໘. ໂຄຓເປຕວຕ຺ຖຸວຓ຺ຓນາ

ກິໍ ນຸ ອຸມ຺ມຕ຺ຕຣູໂປ ວາຕິ ອິທໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ມຕປິຕິກໍ ກຸຏຸມ຺ພິກໍ ອາຣພ຺ຠ ກເຖສິ. ສາວຕ຺ຖິຍໍ ກິຣ ອຎ຺ຎຕຣສ຺ສ ກຸຏຸມ຺ພິກສ຺ສ ປິຕາ ກາລມກາສິ. ໂສ ປິຕຸ ມຣເຓນ ໂສກສນ຺ຕຕ຺ຕຫທໂຍ ໂຣທມາໂນ ອຸມ຺ມຕ຺ຕໂກ ປິຍ ວິຈຣນ຺ໂຕ ຍໍ ຍໍ ປສ຺ສຕິ, ຕໍ ຕໍ ປຸຈ຺ຉຕິ – ‘‘ອປິ ເມ ປິຕຣໍ ປສ຺ສິຕ຺ຖາ’’ຕິ? ນ ໂກຈິ ຕສ຺ສ ໂສກໍ ວິໂນເທຕຸໍ ອສກ຺ຂິ. ຕສ຺ສ ປນ ຫທເຍ ຆເຏ ປທີໂປ ວິຍ ໂສຕາປຕ຺ຕິຜລສ຺ສ ອຸປນິສ຺ສໂຍ ປຊ຺ຊລຕິ.

ສຕ຺ຖາ ປຈ຺ຈູສສມເຍ ໂລກໍ ໂອໂລເກນ຺ໂຕ ຕສ຺ສ ໂສຕາປຕ຺ຕິຜລສ຺ສ ອຸປນິສ຺ສຍໍ ທິສ຺ວາ ‘‘ອິມສ຺ສ ອຕີຕກາຣຓໍ ອາຫຣິຕ຺ວາ ໂສກໍ ວູປສເມຕ຺ວາ ໂສຕາປຕ຺ຕິຜລໍ ທາຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ປຸນທິວເສ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ໂຕ ປຈ຺ຉາສມຓໍ ອນາທາຍ ຕສ຺ສ ຆຣທ຺ວາຣໍ ອຄມາສິ. ໂສ ‘‘ສຕ຺ຖາ ອາຄໂຕ’’ຕິ ສຸຕ຺ວາ ປຈ຺ຈຸຄ຺ຄນ຺ຕ຺ວາ ສຕ຺ຖາຣໍ ເຄຫໍ ປເວເສຕ຺ວາ ສຕ຺ຖຣິ ປຎ຺ຎຕ຺ເຕ ອາສເນ ນິສິນ຺ເນ ສຍໍ ຠຄວນ຺ຕໍ ວນ຺ທິຕ຺ວາ ເອກມນ຺ຕໍ ນິສິນ຺ໂນ ‘‘ກິໍ, ຠນ຺ເຕ, ມຍ຺ຫໍ ປິຕຸ ຄຕຏ຺ຐານໍ ຊານາຖາ’’ຕິ ອາຫ. ອຖ ນໍ ສຕ຺ຖາ, ‘‘ອຸປາສກ, ກິໍ ອິມສ຺ມິໍ ອຕ຺ຕຠາເວ ປິຕຣໍ ປຸຈ຺ຉສິ, ອຸທາຫຸ ອຕີເຕ’’ຕິ ອາຫ. ໂສ ຕໍ ວຈນໍ ສຸຕ຺ວາ ‘‘ພຫູ ກິຣ ມຍ຺ຫໍ ປິຕໂຣ’’ຕິ ຕນຸຠູຕໂສໂກ ໂຖກໍ ມຊ຺ຌຕ຺ຕຕໍ ປຏິລຠິ. ອຖສ຺ສ ສຕ຺ຖາ ໂສກວິໂນທນໍ ຘມ຺ມກຖໍ ກຕ຺ວາ ອປຄຕໂສກໍ ກລ຺ລຈິຕ຺ຕໍ ວິທິຕ຺ວາ ສາມຸກ຺ກໍສິກາຍ ຘມ຺ມເທສນາຍ ໂສຕາປຕ຺ຕິຜເລ ປຕິຏ຺ຐາເປຕ຺ວາ ວິຫາຣໍ ອຄມາສິ.

ອຖ ຠິກ຺ຂູ ຘມ຺ມສຠາຍໍ ກຖໍ ສມຸຏ຺ຐາເປສຸໍ – ‘‘ປສ຺ສຖ, ອາວຸໂສ, ພຸທ຺ຘານຸຠາວໍ, ຕຖາ ໂສກປຣິເທວສມາປນ຺ໂນ ອຸປາສໂກ ຂເຓເນວ ຠຄວຕາ ໂສຕາປຕ຺ຕິຜເລ ວິນີໂຕ’’ຕິ. ສຕ຺ຖາ ຕຕ຺ຖ ຄນ຺ຕ຺ວາ ປຎ຺ຎຕ຺ຕວຣພຸທ຺ຘາສເນ ນິສິນ຺ໂນ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິ. ຠິກ຺ຂູ ຕມຕ຺ຖໍ ຠຄວໂຕ ອາໂຣເຈສຸໍ. ສຕ຺ຖາ ‘‘ນ, ຠິກ຺ຂເວ, ອິທາເນວ ມຍາ ອິມສ຺ສ ໂສໂກ ອປນີໂຕ, ປຸພ຺ເພປິ ອປນີໂຕເຍວາ’’ຕິ ວຕ຺ວາ ເຕຫິ ຍາຈິໂຕ ອຕີຕໍ ອາຫຣິ.

ອຕີເຕ ພາຣາຓສິຍໍ ອຎ຺ຎຕຣສ຺ສ ຄຫປຕິກສ຺ສ ປິຕາ ກາລມກາສິ. ໂສ ປິຕຸ ມຣເຓນ ໂສກປຣິເທວສມາປນ຺ໂນ ອສ຺ສຸມຸໂຂ ຣຕ຺ຕກ຺ໂຂ ກນ຺ທນ຺ໂຕ ຈິຕກໍ ປທກ຺ຂິຓໍ ກໂຣຕິ. ຕສ຺ສ ປຸຕ຺ໂຕ ສຸຊາໂຕ ນາມ ກຸມາໂຣ ປຓ຺ຑິໂຕ ພ຺ຍຕ຺ໂຕ ພຸທ຺ຘິສມ຺ປນ຺ໂນ ປິຕຸໂສກວິນຍນູປາຍໍ ຈິນ຺ເຕນ຺ໂຕ ເອກທິວສໍ ພຫິນຄເຣ ເອກໍ ມຕໂຄຓໍ ທິສ຺ວາ ຕິຓຎ຺ຈ ປານີຍຎ຺ຈ ອາຫຣິຕ຺ວາ ຕສ຺ສ ປຸຣໂຕ ຐເປຕ຺ວາ ‘‘ຂາທ, ຂາທ, ປິວ, ປິວາ’’ຕິ ວທນ຺ໂຕ ອຏ຺ຐາສິ. ອາຄຕາຄຕາ ຕໍ ທິສ຺ວາ ‘‘ສມ຺ມ ສຸຊາຕ, ກິໍ ອຸມ຺ມຕ຺ຕໂກສິ, ໂຍ ຕ຺ວໍ ມຕສ຺ສ ໂຄຓສ຺ສ ຕິໂຓທກໍ ອຸປເນສີ’’ຕິ ວທນ຺ຕິ? ໂສ ນ ກິຎ຺ຈິ ປຏິວທຕິ. ມນຸສ຺ສາ ຕສ຺ສ ປິຕຸ ສນ຺ຕິກໍ ຄນ຺ຕ຺ວາ ‘‘ປຸຕ຺ໂຕ ເຕ ອຸມ຺ມຕ຺ຕໂກ ຊາໂຕ, ມຕໂຄຓສ຺ສ ຕິໂຓທກໍ ເທຕີ’’ຕິ ອາຫໍສຸ. ຕໍ ສຸຕ຺ວາ ຈ ກຸຏຸມ຺ພິກສ຺ສ ປິຕຣໍ ອາຣພ຺ຠ ຐິໂຕ ໂສໂກ ອປຄໂຕ. ໂສ ‘‘ມຍ຺ຫໍ ກິຣ ປຸຕ຺ໂຕ ອຸມ຺ມຕ຺ຕໂກ ຊາໂຕ’’ຕິ ສໍເວຄປ຺ປຕ຺ໂຕ ເວເຄນ ຄນ຺ຕ຺ວາ ‘‘ນນຸ ຕ຺ວໍ, ຕາຕ ສຸຊາຕ, ປຓ຺ຑິໂຕ ພ຺ຍຕ຺ໂຕ ພຸທ຺ຘິສມ຺ປນ຺ໂນ, ກສ຺ມາ ມຕໂຄຓສ຺ສ ຕິໂຓທກໍ ເທສີ’’ຕິ ໂຈເທນ຺ໂຕ –

໔໖. ‘‘ກິໍ ນຸ ອຸມ຺ມຕ຺ຕຣູໂປວ, ລາຍິຕ຺ວາ ຫຣິຕໍ ຕິຓໍ;

ຂາທ ຂາທາຕິ ລປສິ, ຄຕສຕ຺ຕໍ ຊຣຄ຺ຄວໍ.

໔໗. ‘‘ນ ຫິ ອນ຺ເນນ ປາເນນ, ມໂຕ ໂຄໂຓ ສມຸຏ຺ຐເຫ;

ຕ຺ວໍສິ ພາໂລ ຈ ທຸມ຺ເມໂຘ, ຍຖາ ຕຎ຺ໂຎວ ທຸມ຺ມຕີ’’ຕິ. –

ຄາຖາທ຺ວຍມາຫ. ຕຕ຺ຖ ກິໍ ນູຕິ ປຸຈ຺ຉາວຈນໍ. ອຸມ຺ມຕ຺ຕຣູໂປວາຕິ ອຸມ຺ມຕ຺ຕກສຠາໂວ ວິຍ ຈິຕ຺ຕກ຺ເຂປໍ ປຕ຺ໂຕ ວິຍ. ລາຍິຕ຺ວາຕິ ລວິຕ຺ວາ. ຫຣິຕໍ ຕິຓນ຺ຕິ ອລ຺ລຕິຓໍ. ລປສິ ວິລປສິ. ຄຕສຕ຺ຕນ຺ຕິ ວິຄຕຊີວິຕໍ. ຊຣຄ຺ຄວນ຺ຕິ ພລິພທ຺ທໍ ຊິຓ຺ຓໂຄຓໍ. ອນ຺ເນນ ປາເນນາຕິ ຕຍາ ທິນ຺ເນນ ຫຣິຕຕິເຓນ ວາ ປານີເຍນ ວາ. ມໂຕ ໂຄໂຓ ສມຸຏ຺ຐເຫຕິ ກາລກໂຕ ໂຄໂຓ ລທ຺ຘຊີວິໂຕ ຫຸຕ຺ວາ ນ ຫິ ສມຸຏ຺ຐເຫຍ຺ຍ. ຕ຺ວໍສິ ພາໂລ ຈ ທຸມ຺ເມໂຘຕິ ຕ຺ວໍ ພາລ຺ຍໂຍຄໂຕ ພາໂລ, ເມຘາສງ຺ຂາຕາຍ ປຎ຺ຎາຍ ອຠາວໂຕ ທຸມ຺ເມໂຘ ອສິ. ຍຖາ ຕຎ຺ໂຎວ ທຸມ຺ມຕີຕິ ຍຖາ ຕໍ ອຎ຺ໂຎປິ ນິປ຺ປຎ຺ໂຎ ວິປ຺ປລເປຍ຺ຍ, ເອວໍ ຕ຺ວໍ ນິຣຕ຺ຖກໍ ວິປ຺ປລປສີຕິ ອຕ຺ໂຖ. ຍຖາ ຕນ຺ຕິ ນິປາຕມຕ຺ຕໍ.

ຕໍ ສຸຕ຺ວາ ສຸຊາໂຕ ປິຕຣໍ ສຎ຺ຎາເປຕຸໍ ອຕ຺ຕໂນ ອຘິປ຺ປາຍໍ ປກາເສນ຺ໂຕ –

໔໘. ‘‘ອິເມ ປາທາ ອິທໍ ສີສໍ, ອຍໍ ກາໂຍ ສວາລຘິ;

ເນຕ຺ຕາ ຕເຖວ ຕິຏ຺ຐນ຺ຕິ, ອຍໍ ໂຄໂຓ ສມຸຏ຺ຐເຫ.

໔໙. ‘‘ນາຍ຺ຍກສ຺ສ ຫຕ຺ຖປາທາ, ກາໂຍ ສີສຎ຺ຈ ທິສ຺ສຕິ;

ຣຸທໍ ມຕ຺ຕິກຖູປສ຺ມິໍ, ນນຸ ຕ຺ວຎ຺ເຎວ ທຸມ຺ມຕີ’’ຕິ. –

ຄາຖາທ຺ວຍໍ ອຠາສິ. ຕສ຺ສຕ຺ໂຖ – ອິມສ຺ສ ໂຄຓສ຺ສ ອິເມ ຈຕ຺ຕາໂຣ ປາທາ, ອິທໍ ສີສໍ, ສຫ ວາລຘິນາ ວຕ຺ຕຕີຕິ ສວາລຘິ ອຍໍ ກາໂຍ. ອິມານິ ຈ ເນຕ຺ຕາ ນຍນານິ ຍຖາ ມຣຓໂຕ ປຸພ຺ເພ, ຕເຖວ ອຠິນ຺ນສຓ຺ຐານານິ ຕິຏ຺ຐນ຺ຕິ. ອຍໍ ໂຄໂຓ ສມຸຏ຺ຐເຫຕິ ອິມສ຺ມາ ກາຣຓາ ອຍໍ ໂຄໂຓ ສມຸຏ຺ຐເຫຍ຺ຍ ສມຸຕ຺ຕິຏ຺ເຐຍ຺ຍາຕິ ມມ ຈິຕ຺ຕໍ ຠເວຍ຺ຍ. ‘‘ມຎ຺ເຎ ໂຄໂຓ ສມຸຏ຺ຐເຫ’’ຕິ ເກຈິ ປຐນ຺ຕິ, ເຕນ ກາຣເຓນ ອຍໍ ໂຄໂຓ ສຫສາປິ ກາຍໍ ສມຸຏ຺ຐເຫຍ຺ຍາຕິ ອຫໍ ມຎ຺ເຎຍ຺ຍໍ, ເອວໍ ເມ ມຎ຺ຎນາ ສມ຺ຠເວຍ຺ຍາຕິ ອຘິປ຺ປາໂຍ. ອຍ຺ຍກສ຺ສ ປນ ມຍ຺ຫໍ ປິຕາມຫສ຺ສ ນ ຫຕ຺ຖປາທາ ກາໂຍ ສີສໍ ທິສ຺ສຕິ, ເກວລໍ ປນ ຕສ຺ສ ອຏ຺ຐິການິ ປກ຺ຂິປິຕ຺ວາ ກເຕ ມຕ຺ຕິກາມເຍ ຖູເປ ຣຸທນ຺ໂຕ ສຕຄຸເຓນ ສຫສ຺ສຄຸເຓນ, ຕາຕ, ຕ຺ວຎ຺ເຎວ ທຸມ຺ມຕິ ນິປ຺ປຎ຺ໂຎ, ຠິຊ຺ຊນຘມ຺ມາ ສງ຺ຂາຣາ ຠິຊ຺ຊນ຺ຕິ, ຕຕ຺ຖ ວິຊານຕໍ ກາ ປຣິເທວນາຕິ ປິຕຸ ຘມ຺ມໍ ກເຖສິ.

ຕໍ ສຸຕ຺ວາ ໂພຘິສຕ຺ຕສ຺ສ ປິຕາ ‘‘ມມ ມຸຕ຺ໂຕ ປຓ຺ຑິໂຕ ມໍ ສຎ຺ຎາເປຕຸໍ ອິມໍ ກມ຺ມໍ ອກາສີ’’ຕິ ຈິນ຺ເຕຕ຺ວາ ‘‘ຕາຕ ສຸຊາຕ, ‘ສພ຺ເພປິ ສຕ຺ຕາ ມຣຓຘມ຺ມາ’ຕິ ອຎ຺ຎາຕເມຕໍ, ອິໂຕ ປຏ຺ຐາຍ ນ ໂສຈິສ຺ສາມິ, ໂສກຫຣຓສມຕ຺ເຖນ ນາມ ເມຘາວິນາ ຕາທິເສເນວ ຠວິຕພ຺ພ’’ນ຺ຕິ ປຸຕ຺ຕໍ ປສໍສນ຺ໂຕ –

໕໐. ‘‘ອາທິຕ຺ຕໍ ວຕ ມໍ ສນ຺ຕໍ, ຆຕສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈໍ, ສພ຺ພໍ ນິພ຺ພາປເຍ ທຣໍ.

໕໑. ‘‘ອພ຺ພຫີ ວຕ ເມ ສລ຺ລໍ, ໂສກໍ ຫທຍນິສ຺ສິຕໍ;

ໂຍ ເມ ໂສກປເຣຕສ຺ສ, ປິຕຸໂສກໍ ອປານຸທິ.

໕໒. ‘‘ສ຺ວາຫໍ ອພ຺ພູຬ຺ຫສລ຺ໂລສ຺ມິ, ສີຕິຠູໂຕສ຺ມິ ນິພ຺ພຸໂຕ;

ນ ໂສຈາມິ ນ ໂຣທາມິ, ຕວ ສຸຕ຺ວານ ມາຓວ.

໕໓. ‘‘ເອວໍ ກໂຣນ຺ຕິ ສປ຺ປຎ຺ຎາ, ເຍ ໂຫນ຺ຕິ ອນຸກມ຺ປກາ;

ວິນິວຕ຺ຕຍນ຺ຕິ ໂສກມ຺ຫາ, ສຸຊາໂຕ ປິຕຣໍ ຍຖາ’’ຕິ. –

ຈຕສ຺ໂສ ຄາຖາ ອຠາສິ. ຕຕ຺ຖ ອາທິຕ຺ຕນ຺ຕິ ໂສກຄ຺ຄິນາ ອາທິຕ຺ຕໍ ຊລິຕໍ. ສນ຺ຕນ຺ຕິ ສມານໍ. ປາວກນ຺ຕິ ອຄ຺ຄິ. ວາຣິນາ ວິຍ ໂອສິຎ຺ຈນ຺ຕິ ອຸທເກນ ອວສິຎ຺ຈນ຺ໂຕ ວິຍ. ສພ຺ພໍ ນິພ຺ພາປເຍ ທຣນ຺ຕິ ສພ຺ພໍ ເມ ຈິຕ຺ຕທຣຖໍ ນິພ຺ພາເປສິ. ອພ຺ພຫີ ວຕາຕິ ນີຫຣິ ວຕ. ສລ຺ລນ຺ຕິ ໂສກສລ຺ລໍ. ຫທຍນິສ຺ສິຕນ຺ຕິ ຈິຕ຺ຕສນ຺ນິສ຺ສິຕສລ຺ລຠູຕໍ. ໂສກປເຣຕສ຺ສາຕິ ໂສເກນ ອຠິຠູຕສ຺ສ. ປິຕຸໂສກນ຺ຕິ ປິຕຣໍ ອາຣພ຺ຠ ອຸປ຺ປນ຺ນໍ ໂສກໍ. ອປານຸທີຕິ ອປເນສິ. ຕວ ສຸຕ຺ວານ ມາຓວາຕິ, ກຸມາຣ, ຕວ ວຈນໍ ສຸຕ຺ວາ ອິທານິ ປນ ນ ໂສຈາມິ ນ ໂຣທາມິ. ສຸຊາໂຕ ປິຕຣໍ ຍຖາຕິ ຍຖາ ອຍໍ ສຸຊາໂຕ ອຕ຺ຕໂນ ປິຕຣໍ ໂສກໂຕ ວິນິວຕ຺ເຕສິ, ເອວໍ ອຎ຺ເຎປິ ເຍ ອນຸກມ຺ປກາ ອນຸຄ຺ຄຓ຺ຫສີລາ ໂຫນ຺ຕິ, ເຕ ສປ຺ປຎ຺ຎາ ເອວໍ ກໂຣນ຺ຕິ ປິຕູນໍ ອຎ຺ເຎສຎ຺ຈ ອຸປກາຣໍ ກໂຣນ຺ຕີຕິ ອຕ຺ໂຖ.

ມາຓວສ຺ສ ວຈນໍ ສຸຕ຺ວາ ປິຕາ ອປຄຕໂສໂກ ຫຸຕ຺ວາ ສີສໍ ນຫາຍິຕ຺ວາ ຠຸຎ຺ຊິຕ຺ວາ ກມ຺ມນ຺ເຕ ປວຕ຺ເຕຕ຺ວາ ກາລໍ ກຕ຺ວາ ສຄ຺ຄປຣາຍໂຓ ອໂຫສິ. ສຕ຺ຖາ ອິມໍ ຘມ຺ມເທສນໍ ອາຫຣິຕ຺ວາ ເຕສໍ ຠິກ຺ຂູນໍ ສຈ຺ຈານິ ປກາເສສິ, ສຈ຺ຈປຣິໂຍສາເນ ພຫູ ໂສຕາປຕ຺ຕິຜລາທີສຸ ປຕິຏ຺ຐຫິໍສຸ. ຕທາ ສຸຊາໂຕ ໂລກນາໂຖ ອໂຫສີຕິ.

ໂຄຓເປຕວຕ຺ຖຸວຓ຺ຓນາ ນິຏ຺ຐິຕາ.