໖. ຎາຓຣາສິຉກ຺ກນິທ຺ເທສວຓ຺ຓນາ

໑໘໓. ອິທານິ ຉຫິ ຣາສີຫິ ອຸທ຺ທິຏ຺ຐຎາເຓສຸ ຈຕຸວີສຕິສມາຘິຎາຓນິທ຺ເທເສ ຕາວ ກາຍານຸປສ຺ສນາທີນໍ ຕິຓ຺ຓໍ ຈຕຸກ຺ການໍ ວເສນ ທ຺ວາທສນ຺ນໍ ວຕ຺ຖູນໍ ເອເກກສ຺ມິໍ ອສ຺ສາສວເສນ ເອໂກ, ປສ຺ສາສວເສນ ເອໂກຕິ ທ຺ເວ ທ຺ເວ ສມາຘີຕິ ທ຺ວາທສສຸ ວຕ຺ຖູສຸ ຈຕຸວີສຕິ ສມາຘໂຍ ໂຫນ຺ຕິ. ຌານກ຺ຂເຓ ເຕຫິ ສມ຺ປຍຸຕ຺ຕານິ ຈຕຸວີສຕິສມາຘິວເສນ ຎາຓານິ.

ທ຺ວາສຕ຺ຕຕິວິປສ຺ສນາຎາຓນິທ຺ເທເສ ທີຆໍ ອສ຺ສາສາຕິ ‘‘ທີຆ’’ນ຺ຕິວຸຕ຺ຕອສ຺ສາສໂຕ. ກິໍ ວຸຕ຺ຕໍ ໂຫຕິ? ທີຆໍ ອສ຺ສາສເຫຕຸ ຌານໍ ປຏິລຠິຕ຺ວາ ສມາຫິເຕນ ຈິຕ຺ເຕນ ວິປສ຺ສນາກ຺ຂເຓ ອນິຈ຺ຈໂຕ ອນຸປສ຺ສນຏ຺ເຐນ ວິປສ຺ສນາຕິ ວຸຕ຺ຕໍ ໂຫຕິ. ເອສ ນໂຍ ອຸຕ຺ຕຣຕ຺ຣາປິ. ເຕສໍເຍວ ທ຺ວາທສນ຺ນໍ ວຕ຺ຖູນໍ ເອເກກສ຺ມິໍ ອສ຺ສາສວເສນ ຕິສ຺ໂສ, ປສ຺ສາສວເສນ ຕິສ຺ໂສຕິ ຉ ຉ ອນຸປສ຺ສນາຕິ ທ຺ວາທສສຸ ວຕ຺ຖູສຸ ທ຺ວາສຕ຺ຕຕິ ອນຸປສ຺ສນາ ໂຫນ຺ຕິ. ຕາ ເອວ ທ຺ວາສຕ຺ຕຕິ ອນຸປສ຺ສນາ ທ຺ວາສຕ຺ຕຕິວິປສ຺ສນາວເສນ ຎາຓານິ.

ນິພ຺ພິທາຎາຓນິທ຺ເທເສ ອນິຈ຺ຈານຸປສ຺ສີ ອສ຺ສສນ຺ຕິ ອນິຈ຺ຈານຸປສ຺ສີ ຫຸຕ຺ວາ ອສ຺ສສນ຺ໂຕ, ອນິຈ຺ຈານຸປສ຺ສີ ຫຸຕ຺ວາ ວຕ຺ເຕນ຺ໂຕຕິ ອຕ຺ໂຖ. ‘‘ອສ຺ສສ’’ນ຺ຕິ ຈ ອິທໍ ວຈນໍ ເຫຕຸອຕ຺ເຖ ທຏ຺ຐພ຺ພໍ. ຍຖາຠູຕໍ ຊານາຕິ ປສ຺ສຕີຕິ ນິພ຺ພິທາຎາຓນ຺ຕິ ກລາປສມ຺ມສນໂຕ ປຏ຺ຐາຍ ຍາວ ຠງ຺ຄານຸປສ຺ສນາ ປວຕ຺ຕວິປສ຺ສນາຎາເຓນ ສງ຺ຂາຣານໍ ຍຖາສຠາວໍ ຊານາຕິ, ຈກ຺ຂຸນາ ທິຏ຺ຐມິວ ຈ ເຕເນວ ຎາຓຈກ຺ຂຸນາ ປສ຺ສຕິ. ຕສ຺ມາ ນິພ຺ພິທາຎາຓໍ ນາມາຕິ ອຕ຺ໂຖ, ສງ຺ຂາເຣສຸ ນິພ຺ພິນ຺ທຎາຓໍ ນາມາຕິ ວຸຕ຺ຕໍ ໂຫຕິ. ອຸປຣິ ຠຍຕູປຏ຺ຐານາທີນໍ ມຸຎ຺ຈິຕຸກມ຺ຍຕາທີນຎ຺ຈ ຎາຓານໍ ວິສຸໍ ອາຄຕຕ຺ຕາ ອິຘ ຍຖາວຸຕ຺ຕາເນວ ວິປສ຺ສນາຎາຓານິ ນິພ຺ພິທາຎາຓານີຕິ ເວທິຕພ຺ພານິ.

ນິພ຺ພິທານຸໂລມຎາຓນິທ຺ເທເສ ອນິຈ຺ຈານຸປສ຺ສີ ອສ຺ສສນ຺ຕິ ອນິຈ຺ຈານຸປສ຺ສິໂນ ອສ຺ສສນ຺ຕສ຺ສ. ສາມິອຕ຺ເຖ ປຈ຺ຈຕ຺ຕວຈນໍ. ຠຍຕຸປຏ຺ຐາເນ ປຎ຺ຎາຕິວຈເນເນວ ຠຍຕຸປຏ຺ຐານອາທີນວານຸປສ຺ສນານິພ຺ພິທານຸປສ຺ສນາຎາຓານິ ວຸຕ຺ຕານິ ໂຫນ຺ຕິ ຕິຓ຺ຓໍ ເອກລກ຺ຂຓຕ຺ຕາ. ອິມານິ ຕີຓິ ຎາຓານິ ອນນ຺ຕຣາ ວຸຕ຺ຕານໍ ນິພ຺ພິທາຎາຓານໍ ອນຸກູລຠາເວນ ອນຸໂລມໂຕ ນິພ຺ພິທານຸໂລມຎາຓານີຕິ ວຸຕ຺ຕານິ.

ນິພ຺ພິທາປຏິປ຺ປສ຺ສທ຺ຘິຎາຓນິທ຺ເທເສ ອນິຈ຺ຈານຸປສ຺ສີ ອສ຺ສສນ຺ຕິ ອນນ຺ຕຣສທິສເມວ. ປຏິສງ຺ຂາ ສນ຺ຕິຏ຺ຐນາ ປຎ຺ຎາຕິວຈເນເນວ ມຸຎ຺ຈິຕຸກມ຺ຍຕາປຏິສງ຺ຂານຸປສ຺ສນາສງ຺ຂາຣຸເປກ຺ຂາຎາຓານິ ວຸຕ຺ຕານິ ໂຫນ຺ຕິ ຕິຓ຺ຓໍ ເອກລກ຺ຂຓຕ຺ຕາ. ‘‘ປຏິສງ຺ຂາ ສນ຺ຕິຏ຺ຐນາ’’ຕິວຈເນເນວ ອນຸໂລມຎາຓມຄ຺ຄຎາຓານິປິ ຄຫິຕານິ ໂຫນ຺ຕິ. ສງ຺ຂາຣຸເປກ຺ຂາຎາຓອນຸໂລມຎາຓານິປິ ຫິ ນິພ຺ພິທາຍ ສິຂາປ຺ປຕ຺ຕຕ຺ຕາ ນິພ຺ພິທາຊນນພ຺ຍາປາຣປ຺ປຫາເນນ ນິພ຺ພິທາປຏິປ຺ປສ຺ສທ຺ຘິຎາຓານິ ນາມ ໂຫນ຺ຕິ. ມຄ຺ຄຎາຓໍ ປນ ນິພ຺ພິທາປຏິປ຺ປສ຺ສທ຺ຘນ຺ເຕ ອຸປ຺ປຊ຺ຊນໂຕ ນິພ຺ພິທາປຏິປ຺ປສ຺ສທ຺ຘິຎາຓໍ ນາມ ໂຫຕີຕິ ອຕິວິຍ ຍຸຊ຺ຊຕີຕິ. ນິພ຺ພິທານຸໂລມຎາເຓສຸ ວິຍ ອາທິຠູຕໍ ມຸຎ຺ຈິຕຸກມ຺ຍຕາຎາຓໍ ອຄ຺ຄເຫຕ຺ວາ ‘‘ປຏິສງ຺ຂາ ສນ຺ຕິຏ຺ຐນາ’’ຕິ ອນ຺ເຕ ຎາຓທ຺ວຍຄ຺ຄຫຓໍ ມຄ຺ຄຎາຓສງ຺ຄຫຓຕ຺ຖໍ. ມຸຎ຺ຈິຕຸກມ຺ຍຕາຕິ ຫິ ວຸຕ຺ເຕ ອນຸໂລມຎາຓໍ ສງ຺ຄຍ຺ຫຕິ, ນ ມຄ຺ຄຎາຓໍ. ມຄ຺ຄຎາຓຎ຺ຫິ ມຸຎ຺ຈິຕຸກມ຺ຍຕາ ນາມ ນ ໂຫຕິ, ກິຈ຺ຈສິທ຺ຘິຍໍ ສນ຺ຕິຏ຺ຐນໂຕ ປນ ສນ຺ຕິຏ຺ຐນາ ນາມ ໂຫຕິ. ອຏ຺ຐກຖາຍມ຺ປິ ຈ ‘‘ຜຸສນາຕິ ອປ຺ປນາ’’ຕິ ວຸຕ຺ຕໍ. ອິທຎ຺ຈ ມຄ຺ຄຎາຓໍ ນິພ຺ພາເນ ອປ຺ປນາຕິ ກຕ຺ວາ ສນ຺ຕິຏ຺ຐນາ ນາມ ໂຫຕີຕິ ‘‘ສນ຺ຕິຏ຺ຐນາ’’ຕິວຈເນນ ມຄ຺ຄຎາຓມ຺ປິ ສງ຺ຄຍ຺ຫຕິ. ນິພ຺ພິທານຸໂລມຎາຓານິປິ ອຕ຺ຖໂຕ ນິພ຺ພິທາຎາຓາເນວ ໂຫນ຺ຕີຕິ ຕານິປິ ນິພ຺ພິທາຎາເຓຫິ ສງ຺ຄເຫຕ຺ວາ ນິພ຺ພິທາປຏິປ຺ປສ຺ສທ຺ຘິຎາຓານີຕິ ນິພ຺ພິທາຄຫຓເມວ ກຕໍ, ນ ນິພ຺ພິທານຸໂລມຄ຺ຄຫຓໍ. ຕີສຸປິ ເຈເຕສຸ ຎາຓຏ຺ຐກນິທ຺ເທເສສຸ ຈຕຸຕ຺ຖສ຺ສ ຘມ຺ມານຸປສ຺ສນາຈຕຸກ຺ກສ຺ສ ວເສນ ວຸຕ຺ຕານໍ ຈຕຸນ຺ນໍ ວຕ຺ຖູນໍ ເອເກກສ຺ມິໍ ອສ຺ສາສວເສນ ເອກໍ, ປສ຺ສາສວເສນ ເອກນ຺ຕິ ທ຺ເວ ທ຺ເວ ຎາຓານີຕິ ຈຕູສຸ ວຕ຺ຖູສຸ ອຏ຺ຐ ຎາຓານິ ໂຫນ຺ຕິ.

ວິມຸຕ຺ຕິສຸຂຎາຓນິທ຺ເທເສ ປຫີນຕ຺ຕາຕິ ປຫານໍ ທສ຺ເສຕ຺ວາ ຕສ຺ສ ປຫານສ຺ສ ສມຸຈ຺ເຉທປ຺ປຫານຕ຺ຕໍ ທສ຺ເສນ຺ໂຕ ສມຸຈ຺ຉິນ຺ນຕ຺ຕາຕິ ອາຫ. ວິມຸຕ຺ຕິສຸເຂ ຎາຓນ຺ຕິ ຜລວິມຸຕ຺ຕິສຸຂສມ຺ປຍຸຕ຺ຕຎາຓຎ຺ຈ ຜລວິມຸຕ຺ຕິສຸຂາຣມ຺ມຓປຈ຺ຈເວກ຺ຂຓຎາຓຎ຺ຈ. ອນຸສຍວຕ຺ຖຸສ຺ສ ກິເລສສ຺ສ ປຫາເນນ ປຣິຍຸຏ຺ຐານທຸຈ຺ຈຣິຕວຕ຺ຖຸປ຺ປຫານໍ ໂຫຕີຕິ ທສ຺ສນຕ຺ຖໍ ປຸນ ອນຸສຍານໍ ປຫານໍ ວຸຕ຺ຕໍ. ເອກວີສຕິຜລຎາຓໍ ສນ຺ຘາຍ ປຫີນກິເລສຄຓນາຍປິ ຎາຓຄຓນາ ກຕາ ໂຫຕິ, ປຈ຺ຈເວກ຺ຂຓຎາຓຎ຺ຈ ສນ຺ຘາຍ ປຫີນກິເລສປຈ຺ຈເວກ຺ຂຓຄຓນາຍ ຜລປຈ຺ຈເວກ຺ຂຓຎາຓຄຓນາ ກຕາ ໂຫຕີຕິ.

ຎາຓຣາສິຉກ຺ກນິທ຺ເທສວຓ຺ຓນາ ນິຏ຺ຐິຕາ.

ສທ຺ຘມ຺ມປ຺ປກາສິນິຍາ ປຏິສມ຺ຠິທາມຄ຺ຄຏ຺ຐກຖາຍ

ອານາປານສ຺ສຕິກຖາວຓ຺ຓນາ ນິຏ຺ຐິຕາ.