໒. ສູກຣມຸຂເປຕວຕ຺ຖຸວຓ຺ຓນາ

ກາໂຍ ເຕ ສພ຺ພໂສວຓ຺ໂຓຕິ ອິທໍ ສຕ຺ຖຣິ ຣາຊຄຫໍ ອຸປນິສ຺ສາຍ ເວຬຸວເນ ກລນ຺ທກນິວາເປ ວິຫຣນ຺ເຕ ອຎ຺ຎຕຣໍ ສູກຣມຸຂເປຕໍ ອາຣພ຺ຠ ວຸຕ຺ຕໍ. ອຕີເຕ ກິຣ ກສ຺ສປສ຺ສ ຠຄວໂຕ ສາສເນ ເອໂກ ຠິກ຺ຂຸ ກາເຍນ ສຎ຺ຎໂຕ ອໂຫສິ, ວາຈາຍ ອສຎ຺ຎໂຕ, ຠິກ຺ຂູ ອກ຺ໂກສຕິ ປຣິຠາສຕິ. ໂສ ກາລໍ ກຕ຺ວາ ນິຣເຍ ນິພ຺ພຕ຺ໂຕ, ເອກໍ ພຸທ຺ຘນ຺ຕຣໍ ຕຕ຺ຖ ປຈ຺ຈິຕ຺ວາ ຕໂຕ ຈວິຕ຺ວາ ອິມສ຺ມິໍ ພຸທ຺ຘຸປ຺ປາເທ ຣາຊຄຫສມີເປ ຄິຊ຺ຌກູຏປພ຺ພຕປາເທ ຕສ຺ເສວ ກມ຺ມສ຺ສ ວິປາກາວເສເສນ ຂຸປ຺ປິປາສາຠິຠູໂຕ ເປໂຕ ຫຸຕ຺ວາ ນິພ຺ພຕ຺ຕິ. ຕສ຺ສ ກາໂຍ ສຸວຓ຺ຓວຓ຺ໂຓ ອໂຫສິ, ມຸຂໍ ສູກຣມຸຂສທິສໍ. ອຖາຍສ຺ມາ ນາຣໂທ ຄິຊ຺ຌກູເຏ ປພ຺ພເຕ ວສນ຺ໂຕ ປາໂຕວ ສຣີຣປຏິຊຄ຺ຄນໍ ກຕ຺ວາ ປຕ຺ຕຈີວຣມາທາຍ ຣາຊຄຫໍ ປິຓ຺ຑາຍ ຄຈ຺ຉນ຺ໂຕ ອນ຺ຕຣາມຄ຺ເຄ ຕໍ ເປຕໍ ທິສ຺ວາ ເຕນ ກຕກມ຺ມໍ ປຸຈ຺ຉນ຺ໂຕ –

໔. ‘‘ກາໂຍ ເຕ ສພ຺ພໂສວຓ຺ໂຓ, ສພ຺ພາ ໂອຠາສເຕ ທິສາ;

ມຸຂໍ ເຕ ສູກຣສ຺ເສວ, ກິໍ ກມ຺ມມກຣີ ປຸເຣ’’ຕິ. –

ຄາຖມາຫ. ຕຕ຺ຖ ກາໂຍ ເຕ ສພ຺ພໂສວຓ຺ໂຓຕິ ຕວ ກາໂຍ ເທໂຫ ສພ຺ໂພ ສຸວຓ຺ຓວຓ຺ໂຓ ອຸຕ຺ຕຕ຺ຕກນກສນ຺ນິໂຠ. ສພ຺ພາ ໂອຠາສເຕ ທິສາຕິ ຕສ຺ສ ປຠາຍ ສພ຺ພາປິ ທິສາ ສມນ຺ຕນ຺ໂຕ ໂອຠາສຕິ ວິຊ຺ໂຊຕຕິ. ໂອຠາສເຕຕິ ວາ ອນ຺ໂຕຄຘໂຫຕຸອຕ຺ຖມິທໍ ປທນ຺ຕິ ‘‘ເຕ ກາໂຍ ສພ຺ພໂສວຓ຺ໂຓ ສພ຺ພາ ທິສາ ໂອຠາເສຕິ ວິຊ຺ໂຊເຕຕີ’’ຕິ ອຕ຺ໂຖ ທຏ຺ຐພ຺ໂພ. ມຸຂໍ ເຕ ສູກຣສ຺ເສວາຕິ ມຸຂໍ ປນ ເຕ ສູກຣສ຺ສ ວິຍ, ສູກຣມຸຂສທິສໍ ຕວ ມຸຂນ຺ຕິ ອຕ຺ໂຖ. ກິໍ ກມ຺ມມກຣີ ປຸເຣຕິ ‘‘ຕ຺ວໍ ປຸພ຺ເພ ອຕີຕຊາຕິຍໍ ກີທິສໍ ກມ຺ມໍ ອກາສີ’’ຕິ ປຸຈ຺ຉຕິ.

ເອວໍ ເຖເຣນ ໂສ ເປໂຕ ກຕກມ຺ມໍ ປຸຏ຺ໂຐ ຄາຖາຍ ວິສ຺ສຊ຺ເຊນ຺ໂຕ –

໕. ‘‘ກາເຍນ ສຎ຺ຎໂຕ ອາສິໍ, ວາຈາຍາສິມສຎ຺ຎໂຕ;

ເຕນ ເມຕາທິໂສ ວຓ຺ໂຓ, ຍຖາ ປສ຺ສສິ ນາຣທາ’’ຕິ. –

ອາຫ. ຕຕ຺ຖ ກາເຍນ ສຎ຺ຎໂຕ ອາສິນ຺ຕິ ກາຍິເກນ ສໍຍເມນ ສໍຍໂຕ ກາຍທ຺ວາຣິເກນ ສໍວເຣນ ສໍວຸໂຕ ອໂຫສິໍ. ວາຈາຍາສິມສຎ຺ຎໂຕຕິ ວາຈາຍ ອສຎ຺ຎໂຕ ວາຈສິເກນ ອສໍວເຣນ ສມນ຺ນາຄໂຕ ອໂຫສິໍ. ເຕນາຕິ ເຕນ ອຸຠເຍນ ສໍຍເມນ ອສໍຍເມນ ຈ. ເມຕິ ມຍ຺ຫໍ. ເອຕາທິໂສ ວຓ຺ໂຓຕິ ເອທິໂສ. ຍຖາ ຕ຺ວໍ, ນາຣທ, ປຈ຺ຈກ຺ຂໂຕ ປສ຺ສສິ, ເອວຣູໂປ, ກາເຍນ ມນຸສ຺ສສຓ຺ຐາໂນ ສຸວຓ຺ຓວຓ຺ໂຓ, ມຸເຂນ ສູກຣສທິໂສ ອາສິນ຺ຕິ ໂຍຊນາ. ວຓ຺ຓສທ຺ໂທ ຫິ ອິຘ ຉວິຍໍ ສຓ຺ຐາເນ ຈ ທຏ຺ຐພ຺ໂພ.

ເອວໍ ເປໂຕ ເຖເຣນ ປຸຈ຺ຉິໂຕ ຕມຕ຺ຖໍ ວິສ຺ສຊ຺ເຊຕ຺ວາ ຕເມວ ກາຣຓໍ ກຕ຺ວາ ເຖຣສ຺ສ ໂອວາທໍ ເທນ຺ໂຕ –

໖. ‘‘ຕໍ ຕ຺ຍາຫໍ ນາຣທ ພ຺ຣູມິ, ສາມໍ ທິຏ຺ຐມິທໍ ຕຍາ;

ມາກາສິ ມຸຂສາ ປາປໍ, ມາ ໂຂ ສູກຣມຸໂຂ ອຫູ’’ຕິ. –

ຄາຖມາຫ. ຕຕ຺ຖ ຕນ຺ຕິ ຕສ຺ມາ. ຕ຺ຍາຫນ຺ຕິ ເຕ ອຫໍ. ນາຣທາຕິ ເຖຣໍ ອາລປຕິ. ພ຺ຣູມີຕິ ກເຖມິ. ສາມນ຺ຕິ ສຍເມວ. ອິທນ຺ຕິ ອຕ຺ຕໂນ ສຣີຣໍ ສນ຺ຘາຍ ວທຕິ. ອຍຎ຺ເຫຕ຺ຖ ອຕ຺ໂຖ – ຍສ຺ມາ, ຠນ຺ເຕ ນາຣທ, ອິທໍ ມມ ສຣີຣໍ ຄລໂຕ ປຏ຺ຐາຍ ເຫຏ຺ຐາ ມນຸສ຺ສສຓ຺ຐານໍ, ອຸປຣິ ສູກຣສຓ຺ຐານໍ, ຕຍາ ປຈ຺ຈກ຺ຂໂຕວ ທິຏ຺ຐໍ, ຕສ຺ມາ ເຕ ອຫໍ ໂອວາທວເສນ ວທາມີຕິ. ກິນ຺ຕິ ເຈຕິ ອາຫ ‘‘ມາກາສິ ມຸຂສາ ປາປໍ, ມາ ໂຂ ສູກຣມຸໂຂ ອຫູ’’ຕິ. ຕຕ຺ຖ ມາຕິ ປຏິເສເຘ ນິປາໂຕ. ມຸຂສາຕິ ມຸເຂນ. ໂຂຕິ ອວຘາຣເຓ, ວາຈາຍ ປາປກມ຺ມໍ ມາກາສິ ມາ ກໂຣຫິ. ມາ ໂຂ ສູກຣມຸໂຂ ອຫູຕິ ອຫໍ ວິຍ ສູກຣມຸໂຂ ມາ ອໂຫສິເຍວ. ສເຈ ປນ ຕ຺ວໍ ມຸຂໂຣ ຫຸຕ຺ວາ ວາຈາຍ ປາປໍ ກເຣຍ຺ຍາສິ, ເອກໍເສນ ສູກຣມຸໂຂ ຠເວຍ຺ຍາສິ, ຕສ຺ມາ ມາກາສິ ມຸຂສາ ປາປນ຺ຕິ ຜລປຏິເສຘນມຸເຂນປິ ເຫຕຸເມວ ປຏິເສເຘຕິ.

ອຖາຍສ຺ມາ ນາຣໂທ ຣາຊຄເຫ ປິຓ຺ຑາຍ ຈຣິຕ຺ວາ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ໂຕ ຈຕຸປຣິສມຊ຺ເຌ ນິສິນ຺ນສ຺ສ ສຕ຺ຖຸໂນ ຕມຕ຺ຖໍ ອາໂຣເຈສິ. ສຕ຺ຖາ, ‘‘ນາຣທ, ປຸພ຺ເພວ ມຍາ ໂສ ສຕ຺ໂຖ ທິຏ຺ໂຐ’’ຕິ ວຕ຺ວາ ອເນກາກາຣໂວກາຣໍ ວຈີທຸຈ຺ຈຣິຕສນ຺ນິສ຺ສິຕໍ ອາທີນວໍ, ວຈີສຸຈຣິຕປຏິສໍຍຸຕ຺ຕຎ຺ຈ ອານິສໍສໍ ປກາເສນ຺ໂຕ ຘມ຺ມໍ ເທເສສິ. ສາ ເທສນາ ສມ຺ປຕ຺ຕປຣິສາຍ ສາຕ຺ຖິກາ ອໂຫສີຕິ.

ສູກຣມຸຂເປຕວຕ຺ຖຸວຓ຺ຓນາ ນິຏ຺ຐິຕາ.