໗. ສຕ຺ຕປຸຕ຺ຕຂາທກເປຕິວຕ຺ຖຸວຓ຺ຓນາ

ນຄ຺ຄາ ທຸພ຺ພຓ຺ຓຣູປາສີຕິ ອິທໍ ສຕ຺ຖຣິ ສາວຕ຺ຖິຍໍ ວິຫຣນ຺ເຕ ສຕ຺ຕປຸຕ຺ຕຂາທກເປຕິໍ ອາຣພ຺ຠ ວຸຕ຺ຕໍ. ສາວຕ຺ຖິຍາ ກິຣ ອວິທູເຣ ອຎ຺ຎຕຣສ຺ມິໍ ຄາມເກ ອຎ຺ຎຕຣສ຺ສ ອຸປາສກສ຺ສ ທ຺ເວ ປຸຕ຺ຕາ ອເຫສຸໍ – ປຐມວເຍ ຐິຕາ ຣູປສມ຺ປນ຺ນາ ສີລາຈາເຣນ ສມນ຺ນາຄຕາ. ເຕສໍ ມາຕາ ‘‘ປຸຕ຺ຕວຕີ ອຫ’’ນ຺ຕິ ປຸຕ຺ຕພເລນ ຠຕ຺ຕາຣໍ ອຕິມຎ຺ຎຕິ. ໂສ ຠຣິຍາຍ ອວມານິໂຕ ນິພ຺ພິນ຺ນມານໂສ ອຎ຺ຎໍ ກຎ຺ຎໍ ອາເນສິ. ສາ ນຈິຣສ຺ເສວ ຄພ຺ຠິນີ ອໂຫສິ. ອຖສ຺ສ ເຊຏ຺ຐຠຣິຍາ ອິສ຺ສາປກຕາ ອຎ຺ຎຕຣໍ ເວຊ຺ຊໍ ອາມິເສນ ອຸປລາເປຕ຺ວາ ເຕນ ຕສ຺ສາ ເຕມາສິກໍ ຄພ຺ຠໍ ປາເຕສິ. ອຖ ສາ ຎາຕີຫິ ຈ ຠຕ຺ຕາຣາ ຈ ‘‘ຕຍາ ອິມິສ຺ສາ ຄພ຺ໂຠ ປາຕິໂຕ’’ຕິ ປຸຏ຺ຐາ ‘‘ນາຫໍ ປາເຕມີ’’ຕິ ມຸສາ ວຕ຺ວາ ເຕຫິ ອສທ຺ທຫນ຺ເຕຫິ ‘‘ສປຖໍ ກໂຣຫີ’’ຕິ ວຸຕ຺ຕາ ‘‘ສາຍໍ ປາຕໍ ສຕ຺ຕ ສຕ຺ຕ ປຸຕ຺ເຕ ວິຊາຍິຕ຺ວາ ປຸຕ຺ຕມໍສານິ ຂາທາມິ, ນິຈ຺ຈໍ ທຸຄ຺ຄນ຺ຘາ ຈ ມກ຺ຂິກາປຣິກິຓ຺ຓາ ຈ ຠເວຍ຺ຍ’’ນ຺ຕິ ສປຖໍ ອກາສິ.

ສາ ອປເຣນ ສມເຍນ ກາລໍ ກຕ຺ວາ ຕສ຺ສ ຄພ຺ຠປາຕນສ຺ສ ມຸສາວາທສ຺ສ ຈ ຜເລເນວ ເປຕໂຍນິຍໍ ນິພ຺ພຕ຺ຕິຕ຺ວາ ປຸຕ຺ຕນເຍນ ປຸຕ຺ຕມໍສານິ ຂາທນ຺ຕີ ຕສ຺ເສວ ຄາມສ຺ສ ອວິທູເຣ ວິຈຣຕິ. ເຕນ ຈ ສມເຍນ ສມ຺ພຫຸລາ ເຖຣາ ຄາມກາວາເສ ວຸຕ຺ຖວສ຺ສາ ຠຄວນ຺ຕໍ ທສ຺ສນາຍ ສາວຕ຺ຖິໍ ອາຄຈ຺ຉນ຺ຕາ ຕສ຺ສ ຄາມສ຺ສ ອວິທູເຣ ເອກສ຺ມິໍ ປເທເສ ຣຕ຺ຕິຍໍ ວາສໍ ກປ຺ເປສຸໍ. ອຖ ສາ ເປຕີ ເຕສໍ ເຖຣານໍ ອຕ຺ຕານໍ ທສ຺ເສສິ. ຕໍ ມຫາເຖໂຣ ຄາຖາຍ ປຸຈ຺ຉິ –

໓໕. ‘‘ນຄ຺ຄາ ທຸພ຺ພຓ຺ຓຣູປາສິ, ທຸຄ຺ຄນ຺ຘາ ປູຕິ ວາຍສິ;

ມກ຺ຂິກາຫິ ປຣິກິຓ຺ຓາ, ກາ ນຸ ຕ຺ວໍ ອິຘ ຕິຏ຺ຐສີ’’ຕິ.

ສາ ເຖເຣນ ປຸຏ຺ຐາ ຕີຫິ ຄາຖາຫິ ປຏິວຈນໍ ອທາສິ –

໓໖. ‘‘ອຫໍ ຠທນ຺ເຕ ເປຕີມ຺ຫິ, ທຸຄ຺ຄຕາ ຍມໂລກິກາ;

ປາປກມ຺ມໍ ກຣິຕ຺ວານ, ເປຕໂລກໍ ອິໂຕ ຄຕາ.

໓໗. ‘‘ກາເລນ ສຕ຺ຕ ປຸຕ຺ຕານິ, ສາຍໍ ສຕ຺ຕ ປຸນາປເຣ;

ວິຊາຍິຕ຺ວານ ຂາທາມິ, ເຕປິ ນາ ໂຫນ຺ຕິ ເມ ອລໍ.

໓໘. ‘‘ປຣິຑຍ຺ຫຕິ ຘູມາຍຕິ, ຂຸທາຍ ຫທຍໍ ມມ;

ນິພ຺ພຸຕິໍ ນາຘິຄຈ຺ຉາມິ, ອຄ຺ຄິທຑ຺ຒາວ ອາຕເປ’’ຕິ.

໓໘. ຕຕ຺ຖ ນິພ຺ພຸຕິນ຺ຕິ ຂຸປ຺ປິປາສາທຸກ຺ຂສ຺ສ ວູປສມໍ. ນາຘິຄຈ຺ຉາມີຕິ ນ ລຠາມິ. ອຄ຺ຄິທຑ຺ຒາວ ອາຕເປຕິ ອຕິອຸຓ຺ຫອາຕເປ ອຄ຺ຄິນາ ຑຍ຺ຫມານາ ວິຍ ນິພ຺ພຸຕິໍ ນາຘິຄຈ຺ຉາມີຕິ ໂຍຊນາ.

ຕໍ ສຸຕ຺ວາ ມຫາເຖໂຣ ຕາຍ ກຕກມ຺ມໍ ປຸຈ຺ຉນ຺ໂຕ –

໓໙. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ກິສ຺ສກມ຺ມວິປາເກນ, ປຸຕ຺ຕມໍສານິ ຂາທສີ’’ຕິ. – ຄາຖມາຫ;

ອຖ ສາ ເປຕີ ອຕ຺ຕໂນ ເປຕໂລກູປປຕ຺ຕິຎ຺ຈ ປຸຕ຺ຕມໍສຂາທນກາຣຓຎ຺ຈ ກເຖນ຺ຕີ –

໔໐. ‘‘ອຫູ ມຍ຺ຫໍ ທຸເວ ປຸຕ຺ຕາ, ອຸໂຠ ສມ຺ປຕ຺ຕໂຍພ຺ພນາ;

ສາຫໍ ປຸຕ຺ຕພລູເປຕາ, ສາມິກໍ ອຕິມຎ຺ຎິສໍ.

໔໑. ‘‘ຕໂຕ ເມ ສາມິໂກ ກຸທ຺ໂຘ, ສປຕິໍ ມຍ຺ຫມານຍິ;

ສາ ຈ ຄພ຺ຠໍ ອລຠິຕ຺ຖ, ຕສ຺ສາ ປາປໍ ອເຈຕຍິໍ.

໔໒. ‘‘ສາຫໍ ປທຸຏ຺ຐມນສາ, ອກຣິໍ ຄພ຺ຠປາຕນໍ;

ຕສ຺ສ ເຕມາສິໂກ ຄພ຺ໂຠ, ປູຕິໂລຫິຕໂກ ປຕິ.

໔໓. ‘‘ຕທສ຺ສາ ມາຕາ ກຸປິຕາ, ມຍ຺ຫໍ ຎາຕີ ສມານຍິ;

ສປຖຎ຺ຈ ມໍ ກາເຣສິ, ປຣິຠາສາປຍີ ຈ ມໍ.

໔໔. ‘‘ສາຫໍ ໂຆຣຎ຺ຈ ສປຖໍ, ມຸສາວາທໍ ອຠາສິສໍ;

‘ປຸຕ຺ຕມໍສານິ ຂາທາມິ, ສເຈ ຕໍ ປກຕໍ ມຍາ’.

໔໕. ‘‘ຕສ຺ສ ກມ຺ມສ຺ສ ວິປາເກນ, ມຸສາວາທສ຺ສ ຈູຠຍໍ;

ປຸຕ຺ຕມໍສານິ ຂາທາມິ, ປຸພ຺ພໂລຫິຕມກ຺ຂິຕາ’’ຕິ. – ອິມາ ຄາຖາ ອຠາສິ;

໔໐-໔໕. ຕຕ຺ຖ ປຸຕ຺ຕພລູເປຕາຕິ ປຸຕ຺ຕພເລນ ອຸເປຕາ, ປຸຕ຺ຕານໍ ວເສນ ລທ຺ຘພລາ. ອຕິມຎ຺ຎິສນ຺ຕິ ອຕິກ຺ກມິຕ຺ວາ ມຎ຺ຎິໍ ອວມຎ຺ຎິໍ. ປູຕິໂລຫິຕໂກ ປຕີຕິ ກຸຓປໂລຫິຕໍ ຫຸຕ຺ວາ ຄພ຺ໂຠ ປຣິປຕິ. ເສສໍ ສພ຺ພໍ ອນນ຺ຕຣສທິສເມວ. ຕຕ຺ຖ ອຏ຺ຐ ເຖຣາ, ອິຘ ສມ຺ພຫຸລາ. ຕຕ຺ຖ ປຎ຺ຈ ປຸຕ຺ຕາ, ອິຘ ສຕ຺ຕາຕິ ອຍເມວ ວິເສໂສຕິ.

ສຕ຺ຕປຸຕ຺ຕຂາທກເປຕິວຕ຺ຖຸວຓ຺ຓານາ ນິຏ຺ຐິຕາ.