໑໒. ອຸຣຄເປຕວຕ຺ຖຸວຓ຺ຓນາ

ອຸຣໂຄວ ຕຈໍ ຊິຓ຺ຓນ຺ຕິ ອິທໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ອຸປາສກໍ ອາຣພ຺ຠ ກເຖສິ. ສາວຕ຺ຖິຍໍ ກິຣ ອຎ຺ຎຕຣສ຺ສ ອຸປາສກສ຺ສ ປຸຕ຺ໂຕ ກາລມກາສິ. ໂສ ປຸຕ຺ຕມຣຓເຫຕຸ ປຣິເທວໂສກສມາປນ຺ໂນ ພຫິ ນິກ຺ຂມິຕ຺ວາ ກິຎ຺ຈິ ກມ຺ມໍ ກາຕຸໍ ອສກ຺ໂກນ຺ໂຕ ເຄເຫເຍວ ອຏ຺ຐາສິ. ອຖ ສຕ຺ຖາ ປຈ຺ຈູສເວລາຍໍ ມຫາກຣຸຓາສມາປຕ຺ຕິໂຕ ວຸຏ຺ຐາຍ ພຸທ຺ຘຈກ຺ຂຸນາ ໂລກໍ ໂວໂລເກນ຺ໂຕ ຕໍ ອຸປາສກໍ ທິສ຺ວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ຕສ຺ສ ເຄຫໍ ຄນ຺ຕ຺ວາ ທ຺ວາເຣ ອຏ຺ຐາສິ. ອຸປາສໂກ ຈ ສຕ຺ຖຸ ອາຄຕຠາວໍ ສຸຕ຺ວາ ສີຆໍ ອຸຏ຺ຐາຍ ຄນ຺ຕ຺ວາ ປຈ຺ຈຸຄ຺ຄມນໍ ກຕ຺ວາ ຫຕ຺ຖໂຕ ປຕ຺ຕໍ ຄເຫຕ຺ວາ ເຄຫໍ ປເວເສຕ຺ວາ ອາສນໍ ປຎ຺ຎເປຕ຺ວາ ອທາສິ. ນິສີທິ ຠຄວາ ປຎ຺ຎຕ຺ເຕ ອາສເນ. ອຸປາສໂກປິ ຠຄວນ຺ຕໍ ວນ຺ທິຕ຺ວາ ເອກມນ຺ຕໍ ນິສີທິ. ຕໍ ຠຄວາ ‘‘ກິໍ, ອຸປາສກ, ໂສກປເຣໂຕ ວິຍ ທິສ຺ສຕີ’’ຕິ ອາຫ. ‘‘ອາມ, ຠຄວາ, ປິໂຍ ເມ ປຸຕ຺ໂຕ ກາລກໂຕ, ເຕນາຫໍ ໂສຈາມີ’’ຕິ. ອຖສ຺ສ ຠຄວາ ໂສກວິໂນທນໍ ກໂຣນ຺ໂຕ ອຸຣຄຊາຕກໍ (ຊາ. ໑.໕.໑໙ ອາທໂຍ) ກເຖສິ.

ອຕີເຕ ກິຣ ກາສິຣຏ຺ເຐ ພາຣາຓສິຍໍ ຘມ຺ມປາລໍ ນາມ ພ຺ຣາຫ຺ມຓກຸລໍ ອໂຫສິ. ຕຕ຺ຖ ພ຺ຣາຫ຺ມໂຓ ພ຺ຣາຫ຺ມຓີ ປຸຕ຺ໂຕ ຘີຕາ ສຸຓິສາ ທາສີຕິ ອິເມ ສພ຺ເພປິ ມຣຓານຸສ຺ສຕິຠາວນາຠິຣຕາ ອເຫສຸໍ. ເຕສຸ ໂຍ ເຄຫໂຕ ນິກ຺ຂມຕິ, ໂສ ເສສຊເນ ໂອວທິຕ຺ວາ ນິຣເປກ຺ໂຂວ ນິກ຺ຂມຕິ. ອເຖກທິວສໍ ພ຺ຣາຫ຺ມໂຓ ປຸຕ຺ເຕນ ສທ຺ຘິໍ ຆຣໂຕ ນິກ຺ຂມິຕ຺ວາ ເຂຕ຺ຕໍ ຄນ຺ຕ຺ວາ ກສຕິ. ປຸຕ຺ໂຕ ສຸກ຺ຂຕິຓປຓ຺ຓກຏ຺ຐານິ ອາລິມ຺ເປຕິ. ຕຕ຺ເຖໂກ ກຓ຺ຫສປ຺ໂປ ຑາຫຠເຍນ ຣຸກ຺ຂສຸສິຣໂຕ ນິກ຺ຂມິຕ຺ວາ ອິມໍ ພ຺ຣາຫ຺ມຓສ຺ສ ປຸຕ຺ຕໍ ຑໍສິ. ໂສ ວິສເວເຄນ ມຸຈ຺ຉິໂຕ ຕຕ຺ເຖວ ປຣິປຕິຕ຺ວາ ກາລກໂຕ, ສກ຺ໂກ ເທວຣາຊາ ຫຸຕ຺ວາ ນິພ຺ພຕ຺ຕິ. ພ຺ຣາຫ຺ມໂຓ ປຸຕ຺ຕໍ ມຕໍ ທິສ຺ວາ ກມ຺ມນ຺ຕສມີເປນ ຄຈ຺ຉນ຺ຕໍ ເອກໍ ປຸຣິສໍ ເອວມາຫ – ‘‘ສມ຺ມ, ມມ ຆຣໍ ຄນ຺ຕ຺ວາ ພ຺ຣາຫ຺ມຓິໍ ເອວໍ ວເທຫິ ‘ນ຺ຫາຍິຕ຺ວາ ສຸທ຺ຘວຕ຺ຖນິວຕ຺ຖາ ເອກສ຺ສ ຠຕ຺ຕໍ ມາລາຄນ຺ຘາທີນິ ຈ ຄເຫຕ຺ວາ ຕຸຣິຕໍ ອາຄຈ຺ຉຕູ’ຕິ’’. ໂສ ຕຕ຺ຖ ຄນ຺ຕ຺ວາ ຕຖາ ອາໂຣເຈສິ, ເຄຫຊໂນປິ ຕຖາ ອກາສິ. ພ຺ຣາຫ຺ມໂຓ ນ຺ຫຕ຺ວາ ຠຸຎ຺ຊິຕ຺ວາ ວິລິມ຺ປິຕ຺ວາ ປຣິຊນປຣິວຸໂຕ ປຸຕ຺ຕສ຺ສ ສຣີຣໍ ຈິຕກໍ ອາໂຣເປຕ຺ວາ ອຄ຺ຄິໍ ທຕ຺ວາ ທາຣຸກ຺ຂນ຺ຘໍ ຑຫນ຺ໂຕ ວິຍ ນິສ຺ໂສໂກ ນິສ຺ສນ຺ຕາໂປ ອນິຈ຺ຈສຎ຺ຎໍ ມນສິ ກໂຣນ຺ໂຕ ອຏ຺ຐາສິ.

ອຖ ພ຺ຣາຫ຺ມຓສ຺ສ ປຸຕ຺ໂຕ ສກ຺ໂກ ຫຸຕ຺ວາ ນິພ຺ພຕ຺ຕິ, ໂສ ຈ ອມ຺ຫາກໍ ໂພຘິສຕ຺ໂຕ ອໂຫສິ. ໂສ ອຕ຺ຕໂນ ປຸຣິມຊາຕິໍ ກຕປຸຎ຺ຎຎ຺ຈ ປຈ຺ຈເວກ຺ຂິຕ຺ວາ ປິຕຣໍ ຎາຕເກ ຈ ອນຸກມ຺ປມາໂນ ພ຺ຣາຫ຺ມຓເວເສນ ຕຕ຺ຖ ອາຄນ຺ຕ຺ວາ ຎາຕເກ ອໂສຈນ຺ເຕ ທິສ຺ວາ ‘‘ອມ຺ໂຠ, ມິຄໍ ຌາເປຖ, ອມ຺ຫາກໍ ມໍສໍ ເທຖ, ຉາໂຕມ຺ຫີ’’ຕິ ອາຫ. ‘‘ນ ມິໂຄ, ມນຸສ຺ໂສ ພ຺ຣາຫ຺ມຓາ’’ຕິ ອາຫ. ‘‘ກິໍ ຕຸມ຺ຫາກໍ ປຈ຺ຈຕ຺ຖິໂກ ເອໂສ’’ຕິ? ‘‘ນ ປຈ຺ຈຕ຺ຖິໂກ, ອຸເຣ ຊາໂຕ ໂອຣໂສ ມຫາຄຸຓວນ຺ໂຕ ຕຣຸຓປຸຕ຺ໂຕ’’ຕິ ອາຫ. ‘‘ກິມຕ຺ຖໍ ຕຸມ຺ເຫ ຕຖາຣູເປ ຄຸຓວຕິ ຕຣຸຓປຸຕ຺ເຕ ມເຕ ນ ໂສຈຖາ’’ຕິ? ຕໍ ສຸຕ຺ວາ ພ຺ຣາຫ຺ມໂຓ ອໂສຈນກາຣຓໍ ກເຖນ຺ໂຕ –

໘໕. ‘‘ອຸຣໂຄວ ຕຈໍ ຊິຓ຺ຓໍ, ຫິຕ຺ວາ ຄຈ຺ຉຕິ ສໍ ຕນຸໍ;

ເອວໍ ສຣີເຣ ນິພ຺ໂຠເຄ, ເປເຕ ກາລກເຕ ສຕິ.

໘໖. ‘‘ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂຣທາມິ, ຄໂຕ ໂສ ຕສ຺ສ ຍາ ຄຕີ’’ຕິ. –

ທ຺ເວ ຄາຖາ ອຠາສິ.

໘໕-໘໖. ຕຕ຺ຖ ອຸຣໂຄຕິ ອຸເຣນ ຄຈ຺ຉຕີຕິ ອຸຣໂຄ. ສປ຺ປສ຺ເສຕໍ ອຘິວຈນໍ. ຕຈໍ ຊິຓ຺ຓນ຺ຕິ ຊຊ຺ຊຣຠາເວນ ຊິຓ຺ຓໍ ປຸຣາຓໍ ອຕ຺ຕໂນ ຕຈໍ ນິມ຺ໂມກໍ. ຫິຕ຺ວາ ຄຈ຺ຉຕິ ສໍ ຕນຸນ຺ຕິ ຍຖາ ອຸຣໂຄ ອຕ຺ຕໂນ ຊິຓ຺ຓຕຈໍ ຣຸກ຺ຂນ຺ຕເຣ ວາ ກຏ຺ຐນ຺ຕເຣ ວາ ມູລນ຺ຕເຣ ວາ ປາສາຓນ຺ຕເຣ ວາ ກຎ຺ຈຸກໍ ໂອມຸຎ຺ຈນ຺ໂຕ ວິຍ ສຣີຣໂຕ ໂອມຸຎ຺ຈິຕ຺ວາ ປຫາຍ ຉຑ຺ເຑຕ຺ວາ ຍຖາກາມໍ ຄຈ຺ຉຕິ, ເອວເມວ ສໍສາເຣ ປຣິພ຺ຠມນ຺ໂຕ ສຕ຺ໂຕ ໂປຣາຓສ຺ສ ກມ຺ມສ຺ສ ປຣິກ຺ຂີຓຕ຺ຕາ ຊຊ຺ຊຣີຠູຕໍ ສໍ ຕນຸໍ ອຕ຺ຕໂນ ສຣີຣໍ ຫິຕ຺ວາ ຄຈ຺ຉຕິ, ຍຖາກມ຺ມໍ ຄຈ຺ຉຕິ, ປຸນພ຺ຠວວເສນ ອຸປປຊ຺ຊຕີຕິ ອຕ຺ໂຖ. ເອວນ຺ຕິ ຑຍ຺ຫມານໍ ປຸຕ຺ຕສ຺ສ ສຣີຣໍ ທສ຺ເສນ຺ໂຕ ອາຫ. ສຣີເຣ ນິພ຺ໂຠເຄຕິ ອສ຺ສ ວິຍ ອຎ຺ເຎສມ຺ປິ ກາເຍ ເອວໍ ໂຠຄວິຣຫິເຕ ນິຣຕ຺ຖເກ ຊາເຕ. ເປເຕຕິ ອາຍຸອຸສ຺ມາວິຎ຺ຎາຓໂຕ ອປຄເຕ. ກາລກເຕ ສຕີຕິ ມເຕ ຊາເຕ. ຕສ຺ມາຕິ ຍສ຺ມາ ຑຍ຺ຫມາໂນ ກາໂຍ ອເປຕວິຎ຺ຎາຓຕ຺ຕາ ຑາຫທຸກ຺ຂໍ ວິຍ ຎາຕີນໍ ຣຸທິຕໍ ປຣິເທວິຕມ຺ປິ ນ ຊານາຕິ, ຕສ຺ມາ ເອຕໍ ມມ ປຸຕ຺ຕໍ ນິມິຕ຺ຕໍ ກຕ຺ວາ ນ ໂຣທາມິ. ຄໂຕ ໂສ ຕສ຺ສ ຍາ ຄຕີຕິ ຍທິ ມຕສຕ຺ຕາ ນ ອຸຈ຺ຉິຊ຺ຊນ຺ຕິ, ມຕສ຺ສ ປນ ກໂຕກາສສ຺ສ ກມ຺ມສ຺ສ ວເສນ ຍາ ຄຕິ ປາຏິກງ຺ຂາ, ຕໍ ຈຸຕິອນນ຺ຕຣເມວ ຄໂຕ, ໂສ ນ ປຸຣິມຎາຕີນໍ ຣຸທິຕໍ ປຣິເທວິຕໍ ວາ ປຈ຺ຈາສີສຕິ, ນາປິ ເຍຠຸຍ຺ເຍນ ປຸຣິມຎາຕີນໍ ຣຸທິເຕນ ກາຈິ ອຕ຺ຖສິທ຺ຘີຕິ ອຘິປ຺ປາໂຍ.

ເອວໍ ພ຺ຣາຫ຺ມເຓນ ອຕ຺ຕໂນ ອໂສຈນກາຣເຓ ກຖິເຕ ປຣິຍາຍມນສິກາຣໂກສລ຺ເລ ປກາສິເຕ ພ຺ຣາຫ຺ມຓຣູໂປ ສກ຺ໂກ ພ຺ຣາຫ຺ມຓິໍ ອາຫ – ‘‘ອມ຺ມ, ຕຸຍ຺ຫໍ ໂສ ມໂຕ ກິໍ ໂຫຕີ’’ຕິ? ‘‘ທສ ມາເສ ກຸຈ຺ຉິນາ ປຣິຫຣິຕ຺ວາ ຖຎ຺ຎໍ ປາເຍຕ຺ວາ ຫຕ຺ຖປາເທ ສຓ຺ຐເປຕ຺ວາ ສໍວຑ຺ຒິໂຕ ປຸຕ຺ໂຕ ເມ, ສາມີ’’ຕິ. ‘‘ຍທິ ເອວໍ ປິຕາ ຕາວ ປຸຣິສຠາເວນ ມາ ໂຣທຕຸ, ມາຕຸ ນາມ ຫທຍໍ ມຸທຸກໍ, ຕ຺ວໍ ກສ຺ມາ ນ ໂຣທສີ’’ຕິ? ຕໍ ສຸຕ຺ວາ ສາ ອໂຣທນກາຣຓໍ ກເຖນ຺ຕີ –

໘໗. ‘‘ອນພ຺ຠິໂຕ ຕໂຕ ອາຄາ, ນານຸຎ຺ຎາໂຕ ອິໂຕ ຄໂຕ;

ຍຖາຄໂຕ ຕຖາ ຄໂຕ, ຕຕ຺ຖ ກາ ປຣິເທວນາ.

໘໘. ‘‘ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂຣທາມິ, ຄໂຕ ໂສ ຕສ຺ສ ຍາ ຄຕີ’’ຕິ. –

ຄາຖາທ຺ວຍມາຫ. ຕຕ຺ຖ ອນພ຺ຠິໂຕຕິ ອນວ຺ຫາໂຕ, ‘‘ເອຫິ ມຍ຺ຫໍ ປຸຕ຺ຕຠາວໍ ອຸປຄຈ຺ຉາ’’ຕິ ເອວໍ ອປກ຺ໂກສິໂຕ. ຕໂຕຕິ ຍຕ຺ຖ ປຸພ຺ເພ ຐິໂຕ, ຕໂຕ ປຣໂລກໂຕ. ອາຄາຕິ ອາຄຎ຺ຉິ. ນານຸຎ຺ຎາໂຕຕິ ອນນຸມໂຕ, ‘‘ຄຈ຺ຉ, ຕາຕ, ປຣໂລກ’’ນ຺ຕິ ເອວໍ ອມ຺ເຫຫິ ອວິສ຺ສຏ຺ໂຐ. ອິໂຕຕິ ອິຘໂລກໂຕ. ຄໂຕຕິ ອປຄໂຕ. ຍຖາຄໂຕຕິ ເຍນາກາເຣນ ອາຄໂຕ, ອມ຺ເຫຫິ ອນພ຺ຠິໂຕ ເອວ ອາຄໂຕຕິ ອຕ຺ໂຖ. ຕຖາ ຄໂຕຕິ ເຕເນວາກາເຣນ ຄໂຕ. ຍຖາ ສເກເນວ ກມ຺ມຸນາ ອາຄໂຕ, ຕຖາ ສເກເນວ ກມ຺ມຸນາ ຄໂຕຕິ. ເອເຕນ ກມ຺ມສ຺ສກຕໍ ທສ຺ເສຕິ. ຕຕ຺ຖ ກາ ປຣິເທວນາຕິ ເອວໍ ອວສວຕ຺ຕິເກ ສໍສາຣປວຕ຺ເຕ ມຣຓໍ ປຏິຈ຺ຈ ກາ ນາມ ປຣິເທວນາ, ອຍຸຕ຺ຕາ ສາ ປຎ຺ຎວຕາ ອກຣຓີຍາຕິ ທສ຺ເສຕິ.

ເອວໍ ພ຺ຣາຫ຺ມຓິຍາ ວຈນໍ ສຸຕ຺ວາ ຕສ຺ສ ຠຄິນິໍ ປຸຈ຺ຉິ – ‘‘ອມ຺ມ, ຕຸຍ຺ຫໍ ໂສ ກິໍ ໂຫຕີ’’ຕິ? ‘‘ຠາຕາ ເມ, ສາມີ’’ຕິ. ‘‘ອມ຺ມ, ຠຄິນິໂຍ ນາມ ຠາຕູສຸ ສິເນຫາ, ຕ຺ວໍ ກສ຺ມາ ນ ໂຣທສີ’’ຕິ? ສາປິ ອໂຣທນກາຣຓໍ ກເຖນ຺ຕີ –

໘໙. ‘‘ສເຈ ໂຣເທ ກິສ຺ສ ອສ຺ສໍ, ຕຕ຺ຖ ເມ ກິໍ ຜລໍ ສິຍາ;

ຎາຕິມິຕ຺ຕສຸຫຊ຺ຊານໍ, ຠິຍ຺ໂຍ ໂນ ອຣຕີ ສິຍາ.

໙໐. ‘‘ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂຣທາມິ, ຄໂຕ ໂສ ຕສ຺ສ ຍາ ຄຕີ’’ຕິ. –

ຄາຖາທ຺ວຍມາຫ. ຕຕ຺ຖ ສເຈ ໂຣເທ ກິສາ ອສ຺ສນ຺ຕິ ຍທິ ອຫໍ ໂຣເທຍ຺ຍໍ, ກິສາ ປຣິສຸກ຺ຂສຣີຣາ ຠເວຍ຺ຍໍ. ຕຕ຺ຖ ເມ ກິໍ ຜລໍ ສິຍາຕິ ຕສ຺ມິໍ ມຍ຺ຫໍ ຠາຕຸ ມຣຓນິມິຕ຺ເຕ ໂຣທເນ ກິໍ ນາມ ຜລໍ, ໂກ ອານິສໍໂສ ຠເວຍ຺ຍ? ນ ເຕນ ມຍ຺ຫໍ ຠາຕິໂກ ອາຄຈ຺ເຉຍ຺ຍ, ນາປິ ໂສ ເຕນ ສຸຄຕິໍ ຄຈ຺ເຉຍ຺ຍາຕິ ອຘິປ຺ປາໂຍ. ຎາຕິມິຕ຺ຕສຸຫຊ຺ຊານໍ, ຠິຍ຺ໂຍ ໂນ ອຣຕີ ສິຍາຕິ ອມ຺ຫາກໍ ຎາຕີນໍ ມິຕ຺ຕານໍ ສຸຫທຍານຎ຺ຈ ມມ ໂສຈເນນ ຠາຕຸມຣຓທຸກ຺ຂໂຕ ຠິຍ຺ໂຍປິ ອຣຕິ ທຸກ຺ຂເມວ ສິຍາຕິ.

ເອວໍ ຠຄິນິຍາ ວຈນໍ ສຸຕ຺ວາ ຕສ຺ສ ຠຣິຍໍ ປຸຈ຺ຉິ – ‘‘ຕຸຍ຺ຫໍ ໂສ ກິໍ ໂຫຕີ’’ຕິ? ‘‘ຠຕ຺ຕາ ເມ, ສາມີ’’ຕິ. ‘‘ຠທ຺ເທ, ອິຕ຺ຖິໂຍ ນາມ ຠຕ຺ຕຣິ ສິເນຫາ ໂຫນ຺ຕິ, ຕສ຺ມິຎ຺ຈ ມເຕ ວິຘວາ ອນາຖາ ໂຫນ຺ຕິ, ກສ຺ມາ ຕ຺ວໍ ນ ໂຣທສີ’’ຕິ? ສາປິ ອຕ຺ຕໂນ ອໂຣທນກາຣຓໍ ກເຖນ຺ຕີ –

໙໑. ‘‘ຍຖາປິ ທາຣໂກ ຈນ຺ທໍ, ຄຈ຺ຉນ຺ຕມນຸໂຣທຕິ;

ເອວໍສມ຺ປທເມເວຕໍ, ໂຍ ເປຕມນຸໂສຈຕິ.

໙໒. ‘‘ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂຣທາມິ, ຄໂຕ ໂສ ຕສ຺ສ ຍາ ຄຕີ’’ຕິ. – ຄາຖາທ຺ວຍມາຫ;

ຕຕ຺ຖ ທາຣໂກຕິ ພາລທາຣໂກ. ຈນ຺ທນ຺ຕິ ຈນ຺ທມຓ຺ຑລໍ. ຄຈ຺ຉນ຺ຕນ຺ຕິ ນຠໍ ອພ຺ຠຸສ຺ສຸກ຺ກມານໍ. ອນຸໂຣທຕີຕິ ‘‘ມຍ຺ຫໍ ຣຖຈກ຺ກໍ ຄເຫຕ຺ວາ ເທຫີ’’ຕິ ອນຸໂຣທຕິ. ເອວໍສມ຺ປທເມເວຕນ຺ຕິ ໂຍ ເປຕໍ ມຕໍ ອນຸໂສຈຕິ, ຕສ຺ເສຕໍ ອນຸໂສຈນໍ ເອວໍສມ຺ປທໍ ເອວຣູປໍ, ອາກາເສນ ຄຈ຺ຉນ຺ຕສ຺ສ ຈນ຺ທສ຺ສ ຄເຫຕຸກາມຕາສທິສໍ ອລພ຺ຠເນຍ຺ຍວຕ຺ຖຸສ຺ມິໍ ອິຈ຺ຉາຠາວໂຕຕິ ອຘິປ຺ປາໂຍ.

ເອວໍ ຕສ຺ສ ຠຣິຍາຍ ວຈນໍ ສຸຕ຺ວາ ທາສິໍ ປຸຈ຺ຉິ – ‘‘ອມ຺ມ, ຕຸຍ຺ຫໍ ໂສ ກິໍ ໂຫຕີ’’ຕິ? ‘‘ອຍ຺ໂຍ ເມ, ສາມີ’’ຕິ. ‘‘ຍທິ ເອວໍ ເຕນ ຕ຺ວໍ ໂປເຖຕ຺ວາ ເວຍ຺ຍາວຈ຺ຈໍ ກາຣິຕາ ຠວິສ຺ສສິ, ຕສ຺ມາ ມຎ຺ເຎ ‘ສຸມຸຕ຺ຕາຫໍ ເຕນາ’ຕິ ນ ໂຣທສີ’’ຕິ? ‘‘ສາມິ, ມາ ມໍ ເອວໍ ອວຈ, ນ ເຈຕໍ ອນຸຈ຺ຉວິກໍ, ອຕິວິຍ ຂນ຺ຕິເມຕ຺ຕານຸທ຺ທຍາສມ຺ປນ຺ໂນ ຍຸຕ຺ຕວາທີ ມຍ຺ຫໍ ອຍ຺ຍປຸຕ຺ໂຕ ອຸເຣ ສໍວຑ຺ຒປຸຕ຺ໂຕ ວິຍ ອໂຫສີ’’ຕິ. ອຖ ‘‘ກສ຺ມາ ນ ໂຣທສີ’’ຕິ? ສາປິ ອຕ຺ຕໂນ ອໂຣທນກາຣຓໍ ກເຖນ຺ຕີ –

໙໓. ‘‘ຍຖາປິ ພ຺ຣຫ຺ເມ ອຸທກຸມ຺ໂຠ, ຠິນ຺ໂນ ອປ຺ປຏິສນ຺ຘິໂຍ;

ເອວໍສມ຺ປທເມເວຕໍ, ໂຍ ເປຕມນຸໂສຈຕິ.

໙໔. ‘‘ຑຍ຺ຫມາໂນ ນ ຊານາຕິ, ຎາຕີນໍ ປຣິເທວິຕໍ;

ຕສ຺ມາ ເອຕໍ ນ ໂຣທາມິ, ຄໂຕ ໂສ ຕສ຺ສ ຍາ ຄຕີ’’ຕິ. –

ຄາຖາທ຺ວຍມາຫ. ຕຕ຺ຖ ຍຖາປິ ພ຺ຣຫ຺ເມ ອຸທກຸພ຺ໂຠ, ຠິນ຺ໂນ ອປ຺ປຏິສນ຺ຘິໂຍຕິ ພ຺ຣາຫ຺ມຓ ເສຍ຺ຍຖາປິ ອຸທກຆໂຏ ມຸຄ຺ຄຣປ຺ປຫາຣາທິນາ ຠິນ຺ໂນ ອປ຺ປຏິສນ຺ຘິໂຍ ປຸນ ປາກຕິໂກ ນ ໂຫຕິ. ເສສເມຕ຺ຖ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວ.

ສກ຺ໂກ ເຕສໍ ກຖໍ ສຸຕ຺ວາ ປສນ຺ນມານໂສ ‘‘ສມ຺ມເທວ ຕຸມ຺ເຫຫິ ມຣຓສ຺ສຕິ ຠາວິຕາ, ອິໂຕ ປຏ຺ຐາຍ ນ ຕຸມ຺ເຫຫິ ກສິອາທິກຣຓກິຈ຺ຈໍ ອຕ຺ຖີ’’ຕິ ເຕສໍ ເຄຫໍ ສຕ຺ຕຣຕນຠຣິຕໍ ກຕ຺ວາ ‘‘ອປ຺ປມຕ຺ຕາ ທານໍ ເທຖ, ສີລໍ ຣກ຺ຂຖ, ອຸໂປສຖກມ຺ມໍ ກໂຣຖາ’’ຕິ ໂອວທິຕ຺ວາ ອຕ຺ຕານຎ຺ຈ ເຕສໍ ນິເວເທຕ຺ວາ ສກຏ຺ຐານເມວ ຄໂຕ. ເຕປິ ພ຺ຣາຫ຺ມຓາທໂຍ ທານາທີນິ ປຸຎ຺ຎານິ ກໂຣນ຺ຕາ ຍາວຕາຍຸກໍ ຐຕ຺ວາ ເທວໂລເກ ອຸປ຺ປຊ຺ຊິໍສຸ.

ສຕ຺ຖາ ອິມໍ ຊາຕກໍ ອາຫຣິຕ຺ວາ ຕສ຺ສ ອຸປາສກສ຺ສ ໂສກສລ຺ລໍ ສມຸທ຺ຘຣິຕ຺ວາ ອຸປຣິ ສຈ຺ຈານິ ປກາເສສິ, ສຈ຺ຈປຣິໂຍສາເນ ອຸປາສໂກ ໂສຕາປຕ຺ຕິຜເລ ປຕິຏ຺ຐຫີຕິ.

ອຸຣຄເປຕວຕ຺ຖຸວຓ຺ຓນາ ນິຏ຺ຐິຕາ.

ອິຕິ ຂຸທ຺ທກ-ອຏ຺ຐກຖາຍ ເປຕວຕ຺ຖຸສ຺ມິໍ

ທ຺ວາທສວຕ຺ຖຸປຏິມຓ຺ຑິຕສ຺ສ

ປຐມສ຺ສ ອຸຣຄວຄ຺ຄສ຺ສ ອຕ຺ຖສໍວຓ຺ຓນາ ນິຏ຺ຐິຕາ.