໔. ນນ຺ທາເປຕິວຕ຺ຖຸວຓ຺ຓນາ

ກາຬີ ທຸພ຺ພຓ຺ຓຣູປາສີຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ນນ຺ທໍ ນາມ ເປຕິໍ ອາຣພ຺ຠ ວຸຕ຺ຕໍ. ສາວຕ຺ຖິຍາ ກິຣ ອວິທູເຣ ອຎ຺ຎຕຣສ຺ມິໍ ຄາມເກ ນນ຺ທິເສໂນ ນາມ ອຸປາສໂກ ອໂຫສິ ສທ຺ໂຘ ປສນ຺ໂນ. ຠຣິຍາ ປນສ຺ສ ນນ຺ທາ ນາມ ອສ຺ສທ຺ຘາ ອປ຺ປສນ຺ນາ ມຈ຺ຉຣິນີ ຈຓ຺ຑີ ຜຣຸສວຈນາ ສາມິເກ ອຄາຣວາ ອຄ຺ຄຕິສ຺ສາ ສສ຺ສຸໍ ໂຈຣິວາເທນ ອກ຺ໂກສຕິ ປຣິຠາສຕິ. ສາ ອປເຣນ ສມເຍນ ກາລໍ ກຕ຺ວາ ເປຕໂຍນິຍໍ ນິພ຺ພຕ຺ຕິຕ຺ວາ ຕສ຺ເສວ ຄາມສ຺ສ ອວິທູເຣ ວິຈຣນ຺ຕີ ເອກທິວສໍ ນນ຺ທິເສນສ຺ສ ອຸປາສກສ຺ສ ຄາມໂຕ ນິກ຺ຂມນ຺ຕສ຺ສ ອວິທູເຣ ອຕ຺ຕານໍ ທສ຺ເສສິ. ໂສ ຕໍ ທິສ຺ວາ –

໑໖໘. ‘‘ກາຬີ ທຸພ຺ພຓ຺ຓຣູປາສິ, ຜຣຸສາ ຠີຣຸທສ຺ສນາ;

ປິງ຺ຄລາສິ ກຬາຣາສິ, ນ ຕໍ ມຎ຺ຎາມິ ມານຸສິ’’ນ຺ຕິ. –

ຄາຖາຍ ອຊ຺ຌຠາສິ. ຕຕ຺ຖ ກາຬີຕິ ກາຬວຓ຺ຓາ, ຌາມງ຺ຄາຣສທິໂສ ຫິສ຺ສາ ວຓ຺ໂຓ ອໂຫສິ. ຜຣຸສາຕິ ຂຣຄຕ຺ຕາ. ຠີຣຸທສ຺ສນາຕິ ຠຍານກທສ຺ສນາ ສປ຺ປຏິຠຍາກາຣາ. ‘‘ຠາຣຸທສ຺ສນາ’’ຕິ ວາ ປາໂຐ, ຠາຣິຍທສ຺ສນາ, ທຸພ຺ພຓ຺ຓຕາທິນາ ທຸທ຺ທສິກາຕິ ອຕ຺ໂຖ. ປິງ຺ຄລາຕິ ປິງ຺ຄລໂລຈນາ. ກຬາຣາຕິ ກຬາຣທນ຺ຕາ. ນ ຕໍ ມຎ຺ຎາມິ ມານຸສິນ຺ຕິ ອຫໍ ຕໍ ມານຸສິນ຺ຕິ ນ ມຎ຺ຎາມິ, ເປຕິເມວ ຈ ຕໍ ມຎ຺ຎາມີຕິ ອຘິປ຺ປາໂຍ. ຕໍ ສຸຕ຺ວາ ເປຕີ ອຕ຺ຕານໍ ປກາເສນ຺ຕີ –

໑໖໙. ‘‘ອຫໍ ນນ຺ທາ ນນ຺ທິເສນ, ຠຣິຍາ ເຕ ປຸເຣ ອຫຸໍ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’’ຕິ. –

ຄາຖມາຫ. ຕຕ຺ຖ ອຫໍ ນນ຺ທາ ນນ຺ທິເສນາຕິ ສາມິ ນນ຺ທິເສນ ອຫໍ ນນ຺ທາ ນາມ. ຠຣິຍາ ເຕ ປຸເຣ ອຫຸນ຺ຕິ ປຸຣິມຊາຕິຍໍ ຕຸຍ຺ຫໍ ຠຣິຍາ ອໂຫສິໍ. ອິໂຕ ປຣໍ –

໑໗໐. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສ ກມ຺ມວິປາເກນ, ເປຕໂລກໍ ອິໂຕ ຄຕາ’’ຕິ. –

ຕສ຺ສ ອຸປາສກສ຺ສ ປຸຈ຺ຉາ. ອຖສ຺ສ ສາ –

໑໗໑. ‘‘ຈຓ຺ຑີ ຈ ຜຣຸສາ ຈາສິໍ, ຕຍິ ຈາປິ ອຄາຣວາ;

ຕາຫໍ ທຸຣຸຕ຺ຕໍ ວຕ຺ວານ, ເປຕໂລກໍ ອິໂຕ ຄຕາ’’ຕິ. –

ວິສ຺ສຊ຺ເຊສິ. ປຸນ ໂສ –

໑໗໒. ‘‘ຫນ຺ທຸຕ຺ຕຣີຍໍ ທທາມິ ເຕ, ອິມໍ ທຸສ຺ສໍ ນິວາສຍ;

ອິມໍ ທຸສ຺ສໍ ນິວາເສຕ຺ວາ, ເອຫິ ເນສ຺ສາມິ ຕໍ ຆຣໍ.

໑໗໓. ‘‘ວຕ຺ຖຎ຺ຈ ອນ຺ນປານຎ຺ຈ, ລຈ຺ຉສິ ຕ຺ວໍ ຆຣໍ ຄຕາ;

ປຸຕ຺ເຕ ຈ ເຕ ປສ຺ສິສ຺ສສິ, ສຸຓິສາໂຍ ຈ ທກ຺ຂສີ’’ຕິ. – ອຖສ຺ສ ສາ –

໑໗໔. ‘‘ຫຕ຺ເຖນ ຫຕ຺ເຖ ເຕ ທິນ຺ນໍ, ນ ມຍ຺ຫໍ ອຸປກປ຺ປຕິ;

ຠິກ຺ຂູ ຈ ສີລສມ຺ປນ຺ເນ, ວີຕຣາເຄ ພຫຸສ຺ສຸເຕ.

໑໗໕. ‘‘ຕປ຺ເປຫິ ອນ຺ນປາເນນ, ມມ ທກ຺ຂິຓມາທິສ;

ຕທາຫໍ ສຸຂິຕາ ເຫສ຺ສໍ, ສພ຺ພກາມສມິທ຺ຘິນີ’’ຕິ. –

ທ຺ເວ ຄາຖາ ອຠາສິ. ຕໂຕ –

໑໗໖. ‘‘ສາຘູຕິ ໂສ ປຏິສ຺ສຸຕ຺ວາ, ທານໍ ວິປຸລມາກິຣິ;

ອນ຺ນໍ ປານໍ ຂາທນີຍໍ, ວຕ຺ຖເສນາສນານິ ຈ;

ຉຕ຺ຕໍ ຄນ຺ຘຎ຺ຈ ມາລຎ຺ຈ, ວິວິຘາ ຈ ອຸປາຫນາ.

໑໗໗. ‘‘ຠິກ຺ຂູ ຈ ສີລສມ຺ປນ຺ເນ, ວີຕຣາເຄ ພຫຸສ຺ສຸເຕ;

ຕປ຺ເປຕ຺ວາ ອນ຺ນປາເນນ, ຕສ຺ສາ ທກ຺ຂິຓມາທິສີ.

໑໗໘. ‘‘ສມນນ຺ຕຣານຸທ຺ທິຏ຺ເຐ, ວິປາໂກ ອຸທປຊ຺ຊຖ;

ໂຠຊນຈ຺ຉາທນປານີຍໍ, ທກ຺ຂິຓາຍ ອິທໍ ຜລໍ.

໑໗໙. ‘‘ຕໂຕ ສຸທ຺ຘາ ສຸຈິວສນາ, ກາສິກຸຕ຺ຕມຘາຣິນີ;

ວິຈິຕ຺ຕວຕ຺ຖາຠຣຓາ, ສາມິກໍ ອຸປສງ຺ກມີ’’ຕິ. –

ຈຕສ຺ໂສ ຄາຖາ ສງ຺ຄີຕິກາເຣຫິ ວຸຕ຺ຕາ. ຕໂຕ ປຣໍ –

໑໘໐. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໘໑. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໘໒. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໘໓. ‘‘ອຫໍ ນນ຺ທາ ນນ຺ທິເສນ, ຠຣິຍາ ເຕ ປຸເຣ ອຫຸໍ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ.

໑໘໔. ‘‘ຕວ ທິນ຺ເນນ ທາເນນ, ໂມທາມິ ອກຸໂຕຠຍາ;

ຈິຣໍ ຊີວ ຄຫປຕິ, ສຫ ສພ຺ເພຫິ ຎາຕິຠິ;

ອໂສກໍ ວິຣຊໍ ເຂມໍ, ອາວາສໍ ວສວຕ຺ຕິນໍ.

໑໘໕. ‘‘ອິຘ ຘມ຺ມໍ ຈຣິຕ຺ວານ, ທານໍ ທຕ຺ວາ ຄຫປຕິ;

ວິເນຍ຺ຍ ມຈ຺ເຉຣມລໍ ສມູລໍ, ອນິນ຺ທິໂຕ ສຄ຺ຄມຸເປຫິ ຐານ’’ນ຺ຕິ. –

ອຸປາສກສ຺ສ ຈ ເປຕິຍາ ຈ ວຈນປຏິວຈນຄາຖາ.

໑໗໖. ຕຕ຺ຖ ທານໍ ວິປຸລມາກິຣີຕິ ອຸກ຺ຂິເຓຍ຺ຍເຂຕ຺ເຕ ເທຍ຺ຍຘມ຺ມພີຊໍ ວິປ຺ປກິຣນ຺ໂຕ ວິຍ ມຫາທານໍ ປວຕ຺ເຕສິ. ເສສໍ ອນນ຺ຕຣວຕ຺ຖຸສທິສເມວ.

ເອວໍ ສາ ອຕ຺ຕໂນ ທິພ຺ພສມ຺ປຕ຺ຕິໍ ຕສ຺ສາ ຈ ກາຣຓໍ ນນ຺ທິເສນສ຺ສ ວິຠາເວຕ຺ວາ ອຕ຺ຕໂນ ວສນຏ຺ຐານເມວ ຄຕາ. ອຸປາສໂກ ຕໍ ປວຕ຺ຕິໍ ຠິກ຺ຂູນໍ ອາໂຣເຈສິ, ຠິກ຺ຂູ ຠຄວໂຕ ອາໂຣເຈສຸໍ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ນນ຺ທາເປຕິວຕ຺ຖຸວຓ຺ຓນາ ນິຏ຺ຐິຕາ.