໒. ໂສຬສຎາຓນິທ຺ເທສວຓ຺ຓນາ

໑໕໓. ໂສຬສຫິ ອາກາເຣຫີຕິ ອຸຠຍປກ຺ຂວເສນ ວຸຕ຺ເຕຫິ ໂສຬສຫິ ຎາຓໂກຏ຺ຐາເສຫິ. ອຸທຸຈິຕໍ ຈິຕ຺ຕໍ ສມຸທຸຈິຕນ຺ຕິ ອຸປຈາຣຠູມິຍໍ ຈິຕ຺ຕໍ ອຸທ຺ຘໍ ອຸຈິຕໍ, ສມ຺ມາ ອຸທ຺ຘໍ ອຸຈິຕໍ, ອຸປຣູປຣິ ກຕປຣິຈຍໍ ສມ຺ມາ ອຸປຣູປຣິ ກຕປຣິຈຍນ຺ຕິ ອຕ຺ໂຖ. ອຸທຸຊິຕໍ ຈິຕ຺ຕໍ ສມຸທຸຊິຕນ຺ຕິປິ ປາໂຐ. ອຸປຣິຠາວາຍ ຊິຕໍ, ອຸປຣິຠາວກເຣຫິ ວາ ຎາເຓຫິ ຊິຕໍ ອຸທຸຊິຕໍ. ສມຸທຸຊິຕນ຺ຕິ ສມາ ອຸປຣິຠາວາຍ, ອຸປຣິຠາວກເຣຫິ ວາ ຎາເຓຫິ ຊິຕໍ. ສມາຕິ ເຈຕ຺ຖ ວິສມຠາວປຏິກ຺ເຂໂປ. ອິມສ຺ມິໍ ປາເຐ ອຸ, ທຸ-ອິຕິ ທ຺ເວ ທ຺ເວ ອຸປສຄ຺ຄາ ໂຫນ຺ຕິ. ອຸຣູຊິຕໍ ຈິຕ຺ຕໍ ສມ຺ມາຣູຊິຕນ຺ຕິປິ ປາໂຐ. ເອຕ຺ຖາປິ ຊິຕຕ຺ໂຖເຍວ. ອຸຣູ ອຣູຕິ ອິທໍ ປນ ນິປາຕມຕ຺ຕເມວາຕິ ວທນ຺ຕິ. ວີໂຓປມຏ຺ຐກຖາຍ ຕຊ຺ຊິຕໍ ສຸຕຊ຺ຊິຕນ຺ຕິ ຈ ອຕ຺ໂຖ ວຸຕ຺ໂຕ, ໂສ ອິຘ ນ ຍຸຊ຺ຊຕິ. ເອກຕ຺ເຕ ສນ຺ຕິຏ຺ຐຕີຕິ ອຸປຈາຣຠູມິຍໍ ຕາວ ນານາຣມ຺ມຓວິກ຺ເຂປາຠາເວນ ເອກຕ຺ເຕ ປຕິຏ຺ຐາຕິ. ນິຍ຺ຍານາວຣຓຏ຺ເຐນ ນີວຣຓາຕິ ເອຕ຺ຖ ອຣຕິປິ ສພ຺ເພປິ ອກຸສລາ ອາວຣຓຏ຺ເຐນ ນີວຣຓາຕິ ວຸຕ຺ຕາ. ນິຍ຺ຍານາວຣຓຏ຺ເຐນາຕິ ນິຍ຺ຍານານໍ ອາຄມນມຄ຺ຄປິທຫນຏ຺ເຐນ. ນິຍ຺ຍານວາຣຓຏ຺ເຐນາຕິປິ ປາໂຐ, ນິຍ຺ຍານານໍ ປຏິກ຺ເຂປນຏ຺ເຐນາຕິ ອຕ຺ໂຖ. ເນກ຺ຂມ຺ມໍ ອຣິຍານໍ ນິຍ຺ຍານນ຺ຕິ ມຄ຺ຄຏ຺ຐານໍ ອຣິຍານໍ ນິຍ຺ຍານສງ຺ຂາຕສ຺ສ ອຣິຍມຄ຺ຄສ຺ສ ເຫຕຸຕ຺ຕາ ຜລູປຈາເຣນ ອຣິຍານໍ ນິຍ຺ຍານໍ. ເຕນ ຈ ເຫຕຸຠູເຕນ ມຄ຺ຄກ຺ຂເຓ ອຣິຍາ ນິຍ຺ຍນ຺ຕິ ນິຄຈ຺ຉນ຺ຕິ. ເກຈິ ປນ ‘‘ນິຍ຺ຍານນ຺ຕິ ມຄ຺ໂຄ’’ຕິ ວທນ຺ຕິ. ອິຘ ອຸປຈາຣສ຺ສ ອຘິປ຺ເປຕຕ຺ຕາ ມຄ຺ຄກ຺ຂເຓ ຈ ອາໂລກສຎ຺ຎາຍ ສພ຺ພກຸສລຘມ຺ມານຎ຺ຈ ອຠາວາ ຕໍ ນ ຍຸຊ຺ຊຕິ. ນິວຸຕຕ຺ຕາຕິ ປຏິຈ຺ຉນ຺ນຕ຺ຕາ. ນປ຺ປຊານາຕີຕິ ປຸຄ຺ຄລວເສນ ວຸຕ຺ຕໍ.

ວິສຸທ຺ຘຈິຕ຺ຕສ຺ສາຕິ ອຸປຈາຣຠູມິຍໍເຍວ. ຂຓິກສໂມຘານາຕິ ຈິຕ຺ຕກ຺ຂເຓ ຈິຕ຺ຕກ຺ຂເຓ ອຸປ຺ປຊ຺ຊນໂຕ ຂໂຓ ເອເຕສໍ ອຕ຺ຖີຕິ ຂຓິກາ, ອຸປກ຺ກິເລສາ, ຂຓິການໍ ສໂມຘາໂນ ສມາຄໂມ ປພນ຺ໂຘ ຂຓິກສໂມຘາໂນ. ຕສ຺ມາ ຂຓິກສໂມຘານາ, ອຸປ຺ປຊ຺ຊມານາ ອຸປກ຺ກິເລສາ ຂຓິກປ຺ປພນ຺ຘວເສນ ຂຓິກປຣມ຺ປຣາວເສນ ອຸປ຺ປຊ຺ຊນ຺ຕິ, ນ ເອກຈິຕ຺ຕກ຺ຂຓວເສນາຕິ ວຸຕ຺ຕໍ ໂຫຕິ.

ໂສຬສຎາຓນິທ຺ເທສວຓ຺ຓນາ ນິຏ຺ຐິຕາ.