໓໙. ອຕ຺ຖສນ຺ທສ຺ສນຎາຓນິທ຺ເທສວຓ຺ຓນາ

໙໐. ອຕ຺ຖສນ຺ທສ຺ສນຎາຓນິທ຺ເທເສ ປຎ຺ຈກ຺ຂນ຺ຘາຕິອາທີນິ ວຸຕ຺ຕຕ຺ຖາເນວ. ປກາເສຕີຕິ ປາກຏໍ ກໂຣຕິ, ໂສຕູນໍ ຎາຓຈກ຺ຂຸນາ ທສ຺ສນໍ ສມ຺ປາເທຕີຕິ ອຕ຺ໂຖ. ນານາຘມ຺ມາຕິ ໂລກິຍໂລກຸຕ຺ຕຣາ ສພ຺ພຘມ຺ມາ ວຸຕ຺ຕາ. ກສ຺ມາ ປກາສນານິທ຺ເທເສ ໂລກິຍາ ເອວ ວຸຕ຺ຕາຕິ ເຈ? ອນິຈ຺ຈາທິວເສນ ປກາສນາຍ ອາຣທ຺ຘຕ຺ຕາ. ໂລກຸຕ຺ຕຣານຎ຺ຈ ອສມ຺ມສນູປຄຕ຺ຕາ ໂລກຸຕ຺ຕຣາ ນ ວຸຕ຺ຕາ. ນານາຘມ຺ມນິທ຺ເທເສນ ປນ ອຕ຺ຖສນ຺ທສ຺ສນນິທ຺ເທເສນ ຈ ເຕສໍ ສງ຺ຄຫິຕຕ຺ຕາ ຍຖາ ເຕ ປກາເສຕພ຺ພາ, ຕຖາ ປກາສນາ ປກາສນາເຍວ. ປຊຫນ຺ໂຕຕິ ໂສຕາຣໍ ປຊຫາເປນ຺ໂຕຕິ ອຕ຺ໂຖ. ສນ຺ທສ຺ເສຕີຕິ ໂສຕູນໍ ສມ຺ມາ ທສ຺ເສຕິ. ເກຈິ ປນ ‘‘ກາມຈ຺ຉນ຺ທສ຺ສ ປຫີນຕ຺ຕາ ເນກ຺ຂມ຺ມຕ຺ຖໍ ສນ຺ທສ຺ເສຕີ’’ຕິອາທິນາ ນເຍນ ປຐນ຺ຕິ. ເຕສໍ ອຸຊຸກເມວ ໂສຕູນໍ ໂທສປ຺ປຫາເນ ຄຸຓປຏິລາເຠ ຈ ກເຕ ສິຂາປ຺ປຕ຺ຕໍ ເທສນາຎາຓໍ ໂຫຕີຕິ ທສ຺ສນຕ຺ຖໍ ອຍໍ ນໂຍ ວຸຕ຺ໂຕຕິ ເວທິຕພ຺ໂພ.

ອຕ຺ຖສນ຺ທສ຺ສນຎາຓນິທ຺ເທສວຓ຺ຓນາ ນິຏ຺ຐິຕາ.