໓. ມິຈ຺ຉາທິຏ຺ຐິນິທ຺ເທສວຓ຺ຓນາ

໑໓໖. ມິຈ຺ຉາທິຏ຺ຐິ ເຫຏ຺ຐາ ວຸຕ຺ຕຕ຺ຖາເຍວ. ອຍໍ ປນ ອປໂຣ ນໂຍ – ນຕ຺ຖິ ທິນ຺ນນ຺ຕິ ອຸຈ຺ເຉທທິຏ຺ຐິກຕ຺ຕາ ທານຜລໍ ປຏິກ຺ຂິປຕິ. ນຕ຺ຖິ ຍິຏ຺ຐນ຺ຕິ ເອຕ຺ຖ ຍິຏ຺ຐນ຺ຕິ ຂຸທ຺ທກຍຎ຺ໂຎ. ຫຸຕນ຺ຕິ ມຫາຍຎ຺ໂຎ. ທ຺ວິນ຺ນມ຺ປິ ຜລໍ ປຏິກ຺ຂິປຕິ. ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກຕິ ທານຜລສ຺ສ ປຏິກ຺ຂິຕ຺ຕຕ຺ຕາ ສີລາທີນໍ ປຸຎ຺ຎກມ຺ມານໍ, ປາຓາຕິປາຕາທີນໍ ປາປກມ຺ມານໍ ຜລໍ ປຏິກ຺ຂິປຕິ. ນຕ຺ຖິ ອຍໍ ໂລໂກຕິ ປຸເຣ ກເຕນ ກມ຺ມຸນາ. ນຕ຺ຖິ ປໂຣ ໂລໂກຕິ ອິຘ ກເຕນ ກມ຺ມຸນາ. ນຕ຺ຖິ ມາຕາ, ນຕ຺ຖິ ປິຕາຕິ ເຕສຸ ກຕກມ຺ມານໍ ຜລໍ ປຏິກ຺ຂິປຕິ. ນຕ຺ຖິ ສຕ຺ຕາ ໂອປປາຕິກາຕິ ກມ຺ມເຫຕຸກໍ ອຸປປຕ຺ຕິໍ ປຏິກ຺ຂິປຕິ. ນຕ຺ຖິ ໂລເກ ສມຓພ຺ຣາຫ຺ມຓາ…ເປ… ປເວເທນ຺ຕີຕິ ອິຘໂລກປຣໂລເກ ປສ຺ສິຕຸໍ ອຠິຎ຺ຎາປຏິລາຠາຍ ປຏິປທໍ ປຏິກ຺ຂິປຕິ. ອິຘ ປາຬິຍໍ ປນ ນຕ຺ຖິ ທິນ຺ນນ຺ຕິ ວຕ຺ຖູຕິ ນຕ຺ຖິ ທິນ຺ນນ຺ຕິ ວຸຈ຺ຈມານໍ ທານໍ, ຕສ຺ສາ ທິຏ຺ຐິຍາ ວຕ຺ຖູຕິ ອຕ຺ໂຖ. ເອວໍວາໂທ ມິຈ຺ຉາຕິ ເອວໍ ນຕ຺ຖິ ທິນ຺ນນ຺ຕິ ວາໂທ ວຈນໍ ມິຈ຺ຉາ ວິປຣີໂຕຕິ ອຕ຺ໂຖ.

ມິຈ຺ຉາທິຏ຺ຐິນິທ຺ເທສວຓ຺ຓນາ ນິຏ຺ຐິຕາ.