໗. ຘນປາລເສຏ຺ຐິເປຕວຕ຺ຖຸວຓ຺ຓນາ

ນຄ຺ໂຄ ທຸພ຺ພຓ຺ຓຣູໂປສີຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ຘນປາລເປຕໍ ອາຣພ຺ຠ ວຸຕ຺ຕໍ. ອນຸປ຺ປນ຺ເນ ກິຣ ພຸທ຺ເຘ ປຓ຺ຓຣຏ຺ເຐ ເອຣກຈ຺ຉນຄເຣ ຘນປາລໂກ ນາມ ເສຏ຺ຐິ ອໂຫສິ ອສ຺ສທ຺ໂຘ ອປ຺ປສນ຺ໂນ ກທຣິໂຍ ນຕ຺ຖິກທິຏ຺ຐິໂກ. ຕສ຺ສ ກິຣິຍາ ປາຬິໂຕ ເອວ ວິຎ຺ຎາຍຕິ. ໂສ ກາລໍ ກຕ຺ວາ ມຣຸກນ຺ຕາເຣ ເປໂຕ ຫຸຕ຺ວາ ນິພ຺ພຕ຺ຕິ. ຕສ຺ສ ຕາລກ຺ຂນ຺ຘປ຺ປມາໂຓ ກາໂຍ ອໂຫສິ, ສມຸຏ຺ຐິຕຈ຺ຉວິ ຜຣຸໂສ, ວິຣູປເກໂສ, ຠຍານໂກ, ທຸພ຺ພຓ຺ໂຓ ອຕິວິຍ ວິຣູໂປ ພີຠຈ຺ຉທສ຺ສໂນ. ໂສ ປຎ຺ຈປຓ຺ຓາສ ວສ຺ສານິ ຠຕ຺ຕສິຕ຺ຖໍ ວາ ອຸທກພິນ຺ທຸໍ ວາ ອລຠນ຺ໂຕ ວິສຸກ຺ຂກຓ຺ໂຐຏ຺ຐຊິວ຺ໂຫ ຊິຆຈ຺ຉາປິປາສາຠິຠູໂຕ ອິໂຕ ຈິໂຕ ຈ ປຣິພ຺ຠມຕິ.

ອຖ ອມ຺ຫາກໍ ຠຄວຕິ ໂລເກ ອຸປ຺ປຊ຺ຊິຕ຺ວາ ປວຕ຺ຕິຕວຣຘມ຺ມຈກ຺ເກ ອນຸກ຺ກເມນ ສາວຕ຺ຖິຍໍ ວິຫຣນ຺ເຕ ສາວຕ຺ຖິວາສິໂນ ວາຓິຊາ ປຎ຺ຈມຕ຺ຕານິ ສກຏສຕານິ ຠຓ຺ຑສ຺ສ ປູເຣຕ຺ວາ ອຸຕ຺ຕຣາປຖໍ ຄນ຺ຕ຺ວາ ຠຓ຺ຑໍ ວິກ຺ກິຓິຕ຺ວາ ປຏິລທ຺ຘຠຓ຺ຑໍ ສກເຏສຸ ອາໂຣເປຕ຺ວາ ປຏິນິວຕ຺ຕມານາ ສາຍນ຺ຫສມເຍ ອຎ຺ຎຕຣໍ ສຸກ຺ຂນທິໍ ປາປຸຓິຕ຺ວາ ຕຕ຺ຖ ຍານໍ ມຸຎ຺ຈິຕ຺ວາ ຣຕ຺ຕິຍໍ ວາສໍ ກປ຺ເປສຸໍ. ອຖ ໂສ ເປໂຕ ປິປາສາຠິຠູໂຕ ປານີຍສ຺ສຕ຺ຖາຍ ອາຄນ຺ຕ຺ວາ ຕຕ຺ຖ ພິນ຺ທຸມຕ຺ຕມ຺ປິ ປານີຍໍ ອລຠິຕ຺ວາ ວິຄຕາໂສ ຉິນ຺ນມູໂລ ວິຍ ຕາໂລ ຉິນ຺ນປາໂທ ປຕິ. ຕໍ ທິສ຺ວາ ວາຓິຊາ –

໒໒໗. ‘‘ນຄ຺ໂຄ ທຸພ຺ພຓ຺ຓຣູໂປສິ, ກິໂສ ຘມນິສນ຺ຖໂຕ;

ອຸປ຺ຜາສຸລິໂກ ກິສິໂກ, ໂກ ນຸ ຕ຺ວມສິ ມາຣິສາ’’ຕິ. –

ອິມາຍ ຄາຖາຍ ປຸຈ຺ຉິໍສຸ. ຕໂຕ ເປໂຕ –

໒໒໘. ‘‘ອຫໍ ຠທນ຺ເຕ ເປໂຕມ຺ຫິ, ທຸຄ຺ຄໂຕ ຍມໂລກິໂກ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄໂຕ’’ຕິ. –

ອຕ຺ຕານໍ ອາວິກຕ຺ວາ ປຸນ ເຕຫິ –

໒໒໙. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ເປຕໂລກໍ ອິໂຕ ຄໂຕ’’ຕິ. –

ກຕກມ຺ມໍ ປຸຈ຺ຉິໂຕ ປຸພ຺ເພ ນິພ຺ພຕ຺ຕຏ຺ຐານໂຕ ປຏ຺ຐາຍ ອຕີຕໍ ປຈ຺ຈຸປ຺ປນ຺ນໍ ອນາຄຕຎ຺ຈ ອຕ຺ຕໂນ ປວຕ຺ຕິໍ ທສ຺ເສນ຺ໂຕ ເຕສຎ຺ຈ ໂອວາທໍ ເທນ຺ໂຕ –

໒໓໐. ‘‘ນຄຣໍ ອຕ຺ຖິ ປຓ຺ຓານໍ, ເອຣກຈ຺ຉນ຺ຕິ ວິສ຺ສຸຕໍ;

ຕຕ຺ຖ ເສຏ຺ຐິ ປຸເຣ ອາສິໍ, ຘນປາໂລຕິ ມໍ ວິທູ.

໒໓໑. ‘‘ອສີຕິ ສກຏວາຫານໍ, ຫິຣຎ຺ຎສ຺ສ ອໂຫສິ ເມ;

ປຫູຕໍ ເມ ຊາຕຣູປໍ, ມຸຕ຺ຕາ ເວຬຸຣິຍາ ພຫູ.

໒໓໒. ‘‘ຕາວ ມຫທ຺ຘນສ຺ສາປິ, ນ ເມ ທາຕຸໍ ປິຍໍ ອຫຸ;

ປິທຫິຕ຺ວາ ທ຺ວາຣໍ ຠຸຎ຺ຊິໍ, ມາ ມໍ ຍາຈນກາທ຺ທສຸໍ.

໒໓໓. ‘‘ອສ຺ສທ຺ໂຘ ມຈ຺ຉຣີ ຈາສິໍ, ກທຣິໂຍ ປຣິຠາສໂກ;

ທທນ຺ຕານໍ ກໂຣນ຺ຕານໍ, ວາຣຍິສ຺ສໍ ພຫູ ຊເນ.

໒໓໔. ‘‘ວິປາໂກ ນຕ຺ຖິ ທານສ຺ສ, ສໍຍມສ຺ສ ກຸໂຕ ຜລໍ;

ໂປກ຺ຂຣຎ຺ໂຎທປານານິ, ອາຣາມານິ ຈ ໂຣປິເຕ;

ປປາໂຍ ຈ ວິນາເສສິໍ, ທຸຄ຺ເຄ ສງ຺ກມນານິ ຈ.

໒໓໕. ‘‘ສ຺ວາຫໍ ອກຕກລ຺ຍາໂຓ, ກຕປາໂປ ຕໂຕ ຈຸໂຕ;

ອຸປປນ຺ໂນ ເປຕ຺ຕິວິສຍໍ, ຂຸປ຺ປິປາສສມປ຺ປິໂຕ.

໒໓໖. ‘‘ປຎ຺ຈປຓ຺ຓາສ ວສ຺ສານິ, ຍໂຕ ກາລງ຺ກໂຕ ອຫໍ;

ນາຠິຊານາມິ ຠຸຕ຺ຕໍ ວາ, ປີຕໍ ວາ ປນ ປານິຍໍ.

໒໓໗. ‘‘ໂຍ ສໍຍໂມ ໂສ ວິນາໂສ, ໂຍ ວິນາໂສ ໂສ ສໍຍໂມ;

ເປຕາ ຫິ ກິຣ ຊານນ຺ຕິ, ໂຍ ສໍຍໂມ ໂສ ວິນາໂສ.

໒໓໘. ‘‘ອຫໍ ປຸເຣ ສໍຍມິສ຺ສໍ, ນາທາສິໍ ພຫຸເກ ຘເນ;

ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກາສິມຕ຺ຕໂນ;

ສ຺ວາຫໍ ປຈ຺ຉານຸຕປ຺ປາມິ, ອຕ຺ຕກມ຺ມຜລູປໂຄ.

໒໓໙. ‘‘ອຸທ຺ຘໍ ຈຕູຫິ ມາເສຫິ, ກາລກິຣິຍາ ຠວິສ຺ສຕິ;

ເອກນ຺ຕກຏຸກໍ ໂຆຣໍ, ນິຣຍໍ ປປຕິສ຺ສຫໍ.

໒໔໐. ‘‘ຈຕຸກ຺ກຓ຺ຓໍ ຈຕຸທ຺ວາຣໍ, ວິຠຕ຺ຕໍ ຠາຄໂສ ມິຕໍ;

ອໂຍປາກາຣປຣິຍນ຺ຕໍ, ອຍສາ ປຏິກຸຊ຺ຊິຕໍ.

໒໔໑. ‘‘ຕສ຺ສ ອໂຍມຍາ ຠູມິ, ຊລິຕາ ເຕຊສາ ຍຸຕາ;

ສມນ຺ຕາ ໂຍຊນສຕໍ, ຜຣິຕ຺ວາ ຕິຏ຺ຐຕິ ສພ຺ພທາ.

໒໔໒. ‘‘ຕຕ຺ຖາຫໍ ທີຆມທ຺ຘານໍ, ທຸກ຺ຂໍ ເວທິສ຺ສ ເວທນໍ;

ຜລໍ ປາປສ຺ສ ກມ຺ມສ຺ສ, ຕສ຺ມາ ໂສຈາມຫໍ ຠຸສໍ.

໒໔໓. ‘‘ຕໍ ວາ ວທາມິ ຠທ຺ທໍ ໂວ, ຍາວນ຺ເຕຕ຺ຖ ສມາຄຕາ;

ມາກຕ຺ຖ ປາປກໍ ກມ຺ມໍ, ອາວິ ວາ ຍທິ ວາ ຣໂຫ.

໒໔໔. ‘‘ສເຈ ຕໍ ປາປກໍ ກມ຺ມໍ, ກຣິສ຺ສຖ ກໂຣຖ ວາ;

ນ ໂວ ທຸກ຺ຂາ ປມຸຕ຺ຍຕ຺ຖິ, ອຸປ຺ປຈ຺ຈາປິ ປລາຍຕໍ.

໒໔໕. ‘‘ມຕ຺ເຕຍ຺ຍາ ໂຫຖ ເປຕ຺ເຕຍ຺ຍາ, ກຸເລ ເຊຏ຺ຐາປຈາຍິກາ;

ສາມຎ຺ຎາ ໂຫຖ ພ຺ຣຫ຺ມຎ຺ຎາ, ເອວໍ ສຄ຺ຄໍ ຄມິສ຺ສຖາ’’ຕິ. –

ອິມາ ຄາຖາ ອຠາສິ.

໒໓໐-໒໓໑. ຕຕ຺ຖ ປຓ຺ຓານນ຺ຕິ ປຓ຺ຓານາມຣຏ຺ຐສ຺ສ ເອວໍນາມການໍ ຣາຊູນໍ. ເອຣກຈ຺ຉນ຺ຕິ ຕສ຺ສ ນຄຣສ຺ສ ນາມໍ. ຕຕ຺ຖາຕິ ຕສ຺ມິໍ ນຄເຣ. ປຸເຣຕິ ປຸພ຺ເພ ອຕີຕຕ຺ຕຠາເວ. ຘນປາໂລຕິ ມໍ ວິທູຕິ ‘‘ຘນປາລເສຏ຺ຐີ’’ຕິ ມໍ ຊານນ຺ຕິ. ຕຍິທໍ ນາມໍ ຕທາ ມຍ຺ຫໍ ອຕ຺ຖານຸຄຕເມວາຕິ ທສ຺ເສນ຺ໂຕ ‘‘ອສີຕີ’’ຕິ ຄາຖມາຫ. ຕຕ຺ຖ ອສີຕິ ສກຏວາຫານນ຺ຕິ ວີສຕິຂາຣິໂກ ວາໂຫ, ໂຍ ສກຏນ຺ຕິ ວຸຈ຺ຈຕິ. ເຕສໍ ສກຏວາຫານໍ ອສີຕິ ຫິຣຎ຺ຎສ຺ສ ຕຖາ ກຫາປຓສ຺ສ ຈ ເມ ອໂຫສີຕິ ໂຍຊນາ. ປຫູຕໍ ເມ ຊາຕຣູປນ຺ຕິ ສຸວຓ຺ຓມ຺ປິ ປຫູຕໍ ອເນກຠາຣປຣິມາຓໍ ອໂຫສີຕິ ສມ຺ພນ຺ໂຘ.

໒໓໒-໒໓໓. ນ ເມ ທາຕຸໍ ປິຍໍ ອຫູຕິ ທານໍ ທາຕຸໍ ມຍ຺ຫໍ ປິຍໍ ນາໂຫສິ. ມາ ມໍ ຍາຈນກາທ຺ທສຸນ຺ຕິ ‘‘ຍາຈກາ ມາ ມໍ ປສ຺ສິໍສູ’’ຕິ ປິທຫິຕ຺ວາ ເຄຫທ຺ວາຣໍ ຠຸຎ຺ຊາມິ. ກທຣິໂຍຕິ ຖທ຺ຘມຈ຺ຉຣີ. ປຣິຠາສໂກຕິ ທານໍ ເທນ຺ເຕ ທິສ຺ວາ ຠເຍນ ສນ຺ຕຊ຺ຊໂກ. ທທນ຺ຕານໍ ກໂຣນ຺ຕານນ຺ຕິ ອຸປໂຍຄຕ຺ເຖ ສາມິວຈນໍ, ທານານິ ທທນ຺ເຕ ປຸຎ຺ຎານິ ກໂຣນ຺ເຕ. ພຫູ ຊເນຕິ ພຫູ ສຕ຺ເຕ. ທທນ຺ຕານໍ ວາ ກໂຣນ຺ຕານໍ ວາ ສມຸທາຍຠູຕໍ ພຫຸໍ ຊນໍ ປຸຎ຺ຎກມ຺ມໂຕ ວາຣຍິສ຺ສໍ ນິວາເຣສິໍ.

໒໓໔-໒໓໖. ວິປາໂກ ນຕ຺ຖິ ທານສ຺ສາຕິອາທິ ທານາທີນໍ ນິວາຣເຓ ກາຣຓທສ຺ສນໍ. ຕຕ຺ຖ ວິປາໂກ ນຕ຺ຖິ ທານສ຺ສາຕິ ທານກມ຺ມສ຺ສ ຜລໍ ນາມ ນຕ຺ຖິ, ເກວລໍ ປຸຎ຺ຎໍ ປຸຎ຺ຎນ຺ຕິ ຘນວິນາໂສ ເອວາຕິ ທີເປຕິ. ສໍຍມສ຺ສາຕິ ສີລສໍຍມສ຺ສ. ກຸໂຕ ຜລນ຺ຕິ ກຸໂຕ ນາມ ຜລໍ ລພ຺ຠຕິ, ນິຣຕ຺ຖກເມວ ສີລຣກ຺ຂຓນ຺ຕິ ອຘິປ຺ປາໂຍ. ອາຣາມານີຕິ ອາຣາມູປວນານີຕິ ອຕ຺ໂຖ. ປປາໂຍຕິ ປານີຍສາລາ. ທຸຄ຺ເຄຕິ ອຸທກຈິກ຺ຂລ຺ລານໍ ວເສນ ທຸຄ຺ຄມຏ຺ຐານານິ. ສງ຺ກມນານີຕິ ເສຕຸໂຍ. ຕໂຕ ຈຸໂຕຕິ ຕໂຕ ມນຸສ຺ສໂລກໂຕ ຈຸໂຕ. ປຎ຺ຈປຓ຺ຓາສາຕິ ປຎ຺ຈປຎ຺ຎາສ. ຍໂຕ ກາລງ຺ກໂຕ ອຫນ຺ຕິ ຍທາ ກາລກຕາ ອຫໍ, ຕໂຕ ປຏ຺ຐາຍ. ນາຠິຊານາມີຕິ ເອຕ຺ຕກໍ ກາລໍ ຠຸຕ຺ຕໍ ວາ ປີຕໍ ວາ ກິຎ຺ຈິ ນ ຊານາມິ.

໒໓໗-໓໘. ໂຍ ສໍຍໂມ ໂສ ວິນາໂສຕິ ໂລຠາທິວເສນ ຍໍ ສໍຍມນໍ ກສ຺ສຈິ ອທານໍ, ໂສ ອິເມສໍ ສຕ຺ຕານໍ ວິນາໂສ ນາມ ເປຕໂຍນິຍໍ ນິພ຺ພຕ຺ຕເປຕານໍ ມຫາພ຺ຍສນສ຺ສ ເຫຕຸຠາວໂຕ. ‘‘ໂຍ ວິນາໂສ ໂສ ສໍຍໂມ’’ຕິ ອິມິນາ ຍຖາວຸຕ຺ຕສ຺ສ ອຕ຺ຖສ຺ສ ເອກນ຺ຕິກຠາວໍ ວທຕິ. ເປຕາ ຫິ ກິຣ ຊານນ຺ຕີຕິ ເອຕ຺ຖ ຫິ-ສທ຺ໂທ ອວຘາຣເຓ, ກິຣ-ສທ຺ໂທ ອຣຸຈິສູຈເນ. ‘‘ສໍຍໂມ ເທຍ຺ຍຘມ຺ມສ຺ສ ອປຣິຈ຺ຈາໂຄ ວິນາສເຫຕູ’’ຕິ ອິມມຕ຺ຖໍ ເປຕາ ເອວ ກິຣ ຊານນ຺ຕິ ປຈ຺ຈກ຺ຂໂຕ ອນຸຠຸຍ຺ຍມານຕ຺ຕາ, ນ ມນຸສ຺ສາຕິ. ນຍິທໍ ຍຸຕ຺ຕໍ ມນຸສ຺ສານມ຺ປິ ເປຕານໍ ວິຍ ຂຸປ຺ປິປາສາທີຫິ ອຠິຠຸຍ຺ຍມານານໍ ທິສ຺ສມານຕ຺ຕາ. ເປຕາ ປນ ປຸຣິມຕ຺ຕຠາເວ ກຕກມ຺ມສ຺ສ ປາກຏຠາວໂຕ ຕມຕ຺ຖໍ ສຸຏ຺ຐຸຕຣໍ ຊານນ຺ຕິ. ເຕນາຫ – ‘‘ອຫໍ ປຸເຣ ສໍຍມິສ຺ສ’’ນ຺ຕິອາທິ. ຕຕ຺ຖ ສໍຍມິສ຺ສນ຺ຕິ ສຍມ຺ປິ ທານາທິປຸຎ຺ຎກິຣິຍໂຕ ສໍຍມນໍ ສງ຺ໂກຈໍ ອກາສິໍ. ພຫຸເກ ຘເນຕິ ມຫນ຺ເຕ ຘເນ ວິຊ຺ຊມາເນ.

໒໔໓. ຕນ຺ຕິ ຕສ຺ມາ. ໂວຕິ ຕຸມ຺ເຫ. ຠທ຺ທໍ ໂວຕິ ຠທ຺ທໍ ກລ຺ຍາຓໍ ສຸນ຺ທຣໍ ຕຸມ຺ຫາກໍ ໂຫຕູຕິ ວຈນເສໂສ. ຍາວນ຺ເຕຕ຺ຖ ສມາຄຕາຕິ ຍາວນ຺ໂຕ ຍາວຕກາ ເອຕ຺ຖ ສມາຄຕາ, ເຕ ສພ຺ເພ ມມ ວຈນໍ ສຸຓາຖາຕິ ອຘິປ຺ປາໂຍ. ອາວີຕິ ປກາສນໍ ປເຣສໍ ປາກຏວເສນ. ຣໂຫຕິ ປຏິຈ຺ຉນ຺ນໍ ອປາກຏວເສນ. ອາວິ ວາ ປາຓາຕິປາຕາທິມຸສາວາທາທິກາຍວຈີປໂຍຄວເສນ, ຍທິ ວາ ຣໂຫ ອຠິຊ຺ຌາທິວເສນ ປາປກໍ ລາມກໍ ອກຸສລກມ຺ມໍ ມາກຕ຺ຖ ມາ ກຣິຕ຺ຖ.

໒໔໔. ສເຈ ຕໍ ປາປກໍ ກມ຺ມນ຺ຕິ ອຖ ປນ ຕໍ ປາປກມ຺ມໍ ອາຍຕິໍ ກຣິສ຺ສຖ, ເອຕຣຫິ ວາ ກໂຣຖ, ນິຣຍາທີສຸ ຈຕູສຸ ອປາເຍສຸ ມນຸສ຺ເສສຸ ຈ ອປ຺ປາຍຸກຕາທິວເສນ ຕສ຺ສ ຜລຠູຕາ ທຸກ຺ຂໂຕ ປມຸຕ຺ຕິ ປໂມກ຺ໂຂ ນາມ ນຕ຺ຖິ. ອຸປ຺ປຈ຺ຈາປິ ປລາຍຕນ຺ຕິ ອຸປ຺ປຕິຕ຺ວາ ອາກາເສນ ຄຈ຺ຉນ຺ຕານມ຺ປິ ໂມກ຺ໂຂ ນຕ຺ຖິເຍວາຕິ ອຕ຺ໂຖ. ‘‘ອຸເປຈ຺ຈາ’’ຕິປິ ປາຬິ, ອິໂຕ ວາ ເອຕ຺ໂຕ ວາ ປລາຍນ຺ເຕ ຕຸມ຺ເຫ ອນຸພນ຺ຘິສ຺ສຕີຕິ ອຘິປ຺ປາເຍນ ອຸເປຈ຺ຈ ສຎ຺ຈິຈ຺ຈ ປລາຍນ຺ຕານມ຺ປິ ຕຸມ຺ຫາກໍ ຕໂຕ ໂມກ຺ໂຂ ນຕ຺ຖິ, ຄຕິກາລາທິປຈ຺ຈຍນ຺ຕຣສມວາເຍ ປນ ສຕິ ວິປຈ຺ຈຕິເຍວາຕິ ອຕ຺ໂຖ. ອຍຎ຺ຈ ອຕ຺ໂຖ –

‘‘ນ ອນ຺ຕລິກ຺ເຂ ນ ສມຸທ຺ທມຊ຺ເຌ, ນ ປພ຺ພຕານໍ ວິວຣໍ ປວິສ຺ສ;

ນ ວິຊ຺ຊຕີ ໂສ ຊຄຕິປ຺ປເທໂສ, ຍຕ຺ຖຏ຺ຐິໂຕ ມຸຈ຺ເຈຍ຺ຍ ປາປກມ຺ມາ’’ຕິ. (ຘ. ປ. ໑໒໗; ມິ. ປ. ໔.໒.໔) –

ອິມາຍ ຄາຖາຍ ທີເປຕພ຺ໂພ.

໒໔໕. ມຕ຺ເຕຍ຺ຍາຕິ ມາຕຸຫິຕາ. ໂຫຖາຕິ ເຕສໍ ອຸປຏ຺ຐານາທີນິ ກໂຣຖ. ຕຖາ ເປຕ຺ເຕຍ຺ຍາຕິ ເວທິຕພ຺ພາ. ກຸເລ ເຊຏ຺ຐາປຈາຍິກາຕິ ກຸເລ ເຊຏ຺ຐການໍ ອປຈາຍນກຣາ. ສາມຎ຺ຎາຕິ ສມຓປູຊກາ. ຕຖາ ພ຺ຣຫ຺ມຎ຺ຎາຕິ ພາຫິຕປາປປູຊກາຕິ ອຕ຺ໂຖ. ເອວໍ ສຄ຺ຄໍ ຄມິສ຺ສຖາຕິ ອິມິນາ ມຍາ ວຸຕ຺ຕນເຍນ ປຸຎ຺ຎານິ ກຕ຺ວາ ເທວໂລກໍ ອຸປປຊ຺ຊິສ຺ສຖາຕິ ອຕ຺ໂຖ. ຍໍ ປເນຕ຺ຖ ອຕ຺ຖໂຕ ນ ວິຠຕ຺ຕໍ, ຕໍ ເຫຏ຺ຐາ ຂລ຺ລາຏິຍເປຕວຕ຺ຖຸອາທີສຸ ວຸຕ຺ຕນເຍເນວ ເວທິຕພ຺ພໍ.

ເຕ ວາຓິຊາ ຕສ຺ສ ວຈນໍ ສຸຕ຺ວາ ສໍເວຄຊາຕາ ຕໍ ອນຸກມ຺ປມານາ ຠາຊເນຫິ ປານີຍໍ ຄເຫຕ຺ວາ ຕໍ ສຍາເປຕ຺ວາ ມຸເຂ ອາສິຎ຺ຈິໍສຸ. ຕໂຕ ມຫາຊເນນ ພຫຸເວລໍ ອາສິຕ຺ຕໍ ອຸທກໍ ຕສ຺ສ ເປຕສ຺ສ ປາປພເລນ ອໂຘຄຬໍ ນ ໂອຕິຓ຺ຓໍ, ກຸໂຕ ປິປາສໍ ປຏິວິເນສ຺ສຕິ. ເຕ ຕໍ ປຸຈ຺ຉິໍສຸ – ‘‘ອປິ ເຕ ກາຈິ ອສ຺ສາສມຕ຺ຕາ ລທ຺ຘາ’’ຕິ. ໂສ ອາຫ – ‘‘ຍທິ ເມ ເອຕ຺ຕເກຫິ ຊເນຫິ ເອຕ຺ຕກໍ ເວລໍ ອາສິຎ຺ຈມານໍ ອຸທກໍ ເອກພິນ຺ທຸມຕ຺ຕມ຺ປິ ປຣຄຬໍ ປວິຏ຺ຐໍ, ອິໂຕ ເປຕໂຍນິໂຕ ໂມກ຺ໂຂ ມາ ໂຫຕູ’’ຕິ. ອຖ ເຕ ວາຓິຊາ ຕໍ ສຸຕ຺ວາ ອຕິວິຍ ສໍເວຄຊາຕາ ‘‘ອຕ຺ຖິ ປນ ໂກຈິ ອຸປາໂຍ ປິປາສາວູປສມາຍາ’’ຕິ ອາຫໍສຸ. ໂສ ອາຫ – ‘‘ອິມສ຺ມິໍ ປາປກມ຺ເມ ຂີເຓ ຕຖາຄຕສ຺ສ ວາ ຕຖາຄຕສາວການໍ ວາ ທາເນ ທິນ຺ເນ ມມ ທານມຸທ຺ທິສິສ຺ສຕິ, ອຫໍ ອິໂຕ ເປຕຕ຺ຕໂຕ ມຸຈ຺ຈິສ຺ສາມີ’’ຕິ. ຕໍ ສຸຕ຺ວາ ວາຓິຊາ ສາວຕ຺ຖິໍ ຄນ຺ຕ຺ວາ ຠຄວນ຺ຕໍ ອຸປສງ຺ກມິຕ຺ວາ ຕໍ ປວຕ຺ຕິໍ ອາໂຣເຈຕ຺ວາ ສຣຓານິ ສີລານິ ຈ ຄເຫຕ຺ວາ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ສຕ຺ຕາຫໍ ທານໍ ທຕ຺ວາ ຕສ຺ສ ເປຕສ຺ສ ທກ຺ຂິຓໍ ອາທິສິໍສຸ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ຈຕຸນ຺ນໍ ປຣິສານໍ ຘມ຺ມໍ ເທເສສິ. ມຫາຊໂນ ຈ ໂລຠາທິມຈ຺ເຉຣມລໍ ປຫາຍ ທານາທິປຸຎ຺ຎາຠິຣໂຕ ອໂຫສີຕິ.

ຘນປາລເສຏ຺ຐິເປຕວຕ຺ຖຸວຓ຺ຓນາ ນິຏ຺ຐິຕາ.