໑໔. ໂລກວາທປຏິສໍຍຸຕ຺ຕທິຏ຺ຐິນິທ຺ເທສວຓ຺ຓນາ

໑໔໗. ອຕ຺ຕາ ຈ ໂລໂກ ຈາຕິ ໂສ ເອວ ອຕ຺ຕາ ຈ ອາໂລກນຏ຺ເຐນ ໂລໂກ ຈາຕິ ອຕ຺ໂຖ. ສສ຺ສໂຕຕິ ສສ຺ສຕວາທານໍ ທິຏ຺ຐິ. ອສສ຺ສໂຕຕິ ອຸຈ຺ເຉທວາທານໍ. ສສ຺ສໂຕ ຈ ອສສ຺ສໂຕ ຈາຕິ ເອກຈ຺ຈສສ຺ສຕິການໍ. ເນວ ສສ຺ສໂຕ ນາສສ຺ສໂຕຕິ ອມຣາວິກ຺ເຂປິການໍ. ອນ຺ຕວາຕິ ປຣິຕ຺ຕກສິຓລາຠີນໍ ຕກ຺ກິການຎ຺ຈ ນິຄຓ຺ຐາຊີວິການຎ຺ຈ. ອຖ ວາ ອຸຈ຺ເຉທວາທິໂນ ‘‘ສຕ຺ໂຕ ຊາຕິຍາ ປຸພ຺ພນ຺ຕວາ, ມຣເຓນ ອປຣນ຺ຕວາ’’ຕິ ວທນ຺ຕິ. ອຘິຈ຺ຈສມຸປ຺ປນ຺ນິກາ ‘‘ສຕ຺ໂຕ ຊາຕິຍາ ປຸພ຺ພນ຺ຕວາ’’ຕິ ວທນ຺ຕິ. ອນນ຺ຕວາຕິ ອປ຺ປມາຓກສິຓລາຠີນໍ. ສສ຺ສຕວາທິໂນ ປນ ‘‘ປຸພ຺ພນ຺ຕາປຣນ຺ຕາ ນຕ຺ຖິ, ເຕນ ອນນ຺ຕວາ’’ຕິ ວທນ຺ຕິ. ອຘິຈ຺ຈສມຸປ຺ປນ຺ນິກາ ‘‘ອປຣນ຺ເຕນ ອນນ຺ຕວາ’’ຕິ ວທນ຺ຕິ.

ອນ຺ຕວາ ຈ ອນນ຺ຕວາ ຈາຕິ ອຸທ຺ຘມໂຘ ອວຑ຺ຒິຕ຺ວາ ຕິຣິຍໍ ວຑ຺ຒິຕກສິຓານໍ. ເນວ ອນ຺ຕວາ ນ ອນນ຺ຕວາຕິ ອມຣາວິກ຺ເຂປິການໍ.

ໂລກວາທປຏິສໍຍຸຕ຺ຕທິຏ຺ຐິນິທ຺ເທສວຓ຺ຓນາ ນິຏ຺ຐິຕາ.