໘. ຈູຬເສຏ຺ຐິເປຕວຕ຺ຖຸວຓ຺ຓນາ

ນຄ຺ໂຄ ກິໂສ ປພ຺ພຊິໂຕສິ, ຠນ຺ເຕຕິ ອິທໍ ສຕ຺ຖຣິ ເວຬຸວເນ ວິຫຣນ຺ເຕ ຈູຬເສຏ຺ຐິເປຕໍ ອາຣພ຺ຠ ວຸຕ຺ຕໍ. ພາຣາຓສິຍໍ ກິຣ ເອໂກ ຄຫປຕິ ອສ຺ສທ຺ໂຘ ອປ຺ປສນ຺ໂນ ມຈ຺ຉຣີ ກທຣິໂຍ ປຸຎ຺ຎກິຣິຍາຍ ອນາທໂຣ ຈູຬເສຏ຺ຐິ ນາມ ອໂຫສິ. ໂສ ກາລໍ ກຕ຺ວາ ເປເຕສຸ ນິພ຺ພຕ຺ຕິ, ຕສ຺ສ ກາໂຍ ອປຄຕມໍສໂລຫິໂຕ ອຏ຺ຐິນ຺ຫາຣຸຈມ຺ມມຕ຺ໂຕ ມຸຓ຺ໂຑ ອເປຕວຕ຺ໂຖ ອໂຫສິ. ຘີຕາ ປນສ຺ສ ອນຸລາ ອນ຺ຘກວິນ຺ເທ ສາມິກສ຺ສ ເຄເຫ ວສນ຺ຕີ ປິຕຣໍ ອຸທ຺ທິສ຺ສ ພ຺ຣາຫ຺ມເຓ ໂຠເຊຕຸກາມາ ຕຓ຺ຑຸລາທີນິ ທານູປກຣຓານິ ສຊ຺ເຊສິ. ຕໍ ຎຕ຺ວາ ເປໂຕ ອາສາຍ ອາກາເສນ ຕຕ຺ຖ ຄຈ຺ຉນ຺ໂຕ ຣາຊຄຫໍ ສມ຺ປາປຸຓິ. ເຕນ ຈ ສມເຍນ ຣາຊາ ອຊາຕສຕ຺ຕຸ ເທວທຕ຺ເຕນ ອຸຍ຺ໂຍຊິໂຕ ປິຕຣໍ ຊີວິຕາ ໂວໂຣເປຕ຺ວາ ເຕນ ວິປ຺ປຏິສາເຣນ ທຸສ຺ສຸປິເນນ ຈ ນິທ຺ທໍ ອນຸປຄຈ຺ຉນ຺ໂຕ ອຸປຣິປາສາທວຣຄໂຕ ຈງ຺ກມນ຺ໂຕ ຕໍ ເປຕໍ ອາກາເສນ ຄຈ຺ຉນ຺ຕໍ ທິສ຺ວາ ອິມາຍ ຄາຖາຍ ປຸຈ຺ຉິ –

໒໔໖. ‘‘ນຄ຺ໂຄ ກິໂສ ປພ຺ພຊິໂຕສິ ຠນ຺ເຕ, ຣຕ຺ຕິໍ ກຸຫິໍ ຄຈ຺ຉສິ ກິສ຺ສເຫຕຸ;

ອາຈິກ຺ຂ ເມ ຕໍ ອປິ ສກ຺ກຸເຓມຸ, ສພ຺ເພນ ວິຕ຺ຕໍ ປຏິປາທເຍ ຕຸວ’’ນ຺ຕິ.

ຕຕ຺ຖ ປພ຺ພຊິໂຕຕິ ສມໂຓ. ຣາຊາ ກິຣ ຕໍ ນຄ຺ຄຕ຺ຕາ ມຸຓ຺ຑຕ຺ຕາ ຈ ‘‘ນຄ຺ໂຄ ສມໂຓ ອຍ’’ນ຺ຕິ ສຎ຺ຎາຍ ‘‘ນຄ຺ໂຄ ກິໂສ ປພ຺ພຊິໂຕສີ’’ຕິອາທິມາຫ. ກິສ຺ສເຫຕູຕິ ກິນ຺ນິມິຕ຺ຕໍ. ສພ຺ເພນ ວິຕ຺ຕໍ ປຏິປາທເຍ ຕຸວນ຺ຕິ ວິຕ຺ຕິຍາ ອຸປກຣຓຠູຕໍ ວິຕ຺ຕໍ ສພ຺ເພນ ໂຠເຄນ ຕຸຍ຺ຫໍ ອຊ຺ຌາສຍານຸຣູປໍ, ສພ຺ເພນ ວາ ອຸສ຺ສາເຫນ ປຏິປາເທຍ຺ຍໍ ສມ຺ປາເທຍ຺ຍໍ. ຕຖາ ກາຕຸໍ ມຍໍ ອປ຺ເປວ ນາມ ສກ຺ກຸເຓຍ຺ຍາມ, ຕສ຺ມາ ອາຈິກ຺ຂ ເມ ຕໍ, ເອຕໍ ຕວ ອາຄມນກາຣຓໍ ມຍ຺ຫໍ ກເຖຫີຕິ ອຕ຺ໂຖ.

ເອວໍ ຣຎ຺ຎາ ປຸຏ຺ໂຐ ເປໂຕ ອຕ຺ຕໂນ ປວຕ຺ຕິໍ ກເຖນ຺ໂຕ ຕິສ຺ໂສ ຄາຖາ ອຠາສິ –

໒໔໗. ‘‘ພາຣາຓສີ ນຄຣໍ ທູຣຆຸຏ຺ຐໍ, ຕຕ຺ຖາຫໍ ຄຫປຕິ ອຑ຺ຒໂກ ອຫຸ ທີໂນ;

ອທາຕາ ເຄຘິຕມໂນ ອາມິສສ຺ມິໍ, ທຸສ຺ສີລ຺ເຍນ ຍມວິສຍມ຺ຫິ ປຕ຺ໂຕ.

໒໔໘. ‘‘ໂສ ສູຈິກາຍ ກິລມິໂຕ ເຕຫິ,

ເຕເນວ ຎາຕີສຸ ຍາມິ ອາມິສກິຎ຺ຈິກ຺ຂເຫຕຸ;

ອທານສີລາ ນ ຈ ສທ຺ທຫນ຺ຕິ,

‘ທານຜລໍ ໂຫຕິ ປຣມ຺ຫິ ໂລເກ’.

໒໔໙. ‘‘ຘີຕາ ຈ ມຍ຺ຫໍ ລປເຕ ອຠິກ຺ຂຓໍ, ທສ຺ສາມິ ທານໍ ປິຕູນໍ ປິຕາມຫານໍ;

ຕມຸປກ຺ຂຏໍ ປຣິວິສຍນ຺ຕິ ພ຺ຣາຫ຺ມຓາ, ຍາມິ ອຫໍ ອນ຺ຘກວິນ຺ທໍ ຠຸຕ຺ຕຸ’’ນ຺ຕິ.

໒໔໗. ຕຕ຺ຖ ທູຣຆຸຏ຺ຐນ຺ຕິ ທູຣໂຕ ເອວ ຄຸຓກິຕ຺ຕນວເສນ ໂຆສິຕໍ, ສພ຺ພຕ຺ຖ ວິສ຺ສຸຕໍ ປາກຏນ຺ຕິ ອຕ຺ໂຖ. ອຑ຺ຒໂກຕິ ອຑ຺ໂຒ ມຫາວິຠໂວ. ທີໂນຕິ ນິຫີນຈິຕ຺ໂຕ ອທານຊ຺ຌາສໂຍ. ເຕນາຫ ‘‘ອທາຕາ’’ຕິ. ເຄຘິຕມໂນ ອາມິສສ຺ມິນ຺ຕິ ກາມາມິເສ ລຄ຺ຄຈິຕ຺ໂຕ ເຄຘໍ ອາປນ຺ໂນ. ທຸສ຺ສີລ຺ເຍນ ຍມວິສຍມ຺ຫິ ປຕ຺ໂຕຕິ ອຕ຺ຕນາ ກເຕນ ທຸສ຺ສີລກມ຺ມຸນາ ຍມວິສຍໍ ເປຕໂລກໍ ປຕ຺ໂຕ ອມ຺ຫິ.

໒໔໘. ໂສ ສູຈິກາຍ ກິລມິໂຕຕິ ໂສ ອຫໍ ວິຊ຺ຌນຏ຺ເຐນ ສູຈິສທິສຕາຍ ‘‘ສູຈິກາ’’ຕິ ລທ຺ຘນາມາຍ ຊິຆຈ຺ຉາຍ ກິລມິໂຕ ນິຣນ຺ຕຣໍ ວິຊ຺ຌມາໂນ. ‘‘ກິລມໂຖ’’ຕິ ອິຈ຺ເຈວ ວາ ປາໂຐ. ເຕຫີຕິ ‘‘ທີໂນ’’ຕິອາທິນາ ວຸຕ຺ເຕຫິ ປາປກມ຺ເມຫິ ກາຣຓຠູເຕຫິ. ຕສ຺ສ ຫິ ເປຕສ຺ສ ຕານິ ປາປກມ຺ມານິ ອນຸສ຺ສຣນ຺ຕສ຺ສ ອຕິວິຍ ໂທມນສ຺ສໍ ອຸປ຺ປຊ຺ຊິ, ຕສ຺ມາ ເອວມາຫ. ເຕເນວາຕິ ເຕເນວ ຊິຆຈ຺ຉາທຸກ຺ເຂນ. ຎາຕີສຸ ຍາມີຕິ ຎາຕີນໍ ສມີປໍ ຍາມິ ຄຈ຺ຉາມິ. ອາມິສກິຎ຺ຈິກ຺ຂເຫຕູຕິ ອາມິສສ຺ສ ກິຎ຺ຈິກ຺ຂນິມິຕ຺ຕໍ, ກິຎ຺ຈິ ອາມິສໍ ປຕ຺ເຖນ຺ໂຕຕິ ອຕ຺ໂຖ. ອທານສີລາ ນ ຈ ສທ຺ທຫນ຺ຕິ, ‘ທານຜລໍ ໂຫຕິ ປຣມ຺ຫິ ໂລເກ’ຕິ ຍຖາ ອຫໍ, ຕຖາ ເອວໍ ອຎ຺ເຎປິ ມນຸສ຺ສາ ອທານສີລາ ‘‘ທານສ຺ສ ຜລໍ ເອກໍເສນ ປຣໂລເກ ໂຫຕີ’’ຕິ ນ ຈ ສທ຺ທຫນ຺ຕິ. ຍໂຕ ອຫໍ ວິຍ ເຕປິ ເປຕາ ຫຸຕ຺ວາ ມຫາທຸກ຺ຂໍ ປຈ຺ຈນຸຠວນ຺ຕີຕິ ອຘິປ຺ປາໂຍ.

໒໔໙. ລປເຕຕິ ກເຖຕິ. ອຠິກ຺ຂຓນ຺ຕິ ອຠິຓ຺ຫໍ ພຫຸໂສ. ກິນ຺ຕິ ລປຕີຕິ ອາຫ ‘‘ທສ຺ສາມິ ທານໍ ປິຕູນໍ ປິຕາມຫານ’’ນ຺ຕິ. ຕຕ຺ຖ ປິຕູນນ຺ຕິ ມາຕາປິຕູນໍ, ຈູຬປິຕຸມຫາປິຕູນໍ ວາ. ປິຕາມຫານນ຺ຕິ ອຍ຺ຍກປຍ຺ຍການໍ. ອຸປກ຺ຂຏນ຺ຕິ ສຊ຺ຊິຕໍ. ປຣິວິສຍນ຺ຕີຕິ ໂຠຊຍນ຺ຕິ. ອນ຺ຘກວິນ຺ທນ຺ຕິ ເອວໍນາມກໍ ນຄຣໍ. ຠຸຕ຺ຕຸນ຺ຕິ ຠຸຎ຺ຊິຕຸໍ. ຕໂຕ ປຣາ ສງ຺ຄີຕິກາຣເກຫິ ວຸຕ຺ຕາ –

໒໕໐. ‘‘ຕມໂວຈ ຣາຊາ ‘ອນຸຠວິຍານ ຕມ຺ປິ,

ເອຍ຺ຍາສິ ຂິປ຺ປໍ ອຫມປິ ກສ຺ສໍ ປູຊໍ;

ອາຈິກ຺ຂ ເມ ຕໍ ຍທິ ອຕ຺ຖິ ເຫຕຸ,

ສທ຺ຘາຍິຕໍ ເຫຕຸວໂຈ ສຸໂຓມ’.

໒໕໑. ‘‘ຕຖາຕິ ວຕ຺ວາ ອຄມາສິ ຕຕ຺ຖ, ຠຸຎ຺ຊິໍສຸ ຠຕ຺ຕໍ ນ ຈ ທກ຺ຂິຓາຣຫາ;

ປຈ຺ຈາຄມິ ຣາຊຄຫໍ ປຸນາປຣໍ, ປາຕຸຣໂຫສິ ປຸຣໂຕ ຊນາຘິປສ຺ສ.

໒໕໒. ‘‘ທິສ຺ວານ ເປຕໍ ປຸນເທວ ອາຄຕໍ, ຣາຊາ ອໂວຈ ‘ອຫມປິ ກິໍ ທທາມິ;

ອາຈິກ຺ຂ ເມ ຕໍ ຍທິ ອຕ຺ຖິ ເຫຕຸ, ເຍນ ຕຸວໍ ຈິຣຕຣໍ ປີຓິໂຕ ສິຍາ’.

໒໕໓. ‘‘ພຸທ຺ຘຎ຺ຈ ສງ຺ຆໍ ປຣິວິສິຍານ ຣາຊ, ອນ຺ເນນ ປາເນນ ຈ ຈີວເຣນ;

ຕໍ ທກ຺ຂິຓໍ ອາທິສ ເມ ຫິຕາຍ, ເອວໍ ອຫໍ ຈິຣຕຣໍ ປີຓິໂຕ ສິຍາ.

໒໕໔. ‘‘ຕໂຕ ຈ ຣາຊາ ນິປຕິຕ຺ວາ ຕາວເທ, ທານໍ ສຫຕ຺ຖາ ອຕຸລໍ ທທິຕ຺ວາ ສງ຺ເຆ;

ອາໂຣເຈສິ ປກຕໍ ຕຖາຄຕສ຺ສ, ຕສ຺ສ ຈ ເປຕສ຺ສ ທກ຺ຂິຓໍ ອາທິສິຕ຺ຖ.

໒໕໕. ‘‘ໂສ ປູຊິໂຕ ອຕິວິຍ ໂສຠມາໂນ, ປາຕຸຣໂຫສິ ປຸຣໂຕ ຊນາຘິປສ຺ສ;

ຍກ຺ໂຂຫມສ຺ມິ ປຣມິທ຺ຘິປຕ຺ໂຕ, ນ ມຍ຺ຫມຕ຺ຖິ ສມາ ສທິສາ ມານຸສາ.

໒໕໖. ‘‘ປສ຺ສານຸຠາວໍ ອປຣິມິຕໍ ມມຍິທໍ, ຕຍານຸທິຏ຺ຐໍ ອຕຸລໍ ທຕ຺ວາ ສງ຺ເຆ;

ສນ຺ຕປ຺ປິໂຕ ສຕຕໍ ສທາ ພຫູຫິ, ຍາມິ ອຫໍ ສຸຂິໂຕ ມນຸສ຺ສເທວາ’’ຕິ.

໒໕໐. ຕຕ຺ຖ ຕມໂວຈ ຣາຊາຕິ ຕໍ ເປຕໍ ຕຖາ ວຕ຺ວາ ຐິຕໍ ຣາຊາ ອຊາຕສຕ຺ຕຸ ອໂວຈ. ອນຸຠວິຍານ ຕມ຺ປີຕິ ຕໍ ຕວ ຘີຕຸຍາ ອຸປກ຺ຂຏໍ ທານມ຺ປິ ອນຸຠວິຕ຺ວາ. ເອຍ຺ຍາສີຕິ ອາຄຈ຺ເຉຍ຺ຍາສິ. ກສ຺ສນ຺ຕິ ກຣິສ຺ສາມິ. ອາຈິກ຺ຂ ເມ ຕໍ ຍທິ ອຕ຺ຖິ ເຫຕູຕິ ສເຈ ກິຎ຺ຈິ ກາຣຓໍ ອຕ຺ຖິ, ຕໍ ກາຣຓໍ ມຍ຺ຫໍ ອາຈິກ຺ຂ ກເຖຫິ. ສທ຺ຘາຍິຕນ຺ຕິ ສທ຺ຘາຍິຕພ຺ພໍ. ເຫຕຸວໂຈຕິ ເຫຕຸຍຸຕ຺ຕວຈນໍ, ‘‘ອມຸກສ຺ມິໍ ຐາເນ ອສຸເກນ ປກາເຣນ ທາເນ ກເຕ ມຍ຺ຫໍ ອຸປກປ຺ປຕີ’’ຕິ ສກາຣຓໍ ວຈນໍ ວທາຕິ ອຕ຺ໂຖ.

໒໕໑. ຕຖາຕິ ວຕ຺ວາຕິ ສາຘູຕິ ວຕ຺ວາ. ຕຕ຺ຖາຕິ ຕສ຺ມິໍ ອນ຺ຘກວິນ຺ເທ ປຣິເວສນຏ຺ຐາເນ. ຠຸຎ຺ຊິໍສຸ ຠຕ຺ຕໍ ນ ຈ ທກ຺ຂິຓາຣຫາຕິ ຠຕ຺ຕໍ ຠຸຎ຺ຊິໍສຸ ທຸສ຺ສີລພ຺ຣາຫ຺ມຓາ, ນ ຈ ປນ ທກ຺ຂິຓາຣຫາ ສີລວນ຺ໂຕ ຠຸຎ຺ຊິໍສູຕິ ອຕ຺ໂຖ. ປຸນາປຣນ຺ຕິ ປຸນ ອປຣໍ ວາຣໍ ຣາຊຄຫໍ ປຈ຺ຈາຄມິ.

໒໕໒. ກິໍ ທທາມີຕິ ‘‘ກີທິສໍ ເຕ ທານໍ ທສ຺ສາມີ’’ຕິ ຣາຊາ ເປຕໍ ປຸຈ຺ຉິ. ເຍນ ຕຸວນ຺ຕິ ເຍນ ກາຣເຓນ ຕ຺ວໍ. ຈິຣຕຣນ຺ຕິ ຈິຣກາລໍ. ປີຓິໂຕຕິ ຕິຕ຺ໂຕ ສິຍາ, ຕໍ ກເຖຫີຕິ ອຕ຺ໂຖ.

໒໕໓. ປຣິວິສິຍານາຕິ ໂຠເຊຕ຺ວາ. ຣາຊາຕິ ອຊາຕສຕ຺ຕຸໍ ອາລປຕິ. ເມ ຫິຕາຍາຕິ ມຍ຺ຫໍ ຫິຕຕ຺ຖາຍ ເປຕຕ຺ຕຠາວໂຕ ປຣິມຸຕ຺ຕິຍາ.

໒໕໔. ຕໂຕຕິ ຕສ຺ມາ ເຕນ ວຈເນນ, ຕໂຕ ວາ ປາສາທໂຕ. ນິປຕິຕ຺ວາຕິ ນິກ຺ຂມິຕ຺ວາ. ຕາວເທຕິ ຕທາ ເອວ ອຣຸຓຸຄ຺ຄມນເວລາຍ. ຍມ຺ຫິ ເປໂຕ ປຈ຺ຈາຄນ຺ຕ຺ວາ ຣຎ຺ໂຎ ອຕ຺ຕານໍ ທສ຺ເສສິ, ຕສ຺ມິໍ ປຸເຣຠຕ຺ເຕ ເອວ ທານໍ ອທາສິ. ສຫຕ຺ຖາຕິ ສຫຕ຺ເຖນ. ອຕຸລນ຺ຕິ ອປ຺ປມາຓໍ ອຸຬາຣໍ ປຓີຕໍ. ທຕ຺ວາ ສງ຺ເຆຕິ ສງ຺ຆສ຺ສ ທຕ຺ວາ. ອາໂຣເຈສິ ປກຕໍ ຕຖາຄຕສ຺ສາຕິ ‘‘ອິທໍ, ຠນ຺ເຕ, ທານໍ ອຎ຺ຎຕຣໍ ເປຕໍ ສນ຺ຘາຍ ປກຕ’’ນ຺ຕິ ຕໍ ປວຕ຺ຕິໍ ຠຄວໂຕ ອາໂຣເຈສິ. ອາໂຣເຈຕ຺ວາ ຈ ຍຖາ ຕໍ ທານໍ ຕສ຺ສ ອຸປກປ຺ປຕິ, ເອວໍ ຕສ຺ສ ຈ ເປຕສ຺ສ ທກ຺ຂິຓໍ ອາທິສິຕ຺ຖ ອາທິສິ.

໒໕໕. ໂສຕິ ໂສ ເປໂຕ. ປູຊິໂຕຕິ ທກ຺ຂິຓາຍ ທິຍ຺ຍມານາຍ ປູຊິໂຕ. ອຕິວິຍ ໂສຠມາໂນຕິ ທິພ຺ພານຸຠາເວນ ອຕິວິຍ ວິໂຣຈມາໂນ. ປາຕຸຣໂຫສີຕິ ປາຕຸຠວິ, ຣຎ຺ໂຎ ປຸຣໂຕ ອຕ຺ຕານໍ ທສ຺ເສສິ. ຍກ຺ໂຂຫມສ຺ມີຕິ ເປຕຕ຺ຕຠາວໂຕ ມຸຕ຺ໂຕ ຍກ຺ໂຂ ອຫໍ ຊາໂຕ ເທວຠາວໍ ປຕ຺ໂຕສ຺ມິ. ນ ມຍ຺ຫມຕ຺ຖິ ສມາ ສທິສາ ມານຸສາຕິ ມຍ຺ຫໍ ອານຸຠາວສມ຺ປຕ຺ຕິຍາ ສມາ ວາ ໂຠຄສມ຺ປຕ຺ຕິຍາ ສທິສາ ວາ ມນຸສ຺ສາ ນ ສນ຺ຕິ.

໒໕໖. ປສ຺ສານຸຠາວໍ ອປຣິມິຕໍ ມມຍິທນ຺ຕິ ‘‘ມມ ອິທໍ ອປຣິມາຓໍ ທິພ຺ພານຸຠາວໍ ປສ຺ສາ’’ຕິ ອຕ຺ຕໂນ ສມ຺ປຕ຺ຕິໍ ປຈ຺ຈກ຺ຂໂຕ ຣຎ຺ໂຎ ທສ຺ເສນ຺ໂຕ ວທຕິ. ຕຍານຸທິຏ຺ຐໍ ອຕຸລໍ ທຕ຺ວາ ສງ຺ເຆຕິ ອຣິຍສງ຺ຆສ຺ສ ອຕຸລໍ ອຸຬາຣໍ ທານໍ ທຕ຺ວາ ມຍ຺ຫໍ ອນຸກມ຺ປາຍ ຕຍາ ອນຸທິຏ຺ຐໍ. ສນ຺ຕປ຺ປິໂຕ ສຕຕໍ ສທາ ພຫູຫີຕິ ອນ຺ນປານວຕ຺ຖາທີຫິ ພຫູຫິ ເທຍ຺ຍຘມ຺ເມຫິ ອຣິຍສງ຺ຆໍ ສນ຺ຕປ຺ເປນ຺ເຕນ ຕຍາ ສທາ ສພ຺ພກາລໍ ຍາວຊີວໍ ຕຕ຺ຖາປິ ສຕຕໍ ນິຣນ຺ຕຣໍ ອຫໍ ສນ຺ຕປ຺ປິໂຕ ປີຓິໂຕ. ຍາມິ ອຫໍ ສຸຂິໂຕ ມນຸສ຺ສເທວາຕິ ‘‘ຕສ຺ມາ ອຫໍ ອິທານິ ສຸຂິໂຕ ມນຸສ຺ສເທວ ມຫາຣາຊ ຍຖິຈ຺ຉິຕຏ຺ຐານໍ ຍາມີ’’ຕິ ຣາຊານໍ ອາປຸຈ຺ຉິ.

ເອວໍ ເປເຕ ອາປຸຈ຺ຉິຕ຺ວາ ຄເຕ ຣາຊາ ອຊາຕສຕ຺ຕຸ ຕມຕ຺ຖໍ ຠິກ຺ຂູນໍ ອາໂຣເຈສິ, ຠິກ຺ຂູ ຠຄວໂຕ ສນ຺ຕິກໍ ອຸປສງ຺ກມິຕ຺ວາ ອາໂຣເຈສຸໍ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ຕໍ ສຸຕ຺ວາ ມຫາຊໂນ ມຈ຺ເຉຣມລໍ ປຫາຍ ທານາທິປຸຎ຺ຎາຠິຣໂຕ ອໂຫສີຕິ.

ຈູຬາເສຏ຺ຐິເປຕວຕ຺ຖຸວຓ຺ຓນາ ນິຏ຺ຐິຕາ.