໕໑. ໂສຕຘາຕຸວິສຸທ຺ຘິຎາຓນິທ຺ເທສວຓ຺ຓນາ

໑໐໓. ໂສຕຘາຕຸວິສຸທ຺ຘິຎາຓນິທ຺ເທເສ ທູເຣປິ ສທ຺ທານນ຺ຕິອາທິ ທິພ຺ພໂສຕໍ ອຸປ຺ປາເທຕຸກາມສ຺ສ ອາທິກມ຺ມິກສ຺ສ ຠິກ຺ຂຸໂນ ອຸປາຍສນ຺ທສ຺ສນຕ຺ຖໍ ວຸຕ຺ຕໍ. ຕຕ຺ຖ ທູເຣປິ ສທ຺ທານໍ ສທ຺ທນິມິຕ຺ຕນ຺ຕິ ທູເຣ ສທ຺ທານໍ ອນ຺ຕເຣ ສທ຺ທໍ. ສທ຺ໂທເຍວ ຫິ ນິມິຕ຺ຕກຣຓວເສນ ສທ຺ທນິມິຕ຺ຕໍ. ‘‘ທູເຣ’’ຕິ ວຸຕ຺ເຕປິ ປກຕິໂສຕສ຺ສ ອາປາຖຏ຺ຐາເນເຍວ. ໂອຬາຣິການນ຺ຕິ ຖູລານໍ. ສຸຂຸມານນ຺ຕິ ອຓູນໍ. ສຓ຺ຫສຓ຺ຫານນ຺ຕິ ສຓ຺ຫໂຕປິ ສຓ຺ຫານໍ, ອຕິສຓ຺ຫານນ຺ຕິ ອຕ຺ໂຖ. ເອເຕນ ປຣມສຸຂຸມາ ສທ຺ທາ ວຸຕ຺ຕາ ໂຫນ຺ຕິ. ອິມໍ ຎາຓໍ ອຸປ຺ປາເທຕຸກາເມນ ອາທິກມ຺ມິເກນ ຌາຍິນາ ອຠິຎ຺ຎາປາທກຊ຺ຌານໍ ສມາປຊ຺ຊິຕ຺ວາ ວຸຏ຺ຐາຍ ປຣິກມ຺ມສມາຘິຈິຕ຺ເຕນ ປຐມຕຣໍ ປກຕິໂສຕປເຖ ທູເຣ ໂອຬາຣິໂກ ອຣຎ຺ເຎ ສີຫາທີນໍ ສທ຺ໂທ ອາວຊ຺ຊິຕພ຺ໂພ. ວິຫາເຣ ຆຓ຺ຑິສທ຺ໂທ ເຠຣິສທ຺ໂທ ສງ຺ຂສທ຺ໂທ ສາມເຓຣທຫຣຠິກ຺ຂູນໍ ສພ຺ພຖາເມນ ສຊ຺ຌາຍນ຺ຕານໍ ສຊ຺ຌາຍນສທ຺ໂທ ປກຕິກຖໍ ກເຖນ຺ຕານໍ ‘‘ກິໍ, ຠນ຺ເຕ, ກິໍ, ອາວຸໂສ’’ຕິອາທິສທ຺ໂທ ສກຸຓສທ຺ໂທ ວາຕສທ຺ໂທ ປທສທ຺ໂທ ປກ຺ກຸຖິຕອຸທກສ຺ສ ຈິຈ຺ຈິຏາຍນສທ຺ໂທ ອາຕເປ ສຸສ຺ສມານຕາລປຓ຺ຓສທ຺ໂທ ກຸນ຺ຖກິປິລ຺ລິກາທິສທ຺ໂທຕິ ເອວໍ ສພ຺ໂພຬາຣິກໂຕ ປຠຸຕິ ຍຖາກ຺ກເມນ ສຸຂຸມສຸຂຸມສທ຺ທາ ອາວຊ຺ຊິຕພ຺ພາ.

ເອວໍ ກໂຣນ຺ເຕນ ຈ ປຸຣຕ຺ຖິມາທີສຸ ທສສຸ ທິສາສຸ ກເມນ ເອເກກິສ຺ສາ ທິສາຍ ສທ຺ທນິມິຕ຺ຕໍ ວຸຕ຺ຕນເຍນ ມນສິ ກາຕພ຺ພໍ. ມນສິ ກໂຣນ຺ເຕນ ຈ ເຍ ສທ຺ທາ ປກຕິໂສຕສ຺ສ ສຸຍ຺ຍນ຺ຕິ, ເຕສຸ ປກຕິໂສຕໂມຘາຍ ມໂນທ຺ວາຣິເກນ ຈິຕ຺ເຕນ ມນສິ ກາຕພ຺ພໍ. ຕສ຺ສ ເຕ ສທ຺ທາ ປກຕິຈິຕ຺ຕສ຺ສາປິ ປາກຏາ ໂຫນ຺ຕິ, ປຣິກມ຺ມສມາຘິຈິຕ຺ຕສ຺ສ ປນ ອຕິວິຍ ປາກຏາ ໂຫນ຺ຕິ. ຕສ຺ເສວໍ ສທ຺ທນິມິຕ຺ຕໍ ມນສິກໂຣໂຕ ອິທານິ ທິພ຺ພໂສຕຘາຕຸ ອຸປ຺ປຊ຺ຊິສ຺ສຕີຕິ ເຕສຸ ສທ຺ເທສຸ ອຎ຺ຎຕຣໍ ອາຣມ຺ມຓໍ ກຕ຺ວາ ມໂນທ຺ວາຣາວຊ຺ຊນໍ ອຸປ຺ປຊ຺ຊຕິ, ຕສ຺ມິໍ ນິຣຸທ຺ເຘ ຈຕ຺ຕາຣິ ປຎ຺ຈ ວາ ຊວນານິ ຊວນ຺ຕິ. ເຍສໍ ປຸຣິມານິ ຕີຓິ ຈຕ຺ຕາຣິ ວາ ປຣິກມ຺ໂມປຈາຣານຸໂລມໂຄຕ຺ຣຠຸນາມການິ ກາມາວຈຣານິ, ຈຕຸຕ຺ຖໍ ປຎ຺ຈມໍ ວາ ອປ຺ປນາຈິຕ຺ຕໍ ຣູປາວຈຣຈຕຸຕ຺ຖຊ຺ຌານິກໍ. ຕຕ຺ຖ ຍໍ ເຕນ ອປ຺ປນາຈິຕ຺ເຕນ ສທ຺ຘິໍ ອຸປ຺ປນ຺ນໍ ຎາຓໍ, ອຍໍ ທິພ຺ພໂສຕຘາຕຸ. ຕໍ ຖາມຄຕໍ ກໂຣນ຺ເຕນ ‘‘ເອຕ຺ຖນ຺ຕເຣ ສທ຺ທໍ ສຸຓາມີ’’ຕິ ເອກງ຺ຄຸລມຕ຺ຕໍ ປຣິຈ຺ຉິນ຺ທິຕ຺ວາ ວຑ຺ເຒຕພ຺ພໍ, ຕໂຕ ທ຺ວງ຺ຄຸລຈຕຸຣງ຺ຄຸລອຏ຺ຐງ຺ຄຸລວິທຕ຺ຖິຣຕນອນ຺ໂຕຄພ຺ຠປມຸຂ- ປາສາທປຣິເວຓສງ຺ຆາຣາມໂຄຈຣຄາມຊນປທາທິວເສນ ຍາວ ຈກ຺ກວາຬໍ, ຕໂຕ ວາ ຠິຍ຺ໂຍປິ ປຣິຈ຺ຉິນ຺ທິຕ຺ວາ ປຣິຈ຺ຉິນ຺ທິຕ຺ວາ ວຑ຺ເຒຕພ຺ພໍ. ເອວໍ ອຘິຄຕາຠິຎ຺ໂຎ ເອສ ປາທກຊ຺ຌານາຣມ຺ມເຓນ ຜຸຏ຺ໂຐກາສພ຺ຠນ຺ຕຣຄເຕ ສທ຺ເທ ປຸນ ປາທກຊ຺ຌານໍ ອສມາປຊ຺ຊິຕ຺ວາປິ ອຠິຎ຺ຎາຎາເຓນ ສຸຓາຕິເຍວ. ເອວໍ ສຸຓນ຺ໂຕ ຈ ສເຈປິ ຍາວພ຺ຣຫ຺ມໂລກາ ສງ຺ຂເຠຣິປຓວາທິສທ຺ເທຫິ ເອກໂກລາຫລໍ ໂຫຕິ, ປາຏິເຍກ຺ກໍ ວວຕ຺ຖາເປຕຸກາມຕາຍ ສຕິ ‘‘ອຍໍ ສງ຺ຂສທ຺ໂທ, ອຍໍ ເຠຣິສທ຺ໂທ’’ຕິ ວວຕ຺ຖາເປຕຸໍ ສກ຺ໂກຕິເຍວ. ອຠິຎ຺ຎາຎາເຓນ ສຸເຕ ສາຕ຺ຖເກ ສທ຺ເທ ປຈ຺ຉາ ກາມາວຈຣຈິຕ຺ເຕນ ອຕ຺ຖໍ ຊານາຕິ. ທິພ຺ພໂສຕໍ ປກຕິໂສຕວໂຕເຍວ ອຸປ຺ປຊ຺ຊຕິ, ໂນ ພຘິຣສ຺ສ. ປຈ຺ຉາ ປກຕິໂສເຕ ວິນຏ຺ເຐປິ ທິພ຺ພໂສຕໍ ນ ວິນສ຺ສຕີຕິ ວທນ຺ຕິ.

ໂສ ທິພ຺ພາຍ ໂສຕຘາຕຸຍາຕິ ເອຕ຺ຖ ທິພ຺ພສທິສຕ຺ຕາ ທິພ຺ພາ. ເທວານຎ຺ຫິ ສຸຈຣິຕກມ຺ມາຠິນິພ຺ພຕ຺ຕາ ປິຕ຺ຕເສມ຺ຫຣຸຘິຣາທີຫິ ອປລິພຸທ຺ຘາ ອຸປກ຺ກິເລສວິມຸຕ຺ຕຕາຍ ທູເຣປິ ອາຣມ຺ມຓສມ຺ປຏິຈ຺ຉນສມຕ຺ຖາ ທິພ຺ພາ ປສາທໂສຕຘາຕຸ ໂຫຕິ. ອຍຎ຺ຈາປິ ອິມສ຺ສ ຠິກ຺ຂຸໂນ ວີຣິຍຠາວນາພລນິພ຺ພຕ຺ຕາ ຎາຓໂສຕຘາຕຸ ຕາທິສາເຍວາຕິ ທິພ຺ພສທິສຕ຺ຕາ ທິພ຺ພາ. ອປິຈ ທິພ຺ພວິຫາຣວເສນ ປຏິລທ຺ຘຕ຺ຕາ, ອຕ຺ຕນາ ຈ ທິພ຺ພວິຫາຣສນ຺ນິສ຺ສິຕຕ຺ຕາປິ ທິພ຺ພາ, ສວນຏ຺ເຐນ ນິຊ຺ຊີວຏ຺ເຐນ ຈ ໂສຕຘາຕຸ, ໂສຕຘາຕຸກິຈ຺ຈກຣເຓນ ຈ ໂສຕຘາຕຸ ວິຍາຕິປິ ໂສຕຘາຕຸ. ຕາຍ ທິພ຺ພາຍ ໂສຕຘາຕຸຍາ. ວິສຸທ຺ຘາຍາຕິ ປຣິສຸທ຺ຘາຍ ນິຣຸປກ຺ກິເລສາຍ. ອຕິກ຺ກນ຺ຕມານຸສິກາຍາຕິ ມນຸສ຺ສູປຈາຣໍ ອຕິກ຺ກມິຕ຺ວາ ສທ຺ທສວເນນ ມານຸສິກໍ ມໍສໂສຕຘາຕຸໍ ອຕິກ຺ກນ຺ຕາຍ ວີຕິວຕ຺ຕິຕ຺ວາ ຐິຕາຍ. ອຸໂຠ ສທ຺ເທ ສຸຓາຕີຕິ ທ຺ເວ ສທ຺ເທ ສຸຓາຕິ. ກຕເມ ທ຺ເວ? ທິພ຺ເພ ຈ ມານຸເສ ຈ, ເທວານຎ຺ຈ ມນຸສ຺ສານຎ຺ຈ ສທ຺ເທຕິ ວຸຕ຺ຕໍ ໂຫຕິ. ເອເຕນ ປເທສປຣິຍາທານໍ ເວທິຕພ຺ພໍ. ເຍ ທູເຣ ສນ຺ຕິເກ ຈາຕິ ເຍ ສທ຺ທາ ທູເຣ ປຣຈກ຺ກວາເຬປິ, ເຍ ຈ ສນ຺ຕິເກ ອນ຺ຕມໂສ ສເທຫສນ຺ນິສ຺ສິຕປາຓກສທ຺ທາປິ, ເຕ ສຸຓາຕີຕິ ວຸຕ຺ຕໍ ໂຫຕິ. ເອເຕນ ນິປ຺ປເທສປຣິຍາທານໍ ເວທິຕພ຺ພນ຺ຕິ.

ໂສຕຘາຕຸວິສຸທ຺ຘິຎາຓນິທ຺ເທສວຓ຺ຓນາ ນິຏ຺ຐິຕາ.