໓. ມຕ຺ຕາເປຕິວຕ຺ຖຸວຓ຺ຓນາ

ນຄ຺ຄາ ທຸພ຺ພຓ຺ຓຣູປາສີຕິ ອິທໍ ສຕ຺ຖຣິ ເຊຕວເນ ວິຫຣນ຺ເຕ ມຕ຺ຕໍ ນາມ ເປຕິໍ ອາຣພ຺ຠ ວຸຕ຺ຕໍ. ສາວຕ຺ຖິຍໍ ກິຣ ອຎ຺ຎຕໂຣ ກຸຏຸມ຺ພິໂກ ສທ຺ໂຘ ປສນ຺ໂນ ອໂຫສິ. ຕສ຺ສ ຠຣິຍາ ອສ຺ສທ຺ຘາ ອປ຺ປສນ຺ນາ ໂກຘນາ ວຎ຺ຌາ ຈ ອໂຫສິ ນາເມນ ມຕ຺ຕາ ນາມ. ອຖ ໂສ ກຸຏຸມ຺ພິໂກ ກຸລວໍສູປຈ຺ເຉທນຠເຍນ ສທິສກຸລໂຕ ຕິສ຺ສໍ ນາມ ອຎ຺ຎໍ ກຎ຺ຎໍ ອາເນສິ. ສາ ອໂຫສິ ສທ຺ຘາ ປສນ຺ນາ ສາມິໂນ ຈ ປິຍາ ມນາປາ, ສາ ນຈິຣສ຺ເສວ ຄພ຺ຠິນີ ຫຸຕ຺ວາ ທສມາສຈ຺ຈເຍນ ປຸຕ຺ຕໍ ວິຊາຍິ, ‘‘ຠູໂຕ’’ຕິສ຺ສ ນາມໍ ອໂຫສິ. ສາ ເຄຫສ຺ສາມິນີ ຫຸຕ຺ວາ ຈຕ຺ຕາໂຣ ຠິກ຺ຂູ ສກ຺ກຈ຺ຈໍ ອຸປຏ຺ຐຫິ, ວຎ຺ຌາ ປນ ຕໍ ອຸສູຍຕິ.

ຕາ ອຸໂຠປິ ເອກສ຺ມິໍ ທິວເສ ສີສໍ ນ຺ຫຕ຺ວາ ອລ຺ລເກສາ ອຏ຺ຐໍສຸ, ກຸຏຸມ຺ພິໂກ ຄຸຓວເສນ ຕິສ຺ສາຍ ອາພທ຺ຘສິເນໂຫ ມນຸຎ຺ເຎນ ຫທເຍນ ຕາຍ ສທ຺ຘິໍ ພຫຸໍ ສລ຺ລປນ຺ໂຕ ອຏ຺ຐາສິ. ຕໍ ອສຫມານາ ມຕ຺ຕາ ອິສ຺ສາປກຕາ ເຄເຫ ສມ຺ມຊ຺ຊິຕ຺ວາ ຐປິຕໍ ສງ຺ກາຣໍ ຕິສ຺ສາຍ ມຕ຺ຖເກ ໂອກິຣິ. ສາ ອປເຣນ ສມເຍນ ກາລໍ ກຕ຺ວາ ເປຕໂຍນິຍໍ ນິພ຺ພຕ຺ຕິຕ຺ວາ ອຕ຺ຕໂນ ກມ຺ມພເລນ ປຎ຺ຈວິຘໍ ທຸກ຺ຂໍ ອນຸຠວຕິ. ຕໍ ປນ ທຸກ຺ຂໍ ປາຬິໂຕ ເອວ ວິຎ຺ຎາຍຕິ. ອເຖກທິວສໍ ສາ ເປຕີ ສຎ຺ຌາຍ ວີຕິວຕ຺ຕາຍ ເຄຫສ຺ສ ປິຏ຺ຐິປສ຺ເສ ນ຺ຫາຍນ຺ຕິຍາ ຕິສ຺ສາຍ ອຕ຺ຕານໍ ທສ຺ເສສິ. ຕໍ ທິສ຺ວາ ຕິສ຺ສາ –

໑໓໔. ‘‘ນຄ຺ຄາ ທຸພ຺ພຓ຺ຓຣູປາສິ, ກິສາ ຘມນິສນ຺ຖຕາ;

ອຸປ຺ຜາສຸລິເກ ກິສິເກ, ກາ ນຸ ຕ຺ວໍ ອິຘ ຕິຏ຺ຐສີ’’ຕິ. –

ຄາຖາຍ ປຏິປຸຈ຺ຉິ. ອິຕຣາ –

໑໓໕. ‘‘ອຫໍ ມຕ຺ຕາ ຕຸວໍ ຕິສ຺ສາ, ສປຕ຺ຕີ ເຕ ປຸເຣ ອຫຸໍ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ’’ຕິ. –

ຄາຖາຍ ປຏິວຈນໍ ອທາສິ. ຕຕ຺ຖ ອຫໍ ມຕ຺ຕາ ຕຸວໍ ຕິສ຺ສາຕິ ອຫໍ ມຕ຺ຕາ ນາມ, ຕຸວໍ ຕິສ຺ສາ ນາມ. ປຸເຣຕິ ປຸຣິມຕ຺ຕຠາເວ. ເຕຕິ ຕຸຍ຺ຫໍ ສປຕ຺ຕີ ອຫຸໍ, ອໂຫສິນ຺ຕິ ອຕ຺ໂຖ. ປຸນ ຕິສ຺ສາ –

໑໓໖. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ເປຕໂລກໍ ອິໂຕ ຄຕາ’’ຕິ. –

ຄາຖາຍ ກຕກມ຺ມໍ ປຸຈ຺ຉິ. ປຸນ ອິຕຣາ –

໑໓໗. ‘‘ຈຓ຺ຑີ ຈ ຜຣຸສາ ຈາສິໍ, ອິສ຺ສຸກີ ມຈ຺ຉຣີ ສຐາ;

ຕາຫໍ ທຸຣຸຕ຺ຕໍ ວຕ຺ວານ, ເປຕໂລກໍ ອິໂຕ ຄຕາ’’ຕິ. –

ຄາຖາຍ ອຕ຺ຕນາ ກຕກມ຺ມໍ ອາຈິກ຺ຂິ. ຕຕ຺ຖ ຈຓ຺ຑີຕິ ໂກຘນາ. ຜຣຸສາຕິ ຜຣຸສວຈນາ. ອາສິນ຺ຕິ ອໂຫສິໍ. ຕາຫນ຺ຕິ ຕໍ ອຫໍ. ທຸຣຸຕ຺ຕນ຺ຕິ ທຸພ຺ຠາສິຕໍ ນິຣຕ຺ຖກວຈນໍ. ອິໂຕ ປຣມ຺ປິ ຕາສໍ ວຈນປຏິວຈນວເສເນວ ຄາຖາ ປວຕ຺ຕາ –

໑໓໘. ‘‘ສພ຺ພໍ ອຫມ຺ປິ ຊານາມິ, ຍຖາ ຕ຺ວໍ ຈຓ຺ຑິກາ ອຫຸ;

ອຎ຺ຎຎ຺ຈ ໂຂ ຕໍ ປຸຈ຺ຉາມິ, ເກນາສິ ປໍສຸກຸນ຺ຖິຕາ.

໑໓໙. ‘‘ສີສໍນ຺ຫາຕາ ຕຸວໍ ອາສິ, ສຸຈິວຕ຺ຖາ ອລງ຺ກຕາ;

ອຫຎ຺ຈ ໂຂ ອຘິມຕ຺ຕໍ, ສມລງ຺ກຕຕຣາ ຕຍາ.

໑໔໐. ‘‘ຕສ຺ສາ ເມ ເປກ຺ຂມານາຍ, ສາມິເກນ ສມນ຺ຕຍິ;

ຕໂຕ ເມ ອິສ຺ສາ ວິປຸລາ, ໂກໂຘ ເມ ສມຊາຍຖ.

໑໔໑. ‘‘ຕໂຕ ປໍສຸໍ ຄເຫຕ຺ວານ, ປໍສຸນາ ຕຎ຺ຫິ ໂອກິຣິໍ;

ຕສ຺ສກມ຺ມວິປາເກນ, ເຕນມ຺ຫິ ປໍສຸກຸນ຺ຖິຕາ.

໑໔໒. ‘‘ສພ຺ພໍ ອຫມ຺ປິ ຊານາມິ, ປໍສຸນາ ມໍ ຕ຺ວໂມກິຣິ;

ອຎ຺ຎຎ຺ຈ ໂຂ ຕໍ ປຸຈ຺ຉາມິ, ເກນ ຂຊ຺ຊສິ ກຈ຺ຉຸຍາ.

໑໔໓. ‘‘ເຠສຊ຺ຊຫາຣີ ອຸຠໂຍ, ວນນ຺ຕໍ ອຄມິມ຺ຫເສ;

ຕ຺ວຎ຺ຈ ເຠສຊ຺ຊມາຫຣິ, ອຫຎ຺ຈ ກປິກຈ຺ຉຸໂນ.

໑໔໔. ‘‘ຕສ຺ສາ ຕ຺ຍາຊານມານາຍ, ເສຍ຺ຍໍ ຕ຺ຍາຫໍ ສໂມກິຣິໍ;

ຕສ຺ສກມ຺ມວິປາເກນ, ເຕນ ຂຊ຺ຊາມິ ກຈ຺ຉຸຍາ.

໑໔໕. ‘‘ສພ຺ພໍ ອຫມ຺ປິ ຊານາມິ, ເສຍ຺ຍໍ ເມ ຕ຺ວໍ ສໂມກິຣິ;

ອຎ຺ຎຎ຺ຈ ໂຂ ຕໍ ປຸຈ຺ຉາມິ, ເກນາສິ ນຄ຺ຄິຍາ ຕຸວໍ.

໑໔໖. ‘‘ສຫາຍານໍ ສມໂຍ ອາສິ, ຎາຕີນໍ ສມິຕີ ອຫຸ;

ຕ຺ວຎ຺ຈ ອາມນ຺ຕິຕາ ອາສິ, ສສາມິນີ ໂນ ຈ ໂຂຫໍ.

໑໔໗. ‘‘ຕສ຺ສາ ຕ຺ຍາຊານມານາຍ, ທຸສ຺ສໍ ຕ຺ຍາຫໍ ອປານຸທິໍ;

ຕສ຺ສກມ຺ມວິປາເກນ, ເຕນມ຺ຫິ ນຄ຺ຄິຍາ ອຫໍ.

໑໔໘. ‘‘ສພ຺ພໍ ອຫມ຺ປິ ຊານາມິ, ທຸສ຺ສໍ ເມ ຕ຺ວໍ ອປານຸທິ;

ອຎ຺ຎຎ຺ຈ ໂຂ ຕໍ ປຸຈ຺ຉາມິ, ເກນາສິ ຄູຖຄນ຺ຘິນີ.

໑໔໙. ‘‘ຕວ ຄນ຺ຘຎ຺ຈ ມາລຎ຺ຈ, ປຈ຺ຈຄ຺ຆຎ຺ຈ ວິເລປນໍ;

ຄູຖກູເປ ອຕາເຣສິໍ, ຕໍ ປາປໍ ປກຕໍ ມຍາ;

ຕສ຺ສກມ຺ມວິປາເກນ, ເຕນມ຺ຫິ ຄູຖຄນ຺ຘິນີ.

໑໕໐. ‘‘ສພ຺ພໍ ອຫມ຺ປິ ຊານາມິ, ຕໍ ປາປໍ ປກຕໍ ຕຍາ;

ອຎ຺ຎຎ຺ຈ ໂຂ ຕໍ ປຸຈ຺ຉາມິ, ເກນາສິ ທຸຄ຺ຄຕາ ຕຸວໍ.

໑໕໑. ‘‘ອຸຠິນ຺ນໍ ສມກໍ ອາສິ, ຍໍ ເຄເຫ ວິຊ຺ຊເຕ ຘນໍ;

ສນ຺ເຕສຸ ເທຍ຺ຍຘມ຺ເມສຸ, ທີປໍ ນາກາສິມຕ຺ຕໂນ;

ຕສ຺ສກມ຺ມວິປາເກນ, ເຕນມ຺ຫິ ທຸຄ຺ຄຕາ ອຫໍ.

໑໕໒. ‘‘ຕເທວ ມໍ ຕ຺ວໍ ອວຈ, ປາປກມ຺ມໍ ນິເສວສິ;

ນ ຫິ ປາເປຫິ ກມ຺ເມຫິ, ສຸລຠາ ໂຫຕິ ສຸຄ຺ຄຕິ.

໑໕໓. ‘‘ວາມໂຕ ມໍ ຕ຺ວໍ ປຈ຺ເຈສິ, ອໂຖປິ ມໍ ອຸສູຍສິ;

ປສ຺ສ ປາປານໍ ກມ຺ມານໍ, ວິປາໂກ ໂຫຕິ ຍາທິໂສ.

໑໕໔. ‘‘ເຕ ຆຣາ ຕາ ຈ ທາສິໂຍ, ຕາເນວາຠຣຓານິເມ;

ເຕ ອຎ຺ເຎ ປຣິຈາເຣນ຺ຕິ, ນ ໂຠຄາ ໂຫນ຺ຕິ ສສ຺ສຕາ.

໑໕໕. ‘‘ອິທານິ ຠູຕສ຺ສ ປິຕາ, ອາປຓາ ເຄຫເມຫິຕິ;

ອປ຺ເປວ ເຕ ທເທ ກິຎ຺ຈິ, ມາ ສຸ ຕາວ ອິໂຕ ອຄາ.

໑໕໖. ‘‘ນຄ຺ຄາ ທຸພ຺ພຓ຺ຓຣູປາມ຺ຫິ, ກິສາ ຘມນິສນ຺ຖຕາ;

ໂກປີນເມຕໍ ອິຕ຺ຖີນໍ, ມາ ມໍ ຠູຕປິຕາທ຺ທສ.

໑໕໗. ‘‘ຫນ຺ທ ກິໍ ວາ ຕ຺ຍາຫໍ ທມ຺ມິ, ກິໍ ວາ ເຕຈ ກໂຣມຫໍ;

ເຍນ ຕ຺ວໍ ສຸຂິຕາ ອສ຺ສ, ສພ຺ພກາມສມິທ຺ຘິນີ.

໑໕໘. ‘‘ຈຕ຺ຕາໂຣ ຠິກ຺ຂູ ສງ຺ຆໂຕ, ຈຕ຺ຕາໂຣ ປນ ປຸຄ຺ຄເລ;

ອຏ຺ຐ ຠິກ຺ຂູ ໂຠຊຍິຕ຺ວາ, ມມ ທກ຺ຂິຓມາທິສ;

ຕທາຫໍ ສຸຂິຕາ ເຫສ຺ສໍ, ສພ຺ພກາມສມິທ຺ຘິນີ.

໑໕໙. ‘‘ສາຘູຕິ ສາ ປຏິສ຺ສຸຕ຺ວາ, ໂຠຊຍິຕ຺ວາຏ຺ຐ ຠິກ຺ຂໂວ;

ວຕ຺ເຖຫຈ຺ຉາທຍິຕ຺ວານ, ຕສ຺ສາ ທກ຺ຂິຓມາທິສີ.

໑໖໐. ‘‘ສມນນ຺ຕຣານຸທ຺ທິຏ຺ເຐ, ວິປາໂກ ອຸທປຊ຺ຊຖ;

ໂຠຊນຈ຺ຉາທນປານີຍໍ, ທກ຺ຂິຓາຍ ອິທໍ ຜລໍ.

໑໖໑. ‘‘ຕໂຕ ສຸທ຺ຘາ ສຸຈິວສນາ, ກາສິກຸຕ຺ຕມຘາຣິນີ;

ວິຈິຕ຺ຕວຕ຺ຖາຠຣຓາ, ສປຕ຺ຕິໍ ອຸປສງ຺ກມິ.

໑໖໒. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໖໓. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໖໔. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສີ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີຕິ.

໑໖໕. ‘‘ອຫໍ ມຕ຺ຕາ ຕຸວໍ ຕິສ຺ສາ, ສປຕ຺ຕີ ເຕ ປຸເຣ ອຫຸໍ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ.

໑໖໖. ‘‘ຕວ ທິນ຺ເນນ ທາເນນ, ໂມທາມິ ອກຸໂຕຠຍາ;

ຈິຣໍ ຊີວາຫິ ຠຄິນິ, ສຫ ສພ຺ເພຫິ ຎາຕິຠິ;

ອໂສກໍ ວິຣຊໍ ຐານໍ, ອາວາສໍ ວສວຕ຺ຕິນໍ.

໑໖໗. ‘‘ອິຘ ຘມ຺ມໍ ຈຣິຕ຺ວານ, ທານໍ ທຕ຺ວານ ໂສຠເນ;

ວິເນຍ຺ຍ ມຈ຺ເຉຣມລໍ ສມູລໍ, ອນິນ຺ທິຕາ ສຄ຺ຄມຸເປຫິ ຐານ’’ນ຺ຕິ.

໑໓໘. ຕຕ຺ຖ ສພ຺ພໍ ອຫມ຺ປິ ຊານາມິ, ຍຖາ ຕ຺ວໍ ຈຓ຺ຑິກາ ອຫູຕິ ‘‘ຈຓ຺ຑີ ຈ ຜຣຸສາ ຈາສິ’’ນ຺ຕິ ຍໍ ຕຍາ ວຸຕ຺ຕໍ, ຕໍ ສພ຺ພໍ ອຫມ຺ປິ ຊານາມິ, ຍຖາ ຕ຺ວໍ ຈຓ຺ຑິກາ ໂກຘນາ ຜຣຸສວຈນາ ອິສ຺ສຸກີ ມຈ຺ຉຣີ ສຐາ ຈ ອໂຫສິ. ອຎ຺ຎຎ຺ຈ ໂຂ ຕໍ ປຸຈ຺ຉາມີຕິ ອຎ຺ຎໍ ປຸນ ຕໍ ອິທານິ ປຸຈ຺ຉາມິ. ເກນາສິ ປໍສຸກຸນ຺ຖິຕາຕິ ເກນ ກມ຺ເມນ ສງ຺ກາຣປໍສູຕິ ໂອຄຸຓ຺ຐິຕາ ສພ຺ພໂສ ໂອກິຓ຺ຓສຣີຣາ ອຫູຕິ ອຕ຺ໂຖ.

໑໓໙-໔໐. ສີສໍນ຺ຫາຕາຕິ ສສີສໍ ນ຺ຫາຕາ. ອຘິມຕ຺ຕນ຺ຕິ ອຘິກຕຣໍ. ສມລງ຺ກຕຕຣາຕິ ສມ຺ມາ ອຕິສເຍນ ອລງ຺ກຕາ. ‘‘ອຘິມຕ຺ຕາ’’ຕິ ວາ ປາໂຐ, ອຕິວິຍ ມຕ຺ຕາ ມານມທມຕ຺ຕາ, ມານນິສ຺ສິຕາຕິ ອຕ຺ໂຖ. ຕຍາຕິ ໂຠຕິຍາ. ສາມິເກນ ສມນ຺ຕຍີຕິ ສາມິເກນ ສທ຺ຘິໍ ອລ຺ໂລປສລ຺ລາປວເສນ ກເຖສິ.

໑໔໒-໑໔໔. ຂຊ຺ຊສິ ກຈ຺ຉຸຍາຕິ ກຈ຺ຉຸໂຣເຄນ ຂາທີຍສິ, ພາຘີຍສີຕິ ອຕ຺ໂຖ. ເຠສຊ຺ຊຫາຣີຕິ ເຠສຊ຺ຊຫາຣິນິໂຍ ໂອສຘຫາຣິກາໂຍ. ອຸຠໂຍຕິ ທຸເວ, ຕ຺ວຎ຺ຈ ອຫຎ຺ຈາຕິ ອຕ຺ໂຖ. ວນນ຺ຕນ຺ຕິ ວນໍ. ຕ຺ວຎ຺ຈ ເຠສຊ຺ຊມາຫຣີຕິ ຕ຺ວໍ ເວຊ຺ເຊຫິ ວຸຕ຺ຕໍ ອຕ຺ຕໂນ ອຸປກາຣາວຫໍ ເຠສຊ຺ຊໍ ອາຫຣິ. ອຫຎ຺ຈ ກປິກຈ຺ຉຸໂນຕິ ອຫໍ ປນ ກປິກຈ຺ຉຸຜລານິ ທຸຜສ຺ສຜລານິ ອາຫຣິໍ. ກປິກຈ຺ຉູຕິ ວາ ສຍໍຠູຕາ ວຸຈ຺ຈຕິ, ຕສ຺ມາ ສຍໍຠູຕາຍ ປຕ຺ຕຜລານິ ອາຫຣິນ຺ຕິ ອຕ຺ໂຖ. ເສຍ຺ຍໍ ຕ຺ຍາຫໍ ສໂມກິຣິນ຺ຕິ ຕວ ເສຍ຺ຍໍ ອຫໍ ກປິກຈ຺ຉຸຜລປຕ຺ເຕຫິ ສມນ຺ຕໂຕ ອວກິຣິໍ.

໑໔໖-໑໔໗. ສຫາຍານນ຺ຕິ ມິຕ຺ຕານໍ. ສມໂຍຕິ ສມາຄໂມ. ຎາຕີນນ຺ຕິ ພນ຺ຘູນໍ. ສມິຕີຕິ ສນ຺ນິປາໂຕ. ອາມນ຺ຕິຕາຕິ ມງ຺ຄລກິຣິຍາວເສນ ນິມນ຺ຕິຕາ. ສສາມິນີຕິ ສຠຕ຺ຕິກາ, ສຫ ຠຕ຺ຕຸນາຕິ ອຕ຺ໂຖ. ໂນ ຈ ໂຂຫນ຺ຕິ ໂນ ຈ ໂຂ ອຫໍ ອາມນ຺ຕິຕາ ອາສິນ຺ຕິ ໂຍຊນາ. ທຸສ຺ສໍ ຕ຺ຍາຫນ຺ຕິ ທຸສ຺ສໍ ເຕ ອຫໍ. ອປານຸທິນ຺ຕິ ໂຈຣິກາຍ ອວຫຣິໍ ອຄ຺ຄໂຫສິໍ.

໑໔໙. ປຈ຺ຈຄ຺ຆນ຺ຕິ ອຠິນວໍ, ມຫຄ຺ຆໍ ວາ. ອຕາເຣສິນ຺ຕິ ຂິປິໍ. ຄູຖຄນ຺ຘິນີຕິ ຄູຖຄນ຺ຘຄນ຺ຘິນີ ກຣີສວາຍິນີ.

໑໕໑. ຍໍ ເຄເຫ ວິຊ຺ຊເຕ ຘນນ຺ຕິ ຍໍ ເຄເຫ ຘນໍ ອຸປລພ຺ຠຕິ, ຕໍ ຕຸຍ຺ຫໍ ມຍ຺ຫຎ຺ຈາຕິ ອມ຺ຫາກໍ ອຸຠິນ຺ນ ສມກໍ ຕຸລ຺ຍເມວ ອາສິ. ສນ຺ເຕສູຕິ ວິຊ຺ຊມາເນສຸ. ທີປນ຺ຕິ ປຕິຏ຺ຐໍ, ປຸຎ຺ຎກມ຺ມໍ ສນ຺ຘາຍ ວທຕິ.

໑໕໒. ເອວໍ ສາ ເປຕີ ຕິສ຺ສາຍ ປຸຈ຺ຉິຕມຕ຺ຖໍ ກຕ຺ເຖຕ຺ວາ ປຸນ ປຸພ຺ເພ ຕສ຺ສາ ວຈນໍ ອກຕ຺ວາ ອຕ຺ຕນາ ກຕໍ ອປຣາຘໍ ປກາເສນ຺ຕີ ‘‘ຕເທວ ມໍ ຕ຺ວ’’ນ຺ຕິອາທິມາຫ. ຕຕ຺ຖ ຕເທວາຕິ ຕທາ ເອວ, ມຍ຺ຫໍ ມນຸສ຺ສຕ຺ຕຠາເວ ຐິຕກາເລເຍວ. ຕເຖວາຕິ ວາ ປາໂຐ, ຍຖາ ເອຕຣຫິ ຊາຕໍ, ຕໍ ຕຖາ ເອວາຕິ ອຕ຺ໂຖ. ມນ຺ຕິ ອຕ຺ຕານໍ ນິທ຺ທິສຕິ, ຕ຺ວນ຺ຕິ ຕິສ຺ສໍ. ອວຈາຕິ ອຠຓິ. ຍຖາ ປນ ອວຈ, ຕໍ ທສ຺ເສຕຸໍ ‘‘ປາປກມ຺ມ’’ນ຺ຕິອາທິ ວຸຕ຺ຕໍ. ‘‘ປາປກມ຺ມານີ’’ຕິ ປາຬິ. ‘‘ຕ຺ວໍ ປາປກມ຺ມານິເຍວ ກໂຣສິ, ປາເປຫິ ປນ ກມ຺ເມຫິ ສຸຄຕິ ສຸລຠາ ນ ໂຫຕິ, ອຖ ໂຂ ທຸຄ຺ຄຕິ ເອວ ສຸລຠາ’’ຕິ ຍຖາ ມໍ ຕ຺ວໍ ປຸພ຺ເພ ອວຈ ໂອວທິ, ຕໍ ຕເຖວາຕິ ວທຕິ.

໑໕໓. ຕໍ ສຸຕ຺ວາ ຕິສ຺ສາ ‘‘ວາມໂຕ ມໍ ຕ຺ວໍ ປຈ຺ເຈສີ’’ຕິອາທິນາ ຕິສ຺ໂສ ຄາຖາ ອາຫ. ຕຕ຺ຖ ວາມໂຕ ມໍ ຕ຺ວໍ ປຈ຺ເຈສີຕິ ວິໂລມໂຕ ມໍ ຕ຺ວໍ ອຘິຄຈ຺ຉສິ, ຕຸຍ຺ຫໍ ຫິເຕສິມ຺ປິ ວິປຈ຺ຈນີກກາຣິນິໍ ກຕ຺ວາ ມໍ ຄຓ຺ຫາສິ. ມໍ ອຸສູຍສີຕິ ມຍ຺ຫໍ ອຸສູຍສິ, ມຍິ ອິສ຺ສໍ ກໂຣສິ. ປສ຺ສ ປາປານໍ ກມ຺ມານໍ, ວິປາໂກ ໂຫຕິ ຍາທິໂສຕິ ປາປການໍ ນາມ ກມ຺ມານໍ ວິປາໂກ ຍາທິໂສ ຍຖາ ໂຆຣຕໂຣ, ຕໍ ປຈ຺ຈກ຺ຂໂຕ ປສ຺ສາຕິ ວທຕິ.

໑໕໔. ເຕ ອຎ຺ເຎ ປຣິຈາເຣນ຺ຕີຕິ ເຕ ຆເຣ ທາສິໂຍ ອາຠຣຓານິ ຈ ອິມານິ ຕຍາ ປຸພ຺ເພ ປຣິຄ຺ຄຫິຕານິ ອິທານິ ອຎ຺ເຎ ປຣິຈາເຣນ຺ຕິ ປຣິຠຸຎ຺ຊນ຺ຕິ. ‘‘ອິເມ’’ຕິ ຫິ ລິງ຺ຄວິປລ຺ລາເສນ ວຸຕ຺ຕໍ. ນ ໂຠຄາ ໂຫນ຺ຕິ ສສ຺ສຕາຕິ ໂຠຄາ ນາເມເຕ ນ ສສ຺ສຕາ ອນວຏ຺ຐິຕາ ຕາວກາລິກາ ມຫາຍຄມນີຍາ, ຕສ຺ມາ ຕທຕ຺ຖໍ ອິສ຺ສາມຈ຺ຉຣິຍາທີນິ ນ ກຕ຺ຕພ຺ພານີຕິ ອຘິປ຺ປາໂຍ.

໑໕໕. ອິທານິ ຠູຕສ຺ສ ປິຕາຕິ ອິທາເນວ ຠູຕສ຺ສ ມຍ຺ຫໍ ປຸຕ຺ຕສ຺ສ ປິຕາ ກຸຏຸມ຺ພິໂກ. ອາປຓາຕິ ອາປຓໂຕ ອິມໍ ເຄຫໍ ເອຫິຕິ ອາຄມິສ຺ສຕິ. ອປ຺ເປວ ເຕ ທເທ ກິຎ຺ຈີຕິ ເຄຫໍ ອາຄໂຕ ກຸຏຸມ຺ພິໂກ ຕຸຍ຺ຫໍ ທາຕພ຺ພຍຸຕ຺ຕກໍ ກິຎ຺ຈິ ເທຍ຺ຍຘມ຺ມໍ ອປິ ນາມ ທເທຍ຺ຍ. ມາ ສຸ ຕາວ ອິໂຕ ອຄາຕິ ອິໂຕ ເຄຫສ຺ສ ປຈ຺ຉາ ວຕ຺ຖຸໂຕ ມາ ຕາວ ອຄມາສີຕິ ຕໍ ອນຸກມ຺ປມານາ ອາຫ.

໑໕໖. ຕໍ ສຸຕ຺ວາ ເປຕີ ອຕ຺ຕໂນ ອຊ຺ຌາສຍໍ ປກາເສນ຺ຕີ ‘‘ນຄ຺ຄາ ທຸພ຺ພຓ຺ຓຣູປາມ຺ຫີ’’ຕິ ຄາຖມາຫ. ຕຕ຺ຖ ໂກປີນເມຕໍ ອິຕ຺ຖີນນ຺ຕິ ເອຕໍ ນຄ຺ຄທຸພ຺ພຓ຺ຓຕາທິກໍ ປຏິຈ຺ຉາເທຕພ຺ພຕາຍ ອິຕ຺ຖີນໍ ໂກປີນໍ ຣຸນ຺ຘນີຍໍ. ມາ ມໍ ຠູຕປິຕາທ຺ທສາຕິ ຕສ຺ມາ ຠູຕສ຺ສ ປິຕາ ກຸຏຸມ຺ພິໂກ ມໍ ມາ ອທ຺ທກ຺ຂີຕິ ລຊ຺ຊມານາ ວທຕິ.

໑໕໗. ຕໍ ສຸຕ຺ວາ ຕິສ຺ສາ ສຎ຺ຊາຕນຸທ຺ທຍາ ‘‘ຫນ຺ທ ກິໍ ວາ ຕ຺ຍາຫໍ ທມ຺ມີ’’ຕິ ຄາຖມາຫ. ຕຕ຺ຖ ຫນ຺ທາຕິ ໂຈທນຕ຺ເຖ ນິປາໂຕ. ກິໍ ວາ ຕ຺ຍາຫໍ ທມ຺ມີຕິ ກິໍ ເຕ ອຫໍ ທມ຺ມິ, ກິໍ ວຕ຺ຖໍ ທສ຺ສາມິ, ອຸທາຫຸ ຠຕ຺ຕນ຺ຕິ. ກິໍ ວາ ເຕຘ ກໂຣມຫນ຺ຕິ ກິໍ ວາ ອຎ຺ຎໍ ເຕ ອິຘ ອິມສ຺ມິໍ ກາເລ ອຸປກາຣໍ ກຣິສ຺ສາມິ.

໑໕໘. ຕໍ ສຸຕ຺ວາ ເປຕີ ‘‘ຈຕ຺ຕາໂຣ ຠິກ຺ຂູ ສງ຺ຆໂຕ’’ຕິ ຄາຖມາຫ. ຕຕ຺ຖ ຈຕ຺ຕາໂຣ ຠິກ຺ຂູ ສງ຺ຆໂຕ, ຈຕ຺ຕາໂຣ ປນ ປຸຄ຺ຄເລຕິ ຠິກ຺ຂຸສງ຺ຆໂຕ ສງ຺ຆວເສນ ຈຕ຺ຕາໂຣ ຠິກ຺ຂູ, ປຸຄ຺ຄລວເສນ ຈຕ຺ຕາໂຣ ຠິກ຺ຂູຕິ ເອວໍ ອຏ຺ຐ ຠິກ຺ຂູ ຍຖາຣຸຈິໍ ໂຠເຊຕ຺ວາ ຕໍ ທກ຺ຂິຓໍ ມມ ອາທິສ, ມຍ຺ຫໍ ປຕ຺ຕິທານໍ ເທຫິ. ຕທາຫໍ ສຸຂິຕາ ເຫສ຺ສນ຺ຕິ ຍທາ ຕ຺ວໍ ທກ຺ຂິຓໍ ມມ ອຸທ຺ທິສິສ຺ສສິ, ຕທາ ອຫໍ ສຸຂິຕາ ສຸຂປ຺ປຕ຺ຕາ ສພ຺ພກາມສມິທ຺ຘິນີ ຠວິສ຺ສາມີຕິ ອຕ຺ໂຖ.

໑໕໙-໑໖໑. ຕໍ ສຸຕ຺ວາ ຕິສ຺ສາ ຕມຕ຺ຖໍ ອຕ຺ຕໂນ ສາມິກສ຺ສ ອາໂຣເຈຕ຺ວາ ທຸຕິຍທິວເສ ອຏ຺ຐ ຠິກ຺ຂູ ໂຠເຊຕ຺ວາ ຕສ຺ສາ ທກ຺ຂິຓມາທິສິ, ສາ ຕາວເທວ ປຏິລທ຺ຘທິພ຺ພສມ຺ປຕ຺ຕິກາ ປຸນ ຕິສ຺ສາຍ ສນ຺ຕິກໍ ອຸປສງ຺ກມິ. ຕມຕ຺ຖໍ ທສ຺ເສຕຸໍ ສງ຺ຄີຕິກາເຣຫິ ‘‘ສາຘູຕິ ສາ ປຏິສ຺ສຸຕ຺ວາ’’ຕິອາທິກາ ຕິສ຺ໂສ ຄາຖາ ຐປິຕາ.

໑໖໒-໑໖໗. ອຸປສງ຺ກມິຕ຺ວາ ຐິຕໍ ປນ ນໍ ຕິສ຺ສາ ‘‘ອຠິກ຺ກນ຺ເຕນ ວຓ຺ເຓນາ’’ຕິອາທີຫິ ຕີຫິ ຄາຖາຫິ ປຏິປຸຈ຺ຉິ. ອິຕຣາ ‘‘ອຫໍ ມຕ຺ຕາ’’ຕິ ຄາຖາຍ ອຕ຺ຕານໍ ອາຈິກ຺ຂິຕ຺ວາ ‘‘ຈິຣໍ ຊີວາຫີ’’ຕິ ຄາຖາຍ ຕສ຺ສາ ອນຸໂມທນໍ ທຕ຺ວາ ‘‘ອິຘ ຘມ຺ມໍ ຈຣິຕ຺ວານາ’’ຕິ ຄາຖາຍ ໂອວາທໍ ອທາສິ. ຕຕ຺ຖ ຕວ ທິນ຺ເນນາຕິ ຕຍາ ທິນ຺ເນນ. ອໂສກໍ ວິຣຊໍ ຐານນ຺ຕິ ໂສກາຠາເວນ ອໂສກໍ, ເສທຊລ຺ລິການໍ ປນ ອຠາເວນ ວິຣຊໍ ທິພ຺ພຏ຺ຐານໍ, ສພ຺ພເມຕໍ ເທວໂລກໍ ສນ຺ຘາຍ ວທຕິ. ອາວາສນ຺ຕິ ຐານໍ. ວສວຕ຺ຕິນນ຺ຕິ ທິພ຺ເພນ ອາຘິປເຕຍ຺ເຍນ ອຕ຺ຕໂນ ວສໍ ວຕ຺ເຕນ຺ຕານໍ. ສມູລນ຺ຕິ ສໂລຠໂທສໍ. ໂລຠໂທສາ ຫິ ມຈ຺ຉຣິຍສ຺ສ ມູລໍ ນາມ. ອນິນ຺ທິຕາຕິ ອຄຣຫິຕາ ປາສໍສາ, ສຄ຺ຄມຸເປຫິ ຐານນ຺ຕິ ຣູປາທີຫິ ວິສເຍຫິ ສຸຏ຺ຐຸ ອຄ຺ຄຕ຺ຕາ ‘‘ສຄ຺ຄ’’ນ຺ຕິ ລທ຺ຘນາມໍ ທິພ຺ພຏ຺ຐານໍ ອຸເປຫິ, ສຸຄຕິປຣາຍຓາ ໂຫຫີຕິ ອຕ຺ໂຖ. ເສສໍ ອຸຕ຺ຕານເມວ.

ອຖ ຕິສ຺ສາ ຕໍ ປວຕ຺ຕິໍ ກຸຏຸມ຺ພິກສ຺ສ ອາໂຣເຈສິ, ກຸຏຸມ຺ພິໂກ ຠິກ຺ຂູນໍ ອາໂຣເຈສິ, ຠິກ຺ຂູ ຠຄວໂຕ ອາໂຣເຈສຸໍ. ຠຄວາ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ, ຕໍ ສຸຕ຺ວາ ມຫາຊໂນ ປຏິລທ຺ຘສໍເວໂຄ ວິເນຍ຺ຍ ມຈ຺ເຉຣາທິມລໍ ທານສີລາທິຣໂຕ ສຸຄຕິປຣາຍໂຓ ອໂຫສີຕິ.

ມຕ຺ຕາເປຕິວຕ຺ຖຸວຓ຺ຓນາ ນິຏ຺ຐິຕາ.