໕໒. ເຈໂຕປຣິຍຎາຓນິທ຺ເທສວຓ຺ຓນາ

໑໐໔. ເຈໂຕປຣິຍຎາຓນິທ຺ເທເສ ໂສ ເອວໍ ປຊານາຕີຕິ ອິທານິ ວຕ຺ຕພ຺ພໍ ວິຘານໍ ອຸປທິສຕິ. ອິທໍ ຣູປໍ ໂສມນສ຺ສິນ຺ທ຺ຣິຍສມຸຏ຺ຐິຕນ຺ຕິອາທິ ອາທິກມ຺ມິເກນ ຌາຍິນາ ປຏິປຊ຺ຊິຕພ຺ພໍ ວິຘານໍ. ກຖໍ? ເອຕຎ຺ຫິ ຎາຓໍ ອຸປ຺ປາເທຕຸກາເມນ ຌາຍິນາ ປຐມໍ ຕາວ ທິພ຺ພຈກ຺ຂຸຎາຓໍ ອຸປ຺ປາເທຕພ຺ພໍ. ເອຕຎ຺ຫິ ທິພ຺ພຈກ຺ຂຸວເສນ ອິຊ຺ຌຕິ, ຕໍ ເອຕສ຺ສ ປຣິກມ຺ມໍ. ຕສ຺ມາ ເຕນ ຠິກ຺ຂຸນາ ອາໂລກໍ ວຑ຺ເຒຕ຺ວາ ທິພ຺ເພນ ຈກ຺ຂຸນາ ປຣສ຺ສ ຫທຍຣູປໍ ນິສ຺ສາຍ ວຕ຺ຕມານສ຺ສ ໂລຫິຕສ຺ສ ວຓ຺ຓໍ ປສ຺ສິຕ຺ວາ ປສ຺ສິຕ຺ວາ ຈິຕ຺ຕໍ ປຣິເຍສິຕພ຺ພໍ. ຕຎ຺ຫິ ໂລຫິຕໍ ກຸສລໂສມນສ຺ເສ ວຕ຺ຕມາເນ ຣຕ຺ຕໍ ໂຫຕິ ນິຄ຺ໂຣຘປກ຺ກວຓ຺ຓໍ, ອກຸສລໂສມນສ຺ເສ ວຕ຺ຕມາເນ ຕເທວ ລຸຬິຕໍ ໂຫຕິ, ໂທມນສ຺ເສ ວຕ຺ຕມາເນ ກາຬກໍ ໂຫຕິ ຊມ຺ພຸປກ຺ກວຓ຺ຓໍ ລຸຬິຕໍ. ກຸສລູເປກ຺ຂາຍ ວຕ຺ຕມານາຍ ປສນ຺ນໍ ໂຫຕິ ຕິລເຕລວຓ຺ຓໍ. ອກຸສລູເປກ຺ຂາຍ ວຕ຺ຕມານາຍ ຕເທວ ລຸຬິຕໍ ໂຫຕິ. ຕສ຺ມາ ເຕນ ‘‘ອິທໍ ຣູປໍ ໂສມນສ຺ສິນ຺ທ຺ຣິຍສມຸຏ຺ຐິຕໍ, ອິທໍ ຣູປໍ ໂທມນສ຺ສິນ຺ທ຺ຣິຍສມຸຏ຺ຐິຕໍ, ອິທໍ ຣູປໍ ອຸເປກ຺ຂິນ຺ທ຺ຣິຍສມຸຏ຺ຐິຕ’’ນ຺ຕິ ປຣສ຺ສ ຫທຍໂລຫິຕວຓ຺ຓໍ ປສ຺ສິຕ຺ວາ ປສ຺ສິຕ຺ວາ ຈິຕ຺ຕໍ ປຣິເຍສນ຺ເຕນ ເຈໂຕປຣິຍຎາຓໍ ຖາມຄຕໍ ກາຕພ຺ພໍ. ເອວໍ ຖາມຄເຕ ຫິ ຕສ຺ມິໍ ອນຸກ຺ກເມນ ສພ຺ພມ຺ປິ ກາມາວຈຣາທິເຠທໍ ຈິຕ຺ຕໍ ປຊານາຕິ ຈິຕ຺ຕາ ຈິຕ຺ຕເມວ ສງ຺ກມນ຺ໂຕ ວິນາ ຫທຍຣູປທສ຺ສເນນ. ວຸຕ຺ຕມ຺ປິ ເຈຕໍ ອຏ຺ຐກຖາຍໍ –

‘‘ອາຣຸປ຺ເປ ປຣສ຺ສ ຈິຕ຺ຕໍ ຊານິຕຸກາໂມ ກສ຺ສ ຫທຍຣູປໍ ປສ຺ສຕິ, ກສ຺ສິນ຺ທ຺ຣິຍວິກາຣໍ ໂອໂລເກຕີຕິ? ນ ກສ຺ສຈິ. ອິທ຺ຘິມໂຕ ວິສໂຍ ເອສ, ຍທິທໍ ຍຕ຺ຖ ກຕ຺ຖຈິ ຈິຕ຺ຕໍ ອາວຊ຺ຊນ຺ໂຕ ໂສຬສປ຺ປເຠທໍ ຈິຕ຺ຕໍ ຊານາຕິ. ອກຕາຠິນິເວສສ຺ສ ປນ ວເສນ ອຍໍ ກຖາ’’ຕິ (ວິສຸທ຺ຘິ. ໒.໔໐໑).

ປຣສຕ຺ຕານນ຺ຕິ ອຕ຺ຕານໍ ຐເປຕ຺ວາ ເສສສຕ຺ຕານໍ. ປຣປຸຄ຺ຄລານນ຺ຕິ ອິທມ຺ປິ ອິມິນາ ເອກຕ຺ຖເມວ, ເວເນຍ຺ຍວເສນ ປນ ເທສນາວິລາເສນ ຈ ພ຺ຍຎ຺ຊເນນ ນານຕ຺ຕໍ ກຕໍ. ເຈຕສາ ເຈໂຕ ປຣິຈ຺ຈ ປຊານາຕີຕິ ອຕ຺ຕໂນ ຈິຕ຺ເຕນ ເຕສໍ ຈິຕ຺ຕໍ ປຣິຈ຺ຉິນ຺ທິຕ຺ວາ ສຣາຄາທິວເສນ ນານປ຺ປກາຣໂຕ ຊານາຕິ. ສຣາຄໍ ວາຕິອາທີສຸ ວາ-ສທ຺ໂທ ສມຸຈ຺ຈຍຕ຺ໂຖ. ຕຕ຺ຖ ອຏ຺ຐວິຘໍ ໂລຠສຫຄຕຈິຕ຺ຕໍ ສຣາຄໍ ຈິຕ຺ຕໍ ນາມ, ອວເສສໍ ຈຕຸຠູມກກຸສລາພ຺ຍາກຕຈິຕ຺ຕໍ ວີຕຣາຄໍ ນາມ. ທ຺ເວ ໂທມນສ຺ສຈິຕ຺ຕານິ, ທ຺ເວ ວິຈິກິຈ຺ຉາອຸທ຺ຘຈ຺ຈຈິຕ຺ຕານີຕິ ອິມານິ ປນ ຈຕ຺ຕາຣິ ຈິຕ຺ຕານິ ອິມສ຺ມິໍ ທຸເກ ສງ຺ຄຫໍ ນ ຄຈ຺ຉນ຺ຕິ. ເກຈິ ປນ ເຖຣາ ຕານິປິ ວີຕຣາຄປເທນ ສງ຺ຄຓ຺ຫນ຺ຕິ. ທຸວິຘໍ ປນ ໂທມນສ຺ສສຫຄຕໍ ຈິຕ຺ຕໍ ສໂທສໍ ຈິຕ຺ຕໍ ນາມ, ສພ຺ພມ຺ປິ ຈຕຸຠູມກໍ ກຸສລາພ຺ຍາກຕໍ ວີຕໂທສໍ ນາມ. ເສສານິ ທສ ອກຸສລຈິຕ຺ຕານິ ອິມສ຺ມິໍ ທຸເກ ສງ຺ຄຫໍ ນ ຄຈ຺ຉນ຺ຕິ. ເກຈິ ປນ ເຖຣາ ຕານິປິ ວີຕໂທສປເທນ ສງ຺ຄຓ຺ຫນ຺ຕິ. ສໂມຫໍ ວີຕໂມຫນ຺ຕິ ເອຕ຺ຖ ປນ ໂມເຫກເຫຕຸກວເສນ ວິຈິກິຈ຺ຉາອຸທ຺ຘຈ຺ຈສຫຄຕທ຺ວຍເມວ ສໂມຫໍ. ໂມຫສ຺ສ ປນ ສພ຺ພາກຸສເລສຸ ສມ຺ຠວໂຕ ທ຺ວາທສວິຘມ຺ປິ ອກຸສລໍ ຈິຕ຺ຕໍ ‘‘ສໂມຫ’’ນ຺ຕິ ເວທິຕພ຺ພໍ. ອວເສສໍ ກຸສລາພ຺ຍາກຕໍ ວີຕໂມຫໍ. ຖິນມິທ຺ຘານຸຄຕໍ ປນ ສໍຂິຕ຺ຕໍ, ອຸທ຺ຘຈ຺ຈານຸຄຕໍ ວິກ຺ຂິຕ຺ຕໍ. ຣູປາວຈຣາຣູປາວຈຣໍ ມຫຄ຺ຄຕໍ, ອວເສສໍ ອມຫຄ຺ຄຕໍ. ສພ຺ພມ຺ປິ ເຕຠູມກໍ ສອຸຕ຺ຕຣໍ, ໂລກຸຕ຺ຕຣໍ ອນຸຕ຺ຕຣໍ. ອຸປຈາຣປ຺ປຕ຺ຕໍ ອປ຺ປນາປ຺ປຕ຺ຕຎ຺ຈ ສມາຫິຕໍ, ຕທຸຠຍມສມ຺ປຕ຺ຕໍ ອສມາຫິຕໍ. ຕທງ຺ຄວິກ຺ຂມ຺ຠນສມຸຈ຺ເຉທປຏິປ຺ປສ຺ສທ຺ຘິນິສ຺ສຣຓວິມຸຕ຺ຕິປ຺ປຕ຺ຕໍ ວິມຸຕ຺ຕໍ, ປຎ຺ຈວິຘມ຺ປິ ເອຕໍ ວິມຸຕ຺ຕິມປ຺ປຕ຺ຕໍ ອວິມຸຕ຺ຕນ຺ຕິ ເວທິຕພ຺ພໍ. ອິຕິ ເຈໂຕປຣິຍຎາຓລາຠີ ຠິກ຺ຂຸ ໂສຬສປ຺ປເຠທມ຺ປິ ຈິຕ຺ຕໍ ປຊານາຕິ. ປຸຖຸຊ຺ຊນາ ປນ ອຣິຍານໍ ມຄ຺ຄຜລຈິຕ຺ຕໍ ນ ຊານນ຺ຕິ, ອຣິຍາປິ ຈ ເຫຏ຺ຐິມາ ເຫຏ຺ຐິມາ ອຸປຣິມານໍ ອຸປຣິມານໍ ມຄ຺ຄຜລຈິຕ຺ຕໍ ນ ຊານນ຺ຕິ, ອຸປຣິມາ ອຸປຣິມາ ປນ ເຫຏ຺ຐິມານໍ ເຫຏ຺ຐິມານໍ ຈິຕ຺ຕໍ ຊານນ຺ຕີຕິ.

ເຈໂຕປຣິຍຎາຓນິທ຺ເທສວຓ຺ຓນາ ນິຏ຺ຐິຕາ.