິປຸຣວາສີ ອຎ຺ຎຕໂຣ ອຸປາສໂກ ວຓິຊ຺ຊາຍ ຕໍ ນຄຣໍ ຄນ຺ຕ຺ວາ ຣຕ຺ຕິຍາ ປຈ຺ຈູສສມເຍ ປຣິຂາປິຏ຺ຐໍ ຄໂຕ ຕາທິເສນ ປໂຍຊເນນ. ສາ ຕຕ຺ຖ ຕໍ ທິສ຺ວາ ສຎ຺ຊານິຕ຺ວາ ນຄ຺ຄາ ອຏ຺ຐິຕ຺ຕຈມຕ຺ຕາວເສສສຣີຣາ ອຕິວິຍ ພີຠຈ຺ຉທສ຺ສນາ ອວິທູເຣ ຐຕ຺ວາ ອຕ຺ຕານໍ ທສ຺ເສສິ. ໂສ ຕໍ ທິສ຺ວາ –

໔໖໔. ‘‘ນຄ຺ຄາ ທຸພ຺ພຓ຺ຓຣູປາສິ, ກິສາ ຘມນິສນ຺ຖຕາ;

ອຸປ຺ຜາສຸລິເກ ກິສິເກ, ກາ ນຸ ຕ຺ວໍ ອິຘ ຕິຏ຺ຐສີ’’ຕິ. –

ຄາຖາຍ ປຸຈ຺ຉິ. ສາປິສ຺ສ –

໔໖໕. ‘‘ອຫໍ ຠທນ຺ເຕ ເປຕີມ຺ຫິ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’’ຕິ. –

ຄາຖາຍ ອຕ຺ຕານໍ ປກາເສສິ. ປຸນ ເຕນ –

໔໖໖. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ເປຕໂລກໍ ອິໂຕ ຄຕາ’’ຕິ. –

ຄາຖາຍ ກຕກມ຺ມໍ ປຸຈ຺ຉິຕາ –

໔໖໗. ‘‘ອນາວເຏສຸ ຕິຕ຺ເຖສຸ, ວິຈິນິໍ ອຑ຺ຒມາສກໍ;

ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກາສິມຕ຺ຕໂນ.

໔໖໘. ‘‘ນທິໍ ອຸເປມິ ຕສິຕາ, ຣິຕ຺ຕກາ ປຣິວຕ຺ຕຕິ;

ຉາຍໍ ອຸເປມິ ອຸຓ຺ເຫສຸ, ອາຕໂປ ປຣິວຕ຺ຕຕິ.

໔໖໙. ‘‘ອຄ຺ຄິວຓ຺ໂຓ ຈ ເມ ວາໂຕ, ຑຫນ຺ໂຕ ອຸປວາຍຕິ;

ເອຕຎ຺ຈ ຠນ຺ເຕ ອຣຫາມິ, ອຎ຺ຎຎ຺ຈ ປາປກໍ ຕໂຕ.

໔໗໐. ‘‘ຄນ຺ຕ຺ວານ ຫຕ຺ຖິນິໍ ປຸຣໍ, ວຊ຺ເຊສິ ມຍ຺ຫ ມາຕຣໍ;

‘ຘີຕາ ຈ ເຕ ມຍາ ທິຏ຺ຐາ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’.

໔໗໑. ‘‘ອຕ຺ຖິ ເມ ເອຕ຺ຖ ນິກ຺ຂິຕ຺ຕໍ, ອນກ຺ຂາຕຎ຺ຈ ຕໍ ມຍາ;

ຈຕ຺ຕາຣິ ສຕສຫສ຺ສານິ, ປລ຺ລງ຺ກສ຺ສ ຈ ເຫຏ຺ຐໂຕ.

໔໗໒. ‘‘ຕໂຕ ເມ ທານໍ ທທຕຸ, ຕສ຺ສາ ຈ ໂຫຕຸ ຊີວິກາ;

ທານໍ ທຕ຺ວາ ຈ ເມ ມາຕາ, ທກ຺ຂິຓໍ ອນຸທິຈ຺ຉຕຸ;

ຕທາຫໍ ສຸຂິຕາ ເຫສ຺ສໍ, ສພ຺ພກາມສມິທ຺ຘິນີ’’ຕິ. –

ອິມາຫິ ຉຫິ ຄາຖາຫິ ອຕ຺ຕນາ ກຕກມ຺ມຎ຺ເຈວ ປຸນ ເຕນ ອຕ຺ຕໂນ ກາຕພ຺ພໍ ອຕ຺ຖຎ຺ຈ ອາຈິກ຺ຂິ.

໔໖໗. ຕຕ຺ຖ ອນາວເຏສຸ ຕິຕ຺ເຖສູຕິ ເກນຈິ ອນິວາຣິເຕສຸ ນທີຕຬາກາທີນໍ ຕິຕ຺ຖປເທເສສຸ, ຍຕ຺ຖ ມນຸສ຺ສາ ນ຺ຫາຍນ຺ຕິ, ອຸທກກິຈ຺ຈໍ ກໂຣນ຺ຕິ, ຕາທິເສສຸ ຐາເນສຸ. ວິຈິນິໍ ອຑ຺ຒມາສກນ຺ຕິ ‘‘ມນຸສ຺ເສຫິ ຐເປຕ຺ວາ ວິສ຺ສຣິຕໍ ອປິນາເມຕ຺ຖ ກິຎ຺ຈິ ລເຠຍ຺ຍ’’ນ຺ຕິ ໂລຠາຠິຠູຕາ ອຑ຺ຒມາສກມຕ຺ຕມ຺ປິ ວິຈິນິໍ ຄເວສິໍ. ອຖ ວາ ອນາວເຏສຸ ຕິຕ຺ເຖສູຕິ ອຸປສງ຺ກມເນນ ເກນຈິ ອນິວາຣິເຕສຸ ສຕ຺ຕານໍ ປໂຍຄາສຍສຸທ຺ຘິຍາ ກາຣຓຠາເວນ ຕິຕ຺ຖຠູເຕສຸ ສມຓພ຺ຣາຫ຺ມເຓສຸ ວິຊ຺ຊມາເນສຸ. ວິຈິນິໍ ອຑ຺ຒມາສກນ຺ຕິ ມຈ຺ເຉຣມລປຣິຍຸຏ຺ຐິຕຈິຕ຺ຕາ ກສ຺ສຈິ ກິຎ຺ຈິ ອເທນ຺ຕີ ອຑ຺ຒມາສກມ຺ປິ ວິເສເສນ ຈິນິໍ, ນ ສຎ຺ຈິນິໍ ປຸຎ຺ຎໍ. ເຕນາຫ ‘‘ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກາສິມຕ຺ຕໂນ’’ຕິ.

໔໖໘. ຕສິຕາຕິ ປິປາສິຕາ. ຣິຕ຺ຕກາຕິ ກາກເປຍ຺ຍາ ສນ຺ທມານາປິ ນທີ ມມ ປາປກມ຺ເມນ ອຸທເກນ ຣິຕ຺ຕາ ຕຸຈ຺ຉາ ວາລິກມຕ຺ຕາ ຫຸຕ຺ວາ ປຣິວຕ຺ຕຕິ. ອຸຓ຺ເຫສູຕິ ອຸຓ຺ຫສມເຍສຸ. ອາຕໂປ ປຣິວຕ຺ຕຕີຕິ ຉາຍາຏ຺ຐານໍ ມຍິ ອຸປຄຕາຍ ອາຕໂປ ສມ຺ປຊ຺ຊຕິ.

໔໖໙-໗໐. ອຄ຺ຄິວຓ຺ໂຓຕິ ສມ຺ຜສ຺ເສນ ອຄ຺ຄິສທິໂສ. ເຕນ ວຸຕ຺ຕໍ ‘‘ຑຫນ຺ໂຕ ອຸປວາຍຕີ’’ຕິ. ເອຕຎ຺ຈ, ຠນ຺ເຕ, ອຣຫາມີຕິ, ຠນ຺ເຕຕິ ຕໍ ອຸປາສກໍ ຄຣຸກາເຣນ ວທຕິ. ຠນ຺ເຕ, ເອຕຎ຺ຈ ຍຖາວຸຕ຺ຕໍ ປິປາສາທິທຸກ຺ຂໍ, ອຎ຺ຎຎ຺ຈ ຕໂຕ ປາປກໍ ທາຣຸຓໍ ທຸກ຺ຂໍ ອນຸຠວິຕຸໍ ອຣຫາມິ ຕຊ຺ຊສ຺ສ ປາປສ຺ສ ກຕຕ຺ຕາຕິ ອຘິປ຺ປາໂຍ. ວຊ຺ເຊສີຕິ ວເທຍ຺ຍາສິ.

໔໗໑-໗໒. ເອຕ຺ຖ ນິກ຺ຂິຕ຺ຕໍ, ອນກ຺ຂາຕນ຺ຕິ ‘‘ເອຕ຺ຕກໍ ເອຕ຺ຖ ນິກ຺ຂິຕ຺ຕ’’ນ຺ຕິ ອນາຈິກ຺ຂິຕໍ. ອິທານິ ຕສ຺ສ ປຣິມາຓໍ ຐປິຕຏ຺ຐານຎ຺ຈ ທສ຺ເສນ຺ຕີ ‘‘ຈຕ຺ຕາຣິ ສຕສຫສ຺ສານິ, ປລ຺ລງ຺ກສ຺ສ ຈ ເຫຏ຺ຐໂຕ’’ຕິ ອາຫ. ຕຕ຺ຖ ປລ຺ລງ຺ກສ຺ສາຕິ ປຸພ຺ເພ ອຕ຺ຕໂນ ສຍນປລ຺ລງ຺ກສ຺ສ. ຕໂຕຕິ ນິຫິຕຘນໂຕ ເອກເທສໍ ຄເຫຕ຺ວາ ມມໍ ອຸທ຺ທິສ຺ສ ທານໍ ເທຕຸ. ຕສ຺ສາຕິ ມຍ຺ຫໍ ມາຕຸຍາ.

ເອວໍ ຕາຍ ເປຕິຍາ ວຸຕ຺ເຕ ໂສ ອຸປາສໂກ ຕສ຺ສາ ວຈນໍ ສມ຺ປຏິຈ຺ຉິຕ຺ວາ ຕຕ຺ຖ ອຕ຺ຕໂນ ກຣຓີຍໍ ຕີເຣຕ຺ວາ ຫຕ຺ຖິນິປຸຣໍ ຄນ຺ຕ຺ວາ ຕສ຺ສາ ມາຕຸຍາ ຕມຕ຺ຖໍ ອາໂຣເຈສິ. ຕມຕ຺ຖໍ ທສ຺ເສຕຸໍ –

໔໗໓. ສາຘູຕິ ໂສ ປຏິສ຺ສຸຕ຺ວາ, ຄນ຺ຕ຺ວານ ຫຕ຺ຖິນິໍ ປຸຣໍ;

ອໂວຈ ຕສ຺ສາ ມາຕຣໍ –

‘‘ຘີຕາ ຈ ເຕ ມຍາ ທິຏ຺ຐາ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ.

໔໗໔. ‘‘ສາ ມໍ ຕຕ຺ຖ ສມາທເປສິ, ວຊ຺ເຊສິ ມຍ຺ຫ ມາຕຣໍ;

‘ຘີຕາ ຈ ເຕ ມຍາ ທິຏ຺ຐາ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ.

໔໗໕. ‘‘‘ອຕ຺ຖິ ຈ ເມ ເອຕ຺ຖ ນິກ຺ຂິຕ຺ຕໍ, ອນກ຺ຂາຕຎ຺ຈ ຕໍ ມຍາ;

ຈຕ຺ຕາຣິ ສຕສຫສ຺ສານິ, ປລ຺ລງ຺ກສ຺ສ ຈ ເຫຏ຺ຐໂຕ.

໔໗໖. ‘‘‘ຕໂຕ ເມ ທານໍ ທທຕຸ, ຕສ຺ສາ ຈ ໂຫຕຸ ຊີວິກາ;

ທານໍ ທຕ຺ວາ ຈ ເມ ມາຕາ, ທກ຺ຂິຓໍ ອນຸທິຈ຺ຉຕຸ;

ຕທາຫໍ ສຸຂິຕາ ເຫສ຺ສໍ, ສພ຺ພກາມສມິທ຺ຘິນີ’.

໔໗໗. ‘‘ຕໂຕ ຫິ ສາ ທານມທາ, ຕສ຺ສາ ທກ຺ຂິຓມາທິສີ;

ເປຕີ ຈ ສຸຂິຕາ ອາສິ, ຕສ຺ສາ ຈາສິ ສຸຊີວິກາ’’ຕິ. –

ສງ຺ຄີຕິກາຣາ ອາຫໍສຸ. ຕາ ສຸວິຎ຺ເຎຍ຺ຍາວ.

ຕໍ ສຸຕ຺ວາ ຕສ຺ສາ ມາຕາ ຠິກ຺ຂຸສງ຺ຆສ຺ສ ທານໍ ທຕ຺ວາ ຕສ຺ສາ ອາທິສິ. ເຕນ ສາ ປຏິລທ຺ຘູປກຣຓສມ຺ປຕ຺ຕິຍໍ ຐິຕາ ມາຕຸ ອຕ຺ຕານໍ ທສ຺ເສຕ຺ວາ ຕໍ ກາຣຓໍ ອາຈິກ຺ຂິ, ມາຕາ ຠິກ຺ຂູນໍ ອາໂຣເຈສິ, ຠິກ຺ຂູ ຕໍ ປວຕ຺ຕິໍ ຠຄວໂຕ ອາໂຣເຈສຸໍ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ເສຣິຓີເປຕິວຕ຺ຖຸວຓ຺ຓນາ ນິຏ຺ຐິຕາ.