໙. ມຫາເປສກາຣເປຕິວຕ຺ຖຸວຓ຺ຓນາ

ຄູຖຎ຺ຈ ມຸຕ຺ຕໍ ຣຸຫິຣຎ຺ຈ ປຸພ຺ພນ຺ຕິ ອິທໍ ສຕ຺ຖຣິ ສາວຕ຺ຖິຍໍ ວິຫຣນ຺ເຕ ອຎ຺ຎຕຣໍ ເປສກາຣເປຕິໍ ອາຣພ຺ຠ ວຸຕ຺ຕໍ. ທ຺ວາທສມຕ຺ຕາ ກິຣ ຠິກ຺ຂູ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ວສນໂຍຄ຺ຄຏ຺ຐານໍ ວີມໍສນ຺ຕາ ອຸປກຏ຺ຐາຍ ວສ຺ສູປນາຍິກາຍ ອຎ຺ຎຕຣໍ ຉາຍູທກສມ຺ປນ຺ນໍ ຣມຓີຍໍ ອຣຎ຺ຎາຍຕນໍ ຕສ຺ສ ຈ ນາຕິທູເຣ ນາຈ຺ຈາສນ຺ເນ ໂຄຈຣຄາມໍ ທິສ຺ວາ ຕຕ຺ຖ ເອກຣຕ຺ຕິໍ ວສິຕ຺ວາ ທຸຕິຍທິວເສ ຄາມໍ ປິຓ຺ຑາຍ ປວິສິໍສຸ. ຕຕ຺ຖ ເອກາທສ ເປສກາຣາ ປຏິວສນ຺ຕິ, ເຕ ເຕ ຠິກ຺ຂູ ທິສ຺ວາ ສຎ຺ຊາຕໂສມນສ຺ສາ ຫຸຕ຺ວາ ອຕ຺ຕໂນ ອຕ຺ຕໂນ ເຄຫໍ ເນຕ຺ວາ ປຓີເຕນ ອາຫາເຣນ ປຣິວິສິຕ຺ວາ ອາຫໍສຸ ‘‘ກຸຫິໍ, ຠນ຺ເຕ, ຄຈ຺ຉຖາ’’ຕິ? ‘‘ຍຕ຺ຖ ອມ຺ຫາກໍ ຜາສຸກໍ, ຕຕ຺ຖ ຄມິສ຺ສາມາ’’ຕິ. ‘‘ຍທິ ເອວໍ, ຠນ຺ເຕ, ອິເຘວ ວສິຕພ຺ພ’’ນ຺ຕິ ວສ຺ສູປຄມນໍ ຍາຈິໍສຸ. ຠິກ຺ຂູ ສມ຺ປຏິຈ຺ຉິໍສຸ. ອຸປາສກາ ເຕສໍ ຕຕ຺ຖ ອຣຎ຺ຎກຸຏິກາໂຍ ກາເຣຕ຺ວາ ອທໍສຸ. ຠິກ຺ຂູ ຕຕ຺ຖ ວສ຺ສໍ ອຸປຄຈ຺ຉິໍສຸ.

ຕຕ຺ຖ ເຊຏ຺ຐກເປສກາໂຣ ທ຺ເວ ຠິກ຺ຂູ ຈຕູຫິ ປຈ຺ຈເຍຫິ ສກ຺ກຈ຺ຈໍ ອຸປຏ຺ຐຫິ, ອິຕເຣ ເອເກກໍ ຠິກ຺ຂຸໍ ອຸປຏ຺ຐຫິໍສຸ. ເຊຏ຺ຐກເປສກາຣສ຺ສ ຠຣິຍາ ອສ຺ສທ຺ຘາ ອປ຺ປສນ຺ນາ ມິຈ຺ຉາທິຏ຺ຐິກາ ມຈ຺ຉຣິນີ ຠິກ຺ຂູ ນ ສກ຺ກຈ຺ຈໍ ອຸປຏ຺ຐາຕິ. ໂສ ຕໍ ທິສ຺ວາ ຕສ຺ສາເຍວ ກນິຏ຺ຐຠຄິນິໍ ອາເນຕ຺ວາ ອຕ຺ຕໂນ ເຄເຫ ອິສ຺ສຣິຍໍ ນິຍ຺ຍາເທສິ. ສາ ສທ຺ຘາ ປສນ຺ນາ ຫຸຕ຺ວາ ສກ຺ກຈ຺ຈໍ ຠິກ຺ຂູ ປຏິຊຄ຺ຄິ. ເຕ ສພ຺ເພ ເປສກາໂຣ ວສ຺ສໍ ວຸຕ຺ຖານໍ ຠິກ຺ຂູນໍ ເອເກກສ຺ສ ເອເກກໍ ສາຏກມທໍສຸ. ຕຕ຺ຖ ມຈ຺ຉຣິນີ ເຊຏ຺ຐເປສກາຣສ຺ສ ຠຣິຍາ ປທຸຏ຺ຐຈິຕ຺ຕາ ອຕ຺ຕໂນ ສາມິກໍ ປຣິຠາສິ – ‘‘ຍໍ ຕຍາ ສມຓານໍ ສກ຺ຍປຸຕ຺ຕິຍານໍ ທານໍ ທິນ຺ນໍ ອນ຺ນປານໍ, ຕໍ ເຕ ປຣໂລເກ ຄູຖມຸຕ຺ຕໍ ປຸພ຺ພໂລຫິຕຎ຺ຈ ຫຸຕ຺ວາ ນິພ຺ພຕ຺ຕຕຸ, ສາຏກາ ຈ ຊລິຕາ ອໂຍມຍປຏ຺ຏາ ໂຫນ຺ຕູ’’ຕິ.

ຕຕ຺ຖ ເຊຏ຺ຐເປສກາໂຣ ອປເຣນ ສມເຍນ ກາລໍ ກຕ຺ວາ ວິຎ຺ຌາຏວິຍໍ ອານຸຠາວສມ຺ປນ຺ນາ ຣຸກ຺ຂເທວຕາ ຫຸຕ຺ວາ ນິພ຺ພຕ຺ຕິ. ຕສ຺ສ ປນ ກທຣິຍາ ຠຣິຍາ ກາລໍ ກຕ຺ວາ ຕສ຺ເສວ ວສນຏ຺ຐານສ຺ສ ອວິທູເຣ ເປຕີ ຫຸຕ຺ວາ ນິພ຺ພຕ຺ຕິ. ສາ ນຄ຺ຄາ ທຸພ຺ພຓ຺ຓຣູປາ ຊິຆຈ຺ຉາປິປາສາຠິຠູຕາ ຕສ຺ສ ຠູມເທວສ຺ສ ສນ຺ຕິກໍ ຄນ຺ຕ຺ວາ ອາຫ – ‘‘ອຫໍ, ສາມິ, ນິຈ຺ໂຈຬາ ອຕິວິຍ ຊິຆຈ຺ຉາປິປາສາຠິຠູຕາ ວິຈຣາມິ, ເທຫິ ເມ ວຕ຺ຖໍ ອນ຺ນປານຎ຺ຈາ’’ຕິ. ໂສ ຕສ຺ສາ ທິພ຺ພໍ ອຸຬາຣໍ ອນ຺ນປານໍ ອຸປເນສິ. ຕໍ ຕາຍ ຄຫິຕມຕ຺ຕເມວ ຄູຖມຸຕ຺ຕໍ ປຸພ຺ພໂລຫິຕຎ຺ຈ ສມ຺ປຊ຺ຊຕິ, ສາຏກຎ຺ຈ ທິນ຺ນໍ ຕາຍ ປຣິທຫິຕໍ ປຊ຺ຊລິຕໍ ອໂຍມຍປຏ຺ຏໍ ໂຫຕິ. ສາ ມຫາທຸກ຺ຂໍ ອນຸຠວນ຺ຕີ ຕໍ ຉຑ຺ເຑຕ຺ວາ ກນ຺ທນ຺ຕີ ວິຈຣຕິ.

ເຕນ ຈ ສມເຍນ ອຎ຺ຎຕໂຣ ຠິກ຺ຂຸ ວຸຕ຺ຖວສ຺ໂສ ສຕ຺ຖາຣໍ ວນ຺ທິຕຸໍ ຄຈ຺ຉນ຺ໂຕ ມຫຕາ ສຕ຺ເຖນ ສທ຺ຘິໍ ວິຎ຺ຌາຏວິໍ ປຏິປຊ຺ຊິ. ສຕ຺ຖິກາ ຣຕ຺ຕິໍ ມຄ຺ຄໍ ຄນ຺ຕ຺ວາ ທິວາ ວເນ ສນ຺ທຈ຺ຉາຍູທກສມ຺ປນ຺ນໍ ປເທສໍ ທິສ຺ວາ ຍານານິ ມຸຎ຺ຈິຕ຺ວາ ມຸຫຸຕ຺ຕໍ ວິສ຺ສມິໍສຸ. ຠິກ຺ຂຸ ປນ ວິເວກກາມຕາຍ ໂຖກໍ ອປກ຺ກມິຕ຺ວາ ອຎ຺ຎຕຣສ຺ສ ສນ຺ທຈ຺ຉາຍສ຺ສ ວນຄຫນປຏິຈ຺ຉນ຺ນສ຺ສ ຣຸກ຺ຂສ຺ສ ມູເລ ສງ຺ຆາຏິໍ ປຎ຺ຎເປຕ຺ວາ ນິປນ຺ໂນ ຣຕ຺ຕິຍໍ ມຄ຺ຄຄມນປຣິສ຺ສເມນ ກິລນ຺ຕກາໂຍ ນິທ຺ທໍ ອຸປຄຎ຺ຉິ. ສຕ຺ຖິກາ ວິສ຺ສມິຕ຺ວາ ມຄ຺ຄໍ ປຏິປຊ຺ຊິໍສຸ, ໂສ ຠິກ຺ຂຸ ນ ປຏິພຸຊ຺ຌິ. ອຖ ສາຍນ຺ຫສມເຍ ອຸຏ຺ຐຫິຕ຺ວາ ເຕ ອປສ຺ສນ຺ໂຕ ອຎ຺ຎຕຣໍ ກຸມ຺ມຄ຺ຄໍ ປຏິປຊ຺ຊິຕ຺ວາ ອນຸກ຺ກເມນ ຕສ຺ສາ ເທວຕາຍ ວສນຏ຺ຐານໍ ສມ຺ປາປຸຓິ. ອຖ ນໍ ໂສ ເທວປຸຕ຺ໂຕ ທິສ຺ວາ ມນຸສ຺ສຣູເປນ ອຸປຄນ຺ຕ຺ວາ ປຏິສນ຺ຖາຣໍ ກຕ຺ວາ ອຕ຺ຕໂນ ວິມານໍ ປເວເສຕ຺ວາ ປາທພ຺ຠຎ຺ຊນາທີນິ ທຕ຺ວາ ປຍິຣຸປາສນ຺ໂຕ ນິສີທິ. ຕສ຺ມິຎ຺ຈ ສມເຍ ສາ ເປຕີ ອາຄນ຺ຕ຺ວາ ‘‘ເທຫິ ເມ, ສາມິ, ອນ຺ນປານໍ ສາຏກຎ຺ຈາ’’ຕິ ອາຫ. ໂສ ຕສ຺ສາ ຕານິ ອທາສິ. ຕານິ ຈ ຕາຍ ຄຫິຕມຕ຺ຕານິ ຄູຖມຸຕ຺ຕປຸພ຺ພໂລຫິຕປຊ຺ຊລິຕອໂຍປຏ຺ຏາເຍວ ອເຫສຸໍ. ໂສ ຠິກ຺ຂຸ ຕໍ ທິສ຺ວາ ສຎ຺ຊາຕສໍເວໂຄ ຕໍ ເທວປຸຕ຺ຕໍ –

໕໔. ‘‘ຄູຖຎ຺ຈ ມຸຕ຺ຕໍ ຣຸຫິຣຎ຺ຈ ປຸພ຺ພໍ, ປຣິຠຸຎ຺ຊຕິ ກິສ຺ສ ອຍໍ ວິປາໂກ;

ອຍໍ ນຸ ກິໍ ກມ຺ມມກາສິ ນາຣີ, ຍາ ສພ຺ພທາ ໂລຫິຕປຸພ຺ພຠກ຺ຂາ.

໕໕. ‘‘ນວານິ ວຕ຺ຖານິ ສຸຠານິ ເຈວ, ມຸທູນິ ສຸທ຺ຘານິ ຈ ໂລມສານິ;

ທິນ຺ນານິ ມິສ຺ສາ ກິຕກາ ຠວນ຺ຕິ, ອຍໍ ນຸ ກິໍ ກມ຺ມມກາສິ ນາຣີ’’ຕິ. –

ທ຺ວີຫິ ຄາຖາຫິ ປຏິປຸຈ຺ຉິ. ຕຕ຺ຖ ກິສ຺ສ ອຍໍ ວິປາໂກຕິ ກີທິສສ຺ສ ກມ຺ມສ຺ສ ອຍໍ ວິປາໂກ, ຍໍ ເອສາ ອິທານິ ປຈ຺ຈນຸຠວຕີຕິ. ອຍໍ ນຸ ກິໍ ກມ຺ມມກາສິ ນາຣີຕິ ອຍໍ ອິຕ຺ຖີ ກິໍ ນຸ ໂຂ ກມ຺ມໍ ປຸພ຺ເພ ອກາສິ. ຍາ ສພ຺ພທາ ໂລຫິຕປຸພ຺ພຠກ຺ຂາຕິ ຍາ ສພ຺ພກາລໍ ຣຸຫິຣປຸພ຺ພເມວ ຠກ຺ຂຕິ ປຣິຠຸຎ຺ຊຕິ. ນວານີຕິ ປຈ຺ຈຄ຺ຆານິ ຕາວເທວ ປາຕຸຠູຕານິ. ສຸຠານີຕິ ສຸນ຺ທຣານິ ທສ຺ສນີຍານິ. ມຸທູນີຕິ ສຸຂສມ຺ຜສ຺ສານິ. ສຸທ຺ຘານີຕິ ປຣິສຸທ຺ຘວຓ຺ຓານິ. ໂລມສານີຕິ ສໂລມການິ ສຸຂສມ຺ຜສ຺ສານິ, ສຸນ຺ທຣານີຕິ ອຕ຺ໂຖ. ທິນ຺ນານິ ມິສ຺ສາ ກິຕກາ ຠວນ຺ຕີຕິ ກິຕກກຓ຺ຏກສທິສານິ ໂລຫປຏ຺ຏສທິສານິ ຠວນ຺ຕິ. ‘‘ກີຏກາ ຠວນ຺ຕີ’’ຕິ ວາ ປາໂຐ, ຂາທກປາຓກວຓ຺ຓານິ ຠວນ຺ຕີຕິ ອຕ຺ໂຖ.

ເອວໍ ໂສ ເທວປຸຕ຺ໂຕ ເຕນ ຠິກ຺ຂຸນາ ປຸຏ຺ໂຐ ຕາຍ ປຸຣິມຊາຕິຍາ ກຕກມ຺ມໍ ປກາເສນ຺ໂຕ –

໕໖. ‘‘ຠຣິຍາ ມເມສາ ອຫຸ ຠທນ຺ເຕ, ອທາຍິກາ ມຈ຺ຉຣິນີ ກທຣິຍາ;

ສາ ມໍ ທທນ຺ຕໍ ສມຓພ຺ຣາຫ຺ມຓານໍ, ອກ຺ໂກສຕິ ຈ ປຣິຠາສຕິ ຈ.

໕໗. ‘‘ຄູຖຎ຺ຈ ມຸຕ຺ຕໍ ຣຸຫິຣຎ຺ຈ ປຸພ຺ພໍ, ປຣິຠຸຎ຺ຊ ຕ຺ວໍ ອສຸຈິໍ ສພ຺ພກາລໍ;

ເອຕໍ ເຕ ປຣໂລກສ຺ມິໍ ໂຫຕຸ, ວຕ຺ຖາ ຈ ເຕ ກິຕກສມາ ຠວນ຺ຕຸ;

ເອຕາທິສໍ ທຸຈ຺ຈຣິຕໍ ຈຣິຕ຺ວາ, ອິຘາຄຕາ ຈິຣຣຕ຺ຕາຍ ຂາທຕີ’’ຕິ. –

ທ຺ເວ ຄາຖາ ອຠາສິ. ຕຕ຺ຖ ອທາຍິກາຕິ ກສ຺ສຈິ ກິຎ຺ຈິປິ ອທານສີລາ. ມຈ຺ຉຣິນີ ກທຣິຍາຕິ ປຐມໍ ມຈ຺ເຉຣມລສ຺ສ ສຠາເວນ ມຈ຺ຉຣິນີ, ຕາຍ ຈ ປຸນປ຺ປຸນໍ ອາເສວນຕາຍ ຖທ຺ຘມຈ຺ຉຣິນີ, ຕາຍ ກທຣິຍາ ອຫູຕິ ໂຍຊນາ. ອິທານິ ຕສ຺ສາ ຕເມວ ກທຣິຍຕໍ ທສ຺ເສນ຺ໂຕ ‘‘ສາ ມໍ ທທນ຺ຕ’’ນ຺ຕິອາທິມາຫ. ຕຕ຺ຖ ເອຕາທິສນ຺ຕິ ເອວຣູປໍ ຍຖາວຸຕ຺ຕວຈີທຸຈ຺ຈຣິຕາທິໍ ຈຣິຕ຺ວາ. ອິຘາຄຕາຕິ ອິມໍ ເປຕໂລກໍ ອາຄຕາ, ເປຕຕ຺ຕຠາວໍ ອຸປຄຕາ. ຈິຣຣຕ຺ຕາຍ ຂາທຕີຕິ ຈິຣກາລໍ ຄູຖາທິເມວ ຂາທຕິ. ຕສ຺ສາ ຫິ ເຍນາກາເຣນ ອກ຺ກຸຏ຺ຐໍ, ເຕເນວາກາເຣນ ປວຕ຺ຕມານມ຺ປິ ຜລໍ. ຍໍ ອຸທ຺ທິສ຺ສ ອກ຺ກຸຏ຺ຐໍ, ຕໂຕ ອຎ຺ຎຕ຺ຖ ປຖວິຍໍ ກມນ຺ຕກສງ຺ຂາເຕ ມຕ຺ຖເກ ອສນິປາໂຕ ວິຍ ອຕ຺ຕໂນ ອຸປຣິ ປຕຕິ.

ເອວໍ ໂສ ເທວປຸຕ຺ໂຕ ຕາຍ ປຸພ຺ເພ ກຕກມ຺ມໍ ກເຖຕ຺ວາ ປຸນ ຕໍ ຠິກ຺ຂຸໍ ອາຫ – ‘‘ອຕ຺ຖິ ປນ, ຠນ຺ເຕ, ໂກຈິ ອຸປາໂຍ ອິມໍ ເປຕໂລກໂຕ ໂມເຈຕຸ’’ນ຺ຕິ? ‘‘ອຕ຺ຖີ’’ຕິ ຈ ວຸຕ຺ເຕ ‘‘ກເຖຖ, ຠນ຺ເຕ’’ຕິ. ຍທິ ຠຄວໂຕ ອຣິຍສງ຺ຆສ຺ສ ຈ ເອກສ຺ເສວ ວາ ຠິກ຺ຂຸໂນ ທານໍ ທຕ຺ວາ ອິມິສ຺ສາ ອຸທ຺ທິສິຍຕິ, ອຍຎ຺ຈ ຕໍ ອນຸໂມທຕິ, ເອວເມຕິສ຺ສາ ອິໂຕ ທຸກ຺ຂໂຕ ມຸຕ຺ຕິ ຠວິສ຺ສຕີຕິ. ຕໍ ສຸຕ຺ວາ ເທວປຸຕ຺ໂຕ ຕສ຺ສ ຠິກ຺ຂຸໂນ ປຓີຕໍ ອນ຺ນປານໍ ທຕ຺ວາ ຕໍ ທກ຺ຂິຓໍ ຕສ຺ສາ ເປຕິຍາ ອາທິສິ. ຕາວເທວ ສາ ເປຕີ ສຸຫິຕາ ປີຓິນ຺ທ຺ຣິຍາ ທິພ຺ພາຫາຣສ຺ສ ຕິຕ຺ຕາ ອໂຫສິ. ປຸນ ຕສ຺ເສວ ຠິກ຺ຂຸໂນ ຫຕ຺ເຖ ທິພ຺ພສາຏກຍຸຄໍ ຠຄວນ຺ຕໍ ອຸທ຺ທິສ຺ສ ທຕ຺ວາ ຕຎ຺ຈ ທກ຺ຂິຓໍ ເປຕິຍາ ອາທິສິ. ຕາວເທວ ຈ ສາ ທິພ຺ພວຕ຺ຖນິວຕ຺ຖາ ທິພ຺ພາລງ຺ກາຣວິຠູສິຕາ ສພ຺ພກາມສມິທ຺ຘາ ເທວຈ຺ຉຣາປຏິຠາຄາ ອໂຫສິ. ໂສ ຈ ຠິກ຺ຂຸ ຕສ຺ສ ເທວປຸຕ຺ຕສ຺ສ ອິທ຺ຘິຍາ ຕທເຫວ ສາວຕ຺ຖິໍ ປຕ຺ວາ ເຊຕວນໍ ປວິສິຕ຺ວາ ຠຄວໂຕ ສນ຺ຕິກໍ ອຸປຄນ຺ຕ຺ວາ ວນ຺ທິຕ຺ວາ ຕໍ ສາຏກຍຸຄໍ ທຕ຺ວາ ຕໍ ປວຕ຺ຕິໍ ອາໂຣເຈສິ. ຠຄວາປິ ຕມຕ຺ຖໍ ອຏ຺ຐຸປ຺ປຕ຺ຕິໍ ກຕ຺ວາ ສມ຺ປຕ຺ຕປຣິສາຍ ຘມ຺ມໍ ເທເສສິ. ສາ ເທສນາ ມຫາຊນສ຺ສ ສາຕ຺ຖິກາ ອໂຫສີຕິ.

ມຫາເປສກາຣເປຕິວຕ຺ຖຸວຓ຺ຓນາ ນິຏ຺ຐິຕາ.