໔. ປິຏ຺ຐຘີຕລິກເປຕວຕ຺ຖຸວຓ຺ຓນາ

ຍໍ ກິຎ຺ຈາຣມ຺ມຓໍ ກຕ຺ວາຕິ ອິທໍ ສຕ຺ຖາ ສາວຕ຺ຖິຍໍ ເຊຕວເນ ວິຫຣນ຺ໂຕ ອນາຖປິຓ຺ຑິກສ຺ສ ຄຫປຕິໂນ ທານໍ ອາຣພ຺ຠ ກເຖສິ. ອນາຖປິຓ຺ຑິກສ຺ສ ກິຣ ຄຫປຕິໂນ ຘີຕຸ ຘີຕາຍ ທາຣິກາຍ ຘາຕິ ປິຏ຺ຐຘີຕລິກໍ ອທາສິ ‘‘ອຍໍ ເຕ ຘີຕາ, ອິມໍ ຄເຫຕ຺ວາ ກີຬສ຺ສູ’’ຕິ. ສາ ຕຕ຺ຖ ຘີຕຸສຎ຺ຎໍ ອຸປ຺ປາເທສິ. ອຖສ຺ສາ ເອກທິວສໍ ຕໍ ຄເຫຕ຺ວາ ກີຬນ຺ຕິຍາ ປມາເທນ ປຕິຕ຺ວາ ຠິຊ຺ຊິ. ຕໂຕ ທາຣິກາ ‘‘ມມ ຘີຕາ ມຕາ’’ຕິ ປໂຣທິ. ຕໍ ໂຣທນ຺ຕິໍ ໂກຈິປິ ເຄຫຊໂນ ສຎ຺ຎາເປຕຸໍ ນາສກ຺ຂິ. ຕສ຺ມິຎ຺ຈ ສມເຍ ສຕ຺ຖາ ອນາຖປິຓ຺ຑິກສ຺ສ ຄຫປຕິໂນ ເຄເຫ ປຎ຺ຎຕ຺ເຕ ອາສເນ ນິສິນ຺ໂນ ໂຫຕິ, ມຫາເສຏ຺ຐິ ຈ ຠຄວໂຕ ສມີເປ ນິສິນ຺ໂນ ອໂຫສິ. ຘາຕິ ຕໍ ທາຣິກໍ ຄເຫຕ຺ວາ ເສຏ຺ຐິສ຺ສ ສນ຺ຕິກໍ ອຄມາສິ. ເສຏ຺ຐິ ຕໍ ທິສ຺ວາ ‘‘ກິສ຺ສາຍໍ ທາຣິກາ ໂຣທຕີ’’ຕິ ອາຫ. ຘາຕິ ຕໍ ປວຕ຺ຕິໍ ເສຏ຺ຐິສ຺ສ ອາໂຣເຈສິ. ເສຏ຺ຐິ ຕໍ ທາຣິກໍ ອງ຺ເກ ນິສີທາເປຕ຺ວາ ‘‘ຕວ ຘີຕຸທານໍ ທສ຺ສາມີ’’ຕິ ສຎ຺ຎາເປຕ຺ວາ ສຕ຺ຖຸ ອາໂຣເຈສິ – ‘‘ຠນ຺ເຕ, ມມ ນຕ຺ຕຸຘີຕຣໍ ປິຏ຺ຐຘີຕລິກໍ ອຸທ຺ທິສ຺ສ ທານໍ ທາຕຸກາໂມ, ຕໍ ເມ ປຎ຺ຈຫິ ຠິກ຺ຂຸສເຕຫິ ສທ຺ຘິໍ ສ຺ວາຕນາຍ ອຘິວາເສຖາ’’ຕິ. ອຘິວາເສສິ ຠຄວາ ຕຸຓ຺ຫີຠາເວນ.

ອຖ ຠຄວາ ທຸຕິຍທິວເສ ປຎ຺ຈຫິ ຠິກ຺ຂຸສເຕຫິ ສທ຺ຘິໍ ເສຏ຺ຐິສ຺ສ ຆຣໍ ຄນ຺ຕ຺ວາ ຠຕ຺ຕກິຈ຺ຈໍ ກຕ຺ວາ ອນຸໂມທນໍ ກໂຣນ຺ໂຕ –

໑໐. ‘‘ຍໍ ກິຎ຺ຈາຣມ຺ມຓໍ ກຕ຺ວາ, ທຊ຺ຊາ ທານໍ ອມຈ຺ຉຣີ;

ປຸພ຺ພເປເຕ ຈ ອາຣພ຺ຠ, ອຖ ວາ ວຕ຺ຖຸເທວຕາ.

໑໑. ‘‘ຈຕ຺ຕາໂຣ ຈ ມຫາຣາເຊ, ໂລກປາເລ ຍສສ຺ສິເນ;

ກຸເວຣໍ ຘຕຣຏ຺ຐຎ຺ຈ, ວິຣູປກ຺ຂໍ ວິຣູຬ຺ຫກໍ;

ເຕ ເຈວ ປູຊິຕາ ໂຫນ຺ຕິ, ທາຍກາ ຈ ອນິປ຺ຜລາ.

໑໒. ‘‘ນ ຫິ ຣຸຓ຺ຓໍ ວາ ໂສໂກ ວາ, ຍາ ຈຎ຺ຎາ ປຣິເທວນາ;

ນ ຕໍ ເປຕສ຺ສ ອຕ຺ຖາຍ, ເອວໍ ຕິຏ຺ຐນ຺ຕິ ຎາຕໂຍ.

໑໓. ‘‘ອຍຎ຺ຈ ໂຂ ທກ຺ຂິຓາ ທິນ຺ນາ, ສງ຺ຆມ຺ຫິ ສຸປ຺ປຕິຏ຺ຐິຕາ;

ທີຆຣຕ຺ຕໍ ຫິຕາຍສ຺ສ, ຐານໂສ ອຸປກປ຺ປຕີ’’ຕິ. – ອິມາ ຄາຖາ ອຠາສິ;

໑໐. ຕຕ຺ຖ ຍໍ ກິຎ຺ຈາຣມ຺ມຓໍ ກຕ຺ວາຕິ ມງ຺ຄລາທີສຸ ອຎ຺ຎຕຣໍ ຍໍ ກິຎ຺ຈິ ອາຣພ຺ຠ ອຸທ຺ທິສ຺ສ. ທຊ຺ຊາຕິ ທເທຍ຺ຍ. ອມຈ຺ຉຣີຕິ ອຕ຺ຕໂນ ສມ຺ປຕ຺ຕິຍາ ປເຣຫິ ສາຘາຣຓຠາວາສຫນລກ຺ຂຓສ຺ສ ມຈ຺ເຉຣສ຺ສ ອຠາວໂຕ ອມຈ຺ຉຣີ, ປຣິຈ຺ຈາຄສີໂລ ມຈ຺ຉຣິຍໂລຠາທິຈິຕ຺ຕມລໍ ທູຣໂຕ ກຕ຺ວາ ທານໍ ທເທຍ຺ຍາຕິ ອຘິປ຺ປາໂຍ. ປຸພ຺ພເປເຕ ຈ ອາຣພ຺ຠາຕິ ປຸພ຺ພເກປິ ເປເຕ ອຸທ຺ທິສ຺ສ. ວຕ຺ຖຸເທວຕາຕິ ຆຣວຕ຺ຖຸອາທີສຸ ອຘິວຕ຺ຖາ ເທວຕາ ອາຣພ຺ຠາຕິ ໂຍຊນາ. ອຖ ວາຕິ ອິມິນາ ອຎ຺ເຎປິ ເທວມນຸສ຺ສາທິເກ ເຍ ເກຈິ ອາຣພ຺ຠ ທານໍ ທເທຍ຺ຍາຕິ ທສ຺ເສຕິ.

໑໑. ຕຕ຺ຖ ເທເວສຸ ຕາວ ເອກຈ຺ເຈ ປາກເຏ ເທເວ ທສ຺ເສນ຺ໂຕ ‘‘ຈຕ຺ຕາໂຣ ຈ ມຫາຣາເຊ’’ຕິ ວຕ຺ວາ ປຸນ ເຕ ນາມໂຕ ຄຓ຺ຫນ຺ໂຕ ‘‘ກຸເວຣ’’ນ຺ຕິອາທິມາຫ. ຕຕ຺ຖ ກຸເວຣນ຺ຕິ ເວສ຺ສວຓໍ. ຘຕຣຏ຺ຐນ຺ຕິອາທີນິ ເສສານໍ ຕິຓ຺ຓໍ ໂລກປາລານໍ ນາມານິ. ເຕ ເຈວ ປູຊິຕາ ໂຫນ຺ຕີຕິ ເຕ ຈ ມຫາຣາຊາໂນ ປຸພ຺ພເປຕວຕ຺ຖຸເທວຕາໂຍ ຈ ອຸທ຺ທິສນກິຣິຍາຍ ປຏິມານິກາ ໂຫນ຺ຕິ. ທາຍກາ ຈ ອນິປ຺ຜລາຕິ ເຍ ທານໍ ເທນ຺ຕິ, ເຕ ທາຍກາ ຈ ປເຣສໍ ອຸທ຺ທິສນມຕ຺ເຕນ ນ ນິປ຺ຜລາ, ອຕ຺ຕໂນ ທານຜລສ຺ສ ຠາຄິໂນ ເອວ ໂຫນ຺ຕິ.

໑໒. ອິທານິ ‘‘ເຍ ອຕ຺ຕໂນ ຎາຕີນໍ ມຣເຓນ ໂຣທນ຺ຕິ ປຣິເທວນ຺ຕິ ໂສຈນ຺ຕິ, ເຕສໍ ຕໍ ນິຣຕ຺ຖກໍ, ອຕ຺ຕປຣິຕາປນມຕ຺ຕເມວາ’’ຕິ ທສ຺ເສຕຸໍ ‘‘ນ ຫິ ຣຸຓ຺ຓໍ ວາ’’ຕິ ຄາຖມາຫ. ຕຕ຺ຖ ຣຸຓ຺ຓນ຺ຕິ ຣຸທິຕໍ ອສ຺ສຸໂມຈນໍ ນ ຫິ ກາຕພ຺ພນ຺ຕິ ວຈນເສໂສ. ໂສໂກຕິ ໂສຈນໍ ຈິຕ຺ຕສນ຺ຕາໂປ, ອນ຺ໂຕນິຊ຺ຌານນ຺ຕິ ອຕ຺ໂຖ. ຍາ ຈຎ຺ຎາ ປຣິເທວນາຕິ ຍາ ຈ ຣຸຓ຺ຓໂສກໂຕ ອຎ຺ຎາ ປຣິເທວນາ, ‘‘ກຫໍ ເອກປຸຕ຺ຕກາ’’ຕິອາທິວາຈາວິປ຺ປລາໂປ, ໂສປິ ນ ກາຕພ຺ໂພຕິ ອຕ຺ໂຖ. ສພ຺ພຕ຺ຖ ວາ-ສທ຺ໂທ ວິກປ຺ປນຕ຺ໂຖ. ນ ຕໍ ເປຕສ຺ສ ອຕ຺ຖາຍາຕິ ຍສ຺ມາ ຣຸຓ຺ຓໍ ວາ ໂສໂກ ວາ ປຣິເທວນາ ວາຕິ ສພ຺ພມ຺ປິ ຕໍ ເປຕສ຺ສ ກາລກຕສ຺ສ ອຕ຺ຖາຍ ອຸປກາຣາຍ ນ ໂຫຕິ, ຕສ຺ມາ ນ ຫິ ຕໍ ກາຕພ຺ພໍ, ຕຖາປິ ເອວໍ ຕິຏ຺ຐນ຺ຕິ ຎາຕໂຍ ອວິທ຺ທສຸໂນຕິ ອຘິປ຺ປາໂຍ.

໑໓. ເອວໍ ຣຸຓ຺ຓາທີນໍ ນິຣຕ຺ຖກຠາວໍ ທສ຺ເສຕ຺ວາ ອິທານິ ຍາ ປຸພ຺ພເປຕາທິເກ ອາຣພ຺ຠ ທາຍເກນ ສງ຺ຆສ຺ສ ທກ຺ຂິຓາ ທິນ຺ນາ, ຕສ຺ສາ ສາຕ຺ຖກຠາວໍ ທສ຺ເສນ຺ໂຕ ‘‘ອຍຎ຺ຈ ໂຂ ທກ຺ຂິຓາ’’ຕິ ຄາຖມາຫ. ຕຕ຺ຖ ອຍນ຺ຕິ ທາຍເກນ ຕໍ ທິນ຺ນໍ ທານໍ ປຈ຺ຈກ຺ຂໂຕ ທສ຺ເສນ຺ໂຕ ວທຕິ. ຈ-ສທ຺ໂທ ພ຺ຍຕິເຣກຕ຺ໂຖ, ເຕນ ຍຖາ ຣຸຓ຺ຓາທິ ເປຕສ຺ສ ນ ກສ຺ສຈິ ອຕ຺ຖາຍ ໂຫຕິ, ນ ເອວມຍໍ, ອຍໍ ປນ ທກ຺ຂິຓາ ທີຆຣຕ຺ຕໍ ຫິຕາຍສ຺ສ ໂຫຕີຕິ ວກ຺ຂມານເມວ ວິເສສໍ ໂຊເຕຕິ. ໂຂຕິ ອວຘາຣເຓ. ທກ຺ຂິຓາຕິ ທານໍ. ສງ຺ຆມ຺ຫິ ສຸປ຺ປຕິຏ຺ຐິຕາຕິ ອນຸຕ຺ຕເຣ ປຸຎ຺ຎກ຺ເຂຕ຺ເຕ ສງ຺ເຆ ສຸຏ຺ຐຸ ປຕິຏ຺ຐິຕາ. ທີຆຣຕ຺ຕໍ ຫິຕາຍສ຺ສາຕິ ອສ຺ສ ເປຕສ຺ສ ຈິຣກາລໍ ຫິຕາຍ ອຕ຺ຖາຍ. ຐານໂສ ອຸປກປ຺ປຕີຕິ ຕງ຺ຂຓຎ຺ເຎວ ນິປ຺ຜຊ຺ຊຕິ, ນ ກາລນ຺ຕເຣຕິ ອຕ຺ໂຖ. ອຍຎ຺ຫິ ຕຕ຺ຖ ຘມ຺ມຕາ – ຍໍ ເປເຕ ອຸທ຺ທິສ຺ສ ທາເນ ທິນ຺ເນ ເປຕາ ເຈ ອນຸໂມທນ຺ຕິ, ຕາວເທວ ຕສ຺ສ ຜເລນ ເປຕາ ປຣິມຸຈ຺ຈນ຺ຕີຕິ.

ເອວໍ ຠຄວາ ຘມ຺ມໍ ເທເສຕ຺ວາ ມຫາຊນໍ ເປເຕ ອຸທ຺ທິສ຺ສ ທານາຠິຣຕມານສໍ ກຕ຺ວາ ອຸຏ຺ຐາຍາສນາ ປກ຺ກາມິ. ປຸນທິວເສ ເສຏ຺ຐິຠຣິຍາ ອວເສສາ ຈ ຎາຕກາ ເສຏ຺ຐິໍ ອນຸວຕ຺ຕນ຺ຕາ ເອວໍ ເຕມາສມຕ຺ຕໍ ມຫາທານໍ ປວຕ຺ເຕສຸໍ. ອຖ ຣາຊາ ປເສນທິ ໂກສໂລ ຠຄວນ຺ຕໍ ອຸປສງ຺ກມິຕ຺ວາ ‘‘ກສ຺ມາ, ຠນ຺ເຕ, ຠິກ຺ຂູ ມາສມຕ຺ຕໍ ມມ ຆຣໍ ນາຄມິໍສູ’’ຕິ ປຸຈ຺ຉິ. ສຕ຺ຖາຣາ ຕສ຺ມິໍ ກາຣເຓ ກຖິເຕ ຣາຊາປິ ເສຏ຺ຐິໍ ອນຸວຕ຺ຕນ຺ໂຕ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ມຫາທານໍ ປວຕ຺ເຕສິ, ຕໍ ທິສ຺ວາ ນາຄຣາ ຣາຊານໍ ອນຸວຕ຺ຕນ຺ຕາ ມາສມຕ຺ຕໍ ມຫາທານໍ ປວຕ຺ເຕສຸໍ. ເອວໍ ມາສທ຺ວຍໍ ປິຏ຺ຐຘີຕລິກມູລກໍ ມຫາທານໍ ປວຕ຺ເຕສຸນ຺ຕິ.

ປິຏ຺ຐຘີຕລິກເປຕວຕ຺ຖຸວຓ຺ຓນາ ນິຏ຺ຐິຕາ.