໕. ມຏ຺ຐກຸຓ຺ຑລີເປຕວຕ຺ຖຸວຓ຺ຓນາ

ອລງ຺ກໂຕ ມຏ຺ຐກຸຓ຺ຑລີຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ມຏ຺ຐກຸຓ຺ຑລິເທວປຸຕ຺ຕໍ ອາຣພ຺ຠ ວຸຕ຺ຕໍ. ຕຕ຺ຖ ຍໍ ວຕ຺ຕພ຺ພໍ, ຕໍ ປຣມຕ຺ຖທີປນິຍໍ ວິມານວຕ຺ຖຸວຓ຺ຓນາຍໍ ມຏ຺ຐກຸຓ຺ຑລີວິມານວຕ຺ຖຸວຓ຺ຓນາຍ (ວິ. ວ. ອຏ຺ຐ. ໑໒໐໖ ມຏ຺ຐກຸຓ຺ຑລີວິມານວຓ຺ຓນາ) ວຸຕ຺ຕເມວ, ຕສ຺ມາ ຕຕ຺ຖ ວຸຕ຺ຕນເຍເນວ ເວທິຕພ຺ພໍ.

ເອຕ຺ຖ ຈ ມຏ຺ຐກຸຓ຺ຑລີເທວປຸຕ຺ຕສ຺ສ ວິມານເທວຕາຠາວໂຕ ຕສ຺ສ ວຕ຺ຖຸ ຍທິປິ ວິມານວຕ຺ຖຸປາຬິຍໍ ສງ຺ຄຫໍ ອາໂຣປິຕໍ, ຍສ຺ມາ ປນ ໂສ ເທວປຸຕ຺ໂຕ ອທິນ຺ນປຸພ຺ພກພ຺ຣາຫ຺ມຓສ຺ສ ປຸຕ຺ຕໂສເກນ ສຸສານໍ ຄນ຺ຕ຺ວາ ອາຬາຫນໍ ອນຸປຣິຍາຍິຕ຺ວາ ໂຣທນ຺ຕສ຺ສ ໂສກຫຣຓຕ຺ຖໍ ອຕ຺ຕໂນ ເທວຣູປໍ ປຏິສໍຫຣິຕ຺ວາ ຫຣິຈນ຺ທນຸສ຺ສໂທ ພາຫາ ປຄ຺ຄຍ຺ຫ ກນ຺ທນ຺ໂຕ ທຸກ຺ຂາຠິຠູຕາກາເຣນ ເປໂຕ ວິຍ ອຕ຺ຕານໍ ທສ຺ເສສິ. ມນຸສ຺ສຕ຺ຕຠາວໂຕ ອເປຕຕ຺ຕາ ເປຕປຣິຍາໂຍປິ ລພ຺ຠຕິ ເອວາຕິ ຕສ຺ສ ວຕ຺ຖຸ ເປຕວຕ຺ຖຸປາຬິຍມ຺ປິ ສງ຺ຄຫໍ ອາໂຣປິຕນ຺ຕິ ທຏ຺ຐພ຺ພໍ.

ມຏ຺ຐກຸຓ຺ຑລີເປຕວຕ຺ຖຸວຓ຺ຓນາ ນິຏ຺ຐິຕາ.