໔. ຠຸສເປຕວຕ຺ຖຸວຓ຺ຓນາ

ຠຸສານິ ເອໂກ ສາລິໍ ປຸນາປໂຣຕິ ອິທໍ ສຕ຺ຖຣິ ສາວຕ຺ຖິຍໍ ວິຫຣນ຺ເຕ ຈຕ຺ຕາໂຣ ເປເຕ ອາຣພ຺ຠ ວຸຕ຺ຕໍ. ສາວຕ຺ຖິຍາ ກິຣ ອວິທູເຣ ອຎ຺ຎຕຣສ຺ມິໍ ຄາມເກ ເອໂກ ກູຏວາຓິໂຊ ກູຏມານາທີຫິ ຊີວິກໍ ກປ຺ເປສິ. ໂສ ສາລິປລາເປ ຄເຫຕ຺ວາ ຕມ຺ພມຕ຺ຕິກາຍ ປຣິຠາເວຕ຺ວາ ຄຣຸຕເຣ ກຕ຺ວາ ຣຕ຺ຕສາລິຫິ ສທ຺ຘິໍ ມິສ຺ເສຕ຺ວາ ວິກ຺ກິຓິ. ຕສ຺ສ ປຸຕ຺ໂຕ ‘‘ຆຣໍ ອາຄຕານໍ ມມ ມິຕ຺ຕສຸຫຊ຺ຊານໍ ສມ຺ມານໍ ນ ກໂຣຕີ’’ຕິ ກຸປິໂຕ ຍຸຄຈມ຺ມໍ ຄເຫຕ຺ວາ ມາຕຸສີເສ ປຫາຣມທາສິ. ຕສ຺ສ ສຸຓິສາ ສພ຺ເພສໍ ອຕ຺ຖາຍ ຐປິຕມໍສໍ ໂຈຣິກາຍ ຂາທິຕ຺ວາ ປຸນ ເຕຫິ ອນຸຍຸຎ຺ຊິຍມານາ ‘‘ສເຈ ມຍາ ຕໍ ມໍສໍ ຂາທິຕໍ, ຠເວ ຠເວ ອຕ຺ຕໂນ ປິຏ຺ຐິມໍສໍ ກນ຺ຕິຕ຺ວາ ຂາເທຍ຺ຍ’’ນ຺ຕິ ສປຖມກາສິ. ຠຣິຍາ ປນສ຺ສ ກິຎ຺ຈິເທວ ອຸປກຣຓໍ ຍາຈນ຺ຕານໍ ‘‘ນຕ຺ຖີ’’ຕິ ວຕ຺ວາ ເຕຫິ ນິປ຺ປີຬິຍມານາ ‘‘ສເຈ ສນ຺ຕໍ ນຕ຺ຖີຕິ ວທາມິ, ຊາຕຊາຕຏ຺ຐາເນ ຄູຖຠກ຺ຂາ ຠເວຍ຺ຍ’’ນ຺ຕິ ມຸສາວາເທນ ສປຖມກາສິ.

ເຕ ຈຕ຺ຕາໂຣປິ ຊນາ ອປເຣນ ສມເຍນ ກາລໍ ກຕ຺ວາ ວິຎ຺ຌາຏວິຍໍ ເປຕາ ຫຸຕ຺ວາ ນິພ຺ພຕ຺ຕິໍສຸ. ຕຕ຺ຖ ກູຏວາຓິໂຊ ກມ຺ມຜເລນ ປຊ຺ຊລນ຺ຕໍ ຠຸສໍ ອຸໂຠຫິ ຫຕ຺ເຖຫິ ຄເຫຕ຺ວາ ອຕ຺ຕໂນ ມຕ຺ຖເກ ອາກິຣິຕ຺ວາ ມຫາທຸກ຺ຂໍ ອນຸຠວຕິ, ຕສ຺ສ ປຸຕ຺ໂຕ ອໂຍມເຍຫິ ມຸຄ຺ຄເຣຫິ ສຍເມວ ອຕ຺ຕໂນ ສີສໍ ຠິນ຺ທິຕ຺ວາ ອນປ຺ປກໍ ທຸກ຺ຂໍ ປຈ຺ຈນຸໂຠຕິ. ຕສ຺ສ ສຸຓິສາ ກມ຺ມຜເລນ ສຸນິສິເຕຫິ ອຕິວິຍ ວິປຸລາຍເຕຫິ ນເຂຫິ ອຕ຺ຕໂນ ປິຏ຺ຐິມໍສານິ ກນ຺ຕິຕ຺ວາ ຂາທນ຺ຕີ ອປຣິມິຕໍ ທຸກ຺ຂໍ ອນຸຠວຕິ, ຕສ຺ສ ຠຣິຍາຍ ສຸຄນ຺ຘໍ ສຸວິສຸທ຺ຘໍ ອປຄຕກາຬກໍ ສາລິຠຕ຺ຕໍ ອຸປນີຕມຕ຺ຕເມວ ນານາວິຘກິມິກຸລາກຸລໍ ປຣມທຸຄ຺ຄນ຺ຘເຊຄຸຈ຺ຉໍ ຄູຖໍ ສມ຺ປຊ຺ຊຕິ, ຕໍ ສາ ອຸໂຠຫິ ຫຕ຺ເຖຫິ ປຣິຄ຺ຄເຫຕ຺ວາ ຠຸຎ຺ຊນ຺ຕີ ມຫາທຸກ຺ຂໍ ປຏິສໍເວເທຕິ.

ເອວໍ ເຕສຸ ຈຕູສຸ ຊເນສຸ ເປເຕສຸ ນິພ຺ພຕ຺ຕິຕ຺ວາ ມຫາທຸກ຺ຂໍ ອນຸຠວນ຺ເຕສຸ ອາຍສ຺ມາ ມຫາໂມຄ຺ຄລາໂນ ປພ຺ພຕຈາຣິກໍ ຈຣນ຺ໂຕ ເອກທິວສໍ ຕໍ ຐານໍ ຄໂຕ. ເຕ ເປເຕ ທິສ຺ວາ –

໔໔໗. ‘‘ຠຸສານິ ເອໂກ ສາລິໍ ປຸນາປໂຣ, ອຍຎ຺ຈ ນາຣີ ສກມໍສໂລຫິຕໍ;

ຕຸວຎ຺ຈ ຄູຖໍ ອສຸຈິໍ ອກນ຺ຕໍ, ປຣິຠຸຎ຺ຊສິ ກິສ຺ສ ອຍໍ ວິປາໂກ’’ຕິ. –

ອິມາຍ ຄາຖາຍ ເຕຫິ ກຕກມ຺ມໍ ປຸຈ຺ຉິ. ຕຕ຺ຖ ຠຸສານີຕິ ປລາປານິ. ເອໂກຕິ ເອກໂກ. ສາລິນ຺ຕິ ສາລິໂນ. ສາມິອຕ຺ເຖ ເຫຕໍ ອຸປໂຍຄວຈນໍ, ສາລິໂນ ປລາປານິ ປຊ຺ຊລນ຺ຕານິ ອຕ຺ຕໂນ ສີເສ ອວກິຣຕີຕິ ອຘິປ຺ປາໂຍ. ປຸນາປໂຣຕິ ປຸນ ອປໂຣ. ໂຍ ຫິ ໂສ ມາຕຸສີສໍ ປຫຣິ, ໂສ ອໂຍມຸຄ຺ຄເຣຫິ ອຕ຺ຕໂນ ສີສໍ ປຫຣິຕ຺ວາ ສີສເຠທໍ ປາປຸຓາຕິ, ຕໍ ສນ຺ຘາຍ ວທຕິ. ສກມໍສໂລຫິຕນ຺ຕິ ອຕ຺ຕໂນ ປິຏ຺ຐິມໍສໍ ໂລຫິຕຎ຺ຈ ປຣິຠຸຎ຺ຊຕີຕິ ໂຍຊນາ. ອກນ຺ຕນ຺ຕິ ອມນາປໍ ເຊຄຸຈ຺ຉໍ. ກິສ຺ສ ອຍໍ ວິປາໂກຕິ ກຕມສ຺ສ ປາປກມ຺ມສ຺ສ ອິທໍ ຜລໍ, ຍໍ ອິທານິ ຕຸມ຺ເຫຫິ ປຈ຺ຈນຸຠວີຍຕີຕິ ອຕ຺ໂຖ.

ເອວໍ ເຖເຣນ ເຕຫິ ກຕກມ຺ເມ ປຸຈ຺ຉິເຕ ກູຏວາຓິຊສ຺ສ ຠຣິຍາ ສພ຺ເພຫິ ເຕຫິ ກຕກມ຺ມໍ ອາຈິກ຺ຂນ຺ຕີ –

໔໔໘. ‘‘ອຍໍ ປຸເຣ ມາຕຣໍ ຫິໍສຕິ, ອຍໍ ປນ ກູຏວາຓິໂຊ;

ອຍໍ ມໍສານິ ຂາທິຕ຺ວາ, ມຸສາວາເທນ ວຎ຺ເຈຕິ.

໔໔໙. ‘‘ອຫໍ ມນຸສ຺ເສສຸ ມນຸສ຺ສຠູຕາ, ອຄາຣິນີ ສພ຺ພກຸລສ຺ສ ອິສ຺ສຣາ;

ສນ຺ເຕສຸ ປຣິຄຸຫາມິ, ມາ ຈ ກິຎ຺ຈິ ອິໂຕ ອທໍ.

໔໕໐. ‘‘ມຸສາວາເທນ ຉາເທມິ, ນຕ຺ຖິ ເອຕໍ ມມ ເຄເຫ;

ສເຈ ສນ຺ຕໍ ນິຄຸຫາມິ, ຄູໂຖ ເມ ໂຫຕຸ ໂຠຊນໍ.

໔໕໑. ‘‘ຕສ຺ສ ກມ຺ມສ຺ສ ວິປາເກນ, ມຸສາວາທສ຺ສ ຈູຠຍໍ;

ສຸຄນ຺ຘໍ ສາລິໂນ ຠຕ຺ຕໍ, ຄູຖໍ ເມ ປຣິວຕ຺ຕຕິ.

໔໕໒. ‘‘ອວຎ຺ຌານິ ຈ ກມ຺ມານິ, ນ ຫິ ກມ຺ມໍ ວິນສ຺ສຕິ;

ທຸຄ຺ຄນ຺ຘໍ ກິມິນໍ ມີຬ຺ຫໍ, ຠຸຎ຺ຊາມິ ຈ ປິວາມິ ຈາ’’ຕິ. – ຄາຖາ ອຠາສິ;

໔໔໘. ຕຕ຺ຖ ອຍນ຺ຕິ ປຸຕ຺ຕໍ ທສ຺ເສນ຺ຕິ ວທຕິ. ຫິໍສຕີຕິ ຖາເມນ ປຣິພາເຘຕິ, ມຸຄ຺ຄເຣນ ປຫຣຕີຕິ ອຕ຺ໂຖ. ກູຏວາຓິໂຊຕິ ຂລວາຓິໂຊ, ວຎ຺ຈນາຍ ວຓິຊ຺ຊກາຣໂກຕິ ອຕ຺ໂຖ. ມໍສານິ ຂາທິຕ຺ວາຕິ ປເຣຫິ ສາຘາຣຓມໍສໍ ຂາທິຕ຺ວາ ‘‘ນ ຂາທາມີ’’ຕິ ມຸສາວາເທນ ເຕ ວຎ຺ເຈຕິ.

໔໔໙-໕໐. ອຄາຣິນີຕິ ເຄຫສາມິນີ. ສນ຺ເຕສູຕິ ວິຊ຺ຊມາເນສ຺ເວວ ປເຣຫິ ຍາຈິຕອຸປກຣເຓສຸ. ປຣິຄຸຫາມີຕິ ປຏິຈ຺ຉາເທສິໍ. ກາລວິປລ຺ລາເສນ ເຫຕໍ ວຸຕ຺ຕໍ. ມາ ຈ ກິຎ຺ຈິ ອິໂຕ ອທນ຺ຕິ ອິໂຕ ມມ ສນ຺ຕກໂຕ ກິຎ຺ຈິມຕ຺ຕມ຺ປິ ອຕ຺ຖິກສ຺ສ ປຣສ຺ສ ນ ອທາສິໍ. ຉາເທມິຕິ ‘‘ນຕ຺ຖິ ເອຕໍ ມມ ເຄເຫ’’ຕິ ມຸສາວາເທນ ຉາເທສິໍ.

໔໕໑-໒. ຄູຖໍ ເມ ປຣິວຕ຺ຕຕີຕິ ສຸຄນ຺ຘໍ ສາລິຠຕ຺ຕໍ ມຍ຺ຫໍ ກມ຺ມວເສນ ຄູຖຠາເວນ ປຣິວຕ຺ຕຕິ ປຣິຓມຕິ. ອວຎ຺ຌານີຕິ ອໂມຆານິ ອນິປ຺ຜລານິ. ນ ຫິ ກມ຺ມໍ ວິນສ຺ສຕີຕິ ຍຖູປຈິຕໍ ກມ຺ມໍ ຜລໍ ອທຕ຺ວາ ນ ຫິ ວິນສ຺ສຕິ. ກິມິນນ຺ຕິ ກິມິວນ຺ຕໍ ສຎ຺ຊາຕກິມິກຸລໍ. ມີຬ຺ຫນ຺ຕິ ຄູຖໍ. ເສສໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານເມວ.

ເອວໍ ເຖໂຣ ຕສ຺ສາ ເປຕິຍາ ວຈນໍ ສຸຕ຺ວາ ຕໍ ປວຕ຺ຕິໍ ຠຄວໂຕ ອາໂຣເຈສິ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ຠຸສເປຕວຕ຺ຖຸວຓ຺ຓນາ ນິຏ຺ຐິຕາ.