໖. ກຓ຺ຫເປຕວຕ຺ຖຸວຓ຺ຓນາ

ອຸຏ຺ເຐຫິ ກຓ຺ຫ ກິໍ ເສສີຕິ ອິທໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ມຕປຸຕ຺ຕໍ ອຸປາສກໍ ອາຣພ຺ຠ ກເຖສິ. ສາວຕ຺ຖິຍໍ ກິຣ ອຎ຺ຎຕຣສ຺ສ ອຸປາສກສ຺ສ ປຸຕ຺ໂຕ ກາລມກາສິ. ໂສ ເຕນ ໂສກສລ຺ລສມປ຺ປິໂຕ ນ ນ຺ຫາຍຕິ, ນ ຠຸຎ຺ຊຕິ, ນ ກມ຺ມນ຺ເຕ ວິຈາເຣຕິ, ນ ພຸທ຺ຘຸປຏ຺ຐານໍ ຄຈ຺ຉຕິ, ເກວລໍ, ‘‘ຕາຕ ປິຍປຸຕ຺ຕກ, ມໍ ໂອຫາຍ ກຫໍ ປຐມຕຣໍ ຄໂຕສີ’’ຕິອາທີນິ ວທນ຺ໂຕ ວິປ຺ປລປຕິ. ສຕ຺ຖາ ປຈ຺ຈູສສມເຍ ໂລກໍ ໂອໂລເກນ຺ໂຕ ຕສ຺ສ ໂສຕາປຕ຺ຕິຜລູປນິສ຺ສຍໍ ທິສ຺ວາ ປຸນທິວເສ ຠິກ຺ຂຸສງ຺ຆປຣິວຸໂຕ ສາວຕ຺ຖິຍໍ ປິຓ຺ຑາຍ ຈຣິຕ຺ວາ ກຕຠຕ຺ຕກິຈ຺ໂຈ ຠິກ຺ຂູ ອຸຍ຺ໂຍເຊຕ຺ວາ ອານນ຺ທຕ຺ເຖເຣນ ປຈ຺ຉາສມເຓນ ຕສ຺ສ ຆຣທ຺ວາຣໍ ອຄມາສິ. ສຕ຺ຖຸ ອາຄຕຠາວໍ ອຸປາສກສ຺ສ ອາໂຣເຈສຸໍ. ອຖສ຺ສ ເຄຫຊໂນ ເຄຫທ຺ວາເຣ ອາສນໍ ປຎ຺ຎາເປຕ຺ວາ ສຕ຺ຖາຣໍ ນິສີທາເປຕ຺ວາ ອຸປາສກໍ ປຣິຄ຺ຄເຫຕ຺ວາ ສຕ຺ຖຸ ສນ຺ຕິກໍ ອຸປເນສິ. ເອກມນ຺ຕໍ ນິສິນ຺ນໍ ຕໍ ທິສ຺ວາ ‘‘ກິໍ, ອຸປາສກ, ໂສຈສີ’’ຕິ ວຕ຺ວາ ‘‘ອາມ, ຠນ຺ເຕ’’ຕິ ວຸຕ຺ເຕ, ‘‘ອຸປາສກ, ໂປຣາຓກປຓ຺ຑິຕາ ປຓ຺ຑິຕານໍ ກຖໍ ສຸຕ຺ວາ ມຕປຸຕ຺ຕໍ ນານຸໂສຈິໍສູ’’ຕິ ວຕ຺ວາ ເຕນ ຍາຈິໂຕ ອຕີຕໍ ອາຫຣິ.

ອຕີເຕ ທ຺ວາຣວຕີນຄເຣ ທສ ຠາຕິກຣາຊາໂນ ອເຫສຸໍ – ວາສຸເທໂວ ພລເທໂວ ຈນ຺ທເທວາ ສູຣິຍເທໂວ ອຄ຺ຄິເທໂວ ວຣຸຓເທໂວ ອຊ຺ຊຸໂນ ປຊ຺ຊຸໂນ ຆຏປຓ຺ຑິໂຕ ອງ຺ກຸໂຣ ຈາຕິ. ເຕສຸ ວາສຸເທວມຫາຣາຊສ຺ສ ປິຍປຸຕ຺ໂຕ ກາລມກາສິ. ເຕນ ຣາຊາ ໂສກປເຣໂຕ ສພ຺ພກິຈ຺ຈານິ ປຫາຍ ມຎ຺ຈສ຺ສ ອຏນິໍ ປຣິຄ຺ຄເຫຕ຺ວາ ວິປ຺ປລປນ຺ໂຕ ນິປຊ຺ຊິ. ຕສ຺ມິໍ ກາເລ ຆຏປຓ຺ຑິໂຕ ຈິນ຺ເຕສິ – ‘‘ຐເປຕ຺ວາ ມໍ ອຎ຺ໂຎ ໂກຈິ ມມ ຠາຕຸ ໂສກໍ ປຣິຫຣິຕຸໍ ສມຕ຺ໂຖ ນາມ ນຕ຺ຖິ, ອຸປາເຍນສ຺ສ ໂສກໍ ຫຣິສ຺ສາມີ’’ຕິ. ໂສ ອຸມ຺ມຕ຺ຕກເວສໍ ຄເຫຕ຺ວາ ‘‘ສສໍ ເມ ເທຖ, ສສໍ ເມ ເທຖາ’’ຕິ ອາກາສໍ ໂອໂລເກນ຺ໂຕ ສກລນຄຣໍ ວິຈຣິ. ‘‘ຆຏປຓ຺ຑິໂຕ ອຸມ຺ມຕ຺ຕໂກ ຊາໂຕ’’ຕິ ສກລນຄຣໍ ສງ຺ຂຸຠິ.

ຕສ຺ມິໍ ກາເລ ໂຣຫິເຓຍ຺ໂຍ ນາມ ອມຈ຺ໂຈ ວາສຸເທວຣຎ຺ໂຎ ສນ຺ຕິກໍ ຄນ຺ຕ຺ວາ ເຕນ ສທ຺ຘິໍ ກຖໍ ສມຸຏ຺ຐາເປນ຺ໂຕ –

໒໐໗. ‘‘ອຸຏ຺ເຐຫິ ກຓ຺ຫ ກິໍ ເສສິ, ໂກ ອຕ຺ໂຖ ສຸປເນນ ເຕ;

ໂຍ ຈ ຕຸຍ຺ຫໍ ສໂກ ຠາຕາ, ຫທຍໍ ຈກ຺ຂຸ ຈ ທກ຺ຂິຓໍ;

ຕສ຺ສ ວາຕາ ພລີຍນ຺ຕິ, ສສໍ ຊປ຺ປຕິ ເກສວາ’’ຕິ. – ອິມໍ ຄາຖມາຫ;

໒໐໗. ຕຕ຺ຖ ກຓ຺ຫາຕິ ວາສຸເທວໍ ໂຄຕ຺ເຕນາລປຕິ. ໂກ ອຕ຺ໂຖ ສຸປເນນ ເຕຕິ ສຸປເນນ ຕຸຍ຺ຫໍ ກາ ນາມ ວຑ຺ຒິ. ສໂກ ຠາຕາຕິ ໂສທຣິໂຍ ຠາຕາ. ຫທຍໍ ຈກ຺ຂຸ ຈ ທກ຺ຂິຓນ຺ຕິ ຫທເຍນ ເຈວ ທກ຺ຂິຓຈກ຺ຂຸນາ ຈ ສທິໂສຕິ ອຕ຺ໂຖ. ຕສ຺ສ ວາຕາ ພລີຍນ຺ຕີຕິ ຕສ຺ສ ອປຣາປຣໍ ອຸປ຺ປຊ຺ຊມານາ ອຸມ຺ມາທວາຕາ ພລວນ຺ໂຕ ໂຫນ຺ຕິ ວຑ຺ຒນ຺ຕິ ອຠິຠວນ຺ຕິ. ສສໍ ຊປ຺ປຕີຕິ ‘‘ສສໍ ເມ ເທຖາ’’ຕິ ວິປ຺ປລປຕິ. ເກສວາຕິ ໂສ ກິຣ ເກສານໍ ໂສຠນານໍ ອຕ຺ຖິຕາຍ ‘‘ເກສໂວ’’ຕິ ໂວຫຣີຍຕິ. ເຕນ ນໍ ນາເມນ ອາລປຕິ.

ຕສ຺ສ ວຈນໍ ສຸຕ຺ວາ ສຍນໂຕ ອຸຏ຺ຐິຕຠາວໍ ທີເປນ຺ໂຕ ສຕ຺ຖາ ອຠິສມ຺ພຸທ຺ໂຘ ຫຸຕ຺ວາ –

໒໐໘. ‘‘ຕສ຺ສ ຕໍ ວຈນໍ ສຸຕ຺ວາ, ໂຣຫິເຓຍ຺ຍສ຺ສ ເກສໂວ;

ຕຣມານຣູໂປ ວຸຏ຺ຐາສິ, ຠາຕຸ ໂສເກນ ອຏ຺ຏິໂຕ’’ຕິ. – ອິມໍ ຄາຖມາຫ;

ຣາຊາ ອຸຏ຺ຐາຍ ສີຆໍ ປາສາທາ ໂອຕຣິຕ຺ວາ ຆຏປຓ຺ຑິຕສ຺ສ ສນ຺ຕິກໍ ຄນ຺ຕ຺ວາ ອຸໂຠສຸ ຫຕ຺ເຖສຸ ນໍ ທຬ຺ຫໍ ຄເຫຕ຺ວາ ເຕນ ສທ຺ຘິໍ ສລ຺ລປນ຺ໂຕ –

໒໐໙. ‘‘ກິໍ ນຸ ອຸມ຺ມຕ຺ຕຣູໂປວ, ເກວລໍ ທ຺ວາຣກໍ ອິມໍ;

ສໂສ ສໂສຕິ ລປສິ, ກີທິສໍ ສສມິຈ຺ຉສິ.

໒໑໐. ‘‘ໂສວຓ຺ຓມຍໍ ມຓິມຍໍ, ໂລຫມຍໍ ອຖ ຣູປິຍມຍໍ;

ສງ຺ຂສິລາປວາຬມຍໍ, ກາຣຍິສ຺ສາມິ ເຕ ສສໍ.

໒໑໑. ‘‘ສນ຺ຕິ ອຎ຺ເຎປິ ສສກາ, ອຣຎ຺ຎວນໂຄຈຣາ;

ເຕປິ ເຕ ອານຍິສ຺ສາມິ, ກີທິສໍ ສສມິຈ຺ຉສີ’’ຕິ. –

ຕິສ຺ໂສ ຄາຖາໂຍ ອຠາສິ.

໒໐໙-໒໑໑. ຕຕ຺ຖ ອຸມ຺ມຕ຺ຕຣູໂປວາຕິ ອຸມ຺ມຕ຺ຕໂກ ວິຍ. ເກວລນ຺ຕິ ສກລໍ. ທ຺ວາຣກນ຺ຕິ ທ຺ວາຣວຕີນຄຣໍ ວິຈຣນ຺ໂຕ. ສໂສ ສໂສຕິ ລປສີຕິ ສໂສ ສໂສຕິ ວິລປສິ. ໂສວຓ຺ຓມຍນ຺ຕິ ສຸວຓ຺ຓມຍໍ. ໂລຫມຍນ຺ຕິ ຕມ຺ພໂລຫມຍໍ. ຣູປິຍມຍນ຺ຕິ ຣຊຕມຍໍ. ຍໍ ອິຈ຺ຉສິ ຕໍ ວເທຫິ, ອຖ ເກນ ໂສຈສິ. ອຎ຺ເຎປິ ອຣຎ຺ເຎ ວນໂຄຈຣາ ສສກາ ອຕ຺ຖິ, ເຕ ເຕ ອານຍິສ຺ສາມິ, ວທ, ຠທ຺ຣມຸຂ, ກີທິສໍ ສສມິຈ຺ຉສີຕິ ຆຏປຓ຺ຑິຕໍ ‘‘ສເສນ ອຕ຺ຖິໂກ’’ຕິ ອຘິປ຺ປາເຍນ ສເສນ ນິມນ຺ເຕສິ. ຕໍ ສຸຕ຺ວາ ຆຏປຓ຺ຑິໂຕ –

໒໑໒. ‘‘ນາຫເມເຕ ສເສ ອິຈ຺ເຉ, ເຍ ສສາ ປຖວິສ຺ສິຕາ;

ຈນ຺ທໂຕ ສສມິຈ຺ຉາມິ, ຕໍ ເມ ໂອຫຣ ເກສວາ’’ຕິ. –

ຄາຖມາຫ. ຕຕ຺ຖ ໂອຫຣາຕິ ໂອຫາເຣຫິ. ຕໍ ສຸຕ຺ວາ ຣາຊາ ‘‘ນິສ຺ສໍສຍໍ ເມ ຠາຕາ ອຸມ຺ມຕ຺ຕໂກ ຊາໂຕ’’ຕິ ໂທມນສ຺ສປ຺ປຕ຺ໂຕ –

໒໑໓. ‘‘ໂສ ນູນ ມຘຸຣໍ ຎາຕິ, ຊີວິຕໍ ວິຊຫິສ຺ສສິ;

ອປຕ຺ຖິຍໍ ປຕ຺ຖຍສິ, ຈນ຺ທໂຕ ສສມິຈ຺ຉສີ’’ຕິ. –

ຄາຖມາຫ. ຕຕ຺ຖ ຎາຕີຕິ ກນິຏ຺ຐໍ ອາລປຕິ. ອຍເມຕ຺ຖ ອຕ຺ໂຖ – ມຍ຺ຫໍ ປິຍຎາຕິ ຍໍ ອຕິມຘຸຣໍ ອຕ຺ຕໂນ ຊີວິຕໍ, ຕໍ ວິຊຫິສ຺ສສິ ມຎ຺ເຎ, ໂຍ ອປຕ຺ຖຍິຕພ຺ພໍ ປຕ຺ເຖສີຕິ.

ຆຏປຓ຺ຑິໂຕ ຣຎ຺ໂຎ ວຈນໍ ສຸຕ຺ວາ ນິຈ຺ຈໂລວ ຐຕ຺ວາ ‘‘ຠາຕິກ, ຕ຺ວໍ ຈນ຺ທໂຕ ສສໍ ປຕ຺ເຖນ຺ຕສ຺ສ ຕໍ ອລຠິຕ຺ວາ ຊີວິຕກ຺ຂໂຍ ຠວິສ຺ສຕີຕິ ຊານນ຺ໂຕ ກສ຺ມາ ມຕໍ ປຸຕ຺ຕໍ ອລຠິຕ຺ວາ ອນຸໂສຈສີ’’ຕິ ອິມມຕ຺ຖໍ ທີເປນ຺ໂຕ –

໒໑໔. ‘‘ເອວໍ ເຈ ກຓ຺ຫ ຊານາສິ, ຍຖຎ຺ຎມນຸສາສສິ;

ກສ຺ມາ ປຸເຣ ມຕໍ ປຸຕ຺ຕໍ, ອຊ຺ຊາປິ ມນຸໂສຈສີ’’ຕິ. –

ຄາຖມາຫ. ຕຕ຺ຖ ເອວໍ ເຈ, ກຓ຺ຫ, ຊານາສີຕິ, ຠາຕິກ, ກຓ຺ຫນາມກ ມຫາຣາຊ, ‘‘ອລພ຺ຠເນຍ຺ຍວຕ຺ຖຸ ນາມ ນ ປຕ຺ເຖຕພ຺ພ’’ນ຺ຕິ ຍທິ ເອວໍ ຊານາສິ. ຍຖຎ຺ຎນ຺ຕິ ເອວໍ ຊານນ຺ໂຕວ ຍຖາ ອຎ຺ຎໍ ອນຸສາສສິ, ຕຖາ ອກຕ຺ວາ. ກສ຺ມາ ປຸເຣ ມຕໍ ປຸຕ຺ຕນ຺ຕິ ອຖ ກສ຺ມາ ອິໂຕ ຈຕຸມາສມຕ຺ຖເກ ມຕໍ ປຸຕ຺ຕໍ ອຊ຺ຊາປິ ອນຸໂສຈສີຕິ.

ເອວໍ ໂສ ອນ຺ຕຣວີຖິຍໍ ຐິຕໂກວ ‘‘ອຫໍ ຕາວ ເອວໍ ປຎ຺ຎາຍມານໍ ປຕ຺ເຖມິ, ຕ຺ວໍ ປນ ອປຎ຺ຎາຍມານສ຺ສຕ຺ຖາຍ ໂສຈສີ’’ຕິ ວຕ຺ວາ ຕສ຺ສ ຘມ຺ມໍ ເທເສນ຺ໂຕ –

໒໑໕. ‘‘ນ ຍໍ ລພ຺ຠາ ມນຸສ຺ເສນ, ອມນຸສ຺ເສນ ວາ ປນ;

ຊາໂຕ ເມ ມາ ມຣິ ປຸຕ຺ໂຕ, ກຸໂຕ ລພ຺ຠາ ອລພ຺ຠິຍໍ.

໒໑໖. ‘‘ນ ມນ຺ຕາ ມູລເຠສຊ຺ຊາ, ໂອສເຘຫິ ຘເນນ ວາ;

ສກ຺ກາ ອານຍິຕຸໍ ກຓ຺ຫ, ຍໍ ເປຕມນຸໂສຈສີ’’ຕິ. – ຄາຖາທ຺ວຍມາຫ;

໒໑໕. ຕຕ຺ຖ ຍນ຺ຕິ, ຠາຕິກ, ຍໍ ‘‘ເອວໍ ຊາໂຕ ເມ ປຸຕ຺ໂຕ ມາ ມຣີ’’ຕິ ມນຸສ຺ເສນ ວາ ເທເວນ ວາ ປນ ນ ລພ຺ຠາ ນ ສກ຺ກາ ລທ຺ຘຸໍ, ຕໍ ຕ຺ວໍ ປຕ຺ເຖສິ, ຕໍ ປເນຕໍ ກຸໂຕ ລພ຺ຠາ, ເກນ ກາຣເຓນ ລທ຺ຘຸໍ ສກ຺ກາ. ຍສ຺ມາ ອລພ຺ຠິຍໍ ອລພ຺ຠເນຍ຺ຍວຕ຺ຖຸ ນາເມຕນ຺ຕິ ອຕ຺ໂຖ.

໒໑໖. ມນ຺ຕາຕິ ມນ຺ຕປ຺ປໂຍເຄນ. ມູລເຠສຊ຺ຊາຕິ ມູລເຠສຊ຺ເຊນ. ໂອສເຘຫີຕິ ນານາວິເຘຫິ ໂອສເຘຫິ. ຘເນນ ວາຕິ ໂກຏິສຕສງ຺ເຂນ ຘເນນ ວາປິ. ອິທໍ ວຸຕ຺ຕໍ ໂຫຕິ – ຍໍ ເປຕມນຸໂສຈສິ, ຕໍ ເອເຕຫິ ມນ຺ຕປ຺ປໂຍຄາທີຫິປິ ອາເນຕຸໍ ນ ສກ຺ກາຕິ.

ປຸນ ຆຏປຓ຺ຑິໂຕ ‘‘ຠາຕິກ, ອິທໍ ມຣຓໍ ນາມ ຘເນນ ວາ ຊາຕິຍາ ວາ ວິຊ຺ຊາຍ ວາ ສີເລນ ວາ ຠາວນາຍ ວາ ນ ສກ຺ກາ ປຏິພາຫິຕຸ’’ນ຺ຕິ ທສ຺ເສນ຺ໂຕ –

໒໑໗. ‘‘ມຫທ຺ຘນາ ມຫາໂຠຄາ, ຣຏ຺ຐວນ຺ໂຕປິ ຂຕ຺ຕິຍາ;

ປຫູຕຘນຘຎ຺ຎາເສ, ເຕປິ ໂນ ອຊຣາມຣາ.

໒໑໘. ‘‘ຂຕ຺ຕິຍາ ພ຺ຣາຫ຺ມຓາ ເວສ຺ສາ, ສຸທ຺ທາ ຈຓ຺ຑາລປຸກ຺ກຸສ຺ສາ;

ເອເຕ ຈຎ຺ເຎ ຈ ຊາຕິຍາ, ເຕປິ ໂນ ອຊຣາມຣາ.

໒໑໙. ‘‘ເຍ ມນ຺ຕໍ ປຣິວຕ຺ເຕນ຺ຕິ, ຉຬງ຺ຄໍ ພ຺ຣຫ຺ມຈິນ຺ຕິຕໍ;

ເອເຕ ຈຎ຺ເຎ ຈ ວິຊ຺ຊາຍ, ເຕປິ ໂນ ອຊຣາມຣາ.

໒໒໐. ‘‘ອິສໂຍ ວາປິ ເຍ ສນ຺ຕາ, ສຎ຺ຎຕຕ຺ຕາ ຕປສ຺ສິໂນ;

ສຣີຣໍ ເຕປິ ກາເລນ, ວິຊຫນ຺ຕິ ຕປສ຺ສິໂນ.

໒໒໑. ‘‘ຠາວິຕຕ຺ຕາ ອຣຫນ຺ໂຕ, ກຕກິຈ຺ຈາ ອນາສວາ;

ນິກ຺ຂິປນ຺ຕິ ອິມໍ ເທຫໍ, ປຸຎ຺ຎປາປປຣິກ຺ຂຍາ’’ຕິ. –

ປຎ຺ຈຫິ ຄາຖາຫິ ຣຎ຺ໂຎ ຘມ຺ມໍ ເທເສສິ.

໒໑໗. ຕຕ຺ຖ ມຫທ຺ຘນາຕິ ນິຘານຄຕສ຺ເສວ ມຫໂຕ ຘນສ຺ສ ອຕ຺ຖິຕາຍ ພຫຸຘນາ. ມຫາໂຠຄາຕິ ເທວໂຠຄສທິສາຍ ມຫຕິຍາ ໂຠຄສມ຺ປຕ຺ຕິຍາ ສມນ຺ນາຄຕາ. ຣຏ຺ຐວນ຺ໂຕຕິ ສກລຣຏ຺ຐວນ຺ໂຕ. ປຫູຕຘນຘຎ຺ຎາເສຕິ ຕິຓ຺ຓໍ ຈຕຸນ຺ນໍ ວາ ສໍວຈ຺ຉຣານໍ ອຕ຺ຖາຍ ນິທຫິຕ຺ວາ ຐເປຕພ຺ພສ຺ສ ນິຈ຺ຈປຣິພ຺ພຍຠູຕສ຺ສ ຘນຘຎ຺ຎສ຺ສ ວເສນ ອປຣິຍນ຺ຕຘນຘຎ຺ຎາ. ເຕປິ ໂນ ອຊຣາມຣາຕິ ເຕປິ ເອວໍ ມຫາວິຠວາ ມນ຺ຘາຕຸມຫາສຸທສ຺ສນາທໂຍ ຂຕ຺ຕິຍາ ອຊຣາມຣາ ນາເຫສຸໍ, ອຎ຺ຎທຕ຺ຖຸ ມຣຓມຸຂເມວ ອນຸປວິຏ຺ຐາຕິ ອຕ຺ໂຖ.

໒໑໘. ເອເຕຕິ ຍຖາວຸຕ຺ຕຂຕ຺ຕິຍາທໂຍ. ອຎ຺ເຎຕິ ອຎ຺ຎຕຣາ ເອວໍຠູຕາ ອມ຺ພຏ຺ຐາທໂຍ. ຊາຕິຍາຕິ ອຕ຺ຕໂນ ຊາຕິນິມິຕ຺ຕໍ ອຊຣາມຣາ ນາເຫສຸນ຺ຕິ ອຕ຺ໂຖ.

໒໑໙. ມນ຺ຕນ຺ຕິ ເວທໍ. ປຣິວຕ຺ເຕນ຺ຕີຕິ ສຊ຺ຌາຍນ຺ຕິ ວາເຈນ຺ຕິ ຈ. ອຖ ວາ ປຣິວຕ຺ເຕນ຺ຕີຕິ ເວທໍ ອນຸປຣິວຕ຺ເຕນ຺ຕາ ໂຫມໍ ກໂຣນ຺ຕາ ຊປນ຺ຕິ. ຉຬງ຺ຄນ຺ຕິ ສິກ຺ຂາກປ຺ປນິຣຸຕ຺ຕິພ຺ຍາກຣຓໂຊຕິສຕ຺ຖຉນ຺ໂທວິຈິຕິສງ຺ຂາເຕຫິ ຉຫິ ອງ຺ເຄຫິ ຍຸຕ຺ຕໍ. ພ຺ຣຫ຺ມຈິນ຺ຕິຕນ຺ຕິ ພ຺ຣາຫ຺ມຓານມຕ຺ຖາຍ ພ຺ຣຫ຺ມນາ ຈິນ຺ຕິຕໍ ກຖິຕໍ. ວິຊ຺ຊາຍາຕິ ພ຺ຣຫ຺ມສທິສວິຊ຺ຊາຍ ສມນ຺ນາຄຕາ, ເຕປິ ໂນ ອຊຣາມຣາຕິ ອຕ຺ໂຖ.

໒໒໐-໒໒໑. ອິສໂຍຕິ ຍມນິຍມາທີນໍ ປຏິກູລສຎ຺ຎາທີນຎ຺ຈ ເອສນຏ຺ເຐນ ອິສໂຍ. ສນ຺ຕາຕິ ກາຍວາຈາຫິ ສນ຺ຕສຠາວາ. ສຎ຺ຎຕຕ຺ຕາຕິ ຣາຄາທີນໍ ສໍຍເມນ ສໍຍຕຈິຕ຺ຕາ. ກາຍຕປນສງ຺ຂາໂຕ ຕໂປ ເອເຕສໍ ອຕ຺ຖີຕິ ຕປສ຺ສິໂນ. ປຸນ ຕປສ຺ສິໂນຕິ ສໍວຣກາ. ເຕນ ເອວໍ ຕປນິສ຺ສິຕກາ ຫຸຕ຺ວາ ສຣີເຣນ ຈ ວິໂມກ຺ຂໍ ປຕ຺ຕຸກາມາປິ ສໍວຣກາ ສຣີຣໍ ວິຊຫນ຺ຕິ ເອວາຕິ ທສ຺ເສຕິ. ອຖ ວາ ອິສໂຍຕິ ອຘິສີລສິກ຺ຂາທີນໍ ເອສນຏ຺ເຐນ ອິສໂຍ, ຕທຕ຺ຖໍ ຕປ຺ປຏິປກ຺ຂານໍ ປາປຘມ຺ມານໍ ວູປສເມນ ສນ຺ຕາ, ເອກາຣມ຺ມເຓ ຈິຕ຺ຕສ຺ສ ສໍຍເມນ ສຎ຺ຎຕຕ຺ຕາ, ສມ຺ມປ຺ປຘານໂຍຄໂຕ ວີຣິຍຕາເປນ ຕປສ຺ສິໂນ, ສປ຺ປໂຍຄາ ຣາຄາທີນໍ ສນ຺ຕປເນນ ຕປສ຺ສິໂນຕິ ໂຍເຊຕພ຺ພໍ. ຠາວິຕຕ຺ຕາຕິ ຈຕຸສຈ຺ຈກມ຺ມຏ຺ຐານຠາວນາຍ ຠາວິຕຈິຕ຺ຕາ.

ເອວໍ ຆຏປຓ຺ຑິເຕນ ຘມ຺ເມ ກຖິເຕ ຕໍ ສຸຕ຺ວາ ຣາຊາ ອປຄຕໂສກສລ຺ໂລ ປສນ຺ນມານໂສ ຆຏປຓ຺ຑິຕໍ ປສໍສນ຺ໂຕ –

໒໒໒. ‘‘ອາທິຕ຺ຕໍ ວຕ ມໍ ສນ຺ຕໍ, ຆຏສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈໍ, ສພ຺ພໍ ນິພ຺ພາປເຍ ທຣໍ.

໒໒໓. ‘‘ອພ຺ພຫີ ວຕ ເມ ສລ຺ລໍ, ໂສກໍ ຫທຍນິສ຺ສິຕໍ;

ໂຍ ເມ ໂສກປເຣຕສ຺ສ, ປຸຕ຺ຕໂສກໍ ອປານຸທິ.

໒໒໔. ‘‘ສ຺ວາຫໍ ອພ຺ພູຬ຺ຫສລ຺ໂລສ຺ມິ, ສີຕິຠູໂຕສ຺ມິ ນິພ຺ພຸໂຕ;

ນ ໂສຈາມິ ນ ໂຣທາມິ, ຕວ ສຸຕ຺ວານ ຠາຕິກ.

໒໒໕. ‘‘ເອວໍ ກໂຣນ຺ຕິ ສປ຺ປຎ຺ຎາ, ເຍ ໂຫນ຺ຕິ ອນຸກມ຺ປກາ;

ນິວຕ຺ຕຍນ຺ຕິ ໂສກມ຺ຫາ, ຆໂຏ ເຊຏ຺ຐໍວ ຠາຕຣໍ.

໒໒໖. ‘‘ຍສ຺ສ ເອຕາທິສາ ໂຫນ຺ຕິ, ອມຈ຺ຈາ ປຣິຈາຣກາ;

ສຸຠາສິເຕນ ອນ຺ເວນ຺ຕິ, ຆໂຏ ເຊຏ຺ຐໍວ ຠາຕຣ’’ນ຺ຕິ. – ເສສຄາຖາ ອຠາສິ;

໒໒໕. ຕຕ຺ຖ ຆໂຏ ເຊຏ຺ຐໍວ ຠາຕຣນ຺ຕິ ຍຖາ ຆຏປຓ຺ຑິໂຕ ອຕ຺ຕໂນ ເຊຏ຺ຐຠາຕຣໍ ມຕປຸຕ຺ຕໂສກາຠິຠູຕໍ ອຕ຺ຕໂນ ອຸປາຍໂກສລ຺ເລນ ເຈວ ຘມ຺ມກຖາຍ ຈ ຕໂຕ ປຸຕ຺ຕໂສກໂຕ ວິນິວຕ຺ຕຍິ, ເອວໍ ອຎ຺ເຎປິ ສປ຺ປຎ຺ຎາ ເຍ ໂຫນ຺ຕິ ອນຸກມ຺ປກາ, ເຕ ຎາຕີນໍ ອຸປກາຣໍ ກໂຣນ຺ຕີຕິ ອຕ຺ໂຖ.

໒໒໖. ຍສ຺ສ ເອຕາທິສາ ໂຫນ຺ຕີຕິ ອຍໍ ອຠິສມ຺ພຸທ຺ຘຄາຖາ. ຕສ຺ສຕ຺ໂຖ – ຍຖາ ເຍນ ກາຣເຓນ ປຸຕ຺ຕໂສກປເຣຕໍ ຣາຊານໍ ວາສຸເທວໍ ຆຏປຓ຺ຑິໂຕ ໂສກຫຣຓຕ຺ຖາຍ ສຸຠາສິເຕນ ອນ຺ເວສິ ອນຸເອສິ, ຍສ຺ສ ອຎ຺ຎສ຺ສາປິ ເອຕາທິສາ ປຓ຺ຑິຕາ ອມຈ຺ຈາ ປຏິລທ຺ຘາ ອສ຺ສຸ, ຕສ຺ສ ກຸໂຕ ໂສໂກຕິ! ເສສຄາຖາ ເຫຏ຺ຐາ ວຸຕ຺ຕຕ຺ຖາ ເອວາຕິ.

ສຕ຺ຖາ ອິມໍ ຘມ຺ມເທສນໍ ອາຫຣິຕ຺ວາ ‘‘ເອວໍ, ອຸປາສກ, ໂປຣາຓກປຓ຺ຑິຕາ ປຓ຺ຑິຕານໍ ກຖໍ ສຸຕ຺ວາ ປຸຕ຺ຕໂສກໍ ຫຣິໍສູ’’ຕິ ວຕ຺ວາ ສຈ຺ຈານິ ປກາເສຕ຺ວາ ຊາຕກໍ ສໂມຘາເນສິ. ສຈ຺ຈປຣິໂຍສາເນ ອຸປາສໂກ ໂສຕາປຕ຺ຕິຜເລ ປຕິຏ຺ຐຫີຕິ.

ກຓ຺ຫເປຕວຕ຺ຖຸວຓ຺ຓນາ ນິຏ຺ຐິຕາ.